يَحْيَى 5 - أَتَّوْرَتْ دَ أَنَّبَاوَا

عِيسَىٰ يَوَرْكَرْ دَ غُرْغُ عَتَڢْكِنْ بٜىٰتَسْدَ

¹ بَايَنْ وَنَّنْ، عِيسَىٰ يَتَڢِے عُرُوشَلِيمَ دُواْمِنْ وَنِ بِكٍ يَهُودَاوَا؞

² أَ عُرُوشَلِيمَ كُوَ أَݣَويْ وَنِ تَڢْكِنْ ضُوَ وَنْدَ عَكٜىٰ كٜىٰوَيٜىٰشِ دَ رُمْڢُنَ غُدَا بِيَرْ؞ دَ يَهُودَنْثِ أَنَ ثٜىٰ دَشِ بٜىٰتَسْدَ؞ وَنَّنْ تَڢْكِ يَنَ كُسَدَ ڧُواْڢَرْ تُمَكِ نٜىٰ؞

³ أَ رُمْڢُنَ نَنْ نٜىٰ مَرَسَ لَاڢِيَ دَ مَكَڢِ دَ غُرَغُ دَ شَنْيَيُّ دَيَوَ سُنْ سَابَا ݣُونْثِيَ؞

⁴ سُنَ جِرَا أَ مُواْڟَ ضُوً؞ غَمَا أَ لُواْكَثِ لُواْكَثِ مَلاَىِٕكَنْ عُبَنْ‌غِجِ يَكَنْ سَوْكُواْ يَمُواْڟَ ضُوً؞ دُكْ كُوَ وَنْدَ يَڢَارَ شِغَ بَايَنْدَ عَكَ مُواْڟَ ضُوً، سَيْ يَوَرْكٜىٰ دَغَ دُكْ إِرِنْ ثِيوُانْ دَ يَكٜىٰدَشِ؞

⁵ أَ نَنْ كُوَ أَݣَويْ وَنِ مُتُمِنْ دَ يَيِ شٜىٰكَرَا تَلَاتِنْ دَ تَݣُوسْ عَثِكِنْ رَشِنْ لَاڢِيَ؞

⁶ دَ عِيسَىٰ يَغَنْشِ ݣُونْثٜىٰ، يَكُمَ سَنِ مُتُمِنْ يَدَطٜىٰ دَ وَنَّنْ ثِيوُاْ، سَيْ عِيسَىٰ يَثٜىٰ وَمُتُمِنْ ‏«‏كَنَ سُواْ كَوَرْكٜىٰ؟»‏

⁷ مَيْ ثِيوُانْ يَأَمْسَ مَسَ يَثٜىٰ ‏«‏مَيْغِرْمَ، أَيْ، بَانِ دَ وَنْدَ ذَيْ تَيْمَكٜىٰنِ إِنْشِغَ ثِكِنْ تَڢْكِنْ لُواْكَثِنْ دَ عَكَمُواْڟَ ضُوً؞ عِدَنْ نَيِ ڧُواْڧَرِ إِنْ شِغَ، سَيْ وَنِ يَرِغَانِ؞»‏

⁸ سَيْ عِيسَىٰ يَثٜىٰ مَسَ ‏«‏تَاشِ، كَطَوْكِ تَبَرْمَرْكَ، كَيِ تَڢِيَرْكَ!‏»‏

⁹ نَنْ دَ نَنْ، مُتُمِنْ يَوَرْكٜىٰ، يَكُمَ طَوْكِ تَبَرْمَرْسَ يَتَڢِے؞ وَنَّنْ أَبِنْ يَڢَرُ أَ رَانَرْ هُوتُ تَمَكُواْ وَدَّ يَهُودَاوَا بَاسَ يِنْ عَيْكِ؞

¹⁰ سَبُواْدَ حَكَ يَهُودَاوَا سُكَثٜىٰ وَمُتُمِنْ دَ عَكَ وَرْكَرْ ‏«‏يَوْ رَانَرْ هُوتُ نٜىٰ، كُمَ بِسَغَ كُواْيَرْوَرْ مُوسَٰى بَدَيْدَيْ بَنٜىٰ كَطَوْكِ تَبَرْمَرْكَ؞»‏

¹¹ سَيْ مُتُمِنْ يَأَمْسَ مُسُ يَثٜىٰ ‏«‏أَيْ، وَنْدَ يَوَرْكَرْ دَنِے، شِينٜىٰ يَثٜىٰ مِنِ إِنْ طَوْكِ تَبَرْمَتَ إِنْيِ تَڢِيَ؞»‏

¹² سُكَ تَمْبَيٜىٰشِ سُكَثٜىٰ ‏«‏وَنٜىٰنٜىٰ وَنَّنْ مُتُمِنْدَ يَثٜىٰ مَكَ كَطَوْكِ تَبَرْمَرْكَ كَيِ تَڢِيَ؟»‏

¹³ مُتُمِنْ دَ عَكَ وَرْكَرْ طِنْ كُوَ بَيْسَنْ كُواْ وَنٜىٰنٜىٰ مَا يَوَرْكَرْ دَشِيبَ، دُواْمِنْ أَݣَويْ مُتَنٜىٰ دَيَوَ أَوُرِنْ، كُمَ عِيسَىٰ يَٻَثٜىٰ ثِكِنْ جَمَعَ؞

¹⁴ بَايَنْ طَنْ لُواْكَثِ، عِيسَىٰ يَسَامٜىٰشِ عَثِكِنْ هَيْكَلِ، يَثٜىٰ مَسَ ‏«‏كَغَا ڢَا، كَوَرْكٜىٰ!‏ تُواْ، كَدَيْنَ يِنْ ذُنُوبِ، دُواْمِنْ كَدَ وَنِ أَبِنْدَ يَڢِ وَنَّنْ مُونِ يَسَامٜىٰكَ؞»‏

¹⁵ سَيْ مُتُمِنْ يَتَڢِے يَغَيَوَ شُوغَبَنِّنْ يَهُودَاوَا ثٜىٰوَ عِيسَىٰ نٜىٰ يَوَرْكَرْ دَشِ؞

¹⁶ سَبُواْدَ حَكَ سُكَ ڢَارَ ڟَنَنْتَا وَ عِيسَىٰ، دُوانْ دَيْ يَنَ يِنْ إِرِنْ وَطَنَّنْ أَبُبُوَ أَ رَانَرْ هُوتُ تَمَكُواْ؞

¹⁷ سَيْ عِيسَىٰ كُوَ يَثٜىٰ مُسُ ‏«‏عُبَانَ يَنَ عَيْكِ حَرْ يَنْذُ، نِے مَا إِنَيِ؞»‏

¹⁸ وَنَّنْ مَغَنَ كُوَ يَسَا يَهُودَاوَا سُكَڧَارَ نٜىٰمَ سُكَشٜىٰ عِيسَىٰ؞ سُكَثٜىٰ ‏«‏بَدُوانْ مَا يَكَرْيَ دُواْكَرْ رَانَرْ هُوتُ تَمَكُواْ كَوَيْبَ، عَمَّا يَثٜىٰ اللَّهْ عُبَنْسَ نٜىٰ، وَتُواْ يَمَيْدَ كَنْسَ دَيْدَيْ دَ اللَّهْ كٜىٰنَنْ؞»‏

إِيكُوانْ عِيسَىٰ طَنْ اللَّهْ

¹⁹ سَيْ عِيسَىٰ يَأَمْسَ مُسُ يَثٜىٰ ‏«‏حَڧِيڧَ، إِنَ غَيَ مُكُ، طَنْ بَايَيِنْ كُواْمٜىٰ، شِ كَطَيْ، سَيْدَيْ أَبِنْدَ يَغَ عُبَنْ يَكٜىٰيِ؞ دُواْمِنْ دُكْ أَبِنْدَ عُبَنْ يَكٜىٰيِ، شِينٜىٰ مَا طَنْ يَكٜىٰيِ؞

²⁰ غَمَا عُبَنْ يَنَ ڧَوْنَرْ طَنْ، يَنَ كُمَ نُونَ مَسَ دُكْ أَبِنْدَ شِ كَنْسَ يَكٜىٰيِ، حَرْ مَا ذَيْ نُونَ مَسَ أَيُّكَنْ دَ سُكَڢِے وَطَنَّنْ، دُواْمِنْ كُيِ مَامَاكِ؞

²¹ كَمَرْ دَيْ يَدَّ عُبَا يَكٜىٰ تَادَ مَتَتُّو يَكُمَ رَايَسُ، حَكَمَا طَنْ يَنَ بَادَ رَيْ غَ دَيْ دُكْ وَنْدَ يَغَ دَامَ؞

²² عُبَا كُمَ بَايَيِ وَكُواْوَ شَرِيعَ، عَمَّا يَبَا طَنْ إِيكُوانْ يِنْ دُكَنْ شَرِيعَ،

²³ دُواْمِنْ دُكَنْ مُتَنٜىٰ سُغِرْمَمَ طَنْ، كَمَرْ يَدَّ سُكٜىٰ غِرْمَمَ عُبَنْ؞ دُكْ وَنْدَ بَايَ غِرْمَمَ طَنْ، بَايَ غِرْمَمَ عُبَنْدَ يَعَيْكُواْشِ كٜىٰنَنْ؞

²⁴ ‏«‏حَڧِيڧَ، إِنَ غَيَ مُكُ، دُكْ مُتُمِنْ دَيَكٜىٰ جِنْ مَغَنَاتَ، يَنَ كُمَ بَادَ غَسْكِيَ غَ وَنْدَ يَعَيْكُواْنِ، يَنَدَ رَيْ نَهَرْ أَبَدَا؞ بَذَاعَيِ مَسَ حُكُنْثِبَ، يَارِغَا يَڧٜىٰتَرٜىٰ مُتُوَ ذُوَا رَيْ؞

²⁵ حَڧِيڧَ، إِنَغَيَ مُكُ، لُواْكَثِ يَنَ ذُوَا، يَا رِغَا يَا ذُواْ مَا دَ مَتَتُّو ذَاسُ جِ مُرْيَرْ طَنْ اللَّهْ، وَطَنْدَ سُكَجِ كُوَ ذَاسُرَايُ؞

²⁶ غَمَا كَمَرْ يَدَّ عُبَادَ كَنْسَ تُوشٜىٰنْ رَيْ نٜىٰ، حَكَمَا يَسَا طَنْسَ يَذَمَ تُوشٜىٰنْ رَيْ؞

²⁷ يَكُمَ بَاشِ إِيكُوانْ يِنْ شَرِيعَ دُواْمِنْ شِے طَنْ مُتُمْ نٜىٰ؞

²⁸ كَدَ كُيِ مَامَاكِنْ وَنَّنْ مَغَنَ، دُواْمِنْ لُواْكَثِ يَنَ ذُوَا دَ دُكْ وَطَنْدَ سُكٜىٰ ثِكِنْ كَبُرْبُرَ ذَاسُجِ مُرْيَرْسَ،

²⁹ سُڢِتُواْ؞ وَطَنْدَ سُكَيِ أَبُ مَيْݣَوْ ذَاسُ تَاشِ، سُرَايُ، عَمَّا وَطَنْدَ سُكَيِ رَشِنْ غَسْكِيَ، ذَاسُ تَاشِ عَكُوَيِ مُسُ حُكُنْثِ؞

³⁰ بَانَ عِيَيِنْ كُواْمٜىٰ نِے كَطَيْ؞ إِنَ شَرِيعَتَ نٜىٰ يَدَّ اللَّهْ يَڢَطَا مِنِ إِنْيِ؞ سَبُواْدَ حَكَ شَرِيعَتَ تَغَسْكِيَثٜىٰ، دُواْمِنْ بَنُڢِنْ كَيْنَ نَكٜىٰبِبَ، عَمَّا نُڢِنْ وَنْدَ يَعَيْكُواْ نِنٜىٰ؞

شَيْدُنْ عِيسَىٰ

³¹ ‏«‏عِدَنْ نَايِ وَكَيْنَ شَيْدَ، تُواْ، شَيْدَتَ بَتَبَّتَاثِّيَ بَثٜىٰ؞

³² عَمَّا أَݣَويْ وَنِ وَنْدَ يَكٜىٰيِنْ شَيْدَ عَكَيْنَ، نَا كُمَسَنْ شَيْدَرْ دَ يَكٜىٰيِ عَكَيْنَ تَبَّتَاثِّيَثٜىٰ؞

³³ كُنْ عَيْكِ مُتَنٜىٰ وُرِنْ يَحْيَى، شِيكُوَ يَشَيْدَ مُكُ غَسْكِيَ؞

³⁴ دُكْدَهَكَ بَنْ دُواْغَضَ دَ شَيْدَرْ مُتُمْبَ؞ نَا دَيْ ڢَطِ حَكَنٜىٰ دُواْمِنْ كُسَامِ ثٜىٰتُواْ؞

³⁵ يَحْيَى ڢِتِلَ نٜىٰ مَيْثِ، مَيْ حَصْكٜىٰ كُمَ، كُنْ كُوَ يَرْدَ كُيِ ڢَضٍ ثِكِ سُواْسَيْ دَ حَصْكٜىٰنْسَ أَطَنْ لُواْكَثِ كَطَنْ؞

³⁶ عَمَّا إِنَدَ تَاوَ شَيْدَ عَكَيْنَ وَدَّ تَڢِے شَيْدَرْ دَ يَحْيَى يَبَايَرْ غَمٜىٰدَنِ؞ أَيُّكَنْ دَ نَكٜىٰيِ، وَطَنْدَ عُبَانَ يَبَانِ إِنْيِ، سُونٜىٰ أَبُبُوَنْ دَ سُكَ ذَمَ شَيْدَتَ، ثٜىٰوَ عُبَا نٜىٰ يَعَيْكُواْ نِے؞

³⁷ عُبَنْ كُمَ وَنْدَ يَعَيْكُواْ نِے شِ دَ كَنْسَ يَذَمَ شَيْدَتَ؞ بَكُ تَٻَ جِنْ مُرْيَرْسَبَ، بَكُ كُمَ تَٻَ غَنِنْ يَدَّ يَكٜىٰبَ؞

³⁸ كَلْمَرْسَ بَاتَذَمَ أَ ذُوثِيَارْكُ، دُواْمِنْ بَكُبَادَ غَسْكِيَ غَ وَنْدَ عُبَا يَعَيْكُواْبَ؞

³⁹ كُنَ تَبِنْثِكٜىٰنْ لِتَّتَّڢَيْ، دُوانْ أَڟَمَّنِنْكُ ذَاكُسَامِ رَيْ نَهَرْ أَبَدَا عَثِكِنْسُ؞ وَطَنَّنْ مَغَنَرْ اللَّهْ كُوَ سُونٜىٰ سُكٜىٰ بَادَ شَيْدَ عَكَيْنَ؞

⁴⁰ عَمَّا دُكْدَهَكَ كُنْڧِ ذُوَا وُرِينَ كُسَامِ رَيْ؞

⁴¹ ‏«‏بَانَكَرْٻَرْ يَبُواْ دَغَ وُرِنْ مُتَنٜىٰ؞

⁴² عَمَّا ڢَا نَسَنْكُ، نَكُمَسَنْ ثٜىٰوَ بَاكُدَ ڧَوْنَرْ اللَّهْ عَثِكِنْ ظُكَاتَنْكُ؞

⁴³ نَذُواْ عَثِكِنْ سُونَنْ عُبَانَ، بَكُ كَرْٻٜىٰنِ بَ، عَمَّا عِدَنْ وَنِ يَا ذُواْ عَثِكِنْ سُونَنْ كَنْسَ، ذَاكُ كَرْٻٜىٰشِ؞

⁴⁴ تُواْ، يَيَ ذَاكُ بَادَ غَسْكِيَ سَعَدَّ كُكٜىٰ ڧُواْڧَرِنْ سَامُنْ يَبُواْ دَغَ جُونَنْكُ، عَمَّا بَكُيِ ڧُواْڧَرِنْ سَامُنْ يَبُوانْ دَيَكٜىٰ ڢِتُواْوَ دَغَ وُرِنْ اللَّهْ وَنْدَ يَكٜىٰ طَيَ كَطَيْبَ؟

⁴⁵ كَدَ كُيِ ڟَمَّنِ ذَنْيِ ڧَارَرْكُ وُرِنْ عُبَا؞ أَݣَويْ مَيْ ڧَارَرْكُ، شِينٜىٰ مُوسَٰى، وَنْدَ كُكٜىٰسَا ذُوثِيَا ذَيْ تَيْمَكٜىٰكُ؞

⁴⁶ دَاعَثٜىٰ كُنْ بَادَ غَسْكِيَ غَ مُوسَٰى دَ كُنْ بَادَ غَسْكِيَ غَرٜىٰنِ، غَمَا مُوسَٰى يَرُبُوتَ غَمٜىٰدَنِ؞

⁴⁷ عَمَّا إِنْ كُوَ بَكُ غَسْكَتَادَ أَبِنْدَ يَرُبُوتَبَ، تَيَيَا ذَاكُ غَسْكَتَادَ مَغَنَاتَ؟»‏