يَحْيَى 2 - أَتَّوْرَتْ دَ أَنَّبَاوَابِكٍ عَوْرٜىٰ أَ كَنَ تَ غَلِيلِ 1 أَ رَانَ تَ عُكُ سَيْ عَكَيِ بِكٍ عَوْرٜىٰ أَ كَنَ تَ غَلِيلِ؞ مَامَرْ عِيسَىٰ كُوَ تَنَ وُرِنْ عَوْرٜىٰنْ؞ 2 أَنْ غَيَّثِ عِيسَىٰ دَ أَلْمَجِرَنْسَ مَا أَعَوْرٜىٰنْ؞ 3 دَ ضُوً إِنَبِے يَڧَارٜىٰ، سَيْ مَامَرْ عِيسَىٰ تَثٜىٰمَسَ «ضُوً إِنَبِنْسُ يَڧَارٜىٰ؞» 4 عِيسَىٰ يَأَمْسَ مَتَ يَثٜىٰ «مَامَا، مٜىٰيَسَا كِكَذُواْ وُرِينَ؟ أَيْ، لُواْكَثِنَ بَيْيِبَ تُكُنَ؞» 5 سَيْ مَامَرْ عِيسَىٰ تَثٜىٰ وَمَاسُ حِدِمَرْ «دُكْ أَبِنْدَ عِيسَىٰ يَثٜىٰ كُيِ، سَيْكُيِ؞» 6 يَهُودَاوَا كُوَ سُنَدَ أَلْعَادَرْ ڟَبْتَثٜىٰوَ سَبُواْدَ حَكَ أَݣَويْ رَنْدُنَ شِدَ وَطَنْدَ دَ دُوڟٜىٰ نٜىٰ عَكَ غِنَسُ عَكَ أَجِيٜىٰ أَوُرِنْ، كُواْوَثّٜىٰ تَنَثِنْ وَجٜىٰنْ لِتَ طَرِے نَضُوَ؞ 7 سَيْ عِيسَىٰ يَثٜىٰ وَمَاسُ حِدِمَرْ «كُثِكَ رَنْدُنَنَّنْ دَ ضُوَ؞» سَيْ سُكَ ثِثِّكَسُ ڢَلْ؞ 8 سَعَنً يَثٜىٰ مُسُ «تُواْ، يَنْذُ كُطِبَ، كُكَيْوَ عُبَنْ بِكٍ؞» سَيْ سُكَ طٜىٰبِے ضُوً سُكَ كَيْ مَسَ؞ 9 ضُوً كُوَ يَثَنْجَ يَذَمَ ضُوً إِنَبِے، سَيْ عُبَنْ بِكٍ يَشَا كَطَنْ؞ شِے كُوَ بَيْ سَنْ عِنْدَ عَكَ سَامُواْ ضُوً إِنَبِنْ بَ، عَمَّا مَاسُ حِدِمَرْ دَسُكَ طٜىٰبُواْ ضُوً سُنْ سَنِ؞ سَيْ يَكِرَا أَنْغُوانْ سُكَ ڟَيَ أَغٜىٰڢٜىٰ، 10 سَعَنً يَثٜىٰ مَسَ «أَيْ، كُواْوَ يَكَنْ ڢَارَ بَادَ ݣَكْݣَوَنْ ضُوً إِنَبِے تُكُنَ، بَايَنْدَ مُتَنٜىٰ سُكَشَا دَيَوَ، سَعَنً كُمَ يَكَٰوُاْ وَنْدَ بَيْ كَيْ نَڢَارِنْ ݣَوْبَ؞ عَمَّا كَيْ كَٻُواْيٜىٰ ݣَكْݣَوَنْ ضُوً إِنَبِنْ سَيْ يَنْذُ!» 11 وَنَّنْ عِتَثٜىٰ عَلَمَرْ بَنْ مَامَاكِ تَڢَرْكُواْ وَدَّ عِيسَىٰ يَيِ، يَكُوَيِ وَنَّنْ نٜىٰ أَ كَنَ تَ غَلِيلِ؞ تَهَكَ يَبَيَّنَ طَوْكَكَرْسَ، أَلْمَجِرَنْسَ كُمَ سُكَ بَادَ غَسْكِيَ غَرٜىٰشِ؞ 12 بَايَنْ حَكَ سَيْ عِيسَىٰ يَغَنْغَرَ ذُوَا كَڢَرْنَهُمْ دَشِے دَ مَامَرْسَ دَ یَنْعُوَنْسَ دَ كُمَ أَلْمَجِرَنْسَ؞ سُكَيِ ذَمَ نَیَنْ ݣُونَكِے عَثَنْ؞ عِيسَىٰ يَڟَبْتَثٜىٰ هَيْكَلِ ﴿ مَتْ 21.12-13 ؛ مَرْ 11.15-17 ؛ لُكْ 19.45-46 ﴾ 13 دَ لُواْكَثِنْ بِكٍ ڧٜىٰتَرٜىٰوَ نَ يَهُودَاوَا يَيِ كُسَ، سَيْ عِيسَىٰ يَتَڢِے عُرُوشَلِيمَ؞ 14 عَثِكِنْ ڢِيلِنْ هَيْكَلِنْ، يَسَامِ مُتَنٜىٰ سُنَ سَيَرْ دَ شَانُو دَ تُمَكِ دَ تَتَّبَرُ دَ كُمَ مَاسُ ثَنْجِنْ كُطِ سُنَ ظَوْنٜىٰ عَتٜىٰبُرَنْسُ؞ 15 سَيْ عِيسَىٰ يَتُڧَ بُلَلَ دَ إِغِيَ، يَكُواْرٜىٰسُ دُكَ دَغَ هَيْكَلِنْ، حَرْ دَ تُمَكِنْ دَ شَانُنْ؞ يَكُمَ تُتُّرٜىٰ تٜىٰبُرَنْ مَاسُ ثَنْجِنْ، يَوَرْوَاڟَرْدَ دُكَنْ كُطَطٜىٰنْسُ؞ 16 سَيْ عِيسَىٰ يَثٜىٰ وَمُتَنٜىٰنْ دَسُكٜىٰ سَيَرْ دَ تَتَّبَرُنْ «كُڢِتَرْدَ وَطَنَّنْ دَغَ نَنْ! كَدَ كُمَيْدَ غِدَنْ عُبَانَ كَاسُوَ؞» 17 دَ وَنَّنْ يَڢَرُ، سَيْ أَلْمَجِرَنْسَ سُكَ تُنَ دَ أَبِنْدَ عَكَ رُبُوتَ أَ مَغَنَرْ اللَّهْ ثٜىٰوَ «كِيشِ نَڧَوْنَرْ دَ نَكٜىٰيِ وَغِدَنْكَ تَنَ ڧُونَنِ كَمَرْ وُتَا؞» 18 سَيْ شُوغَبَنِّنْ يَهُودَاوَا سُكَ تَمْبَيِ عِيسَىٰ سُكَثٜىٰ «تُواْ، وَثٜىٰ عَلَمَرْ بَنْ مَامَاكِثٜىٰ ذَاكَيِ مَنَ وَدَّ ذَاتَ نُونَ ثٜىٰوَ كَنَدَ إِيكُوانْ يِنْ دُكَنْ وَطَنَّنْ أَبُبُوَ؟» 19 عِيسَىٰ يَأَمْسَ مُسُ يَثٜىٰ «كُرُشٜىٰ وَنَّنْ هَيْكَلِ، نِے كُوَ ذَنْتَادَ شِ عَثِكِنْ ݣُونَ عُكُ؞» 20 سَيْ سُكَ تَمْبَيٜىٰشِ سُكَثٜىٰ «يَطَوْكِ شٜىٰكَرَا أَرْبَعِنْ دَ شِدَ أَنَكَنْ غِنِنْ وَنَّنْ هَيْكَلِ! كَيْ كُمَ كَثٜىٰ ذَاكَتَادَشِ عَثِكِنْ ݣُونَ عُكُ؟» 21 عَمَّا هَيْكَلِنْ دَ عِيسَىٰ يَيِ مَغَنَ عَكَيْ، جِكِنْسَنٜىٰ؞ 22 بَايَنْدَ عَكَ تَادَ عِيسَىٰ دَغَ مَتَتُّو، سَيْ أَلْمَجِرَنْسَ سُكَ تُنَ دَ وَنَّنْ أَبِنْدَ عِيسَىٰ يَڢَطَا، سُكَ كُمَ بَادَ غَسْكِيَ غَ رُبُوتَثِّيَرْ مَغَنَرْ اللَّهْ دَ كُمَ مَغَنَرْ دَ عِيسَىٰ يَڢَطَا؞ عِيسَىٰ يَسَنْ ذُوثِيَارْ كُواْوَ 23 أَ لُواْكَثِنْ دَ عِيسَىٰ يَنَ عُرُوشَلِيمَ دُواْمِنْ بِكٍ ڧٜىٰتَرٜىٰوَ، مُتَنٜىٰ دَيَوَ سُنْ بَادَ غَسْكِيَ غَرٜىٰشِ دُواْمِنْ عَلَمُنْ بَنْ مَامَاكِ وَطَنْدَ سُكَ غَنِ يَيِ؞ 24 عَمَّا عِيسَىٰ بَيْ يَرْدَ دَسُوبَ، دُواْمِنْ يَسَنْسُ دُكَ سُواْسَيْ؞ 25 غَمَا بَايَ بُڧَاتَرْ وَنِ يَشَيْدَ وَنِ أَبُ غَمٜىٰدَ مُتُمْ، سَبُواْدَ يَسَنْ أَبِنْدَ يَكٜىٰ أَ ذُوثِيَارْ طَنْ أَدَمْ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria