إِرْمِيَ 8 - أَتَّوْرَتْ دَ أَنَّبَاوَا1 إِنْجِ يَهْوٜىٰهْ « ‹أَ لُواْكَثِنَّنْ، ذَاعَ ڢِتَرْدَ ڧَسُسُوَنْ سَرَاكُنَنْ يَهُودَ دَ نَدَتَّوَنْسُ دَ نَڢِرِسْتُواْثِے دَ نَأَنَّبَوَ دَ نَمَذَوْنَنْ عُرُوشَلِيمَ دَغَ كَبُرْبُرَنْسُ؞ 2 ذَاعَ شِمْڢِطَا ڧَسُسُوَنْ أَ رَانَ دَ أَوَتَ دَ أَغَبَنْ دُكَنْ تَوْرَرِنْ سَمَ، أَبُبُوَنْ دَ مُتَنٜىٰنَ سُكَ ڧَوْنَثٜىٰسُ، سُكَ كُمَ بَوْتَا مُسُ، وَطَنْدَ سُكَ نٜىٰمِ شَوَرَرْسُ، سُكَيِ مُسُ سُجَّدَ؞ بَذَاعَ تَتَّارَ ڧَسُسُوَنْ أَبِنّٜىٰبَ، عَمَّا ذَاعَ تَتَّاكٜىٰسُ كَمَرْ كَاشِنْ دَبَّ أَ ڢُسْكَرْ ڧَسَا؞ 3 ضَغُواْوَرْ مُتَنٜىٰنْ مُوغُوَرْ ذُرِيَرْ نَنْ وَطَنْدَ سُكٜىٰ أَوُرَارٜىٰنْدَ نَوَرْوَڟَاسُ، ذَاسُ ڠُومَّثٜىٰ سُمُتُ مَيْمَكُوانْ سُرَايُ؞ نِے يَهْوٜىٰهْ مَيْ ضُنْدُنَا نَا ڢَطَا؞› » مُتَنٜىٰ سُنْ جُويَا دَغَ حَنْيَرْ يَهْوٜىٰهْ 4 «إِرْمِيَ، كَثٜىٰ مُسُ، إِنْجِ يَهْوٜىٰهْ، « ‹أَشٜىٰ، عِدَنْ مُتُمْ يَڢَاطِ، بَذَيْسَاكٜىٰ تَاشِبَ؟ عِدَنْ مُتُمْ يَجُويَ يَبِے وَتَ حَنْيَ، بَذَيْسَاكٜىٰ جُويُواْ يَكُواْمَ عَكَنْ حَنْيَبَ؟ 5 دُوانْمٜىٰ جَمَعَرْ نَنْ سُكَ جُويَا بَايَ؟ دُوانْمٜىٰ عُرُوشَلِيمَ سُنَ تَجُويَ بَايَ؟ سُنْ مَنّٜىٰوَ رُوطُ، سُنْڧِے كُواْمُواْوَ؞ 6 نَكَسَ كُنّٜىٰ، نَكُمَجِ، عَمَّا بَابُ مَيْ ڢَطِنْ غَسْكِيَ؞ بَابُ مَيْ تُوبَ دَغَ مُغُنْتَارْسَ، بَابُ مَيْ ثٜىٰوَ «مٜىٰنَيِ؟» كُواْوَ يَجُويَ يَنَ بِنْ رَعَيِنْسَ، كَمَرْ دُواْكِ مَيْسَا كَيْ أَغُجٜىٰ ذُوَا ثِكِنْ يَاڧِ؞ 7 كُواْ شَمُوَ تَسَرَرِنْ سَمَ مَا، تَسَنْ ڧَٰعِدَرْ لُواْكَتَنْ ڧَوْرَرْتَ؞ تَتَّبَرَ دَ ڟَڟّٜىٰوَ دَ ظَلْٻٜىٰ، سُنَ كِيَايٜىٰ لُواْكَثِنْ كُواْمُواْوَرْسُ؞ عَمَّا جَمَعَتَ، بَسُ سَنْ حَكَبَ، بَسُسَنْ ڧَٰعِدَرْ دَ نِے يَهْوٜىٰهْ نَكَڢَ مُسُبَ؞ 8 « ‹يَيَ ذَاكُثٜىٰ، «مُنَدَ حِكِمَ، غَمَا كُواْيَرْوَرْ يَهْوٜىٰهْ تَنَ تَرٜىٰدَمُو»؟ غَاشِ، أَبِنْ رُبُوتُنْ ڧَضْيَا نَمَاسُ رُبُوتُو، يَمَيْدَ كُواْيَرْوَاتَا ڧَضْيَا؞ 9 ذَاعَكُنْيَتَرْ دَ مَاسُ حِكِمَ، ذَاعَ سَا سُڢِرْغِتَ عَتَڢِے دَسُو بَوْتَا؞ غَاشِ، سُنْڧِے مَغَنَرْ يَهْوٜىٰهْ، وَثٜىٰ إِرِنْ حِكِمَ سُكٜىٰ دَ عِتَ كٜىٰنَنْ؟ 10 سَبُواْدَ حَكَ ذَنْبَادَ مَاتَنْسُ غَ وَطَنْسُ، غُواْنَكِنْسُ كُمَ غَ مَاسُثِنْسُ دَ يَاڧِ؞ غَمَا دَغَ مَڢِے ڧَرَمِ ذُوَا مَڢِے غِرْمَ عَثِكِنْسُ، كُواْوَنّٜىٰنْسُ يَنَ ݣُوطَيِنْ ثِنْ ڧَظَامَرْ رِيبَ، عِ، حَرْ مَا دَغَ أَنَّبِے ذُوَا ڢِرِسْتِ كُواْوَنّٜىٰنْسُ يَنَ يِنْ رَشِنْ غَسْكِيَ؞ 11 سُنْ وَرْكَرْدَ رَوْنِنْ مُتَنٜىٰنَ سَمَ سَمَ، سُنَ ثٜىٰوَ «سَلَمَ، سَلَمَ،» غَاشِ كُوَ بَابُ سَلَمَ؞ 12 سُنْيِ أَبِنْ كُنْيَا، سُنْ عَيْكَتَ أَبُبُوَنْ بَنْ ڨَمَ، عَمَّا بَسُجِ كُنْيَا بَ كُواْ كَطَنْ؞ بَسُ مَا سَنْ يَدَّ ذَاعَ سُنْكُيَرْ دَكَيْ ثِكِنْ كُنْيَابَ؞ سَبُواْدَ حَكَ، ذَاسُ ڢَاطِ عَثِكِنْ مَاسُ ڢَاطُوَ، سَعَدَّ نَحُكُنْتَسُ، ذَاعَ تُمْٻُكٜىٰسُ؞ نِے يَهْوٜىٰهْ نَا ڢَطَا؞ 13 « ‹إِنْجِنِ يَهْوٜىٰهْ، سَعَدَّ نَكٜىٰسُواْ إِنْتَتَّارَ جَمَعَتَ كَمَرْ يَدَّ مَيْ غِرْبِے يَكٜىٰيِ، بَنْ سَامِ یَیَنْ إِنَبِے عَ إِتَاثٜىٰنْبَ، بَنْ سَامِ یَیَنْ ٻَوْرٜىٰ عَ إِتَاثٜىٰنْبَ؞ غَنْيَيٜىٰنْسُ كُوَ سُنْ بُوشٜىٰ، أَبِنْدَ نَبَاسُ يَٻَثٜىٰ دَغَ غَرٜىٰسُ؞› » 14 مُتَنٜىٰنْ يَهُودَ سُنْ ثٜىٰ، «دُوانْمٜىٰ مُكٜىٰ ظَوْنٜىٰ كَوَيْ؟ مُتَتَّارُ مُتَڢِے ثِكِنْ بِرَنٜىٰ مَاسُ كَتَنْغَ، مُهَلَّكَ عَثَنْ؞ غَمَا يَهْوٜىٰهْ اللَّهْ نْمُ يَڧَدَّرَمُ مُهَلَّكَ، يَكُمَ بَامُ ضُوَ مَيْ دَڢِ مُشَا، سَبُواْدَ مُنْيِ وَ يَهْوٜىٰهْ ذُنُوبِ؞ 15 مُنْ سَا ذُوثِيَا غَ سَلَمَ، عَمَّا بَابُ أَلْحٜىٰرِنْدَ يَذُواْ مَنَ؞ مُنْ سَا ذُوثِيَا غَ لُواْكَثِنْ سَامُنْ وَرْكٜىٰوَ، عَمَّا سَيْغَا رَظَنَ! 16 كُوكَنْ مَنْيَنْ دَوَكِنْ يَاڧِنْسُ، أَنَجِ دَغَ يَنْكِنْ دَنْ؞ دَجِنْ كُوكَنْ مَنْيَنْ دَوَكِنْسُ، دُكَنْ ڧَسَرْ تَغِرْغِظَ؞ سُنْ ذُواْ سُثِنْيٜىٰ ڧَسَرْ دَ دُكَنْ أَبِنْدَ يَكٜىٰ ثِكِنْتَ، سُكُمَ ثِنْيٜىٰ بِرْنِنْ دَ دُكَنْ مَذَوْنَنْسَ؞» 17 «غَاشِ، ذَنْ عَيْكَ مُكُ دَ أَبُواْكَنْ غَابَا كَمَرْ مَثِيظَيْ، مُوغَيٜىٰنْ مَثِيظَنْ دَ بَا مَيْ عِيَ هَنَاسُ سَارَ، ذَاسُ كُوَ سَسَّارٜىٰكُ؞ نِے يَهْوٜىٰهْ، نَاڢَطَا؞» إِرْمِيَ يَيِ كُوكَا دُواْمِنْ مُتَنٜىٰنْسَ 18 بَڧِنْ ثِكِنَ يَشَا ڧَرْڢِينَ، ذُوثِيَاتَ تَنَ ثِيوُاْ؞ 19 جِ! غَا كُوكَنْ ذُوثِيَاتَ جَمَعَتَ؞ كُواْعِنَ عَڧَسَرْ سُنَ ثٜىٰوَ «كُواْ يَهْوٜىٰهْ بَايَ ثِكِنْ سِهِيُواْنَ نٜىٰ؟ كُواْ سَرْكِنْتَ بَايَ عَثِكِنْتَنٜىٰ؟» يَهْوٜىٰهْ سَرْكِنْسُ يَأَمْسَ يَثٜىٰ، «دُوانْمٜىٰ سُكٜىٰ بَوْتَرْ غُمَكَ؟ دُوانْمٜىٰ سُكَسَا نَيِڢُشِے تَوُرِنْ سُجَّدَرْ بَنْظَ غَ أَلُّواْلِنْ أَلْعُمَّيْ؟» 20 مُتَنٜىٰ سُنَ ثٜىٰوَ «لُواْكَثِنْ غِرْبِے يَڧَارٜىٰ، دَامِنَ كُمَ تَوُثٜىٰ، عَمَّا حَرْ يَنْذُ بَعَثٜىٰثٜىٰمُبَ!» 21 غَنِنْ رَوْنِنْ جَمَعَتَ، ذُوثِيَاتَ، يَسَا نِے مَا نَسَامِ رَوْنِ؞ إِنَ مَكُواْكِ، ڟُواْرُواْ يَكَامَنِ؞ 22 بَا مَاغَنِ أَ غِلٜىٰيَدْ نٜىٰ؟ بَابُ مَيْ مَاغَنِ أَوُرِنْ نٜىٰ؟ تُواْ، مٜىٰيَسَا بَعَوَرْكَرْدَ جَمَعَتَ، ذُوثِيَاتَبَ؟ |
Hausa Common Language Ajami Bible © The Bible Society of Nigeria, 2020
Bible Society of Nigeria