إِرْمِيَ 51 - أَتَّوْرَتْ دَ أَنَّبَاوَاسَڧُواْ غَمٜىٰدَ ڢَاطُوَرْ بَابِيلَ 1 إِنْجِ يَهْوٜىٰهْ، «غَاشِ، ذَنْ كَٰوُاْ رُوحُ مَيْ هَلَّكَرْوَ عَكَنْ بَابِيلَ دَ مَذَوْنَنْ كَلْدِيَ؞ 2 ذَنْ عَيْكَ دَ بَاڧِ سُوَرْوَاڟَرْ دَ بَابِيلَ، كَمَرْ دَ مَتَنْكَطِ؞ ذَاسُبَرْ ڧَسَرْ بَا كُواْمٜىٰ عَثِكِ، ذَاسُذُواْ سُڢَاطَ مَتَ عَكُواْوَنٜىٰ غٜىٰڢٜىٰ أَ رَانَرْ مَسِيڢَرْ نَنْ؞ 3 ذَنْ عُمَرْثِ أَبُواْكَنْ غَابَنْ بَابِيلَ، ‹كَدَ عَبَرْ مَيْ بَكَ يَيِ هَرْبِے دَ بَكَنْسَ، كُواْ عَبَرْ سُواْجُواْجِنْسُ سُسَا كَايَنْ يَاڧِنْسُ؞ كَدَ عَبَرْ سَمَارِنْتَ دَ رَيْ، أَ هَلَّكَرْ دَ دُكَنْ سُواْجُواْجِنْ بَابِيلَ!› 4 ذَاعَ سُواْسُّواْكٜىٰسُ عَتِيتُنَنْ بَابِيلَ، سُڢَاطِ مَتَتُّو عَڧَسَرْ كَلْدِيَاوَا؞ 5 غَمَا نِے يَهْوٜىٰهْ مَيْ ضُنْدُنَا، بَنْ يَاشٜىٰ إِسْرَٰٓءِيلَ دَ يَهُودَ بَ؞ نِے اللَّهْ نْسُ نٜىٰ، كُواْدَيَكٜىٰ ڧَسَرْسُ تَثِكَ دَ ذُنُوبِ، ذُنُوبِنْ دَ سُكَيِ مِنِ، نِے مَيْ ڟَرْكِے نَ إِسْرَٰٓءِيلَ؞ 6 «كُغُدُ دَغَ ثِكِنْ بَابِيلَ، كُواْوَ يَيِ غُدُنْ ڟِيرَرْ دَ رَنْسَ! كَدَ أَ هَلَكَاكُ ثِكِنْ حُكُنْثِنْ لَيْڢِنْ بَابِيلَ! غَمَا لُواْكَثِنَّنْ نٜىٰ دَ يَهْوٜىٰهْ ذَيْسَاكَ مَتَ، ذَيْ يِ رَامُوَا عَكَنْتَ بِسَغَ أَيُّكَنْتَ؞ 7 أَ دَا بَابِيلَ كَمَرْ ݣُوڢْ نَظِينَارِيَثٜىٰ أَ هَنُّونَ، نِے يَهْوٜىٰهْ؞ تَا سَا دُكَنْ دُونِيَا تَبُغُ، أَلْعُمَّنْ دُونِيَا سُنْ شَا ضُوً إِنَبِنْتَ سُكَ هَوْكَثٜىٰ؞ 8 بَا لَابَرِ بَابِيلَ تَڢَاطِ تَكَكَّرْيٜىٰ، كُيِ كُوكَا دُواْمِنْتَ! كُسَامُواْ مَتَ مَاغَنِ دُواْمِنْ رَوْنِنْتَ، وَتَڧِيلَ ذَاتَوَرْكٜىٰ؞ 9 بَاڧِ مَاسُ ذَمَ عَ بَابِيلَ سُنْثٜىٰ، ‹مُنْيِ ڧُواْڧَرِ مُوَرْكَرْدَ بَابِيلَ، عَمَّا بَتَوَرْكٜىٰبَ؞ مُڨَلٜىٰتَ، كُواْوَ يَكُواْمَ ڧَسَرْسَ، غَمَا حُكُنْثِنْتَ يَيِيَوَ حَرْ لَابَرِنْ يَكَيْ كُواْعِنَ عَدُونِيَا، حَرْ سَمَ يَجِ يَدَّ حُكُنْثِنْتَ يَكَسَنْثٜىٰ؞› » 10 مُتَنٜىٰنْ يَهْوٜىٰهْ سُنْ تَادَ مُرْيَ سُنْثٜىٰ، «يَنْذُ يَهْوٜىٰهْ يَا ڢَطَا أَ ڢِيلِ مُو مَرَسَ لَيْڢِے نٜىٰ، ذُواْ مُيِ شٜىٰلَرْ أَيُّكَنْ يَهْوٜىٰهْ اللَّهْ نْمُ أَ سِهِيُواْنَ!» 11 شُوغَبَنِّنْ سُواْجُواْجِ سُنْثٜىٰ، «كُوَاسَ كِبِيُواْيِنْكُ! كُشِرْيَ غَرْكُوُاْيِنْكُ! يَهْوٜىٰهْ يَا تَادَ رُوحٌ سَرَاكُنَنْ مٜىٰدِيَ، غَمَا شِرِنْسَ عَكَنْ بَابِيلَ شِينٜىٰ هَلَّكَرْوَ، غَمَا وَنَّنْ رَامُوَرْ يَهْوٜىٰهْ ثٜىٰ، رَامُوَا سَبُواْدَ أَنْرُشٜىٰ هَيْكَلِنْسَ؞ 12 كُتَادَ تُوتَ كُڢَارَ رُشٜىٰ كَتَنْغَرْ بِرْنِنْ بَابِيلَ! كُڧَارَ ڧَرْڢِنْ مَاسُ غَادِ، كُكَكَّڢَ مَاسُ غَادِ أَوُرَارٜىٰنْسُ، كُشِرْيَ مَاسُ ݣُونْتُوانْ ٻَوْنَ!» غَمَا يَهْوٜىٰهْ يَاشِرْيَ يَكُمَ عَيْكَتَ دُكَنْ أَبِنْدَ يَڢَطَا عَكَنْ مَذَوْنَنْ بَابِيلَ؞ 13 يَا كٜىٰ دَ كِكٜىٰ ذَمَ كُسَدَ عِنْدَ أَݣَويْ ضُوَ مَيْ يَوَ، كٜىٰ دَ كِكٜىٰ مَيْ يَوَنْ دُوكِيَ، ڧَرْشٜىٰنْكِ يَذُواْ، لُواْكَثِ يَيِ دَ ذَاعَ يَنْكٜىٰ ثِبِيَرْ رَايُوَرْكِ؞ 14 يَهْوٜىٰهْ مَيْ ضُنْدُنَا يَرَنْڟٜىٰ دَ كَنْسَ يَثٜىٰ، ذَيْثِكَ بَابِيلَ دَ سُواْجُواْجِنْ أَبُواْكَنْ غَابَنْتَ، ذَاسُيِيَوَ كَمَرْ ڧُنْغِيَرْ ڢَارِ، ذَاسُ تَادَ مُرْيَرْ نَصَرَا عَكَنْتَ؞ 15 اللَّهْ نٜىٰ، يَيِ ڧَسَا تَوُرِنْ إِيكُوانْسَ، يَكَڢَ دُونِيَا تَوُرِنْ حِكِمَرْسَ، يَشِمْڢِطَا سَمَّيْ تَوُرِنْ غَانٜىٰوَرْسَ؞ 16 دَجِنْ مُرْيَرْسَ، ضُوَيٜىٰنْ سَمَ سُكَنْيِ رُورِ؞ يَكَنْ تَادَ غِذَغِظَيْ دَغَ إِيَاكَرْ دُونِيَا، يَكَنْ عَيْكُواْ دَ وَلْڧِيَ تَرٜىٰدَ ضُوً سَمَ، يَكَنْ كُمَ ڢِتَرْدَ إِسْكَ دَغَ طَاكِنْ أَجِيَرْسَ؞ 17 دَ غَنِنْ وَنَّنْ، مُتَنٜىٰ سُنْ غَانٜىٰ سُو مَرَرْ تُنَانِ نٜىٰ مَرَرْ سَنِ كُمَ؞ كُواْوَنٜىٰ مَڧٜىٰرِنْ ظِينَارِيَ يَشَا كُنْيَا سَبُواْدَ غُمَكَنْسَ، غَمَا صِڢَّرْدَ يَڧٜىٰرَ أَبِنْ رُوطُ نٜىٰ، بَابُ نُمْڢَشِ عَثِكِنْتَ؞ 18 غُمَكَ أَبِنْ بَنْظَنٜىٰ، أَبُبُوَنْ بَعَنٜىٰ كَوَيْ؞ أَ لُواْكَثِنْ دَ ذَاعَ حُكُنْتَسُ، ذَاسُ هَلَّكَ؞ 19 عَمَّا اللَّهْ نَ إِسْرَٰٓءِيلَ، وَنْدَ شِينٜىٰ رَبُوانْ دَ ذُرِيَرْ يَعْڧُوبَ تَكٜىٰدَ شِ، بَكَمَرْ وَطَنَّنْبَ؞ غَمَا شِينٜىٰ مَيْ صِڢَّتَا دُكَنْ كُواْمٜىٰ، إِسْرَٰٓءِيلَ كُوَ عِتَثٜىٰ ذُرِيَرْسَ تَغَادُواْ؞ سُونَنْسَ يَهْوٜىٰهْ مَيْ ضُنْدُنَا نٜىٰ؞ 20 يَهْوٜىٰهْ يَثٜىٰ، «بَابِيلَ، كٜىٰ غُدُمَ تَاوَثٜىٰ، كَايَنْ يَاڧِنَ، دَكٜىٰ نَڢَرْڢَسَ أَلْعُمَّنْ دُونِيَا، دَكٜىٰ نَهَلَّكَ مُلْكُواْكِ؞ 21 دَ كٜىٰ نَڢَرْڢَسَ دُواْكِ دَ مَيْ هَوَنْسَ، دَكٜىٰ نَڢَرْڢَسَ كٜىٰكٜىٰنْ دُواْكِ دَ مَيْ هَوَنْسَ؞ 22 دَ كٜىٰ نَڢَرْڢَسَ مِجِ دَ مَثٜىٰ، دَكٜىٰ نَڢَرْڢَسَ ڟُواْهُواْ دَ سَوْرَيِ، دَكٜىٰ نَڢَرْڢَسَ سَوْرَيِ دَ يَارِنْيَ؞ 23 دَ كٜىٰ نَڢَرْڢَسَ مَيْ كِيوُاْ دَ غَرْكٜىٰنْسَ، دَكٜىٰ نَڢَرْڢَسَ مَنُواْمِ دَ شَانُنْ نُواْمَنْسَ، دَكٜىٰ نَڢَرْڢَسَ ڠُومْنُواْنِ دَ دَتَّاوَا؞ 24 «أَ عِدُوانْكُ ذَنْيِ رَامُوَا عَكَنْ بَابِيلَ دَ عَكَنْ دُكَنْ مَذَوْنَنْ كَلْدِيَ، سَبُواْدَ دُكَنْ مُغُنْتَارْ دَسُكَ عَيْكَتَ أَ سِهِيُواْنَ؞ نِے يَهْوٜىٰهْ نَا ڢَطَا؞ 25 غَاشِ، يَا كٜىٰ بَابِيلَ، بَبَّنْ دُواْدُواْ مَيْ هَلَّكَرْوَ، مَيْ هَلَّكَرْ دَ دُكَنْ دُونِيَا، ذَنْ مِيڧَ هَنُّونَ نَغَابَادَكٜىٰ، ذَنْ تُورَكِ كِغَنْغَرَ دَغَ سَمَنْ تُدُ حَرْ ڧَسَا، ذَنْ ڧُواْنٜىٰكِ كِذَمَ تُلِنْ تُواْكَ؞ 26 يَا كٜىٰ بَابِيلَ، عَثِكِنْكِ بَذَاعَ سَامِ دُوڟٜىٰ مَيْ أَمْڢَانِ عَݣُونَرْ غِنِبَ، كُواْ مَا أَ سَامِ دُوڟٜىٰ نَكَڢَ تُوشٜىٰنْ غِنِ، غَمَا بَابِيلَ ذَاتَ ذَمَ كُڢَيْ، وُرِے مَرَرْ أَمْڢَانِ حَرْ أَبَدَا؞ نِے يَهْوٜىٰهْ نَا ڢَطَا؞ 27 «كُتَادَ تُوتَ عَڧَسَرْ، كُبُوسَ وَ أَلْعُمَّنْ دُونِيَا ڧَهُواْ؞ كُشِرْيَ أَلْعُمَّيْ دُواْمِنْ سُيِيَاڧِ دَ عِتَ، كُكِرَوُاْ مُلْكُواْكِنَّنْ سُڢَاطُواْ مَتَ دَ يَاڧِ، كُكِرَا أَرَرَاتْ دَ مِنِّ دَ أَشْكٜىٰنَزْ؞ كُسَا سَرْكِنْ يَاڧِ يَجَغُواْرَنْثِ سُواْجُواْجِ عَكَنْتَ، كُسَا دَوَكِ سُٻُلُّواْ كَمَرْ ڧُنْغِيَرْ ڢَارِ؞ 28 كُشِرْيَ أَلْعُمَّيْ سُيِ يَاڧِ دَ عِتَ، كُشِرْيَ سَرَاكُنَنْ مٜىٰدِيَاوَا، دَ ڠُومْنُواْنِنْسُ دَ دُكَنْ دَتَّاوَنْسُ، دَ كُواْوَثٜىٰ ڧَسَرْدَ تَكٜىٰ ڧَرْڧَشِنْ مُلْكِنْسُ؞ 29 ڧَسَرْ تَغِرْغِظَ، تَنَ ضَوَ سَبُواْدَ عَذَابَ، غَمَا يَهْوٜىٰهْ ذَيْثِكَ شِرِنْسَ عَكَنْ بَابِيلَ، شِرِ نَامَيْدَ عِتَ كُڢَيْ عِنْدَ بَابُ كُواْوَ؞ 30 مَاسُ عِيَ يَاڧِ نَ بَابِيلَ سُنْ دَيْنَ يَاڧِ، سُنَ ظَوْنٜىٰ عَثِكِنْ وُرَارٜىٰنْسُ نَكَتَنْغَ، ڧَرْڢِنْسُ يَڧَارٜىٰ، سُنْ ذَمَ كَمَرْ مَاتَا؞ أَنْ سَا وَوُرَارٜىٰنْ ذَمَنْ بَابِيلَ وُتَا، أَنْكَرْيَ سَنْدُنَنْ ڧَرْڢٜىٰ نَڧُواْڢُواْڢِنْ بِرْنِنْ؞ 31 یَنْ كَدَتَݣُونَ سُنَ تَبِنْ جُونَ، طَنْ عَيْكَ يَنَ بِنْ طَنْ عَيْكَ أَغُجٜىٰ، دُواْمِنْ سُكَيْوَ سَرْكِنْ بَابِيلَ سَڧُواْ ثٜىٰوَ أَنْكَامَ بِرْنِنْسَ عَكُواْوَنٜىٰ غٜىٰڢٜىٰ؞ 32 أَنْ ڨُوثٜىٰ دُكَنْ وُرَارٜىٰنْ ڧٜىٰتَرٜىٰ كُواْغِ، أَنْسَا وَڢَدَمُ وُتَا، سُواْجُواْجِ سُنْ ڢِرْغِتَ؞ 33 إِنْجِنِ يَهْوٜىٰهْ مَيْ ضُنْدُنَا، اللَّهْ نَ إِسْرَٰٓءِيلَ، ذُوثِيَاتَ بَابِيلَ كَمَرْ وُرِنْ بُغُنْ حَڟِنٜىٰ، عِنْدَ أَنْرِغَا أَنْشِرْيَ حَڟِ دُواْمِنْ عَبُغَ بَدَ دَطٜىٰوَبَ لُواْكَثِنْ بُغُنْ بَابِيلَ ذَيْذُواْ؞» تَيْمَكُوانْ يَهْوٜىٰهْ ذَيْ كَٰوُاْ سَا ذُوثِيَا 34 مُتَنٜىٰنْ عُرُوشَلِيمَ سُنْثٜىٰ، «سَرْكِے نٜىٰبُكَدْنٜىٰزَّرْ يَثِنْيٜىٰمُ، يَمُرْڧُشٜىٰمُ، يَهَطِيٜىٰمُ كَمَرْ يَدَّ دُواْدُوانْ ضُوَ يَكَنْيِ، يَثِكَ ثِكِنْسَ دَ عَبِنْثِ مَيْ دَاطِے؞ يَبَرْ تُكُنْيَ مَرَرْ كُواْمٜىٰ، يَوَنْكٜىٰ تُكُنْيَرْ سَرَيْ يَظُبَرْ؞» 35 بَرِ مَذَوْنَنْ سِهِيُواْنَ سُثٜىٰ، «اللَّهْ يَسَا ٻَرْنَرْ دَ بَابِيلَ تَيِ مِنِ دَ ظُرِيَاتَ تَكُواْمَ عَكَنْتَ!» بَرِ كُمَ مَذَوْنَنْ عُرُوشَلِيمَ سُثٜىٰ، «اللَّهْ يَسَا أَلْحَكِنْ جِنِنْمُ يَكُواْمَ عَكَنْ مَذَوْنَنْ كَلْدِيَ!» 36 إِنْجِ يَهْوٜىٰهْ، «حَڧِيڧَ، ذَنْ ڟَيَ مُكُ، إِنْ رَامَ مُكُ، ذَنْسَا تٜىٰكُنْ بَابِيلَ تَبُوشٜىٰ، ذَنْسَا مَٻُٻُّغَرْ ضُوَنْتَ سُشَنْيٜىٰ؞ 37 بَابِيلَ ذَاتَ ذَمَ تُلِنْ بُواْلَ، وُرِنْ ذَمَنْ كَرْنُكَنْ دَاجِ، أَبِنْ ڟُواْرُواْ دَ أَبِنْ جَنْ ڟَكِ عِنْدَ بَا كُواْوَ؞ 38 مُتَنٜىٰنْ بَابِيلَ ذَاسُيِ رُورِ كَمَرْ ذَاكُواْكِ، ذَاسُيِ كُوكَا كَمَرْ یَیَنْ ذَاكِ؞ 39 سَعَدَّ يُنْوَ تَكٜىٰ ثِنْيٜىٰسُ، ذَنْ شِمْڢِطَا مُسُ عَبِنْثِنْ بِكِ، إِنْسَا سُشَا سُبُغُ، حَرْ يَشَا كَنْسُ؞ ذَاسُ كُوَ شِغَ بَرْثِ، بَرْثِنْ دَ بَذَاسُ سَاكٜىٰ ڢَرْكَاوَا دَغَ ثِكِيبَ؞ 40 ذَنْ غَنْغَرَرْ دَسُو وُرِنْ يَنْكَ كَمَرْ یَنْ رَغُنَ دَ رَغُنَ دَ بُنْسُرَيْ؞ 41 «دُوبَ يَدَّ عَكَثِ بَابِيلَ دَ يَاڧِ، بَابِيلَ، أَبِنْ تَاڧَمَ غَ دُونِيَا دُكَ! أَنْ ڨُوثٜىٰ بَابِيلَ، تَذَمَ أَبِنْ ڟُواْرُواْ غَ سَوْرَنْ أَلْعُمَّيْ! 42 تٜىٰكُ تَتَاشِ تَرُڢٜىٰ بَابِيلَ، رَاڧُمَنْ ضُوَ مَاسُ هَوْكَ سُنْ رُڢٜىٰتَ؞ 43 غَرُرُوَنْتَ سُنْ ذَمَ كُڢَيْ، بُوسَشِّيَرْ ڧَسَا دَ كُمَ هَمَادَ، ڧَسَا عِنْدَ بَابُ مَيْ ذَمَ عَثِكِ، بَابُ كُمَ طَنْ أَدَمْ وَنْدَ ذَيْبِے تَثِكِنْتَ؞ 44 ذَنْحُكُنْتَ بٜىٰلْ اللَّهْنْ بَابِيلَ، ذَنْسَا بٜىٰلْ يَيِ أَمَنْ أَبِنْدَ يَهَطِيٜىٰ؞ أَلْعُمَّيْ بَذَاسُ سَاكٜىٰ غُدُ ذُوَا وُرِنْسَبَ؞ عِ، بَابُ شَكَّ كَتَنْغَرْ بَابِيلَ ذَاتَ رُشٜىٰ؞ 45 «يَا كُو مُتَنٜىٰنَ، كُڢِتَ دَغَ ثِكِنْ بَابِيلَ! كُواْوَ يَيِ غُدُنْ ڟِيرَرْ دَ رَنْسَ، كُغُدُ دَغَ ذَاڢِنْ ڢُشِنْ يَهْوٜىٰهْ! 46 كَدَ كُڢِدَّ ذُوثِيَا كُواْ كُجِڟُواْرُواْ سَبُواْدَ جِيتَ جِيتَرْ دَ عَكٜىٰجِ عَڧَسَرْ؞ جِيتَ جِيتَرْ وَنَّنْ شٜىٰكَرَا دَبَمْ، نَوَنْثَنْ شٜىٰكَرَا كُمَ دَبَمْ، جِيتَ جِيتَرْ تَاشِنْ حَنْكَلِ عَڧَسَرْ، وَنَّنْ سَرْكِے يَتَاشِ غَابَادَ وَنْثَنْ سَرْكِے؞ 47 «حَڧِيڧَ، ݣُونَكِے سُنَ ذُوَا عِنْدَ ذَنْ حُكُنْتَ غُمَكَنْ بَابِيلَ؞ دُكَنْ ڧَسَرْ بَابِيلَ، ذَاعَ كُنْيَتَرْ دَ عِتَ، مُتَنٜىٰنْتَ ذَاسُ ݣُونْتَ مَتَتُّو كُواْعِنَ عَڧَسَرْ؞ 48 سَمَ دَ ڧَسَا دَ دُكَنْ أَبِنْدَ يَكٜىٰ ثِكِنْسُ ذَاسُيِ إِيهٌ ڢَضٍ ثِكِ، غَمَا مَاسُ هَلَّكَ ذَاسُذُواْ مَتَ دَغَ أَرٜىٰوَ؞ نِے يَهْوٜىٰهْ نَا ڢَطَا؞ 49 عِ، بَابِيلَ ذَاتَ ڢَاطِ، سَبُواْدَ مُتَنٜىٰنْ إِسْرَٰٓءِيلَ وَطَنْدَ تَكَشٜىٰ، يَدَّ دُكَنْ وَطَنْدَ عَكَ كَشٜىٰ عَدُونِيَا، سُكَ ڢَاطِ تَوُرِنْ بَابِيلَ؞ 50 كُو مَاسُ غُدُنْ ڟِيرَا دَغَ تَكُواْبِے، كُغُدُ! كَدَ كُڟَيَ! كُتُنَ دَ يَهْوٜىٰهْ، كُواْدَيَكٜىٰ كُنَ عَڧَسَا مَيْ نِيسَ، كُكُمَيِ تَتُنَاوَ دَ عُرُوشَلِيمَ؞» 51 «مُو مُتَنٜىٰنْ يَهُودَ مُنْ شَا كُنْيَا، غَمَا أَنَ ذَاغِنْمُ، كُنْيَا تَارُڢٜىٰ ڢُسْكُواْكِنْمُ، غَمَا بَاڧِ سُنْ شِغَ ثِكِنْ وُرَارٜىٰ مَاسُ ڟَرْكِے نَغِدَنْ يَهْوٜىٰهْ!» 52 «حَڧِيڧَ، ݣُونَكِے سُنَ ذُوَا عِنْدَ ذَنْ حُكُنْتَ غُمَكَنْ بَابِيلَ، كُواْعِنَ عَڧَسَرْتَ كُمَ مَاسُ رَوْنِ ذَاسُيِ نِيشِ؞ نِے يَهْوٜىٰهْ نَا ڢَطَا؞ 53 كُواْ دَ بَابِيلَ ذَاتَ هَوْ سَمَانِيَ، تَغِنَ كَتَنْغَ مَيْ ڧَرْڢِے عَثَنْ، دُكْدَهَكَ ذَنْ عَيْكَ مَتَ دَ مَاسُ هَلَّكَرْوَ؞ نِے يَهْوٜىٰهْ نَا ڢَطَا؞» ثِكَكِّيَرْ ڢَاطُوَرْ بَابِيلَ 54 «جِ! مُرْيَرْ كُوكَا دَغَ بَابِيلَ، ڧَارَرْ بَبَّرْ هَلَّكَ دَغَ ڧَسَرْ كَلْدِيَاوَا! 55 غَمَا نِے يَهْوٜىٰهْ ذَنْ هَلَّكَ بَابِيلَ، إِنَ كُمَ كَٰوُاْ ڧَرْشٜىٰنْ ڧَارَرْ مُرْيَرْتَ؞ ڧَارَرْ ذُوَانْ سُواْجُواْجِنْ أَبُواْكَنْ غَابَنْتَ كَمَرْ رُورِنْ رَاڧُمَنْ ضُوَ نٜىٰ، أَنَجِنْ مُرْيُواْيِنْسُ كُواْعِنَ؞ 56 مَيْ هَلَّكَرْ دَ بَابِيلَ يَنَ ذُوَا مَتَ، أَنَ كَكَّامَ سُواْجُواْجِنْتَ، أَنَ كُمَ كَكَّرْيَ دُكَنْ بَكَنْسُ؞ غَمَا نِے يَهْوٜىٰهْ مَيْ رَامُوَنٜىٰ، ذَنْ كُوَ سَاكَ ثِكَكّٜىٰ؞ 57 ذَنْسَا شُوغَبَنِّنْتَ دَ مَاسُ حِكِمَرْتَ، دَ ڠُومْنُواْنِنْتَ دَ دَتَّاوَنْتَ دَ سُواْجُواْجِنْتَ، سُشَا سُبُغُ، ذَاسُ شِغَ بَرْثِ، بَرْثِنْ دَ بَذَاسُ سَاكٜىٰ ڢَرْكَاوَا دَغَ ثِكِيبَ؞ نِے سَرْكِے مَيْ سُونَ يَهْوٜىٰهْ مَيْ ضُنْدُنَا نَا ڢَطَا؞ 58 كَتَنْغَ مَيْ ڢَاطِنَّنْ نَ بَابِيلَ، ذَاعَ رُشٜىٰتَ حَرْ ڧَسَا، ڧُواْڢُواْڢِنْتَ مَاسُ ڟَيِنَّنْ، ذَاعَ ڧُواْنٜىٰ دَ وُتَا؞ ڧُواْڧَرِنْ مُتَنٜىٰنْتَ ذَيْ ذَمَ عَبَنْظَ، ڧَبِيلُنْ دُونِيَا ذَاسُ غَاجِيَرْ دَ كَنْسُ عَبَنْظَ، غَمَا وُتَا ذَاتَ ثِنْيٜىٰ؞» إِرْمِيَ يَعَيْكَ دَ سَڧُواْ ذُوَا بَابِيلَ 59 غَا عُمَرْنَنْ دَ أَنَّبِے إِرْمِيَ يَبَا سٜىٰرَيَ طَنْ نٜىٰرِيَ جِيكَنْ مَعَسٜىٰيَ أَ شٜىٰكَرَا تَهُطُ تَمُلْكٍ سَرْكِے صَدِڧِيَ نَ يَهُودَ؞ سٜىٰرَيَ كُوَ يَتَڢِے بَابِيلَ تَرٜىٰدَ سَرْكِے صَدِڧِيَ؞ عَتَڢِيَرْ نَنْ، سٜىٰرَيَ شِينٜىٰ مَيْ لُورَ دَ وُرَارٜىٰنْ سَوْكَ دَ كُمَ عَبِنْثِ؞ 60 دَا مَا إِرْمِيَ يَارِغَا يَرُبُوتَ عَثِكِنْ نَطَطّٜىٰنْ لِتَّڢِ دُكَنْ مَسِيڢَرْ دَ ذَاتَ ڢَرُ دَ بَابِيلَ، وَتُواْ دُكَنْ مَغَنَرْ نَنْ دَ عَكَ رُبُوتَ غَمٜىٰدَ بَابِيلَ؞ 61 سَيْ إِرْمِيَ يَثٜىٰ وَ سٜىٰرَيَ «سَعَدَّ كَكَيْ بَابِيلَ، كَتَبَّتَرْ ثٜىٰوَ كَكَرَنْتَ دُكَنْ سَڧُواْنَّنْ كُواْوَ يَنَ جِ؞ 62 كَثٜىٰ، ‹يَا يَهْوٜىٰهْ، كَيْ كَيِ مَغَنَ غَمٜىٰدَ وَنَّنْ وُرِے ثٜىٰوَ ذَاعَ كَوَرْ دَشِ، حَرْ بَا أَبِنْدَ ذَيْ ذَوْنَ عَثِكِ، كُواْ مُتُمْ، كُواْ دَبَّ؞ وُرِنْ ذَيْ ذَمَ كُڢَيْ حَرْ أَبَدَا؞› 63 بَايَنْدَ كَڧَارٜىٰ كَرَنْتَ نَطَطّٜىٰنْ لِتَّڢِنْ، سَيْ كَطَوْرَ مَسَ دُوڟٜىٰ، كَجٜىٰڢَرْ دَشِ ثِكِنْ كُواْغِنْ يُڢِرٜىٰتِسْ؞ 64 سَعَنً كَثٜىٰ، ‹حَكَ بَابِيلَ ذَاتَ نُڟٜىٰ، بَذَاتَ ڧَارَ تَاشِبَ سَبُواْدَ مَسِيڢَرْ دَ يَهْوٜىٰهْ ذَيْ كَٰوُاْ مَتَ؞ مُتَنٜىٰنْتَ كُوَ ذَاسُمُتُ؞› » وَنَّنْ شِينٜىٰ ڧَرْشٜىٰنْ كَلْمُواْمِنْ أَنَّبِے إِرْمِيَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria