إِرْمِيَ 50 - أَتَّوْرَتْ دَ أَنَّبَاوَاسَڧُواْ غَمٜىٰدَ بَابِيلَ 1 غَا سَڧُوانْ دَ يَهْوٜىٰهْ يَڢَطَا وَ أَنَّبِے إِرْمِيَ غَمٜىٰدَ بَابِيلَ، غَمٜىٰدَ ڧَسَرْ كَلْدِيَاوَا؞ 2 إِنْجِ يَهْوٜىٰهْ، «كُسَنَرْوَ أَلْعُمَّيْ، كُيِ شٜىٰلَ، كُتَادَ تُوتَ، كُيِ شٜىٰلَ، كَدَ كُٻُواْيٜىٰ وَنِ أَبُ عَمَّا كُثٜىٰ، ‹أَنْثِ بَابِيلَ دَ يَاڧِ، أَنْ كُنْيَتَرْدَ اللَّهْنْتَ بٜىٰلْ، أَنْ رُشٜىٰ غُنْكِنْتَ مٜىٰرُواْدَكْ، أَنْ كُنْيَتَرْدَ غُمَكَنْتَ، أَنْكُمَ رُشٜىٰ صِڢُّواْڢِنْتَ!› 3 دَغَ أَرٜىٰوَ وَتَ أَلْعُمَّ تَڢَاطَ مَتَ دَ يَاڧِ، تَمَيْدَ بَابِيلَ كُڢَيْ، بَابُ مُتُمِنْ دَ ذَيْ ذَوْنَ أَوُرِنْ؞ طَنْ ءَادَمُ دَ دَبَّ دُكْ ذَاسُ غُدُ، كُواْوَ ذَيْڢِتَ يَبَرْتَ؞» أَݣَويْ سَا ذُوثِيَا دُواْمِنْ إِسْرَٰٓءِيلَ دَ يَهُودَ 4 «إِنْجِنِ يَهْوٜىٰهْ، عَݣُونَكِنْنَنْ دَ لُواْكَثِنَّنْ، مُتَنٜىٰنْ إِسْرَٰٓءِيلَ دَ مُتَنٜىٰنْ يَهُودَ، تَرٜىٰ ذَاسُذُواْ وُرِينَ، دَ كُوكَا ذَاسُذُواْ سُنٜىٰمٜىٰنِ، نِے يَهْوٜىٰهْ اللَّهْ نْسُ؞ 5 ذَاسُ تَمْبَيِ حَنْيَرْ سِهِيُواْنَ، ذَاسُ جُويَا ڢُسْكَرْسُ ذُوَا وُرِنْ؞ ذَاسُذُواْ سُمَنّٜىٰوَ يَهْوٜىٰهْ ثِكِنْ يَرْجٜىٰجٜىٰنِيَ تَهَرْ أَبَدَا وَدَّ بَذَاعَ تَٻَ مَنْتَاوَابَ؞ 6 «مُتَنٜىٰنَ كَمَرْ تُمَكِنْ دَ سُكَ ٻَتَ نٜىٰ، وَطَنْدَ مَكِيَايَنْسُ سُكَسَا سُنْ ٻَتَ؞ مَكِيَايَنْسُ سُكَ بَرْسُ سُيِ يَٰوُاْ عَتُدَّيْ، تُمَكِينَ سُنَ يَٰوُاْ بَرْكَتَيْ عَثِكِنْ تُدَّيْ، سُنْ مَنْتَادَ وُرِنْ هُوتُنْسُ؞ 7 دُكَنْ وَطَنْدَ سُكَ سَامٜىٰسُ، سَيْ سُكَ ثِنْيٜىٰسُ، أَبُواْكَنْ غَابَنْسُ سُكَثٜىٰ، ‹بَمُيِ لَيْڢِے بَ، غَمَا سُنْيِ وَ يَهْوٜىٰهْ ذُنُوبِ نٜىٰ، يَهْوٜىٰهْ وَنْدَ شِينٜىٰ عَيْنِحِنْ وُرِنْ كِيوُانْسُ، يَهْوٜىٰهْ وَنْدَ شِينٜىٰ سَا ذُوثِيَا نَكَاكَنِّنْسُ؞› 8 «يَا مُتَنٜىٰنَ، كُغُدُ كُبَرْ بَابِيلَ، كُڢِتَ كُمَ دَغَ ثِكِنْ ڧَسَرْ كَلْدِيَاوَا، كُذَمَ كَمَرْ بُنْسُرَيْ وَطَنْدَ سُكَجَا غَبَنْ غَرْكٜىٰ؞ 9 غَاشِ، ذَنْتَادَ تَارُوانْ مَنْيَنْ أَلْعُمَّيْ، دَغَ أَرٜىٰوَ ذَاسُذُواْ سُڢَاطَوَ بَابِيلَ؞ ذَاسُ جٜىٰرَ كَنْسُ دُواْمِنْ ڢَارَ يَاڧِ غَابَادَ عِتَ، ذَاسُ كُوَ ثِنْيٜىٰتَ؞ كِبِيُواْيِنْسُ كَمَرْ نَمَاسُ عِيَ يَاڧِ نٜىٰ، وَطَنْدَ بَسُ كُواْمُواْوَ حَنُّ وُاْڢِ دَغَ يَاڧِ؞ 10 بَابِيلَ ذَاتَ ذَمَ رَبُوانْ دَ عَكَ ڨُوثٜىٰ عَيَاڧِ، دُكْ وَطَنْدَ سُكَ ڨُوثٜىٰ تَا كُوَ ذَاسُ ڧُواْشِ؞ نِے يَهْوٜىٰهْ نَا ڢَطَا؞» تَبَّثِنْ ڢَاطُوَرْ بَابِيلَ 11 «يَا كُو مُتَنٜىٰنْ بَابِيلَ، كُنْيِ مُرْنَ كُنْيِ ڢَضٍ ثِكِ، سَعَدَّ كُكَ ݣُوشٜىٰ مُتَنٜىٰنْ غَادُواْنَ، حَرْ كُنَ ڟَلّٜىٰ كَمَرْ یَرْ سَانِيَ أَوُرِنْ كِيوُاْ، كُنَ كُمَ كُوكَا كَمَرْ مَنْيَنْ دَوَكِ؞ 12 سَبُواْدَ حَكَ، ذَاعَ كُنْيَتَرْ دَ بَابِيلَ، وَدَّ تَكٜىٰ كَمَرْ مَامَرْكُ، ذَاعَ ڧَسْڧَنْتَرْ دَ عِتَ وَدَّ تَحَيْڢٜىٰكُ؞ غَاشِ، بَابِيلَ مَڢِے ڧَنْڧَنْتَ ثٜىٰ عَثِكِنْ أَلْعُمَّيْ، تَذَمَ هَمَادَ، بُوسَشِّيَرْ ڧَسَا، دَاجِ كُمَ عِنْدَ بَابُ كُواْوَ؞ 13 سَبُواْدَ ڢُشِنْ يَهْوٜىٰهْ، بَابِيلَ ذَاتَ ذَمَ وُرِنْ دَ بَاوَنْدَ ذَيْ ذَوْنَ عَثِكِ، ذَاتَذَمَ كُڢَيْ سُواْسَيْ؞ دُكْ وَنْدَ يَبِے تَوَجٜىٰنْ بَابِيلَ، ذَيْ رَسَ أَبِنْ ڢَطَا، ذَيْ كُمَجَا ڟَكِ سَبُواْدَ مَسِيڢَرْ دَ تَسَامٜىٰتَ؞ 14 «يَا كُو مَاسُ ڢَطَ دَ بَكَ، دُكَنْكُ كُجٜىٰرَ كَنْكُ كٜىٰوَيٜىٰ دَ بَابِيلَ؞ كُهَرْبٜىٰتَ، كَدَ كُضَغٜىٰ كِبِيَرْكُ، غَمَا تَايِ وَ يَهْوٜىٰهْ ذُنُوبِ؞ 15 كُكٜىٰوَيٜىٰتَ دَ إِيهٌ يَاڧِ! تَا طَغَ حَنُّنْ نٜىٰمَنْ سَلَمَ، غِنٜىٰ غِنٜىٰنْتَ مَاسُ ڟَيِ سُنْڢَاطِ، أَنْرُشٜىٰ كَتَنْغَرْتَ؞ غَمَا وَنَّنْ رَامُوَثٜىٰ تَ يَهْوٜىٰهْ، عَيِ رَامُوَا، عَيِ مَتَ كَمَرْ يَدَّ تَيِ؞ 16 عَكَوَرْدَ مَاسُ شُوكَ دَغَ بَابِيلَ، عَكَوَرْدَ مَاسُ يِنْ أَمْڢَانِ دَ لَوْجٜىٰ أَغِرْبِے؞ سَبُواْدَ ڟُواْرُوانْ تَكُواْبِنْ أَبُواْكَنْ غَابَا، كُواْوَ ذَيْ كُواْمَ وُرِنْ مُتَنٜىٰنْسَ، كُواْوَ ذَيْ غُدُ ذُوَا ڧَسَرْسَ؞» أَݣَويْ سَا ذُوثِيَا دُواْمِنْ مُتَنٜىٰنْ يَهْوٜىٰهْ 17 «إِسْرَٰٓءِيلَاوَا كَمَرْ تُمَكِنْ دَ سُكَ وَڟٜىٰ نٜىٰ، وَطَنْدَ ذَاكُواْكِ سُكَ كُواْرَ؞ دَ ڢَرْكُواْ سَرْكِنْ أَسُّرِيَ نٜىٰ يَثِنْيٜىٰسُ، عَڧَرْشٜىٰ كُمَ سَرْكِے نٜىٰبُكَدْنٜىٰزَّرْ نَ بَابِيلَ يَكَكَّرْيٜىٰ ڧَسُسُوَنْسُ؞ 18 «إِنْجِنِ يَهْوٜىٰهْ مَيْ ضُنْدُنَا، اللَّهْ نَ إِسْرَٰٓءِيلَ، حَڧِيڧَ ذَنْ حُكُنْتَ سَرْكِنْ بَابِيلَ دَ ڧَسَرْسَ، كَمَرْ يَدَّ نَحُكُنْتَ سَرْكِنْ أَسُّرِيَ؞ 19 عَمَّا ذَنْ دَاوُاْ دَ إِسْرَٰٓءِيلَاوَا وُرِنْ كِيوُانْسُ، ذَاسُيِ كِيوُاْ عَبَبَّنْ تُدُنْ كَرْمٜىٰلْ، سُيِ كِيوُاْ عَيَنْكِنْ بَشَنْ، عَيَنْكِنْ تُدَّيْ نَ إِڢْرَيِمْ دَ يَنْكِنْ غِلٜىٰيَدْ ذَاسُثِ سُڧُواْشِ؞ 20 عَݣُونَكِنْنَنْ دَ لُواْكَثِنَّنْ، ذَاعَ نٜىٰمِ لَيْڢِنْ إِسْرَٰٓءِيلَ، عَمَّا بَذَاعَسَامُبَ، ذَاعَ كُمَ نٜىٰمِ ذُنُبَنْ يَهُودَ، عَمَّا بَذَاعَسَامُبَ؞ غَمَا نِے يَهْوٜىٰهْ ذَنْ غَاڢَرْتَا وَضَغُواْوَرْدَ نَبَرْسُ دَ رَيْ؞ نِے يَهْوٜىٰهْ نَا ڢَطَا؞» حُكُنْثِنْ ڢَاطُوَرْ بَابِيلَ 21 إِنْجِ يَهْوٜىٰهْ، «أَ هَوْرَ ڧَسَرْ مٜىٰرَتَيِمْ، أَ ڢَاطَ مَتَ دَ يَاڧِ، أَ ڢَاطَوَ مَذَوْنَنْ ڢٜىٰكُوادْ دَ يَاڧِ؞ عَبِيسُ، عَكَشٜىٰسُ، أَ هَلَّكَرْ دَسُو كَكَڢْ؞ عَيِ دُكَنْ أَبِنْدَ نَعُمَرْتَ؞ نِے يَهْوٜىٰهْ نَا ڢَطَا؞ 22 جِ هَيَانِيَرْ يَاڧِ، دَ تَبَبَّرْ هَلَّكَ عَڧَسَرْ! 23 دُوبَ يَدَّ عَكَ كَكَّرْيَ بَابِيلَ، أَنْكَوَرْدَ غُدُمَرْ دَ تَبُغِ دُكَنْ دُونِيَا أَدَا! هَلَّكَرْتَ تَذَمَ أَبِنْ ڟُواْرُواْ غَ سَوْرَنْ أَلْعُمَّيْ! 24 كٜىٰ بَابِيلَ، نِے يَهْوٜىٰهْ نَسَا مِكِ تَرْكُواْ، تَرْكُوانْ كُمَ يَكَامَكِ، بَاتَرٜىٰدَ سَنِنْكِبَ؞ أَنْسَامٜىٰكِ أَنْكَامَكِ، غَمَا كِنْيِ غَابَادَنِے؞ 25 نِے يَهْوٜىٰهْ نَبُوطٜىٰ طَاكِنْ أَجِيَرْ كَايَنْ يَاڧِنَ، ثِكِنْ ڢُشِنَ نَڢِتَرْدَ كَايَنْ ڢَطَ؞ غَمَا نِے عُبَنْغِجِ يَهْوٜىٰهْ مَيْ ضُنْدُنَا إِنَدَ عَيْكِنْ دَ ذَنْيِ عَڧَسَرْ كَلْدِيَاوَا؞ 26 «أَ ذُواْ أَ ڢَاطَ مَتَ دَغَ كُواْوَنٜىٰ غٜىٰڢٜىٰ، عَٻَلّٜىٰ ضُمْبُنَنْتَ، أَ مَيْدَ عِتَ كَمَرْ تُلِنْ حَڟِ؞ أَ هَلَكَاتَ غَبَاطَيَ، كَدَ وَنِ أَبُ نَاتَ يَضَغٜىٰ؞ 27 عَيَيَّنْكَ دُكَنْ ڠُونَيٜىٰنْ يَاڧِنْتَ، كَمَرْ بِجِمَنْ دَ عَكَ غَنْغَرَرْ دَسُو وُرِنْ يَنْكَ! كَيْتُوانْسُ! غَمَا رَانَرْسُ تَذُواْ، رَانَرْ حُكُنْثِنْسُ تَ إِسُواْ؞ 28 جِمُواْڟِنْ مَاسُ غُدُنْ ڟِيرَا دَغَ ڧَسَرْ بَابِيلَ! عَيِ شٜىٰلَ أَ سِهِيُواْنَ، شٜىٰلَرْ رَامُوَرْ يَهْوٜىٰهْ اللَّهْ نْمُ عَكَنْ بَابِيلَ، رَامُوَا سَبُواْدَ أَنْرُشٜىٰ هَيْكَلِنْسَ؞ 29 «عَكِرَا مَاسُ ڢَطَ دَ بَكَ سُذُواْ سُڢَاطَوَ بَابِيلَ، دُكَنْ مَاسُ يَاڧِ دَ بَكَ سُكٜىٰوَيٜىٰ بَابِيلَ؞ كَدَ عَيَرْدَ وَنِ يَڟِيرَا؞ أَ يِ رَامُوَا عَكَنْتَ بِسَغَ أَيُّكَنْتَ، عَيِمَتَ دَيْدَيْ يَدَّ تَعَيْكَتَ، غَمَا تَايِ وَ يَهْوٜىٰهْ رٜىٰنِ، شِے وَنْدَ يَكٜىٰ مَيْ ڟَرْكِے نَ إِسْرَٰٓءِيلَ؞ 30 حَڧِيڧَ، سَمَارِنْتَ ذَاسُ مُتُ أَ ڢِيلِنْ غَرِ، دُكَنْ سُواْجُواْجِنْتَ كُمَ ذَاعَ كَشٜىٰسُ أَ رَانَرْ نَنْ؞ نِے يَهْوٜىٰهْ نَا ڢَطَا؞ 31 «كٜىٰ بَابِيلَ، غَاشِ، إِنَ غَابَادَكٜىٰ، كٜىٰ مَيْ غِرْمَنْ كَيْ؞ غَمَا رَانَرْكِ تَذُواْ، رَانَرْ دَ ذَنْ حُكُنْتَكِ؞ نِے عُبَنْغِجِ يَهْوٜىٰهْ مَيْ ضُنْدُنَا نَا ڢَطَا؞ 32 كٜىٰ مَيْ غِرْمَنْ كَيْ، ذَاكِيِ تُنْتُٻٜىٰ كِڢَاطِ، بَ كُوَ وَنْدَ ذَيْ تَاشٜىٰكِ؞ ذَنْ ڧُواْنٜىٰ غَرُرُوَنْكِ دَ وُتَا، وُتَرْ ذَاتَثِنْيٜىٰ دُكَنْ أَبِنْدَ يَكٜىٰ كٜىٰوَيٜىٰ دَكٜىٰ؞» 33 إِنْجِ يَهْوٜىٰهْ مَيْ ضُنْدُنَا، «أَنْيِ وَمُتَنٜىٰنْ إِسْرَٰٓءِيلَ دَنِّيَ، أَنْكُمَيِ وَمُتَنٜىٰنْ يَهُودَ دَنِّيَ؞ دُكَنْ وَطَنْدَ سُكَ كَامَسُ، سُنْ رِڧٜىٰسُ بَايِ دَ ڧَرْڢِے، بَسُ يَرْدَ مُسُ سُتَڢِبَ؞ 34 مَيْ ڢَنْسَرْسُ مَيْ ڧَرْڢِينٜىٰ، يَهْوٜىٰهْ مَيْ ضُنْدُنَا نٜىٰ سُونَنْسَ؞ حَڧِيڧَ ذَيْ ڟَيَ مُسُ دُواْمِنْ يَكَٰوُاْ وَ مَذَوْنَنْ بَابِيلَ رَشِنْ سَلَمَ، يَكَٰوُاْ وَ سَوْرَنْ ڧَسَاشٜىٰنْ دُونِيَا سَلَمَ؞» 35 إِنْجِ يَهْوٜىٰهْ، «تَكُواْبِنْ يَاڧِ عَكَنْ كَلْدِيَاوَا! هَلَّكَ غَ مَذَوْنَنْ بَابِيلَ، دَ شُوغَبَنِّنْسُ دَ مَاسُ حِكِمَرْسُ! 36 تَكُواْبِنْ يَاڧِ عَكَنْ مَاسُ دُوبَا، دُواْمِنْ أَ نُونَ أَ ڢِيلِ سُو وَاوَايٜىٰنٜىٰ! تَكُواْبِنْ يَاڧِ عَكَنْ سُواْجُواْجِنْسُ، دُواْمِنْ سُڢِرْغِتَ سُواْسَيْ! 37 تَكُواْبِنْ يَاڧِ عَكَنْ دَوَكِنْسُ، دَ كٜىٰكُنَنْ دُواْكِنْسُ! تَكُواْبِنْ يَاڧِ عَكَنْ دُكَنْ سُواْجُواْجِنْ هَيَرْسُ، دُواْمِنْ سُذَمَ كَمَرْ مَاتَا! تَكُواْبِنْ يَاڧِ عَكَنْ طَكُنَنْ أَجِيَرْ دُوكِيَرْسُ، دُواْمِنْ عَكْوَاشٜىٰسُ رَبُوانْ يَاڧِ! 38 رَشِنْ ضُوَ عَكَنْ وُرَارٜىٰنْ ضُوَيٜىٰنْسُ، دُواْمِنْ رَاڢُڢُّكَ سُبُوشٜىٰ! غَمَا ڧَسَرْ تَثِكَ دَ غُمَكَ، غُمَكَنْ سُنْ مَيْدَ مُتَنٜىٰنْتَ وَوَيٜىٰ! 39 «بَذَاعَ ڧَارَ سَامُنْ مُتَنٜىٰ مَاسُ ذَمَ عَثِكِنْ بَابِيلَ بَ؞ بَذَاعَ سَامِ كُواْمٜىٰبَ سَيْدَيْ نَمُواْمِنْ دَاجِ دَ كُرَايٜىٰ دَ جِمِنُ، ذَاتَ ذَمَ كُڢَيْ حَرْ دُكَنْ ذَامَانَيْ؞ 40 كَمَرْ يَدَّ اللَّهْ يَهَلَّكَرْ دَ سُواْدُوامْ دَ غُواْمُواْرَ، دَ غَرُضُوً دَسُكٜىٰ كُسَدَسُو، حَكَ ذَاعَ هَلَّكَرْ دَ بَابِيلَ؞ بَابُوَنْدَ ذَيْ ذَوْنَ ثِكِنْتَ، بَابُ طَنْ أَدَمْ وَنْدَ ذَيْ ضَغٜىٰ أَوُرِنْ؞ نِے يَهْوٜىٰهْ نَا ڢَطَا؞ 41 «غَاشِ، وَتَ ڧَبِيلَ تَنَ ذُوَا دَغَ أَرٜىٰوَ، ذَاعَ تَادَ بَبَّرْ أَلْعُمَّ تَرٜىٰدَ سَرَاكُنَ دَغَ إِيَاكَرْ دُونِيَا دُواْمِنْ يَاڧِ؞ 42 سُنَ رِڧٜىٰ دَ بَكَ دَ مَاشِ، مَرَسَ جِنْڧَيْ نٜىٰ مَرَسَ تَوْسَيِ؞ ڧَارَرْ مُواْڟِنْسُ كَمَرْ ڧَارَرْ ضُوً تٜىٰكُ نٜىٰ؞ سُنَ تَڢِيَ عَكَنْ دَوَكِ، سُنَ أَشِرْيٜىٰ دَ نُڢِ طَيَ، دُواْمِنْ سُيِ يَاڧِ دَكٜىٰ، يَا كٜىٰ ذُوثِيَاتَ بَابِيلَ! 43 سَرْكِنْ بَابِيلَ يَجِ رَهُواْتُوانْ أَبُواْكَنْ غَابَنْسُ، حَنُّوَنْسَ سُكَ مُتُ؞ عَذَابَ تَكَامَشِ، ذَاڢِ إِرِنَّمَثٜىٰ مَيْ نَڧُدَ؞ 44 «كَمَرْ يَدَّ ذَاكِ يَكَنْ ٻُلُّواْ دَغَ ثِكِنْ كُرْمِ نَبَاكِنْ كُواْغِنْ يُواْدَنْ يَكُمَ كُواْرِ غَرْكٜىٰنْ تُمَكِ دَغَ ڢِيلِنْ كِيوُاْ، حَكَ ذَنْ ٻُلُّواْ إِنْ كُواْرِ بَابِيلَ ڢَرَتْ طَيَ دَغَ ڧَسَرْتَ؞ شُوغَبَنْدَ ذَنْ ذَاٻَا، شِے ذَيْ يِمُلْكِنْتَ؞ غَمَا وَنٜىٰنٜىٰ كَمَرْنِ؟ وَ كُمَ ذَيْ عِيَيِنْ ڧَارَتَ؟ إِنَا مَكِيَايِنْ دَ ذَيْ عِيَ ڟَيَاوَا يَيِ غَابَادَنِے؟ 45 «سَبُواْدَ حَكَ، كُجِ شِرِنْدَ نِے يَهْوٜىٰهْ نَكٜىٰيِ غَمٜىٰدَ بَابِيلَ دَ أَبِنْدَ نَكٜىٰ نُڢِ عَكَنْ ڧَسَرْ كَلْدِيَاوَا؞ «لَلَّيْ ذَاعَ تَڢِے دَ ڧَنَانَا نَغَرْكٜىٰنْ تُمَكِ، لَلَّيْ وُرِنْ كِيوُانْسُ ذَيْ ذَمَ أَبِنْ ڟُواْرُواْ، سَبُواْدَ ذَاعَ ݣُوشِ مُتَنٜىٰ كَمَرْ تُمَكِ؞ 46 ڧَارَرْ ڢَاطُوَرْ بَابِيلَ ذَاتَسَا ڧَسَا تَغِرْغِظَ، ذَاعَ كُمَجِ إِيهُنْتَ ثِكِنْ دُكَنْ أَلْعُمَّيْ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria