إِرْمِيَ 46 - أَتَّوْرَتْ دَ أَنَّبَاوَاسَڧُواْ غَمٜىٰدَ أَلْعُمَّيْ 1 غَا مَغَنَرْ دَ يَهْوٜىٰهْ يَڢَطَا وَ أَنَّبِے إِرْمِيَ غَمٜىٰدَ أَلْعُمَّيْ؞ سَڧُواْ نَڢَرْكُواْ غَمٜىٰدَ مَصَرْ 2 غَا سَڧُواْ غَمٜىٰدَ ڧَسَرْ مَصَرْ؞ أَ شٜىٰكَرَا تَهُطُ تَمُلْكٍ سَرْكِے يٜىٰهُواْيَكِمْ طَنْ يُواْسِيَا نَ يَهُودَ، سَرْكِے نٜىٰبُكَدْنٜىٰزَّرْ نَ بَابِيلَ يَثِ نَصَرَا عَكَنْ سَرْكِے ڢِرْعَوْنَ نٜىٰكُواْ نَ مَصَرْ دَ سُواْجُواْجِنْسَ؞ وَنَّنْ يَڢَرُ نٜىٰ أَ كَرْكٜىٰمِشْ كُسَدَ كُواْغِنْ يُڢِرٜىٰتِسْ؞ غَا مَغَنَرْ يَهْوٜىٰهْ غَمٜىٰدَ سُواْجُواْجِنْ مَصَرْ؞ 3 شُوغَبَنِّنْ سُواْجُواْجِنْ مَصَرْ سُكَيِ إِيهُ سُكَثٜىٰ، «كُشِرْيَ غَرْكُوَرْكُ، مَنْيَ دَ ڧَنَانَا، كُشِرْيَ ڢِتُواْوَ دُواْمِنْ يَاڧِ! 4 كُشِرْيَ دَوَكِ دُواْمِنْ سُجَا كٜىٰكٜىٰنْ يَاڧِ، كُهَوْ دَوَكِنْكُ! كُسَا هُولُنَنْكُ نَڧَرْڢٜىٰ، كُڟَيَ عَكَنْ لَيِنْ يَاڧِ! كُوَاسَ مَاسُنْكُ! كُسَا كَايَنْكُ نَيَاڧِ!» 5 يَهْوٜىٰهْ يَايِ تَمْبَيَ يَثٜىٰ، «مٜىٰ نَكٜىٰ غَنِ؟ سُنَ جِنْ ڟُواْرُواْ، سُنَ جَا بَايَ، أَنْثِ سُواْجُواْجِنْسُ، سُكَ غُدُ دَ سَوْرِ، بَسُ كُواْ وَيْوَيَ بَايَبَ، غَمَا ڟُواْرُواْ يَرُڢٜىٰسُ عَكُواْوَنٜىٰ غٜىٰڢٜىٰ؞ 6 مَيْ عِيَ غُدُ بَذَيْ ڟِيرَا بَ، ڠُونِنْ يَاڧِ كُمَ بَذَيْ كُٻُتَبَ؞ ذَاسُيِ تُنْتُٻٜىٰ سُڢَاطِ، أَغٜىٰڢٜىٰنْ كُواْغِنْ يُڢِرٜىٰتِسْ عَ أَرٜىٰوَ؞ 7 «وَنٜىٰنٜىٰ وَنَّنْ مَيْ تَاسُواْوَ كَمَرْ ضُوً كُواْغِنْ نِلُ، كَمَرْ كُواْغُنَنْ دَ ضُوَنْسُ سُكٜىٰ أَمْبَلِيَ؟ 8 مَصَرْ ثٜىٰ تَكٜىٰ تَاسُواْوَ كَمَرْ كُواْغِنْ نِلُ، كَمَرْ كُواْغُنَنْ دَ ضُوَنْسُ سُكٜىٰ أَمْبَلِيَ؞ مَصَرْ تَثٜىٰ، ‹ذَنْ تَاشِ إِنْ رُڢٜىٰ دُكَنْ دُونِيَا، ذَنْ رُشٜىٰ بِرَنٜىٰ دَ دُكَنْ مَذَوْنَنْسُ؞› 9 يِغَبَ، يَا كُو مَاسُ هَوَنْ دَوَكِ، كُشِغَ دَ ذَاڢِ، كُو مَاسُ تُوڧِنْ كٜىٰكُنَنْ دُواْكِ! كُو سُواْجُواْجِ مَاسُ عِيَ يَاڧِ، كُيِ غَبَ! سُواْجُواْجِنْ إِتِيُواْڢِيَ دَ نَ ڢُتْ مَاسُ رِڧٜىٰ غَرْكُوَ، سُواْجُواْجِنْ لُدْ مَاسُ عِيَ يَاڧِ دَ بَكَ، كُيِ غَبَ! 10 غَمَا رَانَرْ نَنْ رَانَ ثٜىٰ تَ عُبَنْغِجِ يَهْوٜىٰهْ مَيْ ضُنْدُنَا، رَانَرْ حُكُنْثِنْ رَامُوَا، دُواْمِنْ يَيِ رَامُوَا عَكَنْ أَبُواْكَنْ غَابَنْسَ؞ تَكُواْبِے ذَيْثِ، يَڧُواْشِ، تَكُواْبِے كُمَ ذَيْ شَا جِنِنْسُ يَڧُواْشِ؞ غَمَا عُبَنْغِجِ يَهْوٜىٰهْ مَيْ ضُنْدُنَا ذَيْ يِهَدَايَ عَڧَسَرْ أَرٜىٰوَ أَغٜىٰڢٜىٰنْ كُواْغِنْ يُڢِرٜىٰتِسْ؞ 11 «يَا كٜىٰ بُدُرْوَ ذُوثِيَاتَ مَصَرْ، كِهَوْرَ ذُوَا غِلٜىٰيَدْ كِكَرْٻِ مَاغَنِ؞ عَبَنْظَ ذَاكِيِ أَمْڢَانِ دَ مَغُنْغُنَ، غَمَا بَذَاكِ وَرْكٜىٰبَ؞ 12 أَلْعُمَّنْ دُونِيَا سُنْ جِ لَابَرِنْ كُنْيَرْكِ، كُوكَنْكِ كُمَ يَكَيْ كُواْعِنَ عَدُونِيَا؞ غَمَا سُواْجَ يَيِ كَرُواْ دَ سُواْجَ، دُكَنْسُ كُوَ سُكَ ڢَاطِ غَاوَا تَرٜىٰ؞» سَڧُواْ نَبِيُ غَمٜىٰدَ مَصَرْ 13 غَا سَڧُوانْ دَ يَهْوٜىٰهْ يَڢَطَا وَ أَنَّبِے إِرْمِيَ غَمٜىٰدَ يَدَّ سَرْكِے نٜىٰبُكَدْنٜىٰزَّرْ نَ بَابِيلَ ذَيْذُواْ يَيِ يَاڧِ دَ ڧَسَرْ مَصَرْ؞ 14 «عَيِ شٜىٰلَ أَ مَصَرْ، أَ سَنَرْ أَ مِغْدُوالْ، أَڢَطَا أَ مٜىٰمْڢِسْ دَ ثِكِنْ تَكْڢَنْكٜىٰسْ ثٜىٰوَ ‹كُڟَيَ، كُيِ شِرِ دُواْمِنْ يَاڧِ، غَمَا تَكُواْبِے يَنَ ثِنْ مَڨُوبْتَنْكُ؞› 15 دُوانْمٜىٰ غُنْكِنْ اللَّهْنْكُ نَنْ أَڢِسْ يَڢَاطِ؟ دُوانْمٜىٰ غُنْكِنْ بِجِمِنْكُ بَيْ ڟَيَبَ؟ أَيْ! يَهْوٜىٰهْ يَا بُغٜىٰشِ! 16 يَسَ دَيَوَ سُنْيِ تُنْتُٻٜىٰ سُكَ ڢَاطِ؞ عِ، كُواْوَ يَڢَاطِ عَكَنْ نَكُسَدَشِ؞ سُنَ ثٜىٰوَ ‹تَاشِ، مُكُواْمَ وُرِنْ جَمَعَرْمُ، مُكُواْمَ ڧَسَرْمُ تَحَيْڢُوَ، مُغُدُ دَغَ تَكُواْبِنْ أَبُواْكَنْ غَابَنْمُ!› 17 عَبَا سَرْكِے ڢِرْعَوْنَ نَ مَصَرْ سَابُوانْ سُنَ، ‹مَيْ يَوَنْ سُورُوتُ، مَرَرْ يِنْ كُواْمٜىٰ!› » 18 إِنْجِ سَرْكِے وَنْدَ سُونَنْسَ يَهْوٜىٰهْ مَيْ ضُنْدُنَا نٜىٰ، «حَڧِيڧَ نَا ضَنْڟٜىٰ دَ رَيْنَ، وَنِ مَيْيِنْ غَابَادَ مَصَرْ ذَيْذُواْ، وَنْدَ ڧَرْڢِنْسَ يَڢِ نَدُكَنْ مَاسُ ذُوَا أَدَا، كَمَرْ يَدَّ بَبَّنْ تُدُنْ تَبُوارْ يَڢِ سَوْرَنْ تُدَّيْ ڟَيِ، كَمَرْ بَبَّنْ تُدُنْ كَرْمٜىٰلْ مَيْ ڟَيِ عَبَاكِنْ تٜىٰكُ؞ 19 كِتَارَ كَايَنْكِ دُواْمِنْ ذُوَا بَوْتَا، يَا كٜىٰ ذُوثِيَاتَ مَيْ ذَمَ أَ مَصَرْ! غَمَا بِرْنِنْ مٜىٰمْڢِسْ ذَاتَ لَلَثٜىٰ، ذَاتَ ذَمَ كُڢَيْ، بَابُ كُواْوَ عَثِكِنْتَ؞ 20 مَصَرْ ݣَكْݣَاوَا ثٜىٰ كَمَرْ یَرْ سَانِيَ، عَمَّا ڧُدَ مَيْثِذُواْ دَغَ أَرٜىٰوَ يَسَوْكَ مَتَ! 21 سُواْجُواْجِنْ هَيَرْ دَسُكٜىٰ عَثِكِنْتَ كَمَرْ یَیَنْ شَانُو نٜىٰ مَاسُيَوَنْ ڧِبَ؞ سُو مَا سُنْجُويَا سُنْغُدُ، بَسُ عِيَ ڟَيَاوَا سُيِ يَاڧِبَ؞ غَمَا رَانَرْ مَسِيڢَرْسُ تَ إِسُواْ، لُواْكَثِنْ حُكُنْثِنْسُ كُمَ تَذُواْ؞ 22 مُواْڟِنْ غُدُنْ مَصَرْ كَمَرْ مُواْڟِنْ غُدُنْ مَثِيجِنٜىٰ، غَمَا أَبُواْكَنْ غَابَنْتَ سُنَ ذُوَا دَ ڧَرْڢِے، سُنَ ذُوَا مَتَ دَ غَاتَرِ كَمَرْ مَاسُ سَارَنْ إِتَاثٜىٰ؞ 23 ذَاسُرُشٜىٰ سُواْجُواْجِنْ مَصَرْ، كَمَرْ يَدَّ عَكَ رُشٜىٰ كُرْمِ دُكْ دَ يَوَنْ عِتَتُوَنْسَ، غَمَا يَوَنْسُ يَڢِ يَوَنْ ڢَارَ يَوَنْ دَ بَعَ عِيَ ڧِرْغَوَبَ؞ نِے يَهْوٜىٰهْ نَا ڢَطَا؞ 24 ذُوثِيَاتَ مَصَرْ ذَاتَشَا كُنْيَا، ذَاعَ بَاشٜىٰتَ أَ حَنُّنْ ڧَبِيلَرْ أَرٜىٰوَ؞» سَڧُواْ نَعُكُ غَمٜىٰدَ مَصَرْ 25 يَهْوٜىٰهْ مَيْ ضُنْدُنَا، اللَّهْ نَ إِسْرَٰٓءِيلَ، يَثٜىٰ «غَاشِ، ذَنْ حُكُنْتَ أَمُوانْ غُنْكِ نَ مَصَرَاوَا عَبِرْنِنْ تٜىٰبٜىٰسْ دَ ڢِرْعَوْنَ دَ دُكَنْ مَصَرْ دَ أَلُّواْلِنْتَ دَ كُمَ سَرَاكُنَنْتَ؞ ذَنْ حُكُنْتَ ڢِرْعَوْنَ دَ دُكَنْ مَاسُ دُواْغَضَ عَكَنْسَ؞ 26 ذَنْ بَادَسُو أَ حَنُّنْ وَطَنْدَ سُكٜىٰ نٜىٰمَنْ رَنْسُ، وَتُواْ أَ حَنُّنْ سَرْكِے نٜىٰبُكَدْنٜىٰزَّرْ نَ بَابِيلَ دَ سُواْجُواْجِنْسَ؞ عَمَّا دُكْدَهَكَ، بَايَنْ وَنَّنْ مُتَنٜىٰ ذَاسُ سَاكٜىٰيِنْ ذَمَ عَڧَسَرْ مَصَرْ كَمَرْ يَدَّ عَكَيِ أَدَا؞ نِے يَهْوٜىٰهْ نَا ڢَطَا؞» سَڧُواْ غَمٜىٰدَ ثٜىٰتُواْ دَ حُكُنْثِ 27 «يَنْذُ ڢَا، يَا كُو ذُرِيَرْ بَاوَنَ يَعْڧُوبَ، كَدَ كُجِڟُواْرُواْ، يَا كُو ذُرِيَرْ إِسْرَٰٓءِيلَ، كَدَ كُڢِرْغِتَ! غَاشِ، ذَنْثٜىٰثٜىٰكُ دَغَ ڧَسَا مَيْ نِيسَ، ذَنْثٜىٰثِ یَیَنْكُ دَغَ ڧَسَرْ بَوْتَا؞ ذُرِيَرْ يَعْڧُوبَ ذَاسُ دَاوُاْ، ذَاسُ كَسَنْثٜىٰ دَ لَاڢِيَ دَ سَلَمَ، بَابُوَنْدَ ذَيْسَاكٜىٰ ڟُواْرَتَرْ دَسُو؞ 28 إِنْجِ نِے يَهْوٜىٰهْ، كَدَ كُجِڟُواْرُواْ، يَا كُو ذُرِيَرْ بَاوَنَ يَعْڧُوبَ، غَمَا إِنَتَرٜىٰدَكُو؞ ذَنْكَٰوُاْ دُكَنْ أَلْعُمَّيْ غَ ثِكَكّٜىٰنْ ڧَرْشٜىٰ، أَلْعُمَّنْدَ نَوَرْوَاڟَرْ دَكُو عَثِكِ عَمَّا كُو كَمْ، بَذَنْ كَٰوُاْكُ غَ ثِكَكّٜىٰنْ ڧَرْشٜىٰبَ؞ ذَنْ حُكُنْتَكُ دَ شَرِيعَرْ غَسْكِيَ، حَڧِيڧَ بَذَنْ كَاسَ حُكُنْتَكُبَ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria