إِرْمِيَ 34 - أَتَّوْرَتْ دَ أَنَّبَاوَاسَڧُواْ ذُوَاغَ صَدِڧِيَ 1 غَا مَغَنَرْ دَ يَهْوٜىٰهْ يَيِ وَ إِرْمِيَ، سَعَدَّ سَرْكِے نٜىٰبُكَدْنٜىٰزَّرْ نَ بَابِيلَ دَ دُكَنْ سُواْجُواْجِنْسَ دَ سُواْجُواْجِنْ دُكَنْ مُلْكُواْكِنْ أَلْعُمَّنْ دَسُكٜىٰ عَڧَرْڧَشِنْسَ دَ كُمَ دُكَنْ ڧَبِيلُ سُنَ يَاڧِ دَ عُرُوشَلِيمَ دَ دُكَنْ غَرُرُوَنْتَ؞ 2 إِنْجِ يَهْوٜىٰهْ اللَّهْ نَ إِسْرَٰٓءِيلَ «إِرْمِيَ، تَڢِے كَيِ مَغَنَ دَ سَرْكِے صَدِڧِيَ نَ يَهُودَ ثٜىٰوَ ‹نِے يَهْوٜىٰهْ، ذَنْبَادَ وَنَّنْ بِرْنِ أَ حَنُّنْ سَرْكِنْ بَابِيلَ، ذَيْ كُوَ ڧُواْنٜىٰشِ دَ وُتَا؞ 3 كَيْ كُوَ بَذَاكَ ڟِيرَبَ، عَمَّا لَلَّيْ ذَاعَ كَامَكَ، عَبَادَكَيْ أَ حَنُّنْسَ؞ ذَاكَ غَ سَرْكِنْ بَابِيلَ عِدُواْ دَ عِدُواْ، كَكُمَيِ مَغَنَ دَشِ ڢُسْكَ دَ ڢُسْكَ؞ بَاشَكَّ ذَاكَ تَڢِے بَابِيلَ؞ 4 « ‹عَمَّا يَا سَرْكِے صَدِڧِيَ نَ يَهُودَ، حَڧِيڧَ، بَذَاكَ مُتُ تَوُرِنْ تَكُواْبِے بَ! نِے يَهْوٜىٰهْ نَا ڢَطَا؞ 5 ذَاكَ مُتُ ثِكِنْ سَلَمَ؞ كَمَرْ يَدَّ عَكَنْ ڧُواْنَاوَا سَرَاكُنَنْ دَ سُكَ رِغَا كَا مُتُوَ تُرَارٜىٰ، حَكَ كَيْ مَا مُتَنٜىٰ ذَاسُ ڧُواْنَ مَكَ تُرَارٜىٰ، ذَاسُيِ مَكُواْكِ دُواْمِنْكَ سُنَ ثٜىٰوَ «وَيُّواْ، سَرْكِنْمُ يَمُتُ!» نِے يَهْوٜىٰهْ نَا ڢَطَا؞› » 6 سَيْ أَنَّبِے إِرْمِيَ يَڢَطَا وَ سَرْكِے صَدِڧِيَ نَ يَهُودَ دُكَنْ مَغَنَرْ نَنْ أَ عُرُوشَلِيمَ، 7 سَعَدَّ سُواْجُواْجِنْ سَرْكِنْ بَابِيلَ سُكٜىٰ يَاڧِ دَ عُرُوشَلِيمَ دَ كُمَ دُكَنْ بِرَنٜىٰنْ دَ سُكَ رَغُ نَ يَهُودَ، وَتُواْ لَكِشْ دَ أَظٜىٰكَ؞ غَمَا وَطَنَّنْ سُو كَطَيْ نٜىٰ بِرَنٜىٰنْ يَهُودَ مَاسُ كَتَنْغَ وَطَنْدَ سُكَ رَغُ؞ رَشِنْ كِيَايٜىٰوَرْ يَرْجٜىٰجٜىٰنِيَ غَمٜىٰدَ بَايِ 8 أَنَانً سَيْ يَهْوٜىٰهْ يَسَاكٜىٰيِنْ مَغَنَ دَ إِرْمِيَ بَايَنْدَ سَرْكِے صَدِڧِيَ يَيِ يَرْجٜىٰجٜىٰنِيَ دَ دُكَنْ مُتَنٜىٰنْ عُرُوشَلِيمَ دُواْمِنْ عَيِ شٜىٰلَرْ بَادَ یَنْثِ؞ 9 بِسَغَ يَرْجٜىٰجٜىٰنِيَرْ، كُواْوَ ذَيْ سَكِ بَايِنْسَ، مَظَا دَ مَاتَا، وَطَنْدَ سُكٜىٰ إِبْرَانِيَاوَا؞ كَدَ وَنِ يَرِڧٜىٰ بَاوَ وَنْدَ يَكٜىٰ مُتُمِنْ إِسْرَٰٓءِيلَ كُواْ یَرْ إِسْرَٰٓءِيلَ، دُكَنْكُ یَنْعُوَنْ جُونَ نٜىٰ؞ 10 دُكَنْ دَتَّاوَا دَ دُكَنْ مُتَنٜىٰنْ دَ سُكَيِ يَرْجٜىٰجٜىٰنِيَ ثٜىٰوَ كُواْوَ ذَيْ سَكِ بَايِنْسَ مَظَا دَ مَاتَا، دُكَنْسُ سُكَيِ بِيَيَّ سُكَ یَنْتَرْ دَسُو؞ بَ كُوَ ذَاسُ ڧَارَ سَاسُ سُيِ مُسُ بَوْتَبَ؞ 11 عَمَّا دَغَ بَايَ سُكَسَاكٜىٰ كُواْمُواْ دَ وَطَنَّنْ بَايِ، مَظَا دَ مَاتَا وَطَنْدَ سُكَ یَنْتَرْ، سُكَ كُمَ مَيْدَسُو بَايِ؞ 12 غَا مَغَنَرْ دَ يَهْوٜىٰهْ يَڢَطَا وَ إِرْمِيَ بَايَنْ وَنَّنْ؞ 13 إِنْجِ يَهْوٜىٰهْ اللَّهْ نَ إِسْرَٰٓءِيلَ «نِے دَكَيْنَ نَيِ يَرْجٜىٰجٜىٰنِيَ دَ كَاكَنِّنْكُ، لُواْكَثِنْدَ نَڢِتَرْ دَسُو دَغَ ڧَسَرْ مَصَرْ دَغَ غِدَنْ بَوْتَا، نَثٜىٰمُسُ، 14 ‹عَكُواْوَثٜىٰ شٜىٰكَرَا تَبَݣَويْ، دُواْلٜىٰنٜىٰ كُواْوَنّٜىٰنْكُ يَسَكِ دُكْ مُتُمِنْ إِبْرَانِيَاوَا وَنْدَ يَسَيَ وَنْدَ كُمَ يَيِ مَسَ بَوْتَا حَرْ شٜىٰكَرَا شِدَ؞ دُواْلٜىٰنٜىٰ يَیَنْتَرْدَ مُتُمِنْ دَغَ بَوْتَرْسَ؞› عَمَّا كَاكَنِّنْكُ بَسُ سَوْرَرَتَبَ، بَسُ مَا كَسَ كُنّٜىٰ غَرٜىٰنِبَ؞ 15 بَعَدَطٜىٰبَ دَكُكَ تُوبَ، كُواْوَنّٜىٰنْكُ يَيِ أَبِنْدَ يَكٜىٰ دَيْدَيْ أَغَبَنَ تَوُرِنْ يِنْ شٜىٰلَرْ یَنْثِ غَ جُونَنْكُ، كُكَ كُمَيِ يَرْجٜىٰجٜىٰنِيَ أَغَبَنَ أَ غِدَنْ دَ عَكٜىٰ كِرَا دَ سُونَنَ؞ 16 عَمَّا غَاشِ يَنْذُ كُكَ جُويَا كُكَيِ بَنْظَ دَ سُونَنَ سَعَدَّ كُواْوَنّٜىٰنْكُ يَسَاكٜىٰ كُواْمُواْ دَ بَايِنْسَ مَظَا دَ مَاتَا وَطَنْدَ كُكَ یَنْتَرْ دَسُو سُيِ أَبِنْدَ سُكٜىٰسُواْ؞ كُنْ سَاكٜىٰ مَيْدَسُو بَايِ؞ 17 «حَڧِيڧَ، إِنْجِنِ يَهْوٜىٰهْ، بَ كُيِ مِنِ بِيَيَّ تَوُرِنْ شٜىٰلَرْ یَنْثِبَ، كُواْوَنّٜىٰنْكُ غَ مَڨُوبْثِنْسَ؞ دُواْمِنْ حَكَ، غَاشِ، إِنَيِمُكُ شٜىٰلَرْ یَنْثِ، یَنْثِنْ مُتُوَ تَوُرِنْ تَكُواْبِے دَ بَلَعِ دَ يُنْوَ؞ ذَنْسَا كُذَمَ أَبِنْ ڟُواْرُواْ غَ دُكَنْ مُلْكُواْكِنْ دُونِيَا؞ 18 كُنْيِ يَرْجٜىٰجٜىٰنِيَ ثٜىٰوَ ذَاكُ یَنْتَرْدَ بَايِنْكُ، كُنْ كُمَ كِرَنِ نَا ذَمَ شَيْدَ لُواْكَثِنْ دَ كُكَ تَبَّتَرْ دَ يَرْجٜىٰجٜىٰنِيَ تَوُرِنْ بِے تَڟَكِيَرْ سَاشٜىٰ بِيُ نَطَنْ بِجِمِنْ دَ عَكَ رَبَ؞ عَمَّا كُكَ كَرْيَ يَرْجٜىٰجٜىٰنِيَرْ نَنْ وَدَّ كُكَيِ أَغَبَنَ؞ سَبُواْدَ دَ حَكَ ذَنْيِ مُكُ أَبِنْدَ كُكَيِ دَ طَنْ بِجِمِنَّنْ؞ 19 دُكَنْكُ دَتَّاوَنْ يَهُودَ دَ نَ عُرُوشَلِيمَ دَ بَابَانِّ دَ ڢِرِسْتُواْثِے دَ دُكَنْ مُتَنٜىٰنْ ڧَسَرْ وَطَنْدَ سُكَبِے تَڟَكِيَرْ سَاشٜىٰ بِيُ نَطَنْ بِجِمِنَّنْ دَ عَكَ رَبَ، 20 ذَنْ بَاشٜىٰكُ أَ حَنُّنْ أَبُواْكَنْ غَابَنْكُ وَطَنْدَ سُكٜىٰ نٜىٰمَنْ رَنْكُ؞ غَوَوَّكِنْكُ ذَاسُ ذَمَ عَبِنْثِنْ ڟُنْڟَيٜىٰ دَ نَمُواْمِنْ دَاجِ؞ 21 سَرْكِے صَدِڧِيَ نَ يَهُودَ دَ دَتَّاوَنْسَ كُوَ ذَنْ بَاشٜىٰسُ أَ حَنُّنْ أَبُواْكَنْ غَابَنْسُ وَطَنْدَ سُكٜىٰ نٜىٰمَنْ رَنْسُ، وَتُواْ سُواْجُواْجِنْ سَرْكِنْ بَابِيلَ وَطَنْدَ يَنْذُ سُكَ جَنْيٜىٰ سُكَ بَرْكُ؞ 22 نِے يَهْوٜىٰهْ ذَنْ عُمَرْثٜىٰسُ سُدَاوُاْ ذُوَا وَنَّنْ بِرْنِ، ذَاسُ كُوَيِ يَاڧِ دَ بِرْنِنْ، سُثِ شِ، سُسَا مَسَ وُتَا؞ ذَنْسَا غَرُضُوً يَهُودَ سُذَمَ كُڢَيْ، بَابُ كُواْوَ عَثِكِنْسُ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria