إِرْمِيَ 2 - أَتَّوْرَتْ دَ أَنَّبَاوَاسَڧُواْ غَمٜىٰدَ رَشِنْ أَمِنْثِنْ يَهُودَاوَا 1 يَهْوٜىٰهْ يَا يِمَغَنَ دَنِے ثٜىٰوَ 2 إِنْتَڢِے إِنْيِ شٜىٰلَرْ سَڧُواْنَّنْ عَكُنّٜىٰنْ مُتَنٜىٰنْ عُرُوشَلِيمَ؞ إِنْجِ يَهْوٜىٰهْ، «نَا تُنَ دَ أَمِنْثِنْكِ تَلُواْكَثِنْ ڧُرُثِيَرْكِ، دَ ڧَوْنَرْكِ كَمَرْ تَأَمَرْيَ مَيْ ڧَوْنَرْ أَنْغُوانْتَ، يَدَّ كِكَ بِينِ أَدَاجِ، عَڧَسَرْدَ بَعَيِ شُوكَ عَثِكِيبَ؞ 3 كٜىٰ إِسْرَٰٓءِيلَ، دَا كِنْيِ رَايُوَرْكِ يَدَّ يَدَاثٜىٰ دَ وَدَّ عَكَ كٜىٰٻٜىٰ دَ ڟَرْكِے غَرٜىٰنِ، كٜىٰثٜىٰ نُونً ڢَارِ نَغِرْبِنَ؞ دُكْ وَنْدَ يَثِ دَغَ نُونً ڢَارِنَ، يَجَٰوُاْ وَكَنْسَ لَيْڢِے، مَسِيڢَ كُمَ تَڢَاطُواْ مَسَ؞ نِے يَهْوٜىٰهْ نَا ڢَطَا؞» 4 كُجِ مَغَنَرْ يَهْوٜىٰهْ، يَا كُو غِدَنْ يَعْڧُوبَ، يَا كُو دُكَنْ دَنْغُواْغِنْ غِدَنْ إِسْرَٰٓءِيلَ! 5 إِنْجِ يَهْوٜىٰهْ، «وَنٜىٰ لَيْڢِے كَاكَنِّنْكُ سُكَ سَامٜىٰنِ دَشِ؟ مٜىٰيَسَا سُكَيِ نٜىٰسَ دَنِے؟ مٜىٰيَسَا سُكَبِے أَبُبُوَنْ بَنْظَ، سُكَ كُوَ ذَمَ بَنْظَ؟ 6 بَسُ تَمْبَيِ جُونَبَ ثٜىٰوَ ‹إِنَا نٜىٰ يَهْوٜىٰهْ يَكٜىٰ وَنْدَ يَڢِتَرْ دَمُو دَغَ ڧَسَرْ مَصَرْ؟ إِنَا وَنْدَ يَبِدَمُو أَدَاجِ، عَڧَسَرْ هَمَادَ دَ رَامُكَ، عَبُوسَشِّيَرْ ڧَسَا، ڧَسَرْ بَڧِنْ دُهُ، عَڧَسَرْدَ بَابُ مَيْ رَڟَاوَ كُواْ مَيْ ذَمَ عَثِكِ؟› 7 نَكَٰوُاْكُ ثِكِنْ ڧَسَا مَيْ بَادَ أَمْڢَانِ دُواْمِنْ كُمُواْرٜىٰتَ، كُثِ یَیَنْ إِتَاثٜىٰنْتَ؞ عَمَّا دَ كُكَ شِغَ، سَيْ كُكَ ڧَظَنْتَرْدَ ڧَسَرْ، كُكَ مَيْدَ أَبِنْ غَادُواْنَ يَذَمَ أَبِنْ ڨَمَ؞ 8 ڢِرِسْتُواْثِے بَسُ تَمْبَيِ جُونَبَ ثٜىٰوَ ‹إِنَا نٜىٰ يَهْوٜىٰهْ يَكٜىٰ؟› مَاسُ لُورَ دَ كُواْيَرْوَرْ مُوسَٰى بَسُ سَنِّبَ؞ مَكِيَايَنْ مُتَنٜىٰنَ سُنْيِ مِنِ تَاوَيٜىٰ، أَنَّبَاوَا سُنْيِ أَنَّبْثِ دَ سُونَنْ بَعَلْ، سُنْبِے غُمَكَ مَرَسَ أَمْڢَانِ؞» ڧَارَرْ يَهْوٜىٰهْ عَكَنْ جَمَعَرْسَ 9 «دُواْمِنْ حَكَ، نِے يَهْوٜىٰهْ ذَنْيِ تَكَٰوُاْ ڧَارَ عَكَنْكُ، إِنَ كُمَ كَٰوُاْ ڧَارَ عَكَنْ یَیَنْ یَیَنْكُ؞ 10 كُڧٜىٰتَرٜىٰ تٜىٰكُ حَرْ ذُوَا ڟِبِرِنْ سَيِڢُرُسْ وَجٜىٰنْ يَمَّ، كُغَنِ، كُعَيْكَ ذُوَا كٜىٰدَرْ وَجٜىٰنْ غَبَسْ، كُبِنْثِكَ دَݣَوْ كُغَنِ كُواْ أَنْتَٻَ يِنْ وَنِ أَبُ حَكَ؟ 11 كُواْ أَݣَويْ وَتَ أَلْعُمَّرْ دَ تَتَٻَ ثَنْجَ أَلُّواْلِنْتَ، كُواْدَيَكٜىٰ سُو بَ أَلُّواْلِبَنٜىٰ؟ عَمَّا جَمَعَتَ سُنْ ثَنْجَ نِے دَ نَكٜىٰ طَوْكَكَرْسُ دَ غُمَكَ مَرَسَ أَمْڢَانِ؞» 12 إِنْجِ يَهْوٜىٰهْ، «يَا كُو سَمَّيْ، كُيِ ڟِتْ سَبُواْدَ وَنَّنْ، كُغِرْغِظَ، كُيِ بَڧِنْ ثِكِ سُواْسَيْ؞ 13 غَمَا مُتَنٜىٰنَ سُنْ عَيْكَتَ مُغُنْتَا إِرِ بِيُ، سُنْڧِينِ، نِے دَ نَكٜىٰ مَٻُٻُّغَرْ ضُوَ مَيْ بَادَ رَيْ؞ سُنْ حَڧَ وَكَنْسُ تَڢْكُنَنْ ضُوَ، تَڢْكُنَنْ دَسُكٜىٰ أَڟَڟَّٰغُ، بَسُ عِيَ رِڧٜىٰ ضُوَبَ؞ 14 «إِسْرَٰٓءِيلَ بَاوَ نٜىٰ؟ كُواْ أَنْحَيْڢٜىٰشِ ثِكِنْ بَوْتَا نٜىٰ؟ تُواْ، دُوانْمٜىٰ يَذَمَ أَبِنْ ݣُوسَ أَ حَنُّنْ أَبُواْكَنْ غَابَنْسَ؟ 15 سُنْيِ رُورِ عَكَنْسَ كَمَرْ ذَاكُواْكِ، سُنْيِ رُورِ دَ بَبَّرْ مُرْيَ؞ سُنْ مَيْدَ ڧَسَرْ إِسْرَٰٓءِيلَ كُڢَيْ، سُنْ رُرُّشٜىٰ غَرُرُوَنْسَ، بَابُ كُواْوَ عَثِكِ؞ 16 عِ، مُتَنٜىٰنْ مٜىٰمْڢِسْ دَ تَڢَنٜىٰسْ نَ مَصَرْ ذَاسُ أَسْكٜىٰ مَكَ كَيْ ڨُولْڨُولْ؞ 17 يَا إِسْرَٰٓءِيلَ، كَيْنٜىٰ كَا جَٰوُاْ وَكَنْكَ وَنَّنْ تَوُرِنْ ڧِينَ، نِے يَهْوٜىٰهْ اللَّهْ نْكَ، يَايِنْدَ نَبِشٜىٰكَ أَ حَنْيَ؞ 18 تُواْ، وَثٜىٰ رِيبَ كَسَامُ دَ كَتَڢِے مَصَرْ دُواْمِنْ كَشَا ضُوً كُواْغِنْ نِلُ؟ وَثٜىٰ رِيبَ كَسَامُ دَ كَتَڢِے أَسُّرِيَ دُواْمِنْ كَشَا ضُوً كُواْغِنْ يُڢِرٜىٰتِسْ؟ 19 مُغُنْتَارْكَ ذَاتَ حُكُنْتَكَ، رَشِنْ أَمِنْثِنْكَ ذَاتَجَا مَكَ حُواْرُواْ؞ سَيْ كَيِ تُنَانِ كَكُمَ غَانٜىٰ يَدَّ ڧِنْ يَهْوٜىٰهْ اللَّهْ نْكَ يَنَدَ مُونِ يَنَ كُمَ دَ طَاثِ؞ عِ، بَابُ ڟُواْرُواْنَ أَ ذُوثِيَارْكَ؞ نِے عُبَنْغِجِ يَهْوٜىٰهْ مَيْ ضُنْدُنَا نَا ڢَطَا؞» يَهْوٜىٰهْ يَظَرْغِ إِسْرَٰٓءِيلَ 20 «يَا كٜىٰ إِسْرَٰٓءِيلَ، تُنْدَ دَطٜىٰوَ، نَكَرْيَ غُنْغُمٜىٰنْ دَنِّيَرْكِ، نَكُمَ یَنْتَرْ دَكٜىٰ دَغَ بَوْتَا؞ دُكْدَهَكَ، كِنْ ثٜىٰ ‹بَذَنْ بَوْتَا مَكَبَ؞› حَڧِيڧَ، كِنَ كَارُوَنْثِ تَوُرِنْ سُجَّدَرْكِ عَكَنْ كُواْوَنٜىٰ تُدُ، دَ ڧَرْڧَشِنْ كُواْوَنٜىٰ إِتَاثٜىٰ مَيْ بَادَ إِنُوَ؞ 21 دَا نَدَسَكِ، كَمَرْ ذَاٻَٻّٜىٰنْ إِتَاثٜىٰنْ إِنَبِے دَغَ إِرِ مَڢِے ݣَوْ؞ تَيَيَا كِنْ لَلَثٜىٰ حَكَ كِنْ ذَمَ رَسَّنْ إِتَاثٜىٰنْ إِنَبِے نَدَاجِ مَرَرْ أَمْڢَانِ؟ 22 كُواْ دَ ذَاكِوَنْكٜىٰ كَنْكِ دَ سَبُلُنْ سُواْدَ، كِيِ أَمْڢَانِ دَ سَبُلُ مَيْ يَوَ، دُكْدَهَكَ، ذَنْغَ تَبُوانْ لَيْڢِنْكِ؞ نِے عُبَنْغِجِ يَهْوٜىٰهْ نَا ڢَطَا؞ 23 تَيَيَا ذَاكِثٜىٰ بَاكِ ڧَظَنْتَرْ دَكَنْكِبَ؟ بَاكِ تَٻَبِنْ غُنْكِنَّنْ بَعَلْ بَ؟ دُوبَ عَلَمَرْ حَنْيَرْكِ تَثِكِنْ ݣُورِ، كِيِ تُنَانِ عَكَنْ أَبِنْدَ كِكَيِ؞ كِنَ كَمَ دَ یَرْ رَاڧُمِ، مَيْ كَيْ دَ كَٰوُاْوَ نٜىٰمَنْ بَرْبَرَ؞ 24 كٜىٰ كَمَرْ جَكَرْ دَاجِ ثٜىٰ، مَيْ سَابَادَ هَمَادَ، مَيْ سُوانْ بَرْبَرَ، وَدَّ تَكٜىٰ سَنْسَنَ نٜىٰمَنْ نَمِجِ؞ وَ ذَيْ عِيَ هَنَتَ؟ بَيْ كَمَاتَ مَيْ نٜىٰمَنْتَ يَوَهَلَرْ دَ كَنْسَبَ، غَمَا أَوَتَنْ بَرْبَرَرْتَ ذَاعَ سَامٜىٰتَ؞ 25 كٜىٰ إِسْرَٰٓءِيلَ، كَدَ كِغُدُ حَرْ تَاكَلْمَنْ ڧَڢَاڢُنْكِ سُثِنْيٜىٰ، حَرْ مَڧُواْڠُورُوانْكِ يَبُوشٜىٰ سَبُواْدَ بِنْ وَطَنْسُ أَلُّواْلِ؞ عَمَّا كِنْ ثٜىٰ، ‹إِنَا! بَذَنْ عِيَ دَيْنَ بِنْسُبَ! غَمَا إِنَ سُوانْسُ، سُو كُوَ ذَنْبِے!› 26 «كَمَرْ يَدَّ ٻَرَوُاْ يَكَنْ شَا كُنْيَا سَعَدَّ عَكَ كَامَ شِ، حَكَنٜىٰ غِدَنْ إِسْرَٰٓءِيلَ ذَاسُشَا كُنْيَا، دَ سُو دَ سَرَاكُنَنْسُ دَ شُوغَبَنِّنْسُ، دَ ڢِرِسْتُواْثِنْسُ دَ أَنَّبَاوَنْسُ؞ 27 غَمَا سُنَثٜىٰ وَ إِتَاثٜىٰ، ‹كَيْنٜىٰ بَابَنَ،› غَ دُوڟٜىٰ كُمَ، ‹كَيْنٜىٰ كَا حَيْڢٜىٰنِ؞› غَا نِے يَهْوٜىٰهْ كُمَ، سُنْ جُويَا مِنِ بَايَ، بَسُ بَانِ ڢُسْكَرْسُبَ؞ عَمَّا عِدَنْ وَهَلَ تَذُواْ مُسُ، سَيْ سُثٜىٰ مِنِ، ‹تَاشِ، كَثٜىٰثٜىٰمُ!› 28 تُواْ، إِنَا نٜىٰ أَلُّواْلِنْكُ، غُمَكَنْ دَ كُكَيِ وَكَنْكُ؟ بَرِ سُو سُتَاشِ سُثٜىٰثٜىٰكُ، عِدَنْ ذَاسُ عِيَ ثٜىٰتُوانْكُ أَ لُواْكَثِنْ وَهَلَرْكُ؞ غَمَا يَوَنْ غُمَكَنْكُ سُنْ كَيْ يَوَنْ غَرُرُوَنْكُ، يَا كُو جَمَعَرْ يَهُودَ! 29 نِے يَهْوٜىٰهْ إِنَ تَمْبَيَرْكُ، دُوانْمٜىٰ كُكٜىٰ كَٰوُاْ ڧَارَ عَكَيْنَ؟ أَيْ، دُكَنْكُ نٜىٰ كُكَيِ مِنِ تَاوَيٜىٰ؞ 30 نَحُكُنْتَ مُتَنٜىٰنْكُ، عَمَّا عَبَنْظَنٜىٰ، غَمَا بَسُ كَرْٻِ ڠَرَبَ؞ تَكُواْبِنْكُ نٜىٰ يَكَشٜىٰ أَنَّبَاوَنْ دَ نَعَيْكَ مُكُ، كَمَرْ ذَاكِ مَيْ ڟَنَنِنْ يُنْوَ؞ 31 «يَا كُو مُتَنٜىٰنْ زَامَانِنَّنْ، كُجِ مَغَنَرْ دَ نِے يَهْوٜىٰهْ نَا ڢَطَا؞ نَذَمَ وَ إِسْرَٰٓءِيلَ كَمَرْ دَاجِنٜىٰ؟ كُواْ كَمَرْ ڧَسَا مَيْ بَڧِنْ دُهُنٜىٰ؟ تُواْ، دُوانْمٜىٰ مُتَنٜىٰنَ سُكٜىٰثٜىٰوَ ‹مُنَدَ یَنْثِنْ كَنْمُ، بَذَامُ سَاكٜىٰ ذُوَا وُرِنْكَبَ؟› 32 بُدُرْوَ ذَاتَ مَنْتَادَ كَايَنْ أَدُوانْتَنٜىٰ؟ كُواْ أَمَرْيَ تَمَنْتَادَ رِغَرْ أَدُوانْتَ؟ دُكْدَهَكَ مُتَنٜىٰنَ سُنْ مَنْتَادَنِے ݣُونَكِے بَا إِيَاكَ؞ 33 عِ، كِنَدَ ڠُونِنْتَرْ نٜىٰمَنْ مَسُواْيَ! حَرْ مَاتَا مَڢِے مُغُنْتَا مَا، كِنْ كُواْيَ مُسُ هَنْيُواْيِنْكِ؞ 34 رِيغُنَنْكِ سُنَدَ تَبُوانْ جِنِنْ مَتَلَوْتَ مَرَسَ لَيْڢِے، وَطَنْدَ بَاكِ سَامٜىٰسُ سُنَ سَاتَا أَغِدَنْكِبَ؞ عَمَّا دُكْدَهَكَ، 35 كِنَ ثٜىٰوَ ‹أَيْ، بَانِ دَ لَيْڢِے! حَڧِيڧَ، ڢُشِنْ يَهْوٜىٰهْ يَا جَنْيٜىٰ دَغَ غَرٜىٰنِ؞› عَمَّا لَلَّيْ نِے يَهْوٜىٰهْ ذَنْ حُكُنْتَكِ، غَمَا كِنْ ثٜىٰ، ‹أَيْ، بَنْيِ ذُنُوبِبَ؞› 36 مٜىٰيَسَا ذُوثِيَارْكِ بَتَ ڟَيَ وُرِے طَيَبَ، كِنَ تَثَنْجَ حَنْيَرْكِ؟ ذَاكِ شَا كُنْيَا سَبُواْدَ دُواْغَضَرْكِ عَكَنْ مَصَرَاوَا، كَمَرْ يَدَّ كِكَ شَا كُنْيَا أَ حَنُّنْ أَسُّرِيَاوَا؞ 37 دَغَ مَصَرْ كُمَ ذَاكِ ڢِتَ دَ حَنُّوَنْكِ عَكَيْ؞ غَمَا نِے يَهْوٜىٰهْ نَاڧِ وَطَنْدَ كِكٜىٰ دُواْغَضَ عَكَيْ، بَذَاكِثِ نَصَرَا تَوُرِنْسُبَ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria