إِرْمِيَ 14 - أَتَّوْرَتْ دَ أَنَّبَاوَا

رَشِنْ ضُوَ دَ يُنْوَ دَ مَسِيڢَ عَڧَسَرْ

¹ غَا مَغَنَرْ دَ يَهْوٜىٰهْ يَڢَطَا وَ إِرْمِيَ غَمٜىٰدَ بَبَّنْ رَشِنْ ضُوَ عَڧَسَرْ؞

² ‏«‏يَهُودَ تَنَ مَكُواْكِ، أَلْعَمُرَ نَيَوْ دَ كُلُّمْ عَڧُواْڢُواْڢِنْ بِرَنٜىٰنْتَ سُنْ ڟَيَ ثِكْ، مُتَنٜىٰنْتَ سُنَ ݣُونْثٜىٰ عَڧَسَا ثِكِنْ مَكُواْكِ، كُوكَنْ عُرُوشَلِيمَ يَهَوْرَ حَرْ سَمَ؞

³ مَنْيَنْ مُتَنٜىٰنْ عُرُوشَلِيمَ سُنْ عَيْكَ بَايِنْسُ نٜىٰمَنْ ضُوَ؞ بَايِنْ سُكَ تَڢِے رِجِيُواْيِ، بَسُ كُوَ سَامِ ضُوَبَ، سُكَ كُواْمَ دَ تُلُنَنْسُ وُاْڢِ؞ كُنْيَا دَ ڧَسْڧَنْثِ سُكَ رُڢٜىٰسُ، سُكَ رُڢٜىٰ ڢُسْكَرْسُ سَبُواْدَ كُنْيَا؞

⁴ سَبُواْدَ ڧَسَرْ تَبُوشٜىٰ حَرْ تَڟَٰغٜىٰ تُنْدَ بَعَيِ ضُوً سَمَبَ، سَيْ كُنْيَا تَكَامَ مَنُواْمَ، حَرْ سُكَ رُڢٜىٰ ڢُسْكَرْسُ سَبُواْدَ كُنْيَا؞

⁵ حَرْ مَا بَرٜىٰوَ أَدَاجِ، بَايَنْدَ تَحَيْڢُ، تَغُدُ تَبَرْ طَنْتَ، دُواْمِنْ بَابُ ثِيَوَ؞

⁶ جَاكُنَنْ دَاجِ سُنَ ڟَيٜىٰ عَكَنْ تُدَّيْ مَرَرْ ثِيَوَ، سُنَ نُمْڢَشِ دَݣَرْ كَمَرْ كَرْنُكَنْ دَاجِ، عِدَنُونْسُ بَسُ غَنِ دُواْمِنْ بَابُ عَبِنْثِ؞»‏

⁷ ‏«‏كُواْدَيَكٜىٰ لَيْڢُواْڢِنْمُ سُونٜىٰ شَيْدُ عَكَنْمُ، يَا يَهْوٜىٰهْ، كَتَيْمَكٜىٰمُ دُواْمِنْ أَغِرْمَمَ سُونَنْكَ!‏ غَمَا جُويَا بَايَنْمُ يَيِيَوَ، لَلَّيْ مُنْيِ مَكَ ذُنُوبِ؞

⁸ يَا كَيْ سَاذُوثِيَا نَ إِسْرَٰٓءِيلَ، كَيْ مَيْ ثٜىٰتُوانْتَ أَلُواْكَثِنْ وَهَلَ!‏ دُوانْمٜىٰ كَذَمَ كَمَرْ بَڧُواْ عَڧَسَرْ؟ دُوانْمٜىٰ كَيِ كَمَرْ مَيْ تَڢِيَ وَنْدَ يَ طَنْ هُوتَ دُواْمِنْ يَݣُونَ غُواْبٜىٰ يَوُثٜىٰ؟

⁹ يَا يَهْوٜىٰهْ!‏ دُوانْمٜىٰ كَكَسَنْثٜىٰ كَمَرْ وَنْدَ يَضِكِثِے، كَمَرْ ڠُونِنْ يَاڧِنْدَ يَكَاسَ يِنْ ثٜىٰتُواْ؟ دُكْدَهَكَ، يَا يَهْوٜىٰهْ، كَنَ أَڟَكِيَرْمُ، دَ سُونَنْكَ كُمَ عَكٜىٰ كِرَنْمُ؞ كَدَ كَبَرْمُ!‏»‏

¹⁰ غَا أَبِنْدَ يَهْوٜىٰهْ يَڢَطَا غَمٜىٰدَ جَمَعَرْ نَنْ، ‏«‏حَڧِيڧَ سُنَ سُواْ سُيِ تَيَٰوُاْ، حَنْكَلِنْسُ بَ أَوُرِے طَيَ يَكٜىٰبَ؞ سَبُواْدَ حَكَ، نِے يَهْوٜىٰهْ بَنْ كَرْٻٜىٰسُبَ، يَنْذُ ذَنْ تُنَ دَ لَيْڢُواْڢِنْسُ، إِنْ حُكُنْتَسُ دُواْمِنْ ذُنُبَنْسُ؞»‏

أَنَّبَاوَا مَاسُ أَنَّبْثِنْ ڧَضْيَا

¹¹ سَيْ يَهْوٜىٰهْ يَثٜىٰ مِنِ ‏«‏كَدَ كَيِ أَدُّعَ دُواْمِنْ لَاڢِيَرْ جَمَعَرْ نَنْ؞

¹² كُواْ دَ سُنْيِ أَظُمِ، بَذَنْجِ كُوكَنْسُبَ؞ كُواْ دَ سُنْ مِيڧَ مِنِ هَدَايُ نَڧُواْنَاوَا دَ نَهَڟِ، بَذَنْ كَرْٻٜىٰسُبَ؞ أَ مَيْمَكُوانْ حَكَ، ذَنْ كَشٜىٰسُ دَ تَكُواْبِے دَ يُنْوَ دَ بَلَعِ؞»‏

¹³ سَيْ نَأَمْسَ نَثٜىٰ ‏«‏أَيَّا عُبَنْ‌غِجِ يَهْوٜىٰهْ!‏ غَاشِ، أَنَّبَاوَا سُنَ ثٜىٰمُسُ، ‏‹‏بَذَاكُ غَ تَكُواْبِنْ يَاڧِ كُواْ يُنْوَبَ؞ يَهْوٜىٰهْ ذَيْبَاكُ ثِكَكّٜىٰنْ ذَمَنْ لَاڢِيَ أَوَنَّنْ وُرِے؞›‏ »‏

¹⁴ يَهْوٜىٰهْ كُوَ يَثٜىٰ مِنِ ‏«‏أَنَّبَاوَنَّنْ، أَنَّبْثِنْ ڧَضْيَا نٜىٰ سُكٜىٰيِ دَ سُونَنَ؞ نِے بَنْعَيْكٜىٰسُبَ، بَنْ كُمَ عُمَرْثٜىٰسُبَ، كُواْ إِنْيِ مَغَنَ دَسُو؞ سُنَيِمُكُ أَنَّبْثِنْ رُعُيَرْ ڧَضْيَا دَ دُوبَانْ بَنْظَ دَ تُنَانِنْ ذُوثِيَارْسُ نٜىٰ كَوَيْ؞

¹⁵ سَبُواْدَ حَكَ، غَ أَبِنْدَ نِے يَهْوٜىٰهْ نَكٜىٰ ڢَطِ غَمٜىٰدَ أَنَّبَاوَنْ دَسُكٜىٰيِنْ أَنَّبْثِنْ ڧَضْيَا دَ سُونَنَ، كُواْدَيَكٜىٰ بَنْعَيْكٜىٰسُبَ، سُو دَسُكٜىٰ ثٜىٰوَ بَذَاعَغَ تَكُواْبِنْ يَاڧِ كُواْ يُنْوَ عَڧَسَرْ نَنْبَ؞ تُواْ، تَوُرِنْ تَكُواْبِنْ يَاڧِ دَ يُنْوَ نٜىٰ ذَاعَ هَلَّكَرْ دَ وَطَنَّنْ أَنَّبَاوَا؞

¹⁶ مُتَنٜىٰ كُوَ وَطَنْدَ أَنَّبَاوَا سُكٜىٰيِ مُسُ أَنَّبْثِنْ ڧَضْيَارْ نَنْ، ذَاعَ جٜىٰڢَرْ دَسُو وَجٜىٰ عَكَنْ تِيتُنَنْ عُرُوشَلِيمَ؞ ذَاعَكَكَّشٜىٰسُ تَوُرِنْ تَكُواْبِنْ يَاڧِ دَ يُنْوَ؞ بَابُ كُمَ وَنْدَ ذَيْبِنّٜىٰسُ دَسُو دَمَاتَنْسُ دَیَیَنْسُ مَظَا دَ مَاتَا؞ عِ، ذَنْ جُويَا مُغُنْتَارْسُ تَكُواْمَ عَكَنْسُ؞

¹⁷ ‏«‏إِرْمِيَ، سَيْ كَغَيَ مُسُ وَنَّنْ مَغَنَ، ‏‹‏بَرِ عِدَنُونَ سُيِ تَظُبْدَ هَوَيٜىٰ، دَرٜىٰ دَ رَانَ كَدَ سُدَيْنَ، سَبُواْدَ أَنْبُغِ جَمَعَتَ، بُدُرْوَ ذُوثِيَاتَ، أَنْيِ مَتَ بَبَّنْ رَوْنِ، دُوكَ مَيْ ڟَنَنِ؞

¹⁸ عِدَنْ نَا ڢِتُواْ ذُوَا ڢِيلِ، سَيْغَا وَطَنْدَ عَكَ كَشٜىٰ دَ تَكُواْبِے!‏ عِدَنْ نَا شِغَ بِرْنِ، سَيْغَا وَطَنْدَ سُكٜىٰ مُتُوَ دَ يُنْوَ!‏ عَمَّا أَنَّبَاوَا دَ ڢِرِسْتُواْثِے سُنَ تَيَٰوُاْ، سُنَيِنْ إِرِنْ عَيْكِنْسُ، بَسُ سَنْ كُواْمٜىٰبَ؞›‏ »‏

أَدُّعَرْ ضُواْڧُوانْ جِنْڧَيْ

¹⁹ يَا يَهْوٜىٰهْ، كَاڧِ يَهُودَ غَبَاطَيَ كٜىٰنَنْ؟ رَنْكَ يَنَ ڨَمَرْ سِهِيُواْنَ نٜىٰ؟ مٜىٰيَسَا كَبُغٜىٰمُ، حَرْ بَابُ وَرْكٜىٰوَ دُواْمِنْمُ؟ مُنْسَا رَيْ غَ سَامُنْ سَلَمَ، عَمَّا بَابُ أَلْحٜىٰرِنْدَ يَذُواْ مَنَ؞ مُنْسَا رَيْ غَ لُواْكَثِنْ وَرْكٜىٰوَ، عَمَّا سَيْغَا رَظَنَ؞

²⁰ يَا يَهْوٜىٰهْ، مُنْ سَنْ مُغُنْتَارْ دَ مُكَيِ، دَ لَيْڢُواْڢِنْ دَ كَاكَنِّنْمُ سُكَيِ؞ عِ، دُكَنْمُ مُنْيِ مَكَ ذُنُوبِ؞

²¹ دُواْمِنْ أَغِرْمَمَ سُونَنْكَ، كَدَ كَيَاشٜىٰمُ، كَدَ كَڧَسْڧَنْتَرْ دَ دَرَجَرْ كُجٜىٰرَرْ مُلْكِنْكَ؞ تُنَ دَ يَرْجٜىٰجٜىٰنِيَرْكَ دَمُو، كَدَ كَكَرْيَتَ؞

²² عَثِكِنْ بَنْظَنْ غُمَكَنْ أَلْعُمَّيْ، أَݣَويْ وَنْدَ ذَيْ عِيَ كَٰوُاْ ضُوً سَمَ؟ سَمَّيْ ڢَا ذَاسُ عِيَ كَٰوُاْ ضُوً سَمَ دَ إِيكُوانْ كَنْسُ؟ أَشٜىٰ، بَ كَيْنٜىٰ مَيْ كَٰوُاْوَبَ، يَا يَهْوٜىٰهْ اللَّهْ نْمُ؟ دُواْمِنْ حَكَ مُنْ سَا ذُوثِيَا عَكَنْكَ، غَمَا كَيْنٜىٰ مَيْيِنْ كُواْمٜىٰ؞