إِرْمِيَ 10 - أَتَّوْرَتْ دَ أَنَّبَاوَا

بَمْبَنْثِنْ يَهْوٜىٰهْ دَ أَلُّواْلِ

¹ يَا غِدَنْ إِسْرَٰٓءِيلَ، كُجِ مَغَنَرْ دَ يَهْوٜىٰهْ يَكٜىٰيِ مُكُ؞

² إِنْجِ يَهْوٜىٰهْ، ‏«‏كَدَ كُكُواْيِ حَلِنْ أَلْعُمَّيْ، كُواْ كُڢِرْغِتَ سَبُواْدَ عَلَمُ أَ سَمَ، كُواْدَيَكٜىٰ أَلْعُمَّيْ سُنَ ڢِرْغِتَ سَبُواْدَسُو؞

³ أَلْعَدُنْ أَلْعُمَّيْ بَنْظَنٜىٰ، غَمَا مُتُمْ يَكَنْ سَارٜىٰ إِتَاثٜىٰ دَغَ دَاجِ، سَيْ يَسَسَّڧَ دَ وُڧَ، عَيْكِنْ حَنُّوَنْ مُتُمْ نٜىٰ؞

⁴ يَكَنْيِ مَسَ أَدُواْ دَ أَظُرْڢَا دَ ظِينَارِيَ؞ دَ غُدُمَ يَكَنْ كَڢَ إِتَاثٜىٰنْ دُواْمِنْ كَدَ يَڢَاطِ؞

⁵ غُمَكَنْسُ نَنْ كَمَرْ دُواْدُوانْ غُواْنَ سُكٜىٰ عَثِكِنْ غُواْنَرْ كَبٜىٰوَ، بَسُ عِيَيِنْ مَغَنَ، طَوْكَرْسُ عَكٜىٰيِ، غَمَا بَسُ عِيَ تَڢِيَ دَ كَنْسُبَ؞ كَدَ كُجِڟُواْرُوانْسُ، غَمَا بَاسُدَ إِيكُوانْ عَيْكَتَ مُغُنْتَا، كُمَ بَاسُدَ إِيكُوانْ عَيْكَتَ أَلْحٜىٰرِ؞»‏

⁶ يَا يَهْوٜىٰهْ، بَابُوَنِ كَمَرْكَ!‏ كَيْ مَيْغِرْمَ نٜىٰ، سُونَنْكَ مَيْغِرْمَ نٜىٰ دَ إِيكُواْ سُواْسَيْ؞

⁷ وَنٜىٰنٜىٰ بَذَيْجِڟُواْرُوانْكَبَ، يَا سَرْكِنْ دُكَنْ أَلْعُمَّيْ؟ حَڧِيڧَ، كَا ثَنْثَنْثِ أَجِڟُواْرُوانْكَ، غَمَا ثِكِنْ دُكَنْ مَاسُ حِكِمَ نَأَلْعُمَّيْ، كُمَ ثِكِنْ دُكَنْ مُلْكُواْكِنْسُ، بَابُوَنِ كَمَرْكَ؞

⁸ دُكَنْسُ مَرَسَ تُنَانِ نٜىٰ، وَوَيٜىٰ نٜىٰ كُمَ؞ مٜىٰ ذَاسُ كُواْيَ دَغَ غُمَكَنْ دَ عَكَيِ دَ إِتَاثٜىٰ؟

⁹ حَنُّنْ مَيْ سَسَّڧَ نٜىٰ يَيِ غُمَكَنْ، ڠُونِنْ مَڧٜىٰرِ نٜىٰ يَرُڢٜىٰسُ دَ ظِينَارِيَ؞ أَنْ كَٰوُاْ أَظُرْڢَا دَغَ تَرْشِشْ، ظِينَارِيَ كُمَ دَغَ عُڢَظْ؞ أَنْ بُبُّغَسُ سُذَمَ ڢَلّٜىٰ، أَنْرُڢٜىٰ غُمَكَنْ دَسُو؞ عَكَيِ مُسُ أَدُواْ نَتُڢَاڢِ مَاسُ دَرَجَ، مَاسُ كَلَرْ بُلَ دَ جَرْ غَرُورَا؞

¹⁰ عَمَّا يَهْوٜىٰهْ شِينٜىٰ اللَّهْ نَغَسْكِيَ؞ شِينٜىٰ اللَّهْ مَيْ رَيْ، سَرْكِے نَهَرْ أَبَدَا نٜىٰ؞ عِدَنْ يَا يِڢُشِے، دُونِيَا تَكَنْ غِرْغِظَ، أَلْعُمَّيْ بَذَاسُ عِيَ جِمْرٜىٰوَ دَ ڢُشِنْسَبَ؞

¹¹ كُغَيَوَ مَاسُ بَوْتَرْ غُمَكَنَّنْ ثٜىٰوَ أَلُّواْلِ وَطَنْدَ بَسُو نٜىٰ سُكَيِ سَمَ دَ ڧَسَابَ، ذَاسُ هَلَّكَ أَنَنْ ڧَسَا دَ ڧَرْڧَشِنْ سَمَ؞

وَاڧَرْ يَبُواْ غَ اللَّهْ نَغَسْكِيَ

¹² اللَّهْ نٜىٰ يَيِ ڧَسَا تَوُرِنْ إِيكُوانْسَ، يَكَڢَ دُونِيَا تَوُرِنْ حِكِمَرْسَ، يَشِمْڢِطَا سَمَّيْ تَوُرِنْ غَانٜىٰوَرْسَ؞

¹³ دَجِنْ مُرْيَرْسَ، ضُوَيٜىٰنْ سَمَ سُكَنْيِ رُورِ؞ يَكَنْ تَادَ غِذَغِظَيْ دَغَ إِيَاكَرْ دُونِيَا، يَكَنْ عَيْكُواْ دَ وَلْڧِيَ تَرٜىٰدَ ضُوً سَمَ، يَكَنْ كُمَ ڢِتَرْدَ إِسْكَ دَغَ طَاكِنْ أَجِيَرْسَ؞

¹⁴ دَ غَنِنْ وَنَّنْ، مُتَنٜىٰ سُنْ غَانٜىٰ سُو مَرَرْ تُنَانِنٜىٰ مَرَرْ سَنِ كُمَ؞ كُواْوَنٜىٰ مَڧٜىٰرِنْ ظِينَارِيَ يَشَا كُنْيَا سَبُواْدَ غُمَكَنْسَ، غَمَا صِڢَّرْدَ يَڧٜىٰرَ أَبِنْ رُوطُنٜىٰ، بَابُ نُمْڢَشِ عَثِكِنْتَ؞

¹⁵ غُمَكَ أَبِنْ بَنْظَنٜىٰ، أَبُبُوَنْ بَعَنٜىٰ كَوَيْ؞ أَ لُواْكَثِنْ دَ ذَاعَ حُكُنْتَسُ، ذَاسُ هَلَّكَ؞

¹⁶ غَمَا اللَّهْ، وَنْدَ شِينٜىٰ رَبُوانْ يَعْڧُوبَ، بَكَمَرْ وَطَنَّنْ غُمَكَبَ؞ غَمَا شِينٜىٰ مَيْ صِڢَّتَا دُكَنْ كُواْمٜىٰ، إِسْرَٰٓءِيلَ كُوَ عِتَثٜىٰ ذُرِيَرْسَ تَغَادُواْ؞ سُونَنْسَ يَهْوٜىٰهْ مَيْ ضُنْدُنَا نٜىٰ؞

ذَاعَكَيْ جَمَعَرْ يَهُودَ بَوْتَا

¹⁷ يَا جَمَعَرْ يَهُودَ، كُتَتَّارَ كَايَنْكُ، كُو وَطَنْدَ عَكَ كٜىٰوَيٜىٰ دَ يَاڧِ؞

¹⁸ غَمَا إِنْجِ يَهْوٜىٰهْ، ‏«‏غَاشِ، ذَنْ جٜىٰڢَرْ دَ مَذَوْنَنْ ڧَسَرْ نَنْ دَغَ ڧَسَرْسُ أَوَنَّنْ لُواْكَثِ؞ ذَنْبَاسُ وَهَلَ حَرْ سَيْ سُنْجِ جِكِے؞»‏

¹⁹ كَيْتُواْنَ، سَبُواْدَ رَوْنِنْ دَ عَكَيِ مِنِ!‏ رَوْنِنَ مَرَرْ وَرْكٜىٰوَ نٜىٰ!‏ دَا مَا نَيِ تُنَانِ ثٜىٰوَ ذَنْعِيَ إِنْجِمْرٜىٰ عَذَابَرْ نَنْ؞

²⁰ أَنْهَلَّكَ تٜىٰنْتِنَ، أَنْڟِنْڟِنْكٜىٰ دُكَنْ إِغِيُواْيِنْسَ؞ یَیَنَ سُنْ وَڟٜىٰ دَغَ غَرٜىٰنِ، بَابُوَنْدَ يَضَغٜىٰ يَكَڢَ مِنِ تٜىٰنْتِ، كُواْ يَرَاتَيَ لَبُلٜىٰنْ تٜىٰنْتِنَ؞

²¹ غَمَا مَكِيَايَنْ مَرَسَ تُنَانِنٜىٰ، بَسُ نٜىٰمِ نُڢِنْ يَهْوٜىٰهْ بَ؞ سَبُواْدَ حَكَ بَسُ سَامِ أَلْبَرْكَبَ، أَنْكُمَ وَاڟَرْدَ دُكَنْ غَرْكٜىٰنْسُ؞

²² جِ ڢَا!‏ غَاشِ، لَابَرِ يَذُواْ!‏ غَا ڧَارَرْ مُواْڟِ دَغَ أَرٜىٰوَ، مَاسُ هَلَّكَ سُنَ ذُوَا دُواْمِنْ أَ مَيْدَ غَرُضُوً يَهُودَ كُڢَيْ، عَكُمَ مَيْدَسُو وُرِنْ ذَمَنْ كَرْنُكَنْ دَاجِ؞

²³ نَسَنِ، يَا يَهْوٜىٰهْ، حَنْيَرْ رَايُوَرْ طَنْ أَدَمْ بَعَهَنُّنْسَ تَكٜىٰبَ؞ بَا مُتُمْ نٜىٰ يَكٜىٰدَ إِيكُواْ يَكِيَايٜىٰ تَڢِيَرْسَبَ؞

²⁴ هُواْرَرْ دَنِے، يَا يَهْوٜىٰهْ، عَمَّا ثِكِنْ غَسْكِيَ، بَعَثِكِنْ ڢُشِنْكَبَ، دُواْمِنْ كَدَ كَهَلَكَانِ؞

²⁵ ظُبَ ڢُشِنْكَ عَكَنْ أَلْعُمَّيْ عَكَنْ ڧَبِيلُنَّنْ دَ بَسُ سَنْكَبَ، عَكَنْ وَطَنْدَ بَسُ كِرَا غَ سُونَنْكَبَ؞ غَمَا سُنْثِنْيٜىٰ ذُرِيَرْ يَعْڧُوبَ، سُنْثِنْيٜىٰتَ، سُنْ كَوَرْدَ عِتَ، سُنْ كُمَ مَيْدَ وُرَارٜىٰنْ ذَمَنْتَ كُڢَيْ؞