أَلْڧَلَيْ 7 - أَتَّوْرَتْ دَ أَنَّبَاوَاجِدْعَوْنَ يَا ثِ مِدِيَنَاوَا دَ يَاڧِ 1 أَنَانً وَتَرَانَ، سَيْ يٜىٰرُبَّعَلْ، وَتُواْ جِدْعَوْنَ، تَرٜىٰدَ دُكَنْ سُواْجُواْجِنْسَ سُكَتَاشِ دَ سَسَّڢٜىٰ، سُكَ كَڢَ سَنْسَنِنْسُ كُسَدَ مَٻُٻُّغَرْ ضُوً هَرُوادْ؞ مِدِيَنَاوَا سُكَ كَڢَ سَنْسَنِنْسُ عَثِكِنْ ݣُورِنْ دَيَكٜىٰ تَأَرٜىٰوَ دَسُو، كُسَدَ تُدُنْ مُواْرٜىٰ؞ 2 يَهْوٜىٰهْ يَثٜىٰ وَ جِدْعَوْنَ «مُتَنٜىٰنْ دَ كَكٜىٰ دَسُو سُنْيِيَوَ؞ بَذَنْ بَادَ مِدِيَنَاوَا أَ حَنُّنْسُ حَكَبَ دُواْمِنْ كَدَ مُتَنٜىٰنْ إِسْرَٰٓءِيلَ سُبُغَ ڧِرْجِ سُثٜىٰ، ‹ڧَرْڢِنْمُ نٜىٰ يَثٜىٰثٜىٰمُ؞› 3 يَنْذُ سَيْ كَيِ شٜىٰلَ غَ مُتَنٜىٰنْ كَثٜىٰ، ‹دُكْ وَنْدَ يَنَ جِنْ ڟُواْرُواْ يَنَ كُمَ ضَوَرْ جِكِے، يَكُواْمَ غِدَا!› » سَيْ مُتُمْ دُبُو عَشِرِنْ دَ بِيُ سُكَ كُواْمَ، دُبُو غُواْمَ سُكَ ڟَيَ تَرٜىٰدَ جِدْعَوْنَ؞ 4 سَيْ يَهْوٜىٰهْ يَثٜىٰ وَ جِدْعَوْنَ «حَرْ يَنْذُ مُتَنٜىٰنْ سُنْيِيَوَ؞ كَيْسُ بَاكِنْ كُواْغِ دُواْمِنْ إِنْ وَارٜىٰ مَكَسُ عَثَنْ؞ سَعَدَّ نَثٜىٰ، ‹غَا وَنْدَ ذَيْ تَڢِے تَرٜىٰدَكَيْ،› شِينٜىٰ ذَيْ تَڢِے، وَنْدَ كُمَ نَثٜىٰ، ‹بَذَيْ تَڢِے تَرٜىٰدَكَيْ بَ،› شِيكُوَ بَذَيْ تَڢِے تَرٜىٰدَكَيْ بَ؞» 5 جِدْعَوْنَ كُوَ يَا كَيْ مُتَنٜىٰنْ بَاكِنْ كُواْغِ، سَيْ يَهْوٜىٰهْ يَثٜىٰ مَسَ «كَوَارٜىٰ غٜىٰڢٜىٰ طَيَ دُكْ وَنْدَ يَشَا ضُوَ كَمَرْ يَدَّ كَرٜىٰ يَكَنْ لَسَ؞ كَكُمَ وَارٜىٰ غٜىٰڢٜىٰ طَيَ دُكْ وَنْدَ يَدُرْڧُسَ دَ ڠُوِوَرْسَ يَشَا ضُوَ دَ حَنُّنْسَ؞» 6 يَوَنْ مُتَنٜىٰنْ دَ سُكَ لَشِ ضُوَ كَمَرْ كَرٜىٰ سُو طَرِے عُكُنٜىٰ؞ دُكَنْ سَوْرَنْ سُواْجُواْجِنْ كُوَ سُنْ دُرْڧُسَ عَكَنْ ڠُوِوَرْسُ نٜىٰ سُكَشَا ضُوً؞ 7 يَهْوٜىٰهْ كُوَ يَثٜىٰ وَ جِدْعَوْنَ «ذَنْثٜىٰثٜىٰكَ إِنْبَاكَ نَصَرَا عَكَنْ مِدِيَنَاوَا دَ مُتُمْ طَرِے عُكُ طِنَّنْ دَ سُكَ لَشِ ضُوَ كَمَرْ كَرٜىٰ؞ كَسَلَّمِ سَوْرَنْ، كُواْوَ يَكُواْمَ غِدَنْسَ؞» 8 جِدْعَوْنَ يَبَرْ مُتُمْ طَرِے عُكُ طِنَّنْ تَرٜىٰ دَشِ؞ دُكَنْ سَوْرَنْ سُواْجُواْجِنْ إِسْرَٰٓءِيلَ كُوَ يَسَلَّمٜىٰسُ، عَمَّا سُكَ بَرْ دُكَنْ عَبِنْثِنْسُ دَ ڧَهُواْنِنْسُ أَ حَنُّنْ طَرِے عُكُنَّنْ؞ سَنْسَنِنْ مِدِيَنَاوَا كُوَ يَنَ ڧَسَا دَسُو عَثِكِنْ ݣُورِ؞ 9 أَوَنَّنْ دَرٜىٰ يَهْوٜىٰهْ يَثٜىٰ وَ جِدْعَوْنَ «كَتَاشِ، كَڢَاطَوَ سَنْسَنِنْ مِدِيَنَاوَا دَيَاڧِ، غَمَا نَا بَادَسُو أَ حَنُّنْكَ؞ 10 عَمَّا عِدَنْ كَنَ جِنْ ڟُواْرُواْ كَكَيْ مُسُ يَاڧِ، سَيْ كَغَنْغَرَ سَنْسَنِنْسُ تَرٜىٰدَ بَاوَنْكَ ڢُرَ؞ 11 عَثَنْ ذَاكَجِے أَبِنْدَ سُكٜىٰثٜىٰوَ؞ بَايَنْ حَكَ، ذَاكَسَامِ ڧَرْڢِنْ حَلِنْ دَ ذَاكَ ڢَاطَوَ سَنْسَنِنْ دَ يَاڧِ؞» سَيْ جِدْعَوْنَ تَرٜىٰدَ بَاوَنْسَ ڢُرَ يَغَنْغَرَ كُسَدَ سَنْسَنِنْ أَبُواْكَنْ غَابَنْسُ؞ 12 مِدِيَنَاوَنْ دَ أَمَلٜىٰكَاوَنْ دَ مُتَنٜىٰنْ ڧَبِيلُنْ غَبَسْ، سُكَ بَظُو عَثِكِنْ ݣُورِنْ، يَوَنْسُ كُوَ كَمَرْ ڢَارِ نٜىٰ؞ سُنَ كُمَ دَ رَاڧُمَ دَيَوَ كَمَرْ يَشِ عَبَاكِنْ تٜىٰكُ؞ بَاوَنْدَ يَ عِيَ ڧِرْغَسُ؞ 13 سَعَدَّ جِدْعَوْنَ يَ إِسُواْ، سَيْ يَجِ وَنِ مُتُمِنْ مَدْيَنَ يَنَ ڢَطَا وَ أَبُواْكِنْسَ مَڢَرْكِنْ دَ يَيِ؞ يَنَ ثٜىٰوَ «نَيِ مَڢَرْكِ؞ نَغَ دُنْڧُلٜىٰنْ غُرَاسَرْ بَلٜىٰ يَغَنْغَرُواْ حَرْ عَثِكِنْ سَنْسَنِنْمُ، يَبُغِ تٜىٰنْتِ؞ تٜىٰنْتِنْ كُوَ يَڢَاطِ يَݣُونْتَ عَڧَسَا غَبَاطَيَ؞» 14 أَبُواْكِنْسَ يَأَمْسَ يَثٜىٰ «كَيْ! لَلَّيْ وَنَّنْ تَكُواْبِنٜىٰ نَ جِدْعَوْنَ طَنْ يُواْوَشْ، مُتُمِنْ إِسْرَٰٓءِيلَ! اللَّهْ يَا رِغَا يَا بَادَ مِدِيَنَاوَا دَ سُواْجُواْجِنْمُ دُكَ أَ حَنُّنْسَ!» 15 سَعَدَّ جِدْعَوْنَ يَجِ مَڢَرْكِنْ دَ وَنَّنْ مُتُمْ يَيِ دَ ڢَسَّرَرْسَ، سَيْ يَرُسُنَ دَ ڢُسْكَرْسَ حَرْ ڧَسَا يَيِ وَ يَهْوٜىٰهْ سُجَّدَ؞ سَيْ يَكُواْمَ سَنْسَنِنْ مُتَنٜىٰنْ إِسْرَٰٓءِيلَ يَثٜىٰ «كُتَاشِ، غَمَا يَهْوٜىٰهْ يَا رِغَا يَا بَاكُ نَصَرَا عَكَنْ سُواْجُواْجِنْ مَدْيَنَ!» 16 جِدْعَوْنَ كُوَ يَرَبَ وَطَنَّنْ مُتُمْ طَرِے عُكُ طِنْ كَشِ عُكُ، يَكُمَ بَا كُواْوَنٜىٰ مُتُمْ ڧَهُواْ دَ سَنْدَا مَيْ وُتَادَ تُلُ دُواْمِنْ أَ رُڢٜىٰ سَنْدَنْ؞ 17 يَثٜىٰ مُسُ «كُدُوبٜىٰنِ، كُيِ دُكْ أَبِنْدَ نَكٜىٰيِ؞ سَعَدَّ نَكَيْ بَاكِنْ سَنْسَنِنْسُ، يَدَّ نَيِ، كُو مَا كُيِ دَيْدَيْ حَكَ؞ 18 سَعَدَّ نِے دَ ڧُنْغِيَتَ مُكَ بُوسَ ڧَهُواْنِ، سَيْ كُو مَا كُبُوسَ نَاكُ ڧَهُواْنِنْ أَوُرَارٜىٰنْ دَ كُكٜىٰ كٜىٰوَيٜىٰ دَ سَنْسَنِنْ، سَعَنً كُيِ إِيهُ كُثٜىٰ، ‹دُواْمِنْ يَهْوٜىٰهْ دَ جِدْعَوْنَ!› » 19 جِدْعَوْنَ تَرٜىٰدَ مُتُمْ طَرِے وَطَنْدَ سُكٜىٰ تَرٜىٰدَشِ، سُكَ كَيْ بَاكِنْ سَنْسَنِنْ وَجٜىٰنْ ڟَكَرْ دَرٜىٰ بَايَنْدَ عَكَ ثَنْجَ مَاسُ غَادِ؞ سَيْ سُكَ بُوسَ ڧَهُواْنِ، سُكَ كُمَ ڢَرْڢَسَ تُلُنَنْ دَسُكٜىٰ أَ حَنُّوَنْسُ؞ 20 ڧُنْغِيُواْيِ عُكُ طِنَّنْ سُكَ بُوسَ ڧَهُواْنِنْسُ، سُكَ ڢَرْڢَشٜىٰ تُلُنَنْ دَسُكٜىٰ رِڧٜىٰ دَسُو، سُكَ رِڧٜىٰ سَنْدُنَنْ مَاسُ وُتَا طِنْ أَ حَنُّوَنْسُ نَهَغُ، ڧَهُواْنِنْ كُمَ سُكَ رِڧٜىٰسُ أَ حَنُّوَنْسُ نَدَمَ؞ سَيْ سُكَيِ إِيهُ، سُكَثٜىٰ «تَكُواْبِنْ يَهْوٜىٰهْ دَ جِدْعَوْنَ!» 21 كُواْوَنٜىٰ مُتُمْ يَڟَيَ أَ عِنْدَ يَكٜىٰ كٜىٰوَيٜىٰ دَ سَنْسَنِنْ؞ سَيْ دُكَنْ أَبُواْكَنْ غَابَنْسُ سُكَ غُدُ سُنَ إِيهُ؞ 22 سَعَدَّ مُتَنٜىٰنْ جِدْعَوْنَ سُكَ بُوسَ ڧَهُواْنِ طَرِے عُكُنَّنْ، سَيْ يَهْوٜىٰهْ يَرِكِتَرْدَ سُواْجُواْجِنْ مَدْيَنَ سُكَيِ تَسَسَّارٜىٰ جُونَنْسُ دَ تَكُبَ؞ سُكَ غُدُ ذُوَا بٜىٰتْ شِتَّ تَوَجٜىٰنْ ظَرٜىٰتَنْ، حَرْ كُمَ ذُوَا غَرِنْ أَبٜىٰلْ مٜىٰهُواْلَ، كُسَدَ تَبَّتْ؞ 23 سَيْ عَكَ كِرَا مُتَنٜىٰنْ إِسْرَٰٓءِيلَ دَغَ ذُرِيَرْ نَڢْتَلِ دَ ذُرِيَرْ أَشٜىٰرْ دَ كُمَ ذُرِيَرْ مَنَسّٜىٰ، سُكَ كُوَ ڢِتُواْ سُكَبِے مِدِيَنَاوَا؞ 24 جِدْعَوْنَ كُوَ يَتُورَ یَنْ عَيْكَ أَدُكَنْ ڧَسَرْ تُدَّيْ نَ إِڢْرَيِمْ يَثٜىٰ «كُغَنْغَرُواْ، كُيَاڧِ مِدِيَنَاوَا، كُيِ غَادِنْ وُرَارٜىٰنْ ڧٜىٰتَرٜىٰ كُواْغِنْ يُواْدَنْ دَ نَرَاڢُڢُّكَ حَرْ ذُوَا بٜىٰتْبَرَ دُواْمِنْ كَدَ سُڧٜىٰتَرٜىٰ؞» 25 سُكَيِ تَكُواْرَرْ مِدِيَنَاوَا؞ سُكَ كَامَ شُوغَبَنِّنْ سُواْجُواْجِنْ مِدِيَنَاوَا بِيُ، عُواْرٜىٰبْ دَ ظٜىٰيٜىٰبْ؞ سُكَ كَشٜىٰ عُواْرٜىٰبْ أَ دُوڟٜىٰنْ عُواْرٜىٰبْ، سُكَ كُمَ كَشٜىٰ ظٜىٰيٜىٰبْ أَوُرِنْ مَڟٜىٰوَرْ یَیَنْ إِنَبِے أَ ظٜىٰيٜىٰبْ؞ بَايَنْ حَكَ، سُكَ كَٰوُاْوَ جِدْعَوْنَ كَوُنَنْ عُواْرٜىٰبْ دَ ظٜىٰيٜىٰبْ أَ عِنْدَ يَكٜىٰ عَڧٜىٰتَرٜىٰنْ كُواْغِنْ يُواْدَنْ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria