أَلْڧَلَيْ 4 - أَتَّوْرَتْ دَ أَنَّبَاوَا

يَهْوٜىٰهْ يَا ثٜىٰثِ إِسْرَٰٓءِيلَ تَهَنُّنْ دٜىٰبُواْرَ دَ بَرَكْ

¹ بَايَنْ مُتُوَرْ عٜىٰهُدْ، مُتَنٜىٰنْ إِسْرَٰٓءِيلَ سُكَسَاكٜىٰيِنْ أَبِنْدَ يَكٜىٰ مُوغُ أَعِدُوانْ يَهْوٜىٰهْ؞

² يَهْوٜىٰهْ كُوَ يَسَا يَبِنْ، سَرْكِنْ كَنْعَنِيَاوَا وَنْدَ يَكٜىٰ مُلْكٍ بِرْنِنْ حَزُوارْ، يَشَا ڧَرْڢِنْسُ؞ شُوغَبَنْ سُواْجُواْجِنْسَ شِينٜىٰ سِسٜىٰرَ، وَنْدَ يَكٜىٰ ظَوْنٜىٰ أَ هَرُواْشٜىٰتْ تَ أَلْعُمَّيْ؞

³ يَبِنْ يَنَدَ كٜىٰكٜىٰنْ دُواْكِنْ يَاڧِ نَڧَرْڢٜىٰ غُدَا طَرِے تَرَ، يَكُمَ ڟَنَنْتَ وَمُتَنٜىٰنْ إِسْرَٰٓءِيلَ، يَوُلَڧَنْتَاسُ حَرْ شٜىٰكَرَا عَشِرِنْ؞ سَيْ مُتَنٜىٰنْ إِسْرَٰٓءِيلَ سُكَيِ كُوكَا غَ يَهْوٜىٰهْ دُواْمِنْ يَتَيْمَكٜىٰسُ؞

⁴ دٜىٰبُواْرَ، مَاتَرْ لَڢِدُواتْ، عِتَ أَنَّبِيَ ثٜىٰ؞ أَ لُواْكَثِنَّنْ كُوَ عِتَثٜىٰ تَكٜىٰيِ وَمُتَنٜىٰنْ إِسْرَٰٓءِيلَ شَرِيعَ؞

⁵ تَكَنْ ذَوْنَ عَڧَرْڧَشِنْ وَنِ إِتَاثٜىٰ مَيْ سُونَ إِتَاثٜىٰنْ دَبِينُوانْ دٜىٰبُواْرَ ڟَكَانِنْ رَمَ دَ بٜىٰتٜىٰلْ عَثِكِنْ يَنْكِنْ تُدَّيْ نَ إِڢْرَيِمْ؞ مُتَنٜىٰنْ إِسْرَٰٓءِيلَ سُكَنْ هَوْرَ ذُوَا وُرِنْتَ دُواْمِنْ تَيِ مُسُ شَرِيعَ؞

⁶ أَنَانً وَتَرَانَ تَعَيْكَ عَكِرَا بَرَكْ، طَنْ أَبِنُواْوَمْ دَغَ غَرِنْ كٜىٰدٜىٰشْ عَيَنْكِنْ ذُرِيَرْ نَڢْتَلِ؞ سَيْ تَثٜىٰ مَسَ، ‏«‏‏يَهْوٜىٰهْ اللَّهْ نَ إِسْرَٰٓءِيلَ يَبَاكَ وَنَّنْ عُمَرْنِ، يَثٜىٰ، ‏‹‏كَتَڢِے كَتَتَّارَ مُتَنٜىٰ دُبُو غُواْمَ دَغَ ذُرِيَرْ نَڢْتَلِ دَ تَ ظٜىٰبُلُنْ، كَكُمَ جَغُواْرَنْثٜىٰسُ ذُوَا بَبَّنْ تُدُنْ تَبُوارْ؞

⁷ نِے كُوَ ذَنْ جَٰوُاْ سِسٜىٰرَ، شُوغَبَنْ سُواْجُواْجِنْ يَبِنْ، تَرٜىٰدَ كٜىٰكُنَنْ دُواْكِنْسَ نَيَاڧِ دَ ڧُنْ‌غِيُواْيِنْ سُواْجُواْجِنْسَ يَيِ يَاڧِ دَكَيْ أَ كُواْغِنْ كِشُوانْ، ذَنْ كُوَ بَادَشِ أَ حَنُّنْكَ؞›‏ »‏

⁸ سَيْ بَرَكْ يَثٜىٰ مَتَ ‏«‏عِدَنْ ذَاكِ تَڢِے تَرٜىٰدَنِ، ذَنْ تَڢِے، عَمَّا عِدَنْ بَذَاكِ تَڢِے تَرٜىٰدَنِيبَ، بَذَنْ تَڢِے بَ؞»‏

⁹ دٜىٰبُواْرَ كُوَ تَثٜىٰمَسَ ‏«‏حَڧِيڧَ، ذَنْ تَڢِے تَرٜىٰدَكَيْ؞ عَمَّا سَبُواْدَ مَتَاكِنْدَ كَطَوْكَ دَرَجَرْ نَصَرَا بَذَاتَ ذَمَ تَاكَبَ، غَمَا يَهْوٜىٰهْ ذَيْبَادَ سِسٜىٰرَ أَ حَنُّنْ مَثٜىٰ؞»‏ سَيْ دٜىٰبُواْرَ تَتَاشِ تَتَڢِے تَرٜىٰدَ بَرَكْ ذُوَا كٜىٰدٜىٰشْ؞

¹⁰ بَرَكْ يَكِرَوُاْ سُواْجُواْجِنْ ذُرِيَرْ ظٜىٰبُلُنْ دَ تَ نَڢْتَلِ ذُوَا كٜىٰدٜىٰشْ؞ مُتُمْ دُبُو غُواْمَ سُكَبِيُواْ شِ؞ دٜىٰبُواْرَ كُوَ تَتَڢِے تَرٜىٰ دَشِ؞

¹¹ هٜىٰبٜىٰرْ مُتُمِنْ كٜىٰنِ كُوَ يَا رِغَا يَا وَارٜىٰ كَنْسَ دَغَ سَوْرَنْ كٜىٰنِيَاوَا، ذُرِيَرْ هُواْبَبْ بَابَنْ مَاتَرْ مُوسَٰى؞ يَكَڢَ تٜىٰنْتِنْسَ ثَنْ كُسَدَ إِتَاثٜىٰنْ ڟَاڢِ أَ ذَاعَنَنِّمْ وَنْدَ يَكٜىٰ كُسَدَ كٜىٰدٜىٰشْ؞

¹² عَكَ ڢَطَا وَ سِسٜىٰرَ ثٜىٰوَ بَرَكْ طَنْ أَبِنُواْوَمْ يَهَوْرَ ذُوَا بَبَّنْ تُدُنْ تَبُوارْ؞

¹³ دَجِنْ وَنَّنْ، سَيْ سِسٜىٰرَ يَتَتَّارُواْ دُكَنْ كٜىٰكُنَنْ دُواْكِنْ يَاڧِنْسَ نَڧَرْڢٜىٰ غُدَا طَرِے تَرَ دَ دُكَنْ سُواْجُواْجِنْ دَسُكٜىٰ تَرٜىٰ دَشِ؞ يَجَغُواْرَنْثٜىٰسُ دَغَ هَرُواْشٜىٰتْ تَ أَلْعُمَّيْ حَرْ ذُوَا كُواْغِنْ كِشُوانْ؞

¹⁴ دٜىٰبُواْرَ تَثٜىٰ وَ بَرَكْ ‏«‏تَاشِ!‏ غَمَا يَوْ نٜىٰ رَانَرْ دَ يَهْوٜىٰهْ يَبَادَ سِسٜىٰرَ أَ حَنُّنْكَ، غَمَا ذَيْ يِيَاڧِ دُواْمِنْكَ؞»‏ سَيْ بَرَكْ يَغَنْ‌غَرُواْ دَغَ بَبَّنْ تُدُنْ تَبُوارْ تَرٜىٰدَ مُتُمْ دُبُو غُواْمَ؞

¹⁵ دَ بَرَكْ يَڢَاطَوَ سِسٜىٰرَ دَ يَاڧِ، سَيْ يَهْوٜىٰهْ يَسَا سِسٜىٰرَ يَضِكِثِے دَ دُكَنْ كٜىٰكُنَنْ دُواْكِنْسَ نَيَاڧِ دَ ڧُنْ‌غِيَرْ سُواْجُواْجِنْسَ؞ سَيْ سِسٜىٰرَ يَسَوْكَ دَغَ كٜىٰكٜىٰنْ دُواْكِنْسَ نَيَاڧِ يَغُدُ دَ ڧَڢَا؞

¹⁶ عَمَّا بَرَكْ يَكُواْرِ كٜىٰكُنَنْ دُواْكِ نَيَاڧِ دَ سُواْجُواْجِنْ حَرْ ذُوَا هَرُواْشٜىٰتْ تَ أَلْعُمَّيْ؞ عَكَ كَكَّشٜىٰ دُكَنْ سُواْجُواْجِنْ سِسٜىٰرَ دَ تَكُواْبِے، بَاوَنْدَ يَڟِيرَا؞

¹⁷ أَنَانً سَيْ سِسٜىٰرَ يَغُدُ ذُوَا تٜىٰنْتِنْ يَيٜىٰلْ مَاتَرْ هٜىٰبٜىٰرْ مُتُمِنْ كٜىٰنِ، غَمَا أَݣَويْ ذَمَنْ لَاڢِيَ ڟَكَانِنْ سَرْكِے يَبِنْ نَ حَزُوارْ دَ دَنْ‌غِنْ هٜىٰبٜىٰرْ؞

¹⁸ سَيْ يَيٜىٰلْ تَڢِتُواْ، تَمَرَبْثٜىٰشِ، تَثٜىٰمَسَ ‏«‏كَذُواْ نَنْ، يَا مَيْغِرْمَ، كَشِغَ ثِكِنْ تٜىٰنْتِنَ؞ كَدَ كَجِڟُواْرُواْ؞»‏ شِے كُوَ يَبِتَ ذُوَا ثِكِنْ تٜىٰنْتِنْتَ، سَيْ تَرُڢٜىٰشِ دَبَرْغُواْ؞

¹⁹ يَثٜىٰ مَتَ ‏«‏إِنَ ضُواْڧُوانْكِ، كِبَانِ ضُوَ إِنْ شَا، غَمَا إِنَ جِنْ ڧِشِ؞»‏ عِتَ كُوَ تَجٜىٰ تَبُوطٜىٰ سَلْكَرْ مَدَرَ، تَبَاشِ يَشَا، تَسَاكٜىٰ رُڢٜىٰشِ؞

²⁰ سَيْ يَثٜىٰمَتَ ‏«‏كِڟَيَ عَبَاكِنْ ڧُواْڢَرْ تٜىٰنْتِنْ؞ عِدَنْ وَنِ يَذُواْ يَتَمْبَيٜىٰكِ ثٜىٰوَ ‏‹‏كُواْ أَݣَويْ وَنِ أَنَنْ؟›‏ سَيْ كِثٜىٰ مَسَ، ‏‹‏بَابُ؞›‏ »‏

²¹ سِسٜىٰرَ كُوَ يَغَجِ سُواْسَيْ، بَرْثِ مَيْ نَوْيِ يَكَامَ شِ؞ سَيْ يَيٜىٰلْ مَاتَرْ هٜىٰبٜىٰرْ تَطَوْكِ غُدُمَ دَ ڧُوسَرْ كَڢَ تٜىٰنْتِ، تَجٜىٰ وُرِنْسَ أَ حَنْكَلِ، تَكَڢَ مَسَ ڧُوسَرْ عَكَنْسَ، ڧُوسَرْ تَبِے تَثِكِنْ كَنْسَ حَرْ تَوُثٜىٰ ثِكِنْ ڧَسَا، سَيْ سِسٜىٰرَ يَمُتُ؞

²² بَرَكْ كُوَ يَنَ ڢَامَرْ بِنْ سِسٜىٰرَ؞ دَ يَيٜىٰلْ مَاتَرْ هٜىٰبٜىٰرْ تَغَنْ شِ، تَاڢِتَ تَاسَامٜىٰشِ تَثٜىٰمَسَ ‏«‏كَذُواْ نَنْ!‏ ذَنْ نُونَ مَكَ عِنْدَ مُتُمِنَّنْ دَ كَكٜىٰ نٜىٰمَ يَكٜىٰ؞»‏ سَيْ يَبِتَ ذُوَا ثِكِنْ تٜىٰنْتِنْ، يَتَرَرْ دَ جِكِنْ سِسٜىٰرَ ݣُونْثٜىٰ عَڧَسَا غَاوَا، تَرٜىٰدَ ڧُوسَرْ كَڢَ تٜىٰنْتِ عَثِكِنْ كَنْسَ؞

²³ أَوَنَّنْ رَانَ اللَّهْ يَبَا مُتَنٜىٰنْ إِسْرَٰٓءِيلَ نَصَرَا عَكَنْ يَبِنْ سَرْكِنْ كَنْعَنِيَاوَا؞

²⁴ إِسْرَٰٓءِيلَاوَا سُكَيِ تَڧَارَ ڧَرْڢِے سُكَيِ تَڟَنَنْتَاوَ يَبِنْ سَرْكِنْ كَنْعَنِيَاوَا حَرْ سُكَ هَلَكَاشِ؞