أَلْڧَلَيْ 21 - أَتَّوْرَتْ دَ أَنَّبَاوَا

مَاتَا دُواْمِنْ مُتَنٜىٰنْ ذُرِيَرْ بِلِيَامِنُ

¹ بَايَنْ وَنَّنْ كَشٜىٰ كَشٜىٰ، سَيْ مُتَنٜىٰنْ إِسْرَٰٓءِيلَ سُكَ تَارُ أَ مِظْڢَ، سُكَ طَوْكِ ضَنْڟُوَا ثٜىٰوَ ‏«‏بَا وَنِ دَغَ ثِكِنْمُ وَنْدَ ذَيْبَادَ یَرْسَ عَوْرٜىٰ غَ مُتُمِنْ ذُرِيَرْ بِلِيَامِنُ؞»‏

² دَغَ وُرِنْ مُتَنٜىٰنْ إِسْرَٰٓءِيلَ سُكَ تَڢِے بٜىٰتٜىٰلْ سُكَ ذَوْنَ أَوُرِنْ أَغَبَنْ اللَّهْ حَرْ يَمَّ سُكَ طَغَ مُرْيُواْيِنْسُ سُكَيِ كُوكَا مَيْ ذَاڢِ؞

³ سُكَثٜىٰ ‏«‏يَا يَهْوٜىٰهْ اللَّهْ نَ إِسْرَٰٓءِيلَ، مٜىٰيَسَا وَنَّنْ أَبُ يَڢَرُ عَثِكِنْ إِسْرَٰٓءِيلَ؟ غَاشِ، يَوْ مُنْ رَسَ ذُرِيَ طَيَ دَغَ ثِكِنْ ظُرِيُواْيِنْ إِسْرَٰٓءِيلَ؞»‏

⁴ وَشٜىٰغَرِ دَ سَڢٜىٰ مُتَنٜىٰنْ سُكَ غِنَا بَغَدٜىٰ عَثَنْ، سُكَ مِيڧَ هَدَايُ نَڧُواْنَاوَا دَ نَڠَرَنْ زُمُنْثِ؞

⁵ دَا مَا أَ مِظْڢَ إِسْرَٰٓءِيلَاوَا سُكَ طَوْكِ ضَنْڟُوَا ثٜىٰوَ ‏«‏دُكْ وَنْدَ بَيْ تَڢِے مِظْڢَ بَ، ذَاعَ كَشٜىٰشِ؞»‏ دَ سُكَ تَارُ أَ بٜىٰتٜىٰلْ، سُكَثٜىٰ ‏«‏أَݣَويْ وَتَ ذُرِيَرْ إِسْرَٰٓءِيلَ وَدَّ بَتَكَسَنْثٜىٰ عَتَارُوانْ جَمَعَرْمُ دَ مُكَيِ أَغَبَنْ يَهْوٜىٰهْ أَ مِظْڢَ بَ؟»‏

⁶ مُتَنٜىٰنْ إِسْرَٰٓءِيلَ كُوَ سُكَجِ تَوْسَيِنْ یَنْعُوَنْسُ مُتَنٜىٰنْ ذُرِيَرْ بِلِيَامِنُ سُكَثٜىٰ ‏«‏غَاشِ، يَوْ مُنْ رَسَ ذُرِيَ طَيَ دَغَ ثِكِنْ إِسْرَٰٓءِيلَ؞

⁷ مٜىٰ ذَامُيِ دُواْمِنْ مَظَا نَظُرِيَرْ بِلِيَامِنُ وَطَنْدَ سُكَ ضَغٜىٰ دُواْمِنْ سُسَامِ مَتَ؟ تُنْدَيَكٜىٰ مُنْ رِغَا مُنْ طَوْكِ ضَنْڟُوَا أَغَبَنْ يَهْوٜىٰهْ ثٜىٰوَ بَذَامُ بَادَ یَیَنْمُ مَتَ غَرٜىٰسُ سُعَوْرَبَ؞»‏

⁸ سَيْ سُكَ تَمْبَيَ ثٜىٰوَ ‏«‏كُواْ أَݣَويْ وَتَ ذُرِيَرْ إِسْرَٰٓءِيلَ دَ بَتَهَوْرَ ذُوَا تَارُوانْمُ أَغَبَنْ يَهْوٜىٰهْ أَ مِظْڢَ بَ؟»‏ سَيْ سُكَ تَرَرْ بَا وَنِ دَغَ ثِكِنْ يَبٜىٰشْ غِلٜىٰيَدْ وَنْدَ يَكَسَنْثٜىٰ عَتَارُوانْ جَمَعَرْ؞

⁹ غَمَا دَغَ بَايَ سَعَدَّ عَكَ ڧِرْغَ دُكَنْ مُتَنٜىٰنْ، سَيْ عَكَ تَرَرْ بَا وَنِ دَغَ ثِكِنْ مَذَوْنَنْ يَبٜىٰشْ غِلٜىٰيَدْ وَنْدَ يَكَسَنْثٜىٰ أَوُرِنْ؞

¹⁰ سَبُواْدَ حَكَ، تَارُوانْ جَمَعَ كُوَ سُكَ عَيْكِ سُواْجُواْجِ دُبُو غُواْمَشَا بِيُ ذُوَا يَبٜىٰشْ غِلٜىٰيَدْ سُكَ عُمَرْثٜىٰسُ ‏«‏كُتَڢِے كُكَكَّشٜىٰ دُكَنْ مَذَوْنَنْ يَبٜىٰشْ غِلٜىٰيَدْ دُكْ دَ مَاتَادَ يَارَا؞

¹¹ غَا أَبِنْدَ ذَاكُيِ، كُواْوَنٜىٰ نَمِجِ دَ كُواْوَثٜىٰ مَثٜىٰنْ دَ تَتَٻَ سَنِنْ نَمِجِ ذَاعَ كٜىٰٻٜىٰ دُواْمِنْ هَلَّكَرْوَ؞»‏

¹² سُكَ تَرَرْ عَثِكِنْ مَذَوْنَنْ يَبٜىٰشْ غِلٜىٰيَدْ بُدُرْوَيْ، یَنْ مَاتَانْدَ بَسُ سَنْ نَمِجِبَ غُدَا طَرِے حُطُ؞ سُكَ كَٰوُاْسُ ذُوَا ذَنْ‌غُوانْ سُواْجُواْجِنْ بِلِيَامِنُ أَ شِلُواْ وَدَّ تَكٜىٰ عَڧَسَرْ كَنْعَنَ؞

¹³ سَيْ دُكَنْ تَارُوانْ جَمَعَرْ إِسْرَٰٓءِيلَ سُكَ عَيْكَرْ دَ سَڧُوانْ سَلَمَ ذُوَاغَ مُتَنٜىٰنْ بِلِيَامِنُ وَطَنْدَ سُكَ غُدُ سُكَ ذَوْنَ أَ دُوڟٜىٰنْ رِمُّوانْ ثٜىٰوَ يَاڧِ يَڧَارٜىٰ؞

¹⁴ مُتَنٜىٰنْ بِلِيَامِنُ كُوَ سُكَ كُواْمَ أَ لُواْكَثِنْ، عَكَ بَاسُ یَنْ مَاتَنَّنْ طَرِے حُطُ دَغَ يَبٜىٰشْ غِلٜىٰيَدْ، وَطَنْدَ عَكَ بَرْسُ دَ رَيْ؞ عَمَّا یَنْ مَاتَانْ بَسُ إِشٜىٰسُبَ؞

¹⁵ مُتَنٜىٰنْ سُكَجِ تَوْسَيِنْ مُتَنٜىٰنْ بِلِيَامِنُ، غَمَا سَوْرَ كَطَنْ يَهْوٜىٰهْ يَشَرٜىٰ ذُرِيَ طَيَ دَغَ ثِكِنْ ظُرِيُواْيِنْ إِسْرَٰٓءِيلَ؞

¹⁶ سَبُواْدَ حَكَ دَتَّاوَنْ تَارُوانْ جَمَعَرْ إِسْرَٰٓءِيلَ سُكَثٜىٰ ‏«‏يَيَ ذَامُيِ دَ مَظَا نَظُرِيَرْ بِلِيَامِنُ دَ بَسُسَامِ مَاتَا بَ، تُنْدَ أَنْكَشٜىٰ دُكَنْ مَاتَنْسُ؟»‏

¹⁷ سُكَثٜىٰ ‏«‏دُواْلٜىٰنٜىٰ سَوْرَنْ دَ سُكَ ضَغٜىٰ دَغَ ذُرِيَرْ بِلِيَامِنُ سُسَامِ غَادُواْ، دُواْمِنْ كَدَ أَ شَارٜىٰ وَتَ ذُرِيَ غَبَاطَيَ دَغَ ثِكِنْ ظُرِيُواْيِنْ إِسْرَٰٓءِيلَ؞

¹⁸ عَمَّا بَذَامُ يَرْدَ مُبَاسُ یَیَنْمُ مَتَ سُعَوْرَبَ؞ دَا مَا مُنْ يَرْدَ ثٜىٰوَ دُكْ وَنْدَ يَبَادَ یَرْسَ عَوْرٜىٰ غَ مُتُمِنْ ذُرِيَرْ بِلِيَامِنُ لَعَنَنّٜىٰ نٜىٰ شِ؞»‏

¹⁹ سَيْ سُكَ تُنَ سُكَثٜىٰ ‏«‏غَاشِ، بِكٍ يَهْوٜىٰهْ وَنْدَ عَكَنْيِ كُواْوَثٜىٰ شٜىٰكَرَا أَ شِلُواْ يَيِ كُسَ؞»‏ شِلُواْ يَنَ وَجٜىٰنْ أَرٜىٰوَ دَ بٜىٰتٜىٰلْ، وَجٜىٰنْ غَبَسْ دَ حَنْيَرْ دَ تَڢِتُواْ دَغَ بٜىٰتٜىٰلْ ذُوَا شٜىٰكٜىٰمْ عَكُدَنْثِنْ لٜىٰبُواْنَ؞

²⁰ سُكَثٜىٰ وَمُتَنٜىٰنْ بِلِيَامِنُ ‏«‏كُتَڢِے كُٻُواْيٜىٰ كَنْكُ عَثِكِنْ غُواْنَكِنْ إِنَبِے؞

²¹ كُلُورَ، سَعَدَّ یَنْ مَاتَانْ شِلُواْ سُكَ ڢِتُواْ دُواْمِنْ سُيِ ضَوَ، سَيْ كُتَاشِ أَغُجٜىٰ دَغَ غُواْنَكِنْ إِنَبِنْ، كُواْوَنّٜىٰنْكُ يَكَامَ طَيَ دَغَ ثِكِنْسُ دَ ڧَرْڢِے يَتَڢِے دَ عِتَ غِدَنْسَ تَذَمَ مَاتَرْسَ؞

²² حَڧِيڧَ إِيَايٜىٰنْسُ دَ یَنْعُوَنْسُ ذَاسُذُواْ سُيِ ڧَارَرْكُ أَوُرِنْمُ؞ سَعَدَّ سُكَذُواْ مُو ذَامُثٜىٰ مُسُ، ‏‹‏مُنَ ضُواْڧُوانْكُ، كُيِ مُسُ كِرْكِ سَبُواْدَمُو؞ غَمَا بَمُسَامُواْ وَدُكَنْسُ مَتَ أَ لُواْكَثِنْ يَاڧِبَ؞ كُو كُمَ بَكُ جَٰوُاْ وَكَنْكُ وَنِ لَيْڢِے تَوُرِنْ كَرْيَ ضَنْڟُوَابَ، تُنْدَ بَ دَ يَرْدَرْكُ سُكَ عَوْرِ یَیَنْكُ مَتَبَ؞›‏ »‏

²³ مُتَنٜىٰنْ بِلِيَامِنُ كُوَ سُكَيِ حَكَ؞ كُواْوَنّٜىٰنْسُ يَذَاٻِ مَثٜىٰ دَغَ ثِكِنْ یَنْ مَاتَانْدَ سُكَ ڢِتُواْ ضَوَ أَ شِلُواْ يَتَڢِے دَ عِتَ تَذَمَ مَاتَرْسَ؞ سَعَنً سُكَ كُواْمَ ڢِيلِنْسُ نَغَادُواْ؞ سُكَ سَاكٜىٰ غِنَا غَرُرُوَنْسُ سُكَ ذَوْنَ عَثِكِ؞

²⁴ حَكَكُمَ سَوْرَنْ مُتَنٜىٰنْ إِسْرَٰٓءِيلَ سُكَ وَڟٜىٰ دَغَ وُرِنْ، سَيْ كُواْوَ يَكُواْمَ وُرِنْ ذُرِيَرْسَ دَ عِيَلِنْسَ دَ كُمَ ذُوَاغَ ڢِيلِنْسَ نَغَادُواْ؞

²⁵ أَ زَامَانِنَّنْ بَابُ سَرْكِے عَ إِسْرَٰٓءِيلَ، كُواْوَنٜىٰ مُتُمْ يَيِتَيِنْ أَبِنْدَ يَغَ دَامَ؞