أَلْڧَلَيْ 10 - أَتَّوْرَتْ دَ أَنَّبَاوَا

تُواْلَ مَيْ شَرِيعَ عَ إِسْرَٰٓءِيلَ

¹ بَايَنْدَ أَبِمٜىٰلٜىٰكْ يَمُتُ، سَيْ تُواْلَ طَنْ ڢُوَ جِيكَنْ دُواْدُواْ دَغَ ذُرِيَرْ إِسَّكَرْ يَتَاشِ دُواْمِنْ يَثٜىٰثِ مُتَنٜىٰنْ إِسْرَٰٓءِيلَ؞ يَذَوْنَ أَ شَمِرْ عَثِكِنْ يَنْكِنْ تُدَّيْ نَ إِڢْرَيِمْ؞

² يَيِ عَيْكِنْ شَرِيعَ عَ إِسْرَٰٓءِيلَ حَرْ شٜىٰكَرَا عَشِرِنْ دَ عُكُ، سَعَنً يَمُتُ، عَكَ بِنّٜىٰشِ أَ شَمِرْ؞

يَايِرْ مَيْ شَرِيعَ عَ إِسْرَٰٓءِيلَ

³ بَايَنْ تُواْلَ كُمَ سَيْ يَايِرْ مُتُمِنْ غِلٜىٰيَدْ، شِے مَا يَيِ عَيْكِنْ شَرِيعَ عَ إِسْرَٰٓءِيلَ شٜىٰكَرَا عَشِرِنْ دَ بِيُ؞

⁴ يَنَ دَ یَیَ مَظَا تَلَاتِنْ وَطَنْدَ سُكٜىٰ هَوَنْ جَاكُنَ تَلَاتِنْ؞ سُكَ مَلَّكِ غَرُرُوَ تَلَاتِنْ عَثِكِنْ ڧَسَرْ غِلٜىٰيَدْ، وَطَنْدَ عَكٜىٰكِرَنْسُ ڧَوْيُكَنْ يَايِرْ هَرْوَيَوْ؞

⁵ يَايِرْ يَمُتُ، عَكَ بِنّٜىٰشِ أَ كَمُوانْ؞

يَهْوٜىٰهْ يَا حُكُنْتَ إِسْرَٰٓءِيلَاوَا تَوُرِنْ أَمُّواْنَاوَا

⁶ أَنَانً كُمَ مُتَنٜىٰنْ إِسْرَٰٓءِيلَ سُكَسَاكٜىٰيِنْ أَبِنْدَ يَكٜىٰ مُوغُ أَعِدُوانْ يَهْوٜىٰهْ؞ سُكَ بَوْتَاوَ بَعَلْ دَ عَشْتُواْرٜىٰتْ دَ أَلُّواْلِنْ سُورِيَ دَ نَ سِدُوانْ دَ نَ مُواْوَبْ دَ نَ أَمُّوانْ دَ كُمَ نَ ڢِلِسْتِيَاوَا؞ سُكَ بَرْ بِنْ يَهْوٜىٰهْ، بَسُ كُمَيِ مَسَ سُجَّدَبَ؞

⁷ سَبُواْدَ حَكَ يَهْوٜىٰهْ يَيِ ڢُشِے دَ مُتَنٜىٰنْ إِسْرَٰٓءِيلَ، يَكُوَ بَادَسُو أَ حَنُّنْ ڢِلِسْتِيَاوَا دَ أَمُّواْنَاوَا، سُكَثِسُ دَ يَاڧِ

⁸ أَ شٜىٰكَرَا طَيَ؞ سُكَ ثِيغَبَدَ مَڟَا وَمُتَنٜىٰنْ إِسْرَٰٓءِيلَ حَرْ شٜىٰكَرَا غُواْمَشَا تَݣُوسْ؞ سُكَ دَنّٜىٰسُ سُكَ كُمَ ڟَنَنْتَا وَ دُكَنْ إِسْرَٰٓءِيلَاوَنْ دَسُكٜىٰ ظَوْنٜىٰ أَغَبَشِنْ كُواْغِنْ يُواْدَنْ عَيَنْكِنْ غِلٜىٰيَدْ، وَتُواْ ڧَسَرْ أَمُواْرِيَاوَا تَدَا؞

⁹ أَمُّواْنَاوَنْ سُكَ كُمَ ڧٜىٰتَرٜىٰ كُواْغِنْ يُواْدَنْ دُواْمِنْ سُيَاڧِ مُتَنٜىٰنْ ذُرِيَرْ يَهُودَ دَ تَ بِلِيَامِنُ دَ تَ إِڢْرَيِمْ؞ إِسْرَٰٓءِيلَاوَا كُوَ سُنَ ثِكِنْ وَهَلَ سُواْسَيْ؞

¹⁰ سَيْ إِسْرَٰٓءِيلَاوَا سُكَيِ كُوكَا غَ يَهْوٜىٰهْ سُكَثٜىٰ ‏«‏مُنْيِ مَكَ ذُنُوبِ، غَمَا مُنْ بَرْ بِنْكَ، يَا اللَّهْ نْمُ، مُكَيِ وَ بَعَلْ سُجَّدَ؞»‏

¹¹ سَيْ يَهْوٜىٰهْ يَأَمْسَ مُسُ يَثٜىٰ ‏«‏سَعَدَّ مَصَرَاوَا دَ أَمُواْرِيَاوَا دَ أَمُّواْنَاوَا دَ ڢِلِسْتِيَاوَا سُكَ تَاسُواْ عَكَنْكُ، بَنْثٜىٰثٜىٰكُبَ؟

¹² دَ سِدُواْنِيَاوَا دَ أَمَلٜىٰكَاوَا دَ مُواْوَبَاوَا سُكَ مَاڟَ مُكُ، كُو كُمَ كُكَيِ كُوكَا ذُوَا غَرٜىٰنِ، بَنْثٜىٰثٜىٰكُ دَغَ حَنُّنْسُبَ؟

¹³ عَمَّا دُكْدَهَكَ، كُنْبَرْنِ، كُنَيِ وَ وَطَنْسُ أَلُّواْلِ سُجَّدَ؞ تُواْ!‏ سَبُواْدَ حَكَ بَذَنْ ثٜىٰثٜىٰكُبَ كُمَ؞

¹⁴ كُتَڢِے كُكَيْ كُوكَنْكُ غَ أَلُّواْلِنْ دَ كُكَ ذَاٻَا؞ بَرِ سُثٜىٰثٜىٰكُ أَ لُواْكَثِنْ وَهَلَ؞»‏

¹⁵ عَمَّا مُتَنٜىٰنْ إِسْرَٰٓءِيلَ سُكَ نَاثٜىٰ سُكَ ضُواْڧِ يَهْوٜىٰهْ سُكَثٜىٰ ‏«‏مُنْيِ مَكَ ذُنُوبِ؞ كَيِ مَنَ دُكْ إِرِنْ حُواْرُوانْدَ كَغَ دَامَ، عَمَّا دَيْ كَثٜىٰثٜىٰمُ يَوْ؞»‏

¹⁶ سَبُواْدَ حَكَ سُكَ كَوَرْدَ غُمَكَنْ أَلُّواْلِنْ ڧَبِيلُنْ دَسُكٜىٰ عَثِكِنْسُ، سُكَيِ وَ يَهْوٜىٰهْ سُجَّدَ؞ شِے كُوَ بَيْ عِيَ جِمْرٜىٰ دَ غَنِنْ إِرِنْ وَهَلَرْ دَ مُتَنٜىٰنْ إِسْرَٰٓءِيلَ سُكٜىٰشَابَ؞

¹⁷ سُواْجُواْجِنْ أَمُّواْنَاوَا سُكَ تَتَّارَ كَنْسُ، سُكَ كَڢَ سَنْسَنِ أَ غِلٜىٰيَدْ؞ مُتَنٜىٰنْ إِسْرَٰٓءِيلَ كُوَ سُكَ تَتَّارَ كَنْسُ سُكَ كَڢَ نَاسُ سَنْسَنِنْ أَ مِظْڢَ؞

¹⁸ شُوغَبَنِّنْ مُتَنٜىٰنْ غِلٜىٰيَدْ سُكَثٜىٰ وَجُونَنْسُ ‏«‏دُكْ وَنْدَ يَڢَارَ كَيْوَ مُتَنٜىٰنْ أَمُّواْنَاوَا يَاڧِ، شِينٜىٰ ذَيْ ذَمَ شُوغَبَنْ مَذَوْنَنْ غِلٜىٰيَدْ؞»‏