عِشَايَ 66 - أَتَّوْرَتْ دَ أَنَّبَاوَاسُجَّدَرْ دَ يَهْوٜىٰهْ يَكٜىٰسُواْ 1 إِنْجِ يَهْوٜىٰهْ، «سَمَ كُجٜىٰرَرْ مُلْكِنَ نٜىٰ، ڧَسَا كُمَ وُرِنْ سَا ڧَڢَتَ نٜىٰ؞ تُواْ، وَنٜىٰ إِرِنْ غِدَا نٜىٰ ذَاكُ عِيَ غِنَا مِنِ؟ وَنٜىٰ إِرِنْ وُرِے نٜىٰ ذَيْ عِيَ ذَمَ وُرِنْ هُوتُنَ؟ 2 دُكَنْ أَبُبُوَنَّنْ هَنُّونَ نٜىٰ يَيِسُ، تَهَكَ دُكَنْسُ سُنْ كَسَنْثٜىٰ؞ نِے يَهْوٜىٰهْ نَا ڢَطَا؞ «غَا إِرِنْ مُتُمِنْ دَ حَنْكَلِنَ يَكٜىٰ عَكَنْسَ، وَتُواْ مَيْ سَوْڧِنْ كَيْ دَ مَيْ ذُوثِيَارْ تُوبَ، كُمَ مَيْ غِرْمَمَ مَغَنَاتَ؞ 3 «بَنْ جِ دَاطِنْ سُجَّدَرْ مُتَنٜىٰبَ؞ مِيڧَ بِجِمِ هَدَايَ دَ كَشٜىٰ مُتُمْ أَوُرِينَ أَبُ طَيَ نٜىٰ؞ مِيڧَ طَنْ ضَغُواْ هَدَايَ دَ مِيڧَ كَرٜىٰ هَدَايَ أَوُرِينَ أَبُ طَيَ نٜىٰ؞ مِيڧَ حَڟِ هَدَايَ دَ مِيڧَ جِنِنْ أَلَدٜىٰ هَدَايَ أَوُرِينَ أَبُ طَيَ نٜىٰ؞ مِيڧَ مِنِ تُرَارٜىٰ هَدَايَ دَ سَا وَغُنْكِ أَلْبَرْكَ، أَوُرِينَ أَبُ طَيَ نٜىٰ؞ دُكَنْسُ سُكَ ذَاٻِ بِنْ رَعَيِنْ كَنْسُ، عَثِكِنْ سُجَّدَرْسُ تَڧَظَنْتَا سُكَجِ دَاطِے؞ 4 نِے مَا ذَنْ ذَاٻِ بِنْ رَعَيِنَ إِنْ أَوْكَرْ مُسُ دَ مَسِيڢَ، إِنْ كَٰوُاْ مُسُ أَبِنْدَ سُكٜىٰ جِنْ ڟُواْرُوانْسَ؞ غَمَا دَ نَيِ كِرَا، بَابُوَنْدَ يَأَمْسَ، دَ نَيِ مَغَنَ، بَابُوَنْدَ يَسَوْرَرَ؞ عَمَّا سُكَ عَيْكَتَ مُغُنْتَا أَعِدَنُونَ، سُكَ ذَاٻَا سُيِ أَبِنْدَ بَنْ جِ دَاطِنْسَبَ؞» يَهْوٜىٰهْ يَنَ كَمَّلَ عَيْكِنْسَ 5 إِنْجِ يَهْوٜىٰهْ، «كُجِ مَغَنَاتَ، كُو دَ كُكٜىٰ غِرْمَمَ مَغَنَاتَ! یَنْعُوَنْكُ وَطَنْدَ سُكَڧِيكُ سُكَ كُواْرٜىٰكُ سَبُواْدَ كُكَ غِرْمَمَ سُونَنَ؞ سُنَ ثٜىٰوَ ‹بَرِ أَطَوْكَكَ يَهْوٜىٰهْ، دُواْمِنْ مُغَ ڢَضٍ ثِكِنْكُ،› عَمَّا سُونٜىٰ ذَاسُ شَا كُنْيَا؞ 6 كُجِ إِرِنْ سُورُوتُنْ دَ عَكٜىٰيِ عَثِكِنْ غَرِ! كُجِ مُرْيَ دَغَ هَيْكَلِ! أَيْ! ڧَارَرْ مُواْڟِنْ يَهْوٜىٰهْ نٜىٰ، يَنَ رَامُوَا عَكَنْ أَبُواْكَنْ غَابَنْسَ؞ 7 «سِهِيُواْنَ كَمَ دَ مَثٜىٰ، مَثٜىٰنْ دَ تَحَيْڢُ كَاڢِنْ تَڢَارَ نَڧُدَ، كَاڢِنْ ذَاڢِنْ جِكِے يَتَاسُواْ مَتَ، تَحَيْڢِ طَا؞ 8 وَ يَتَٻَ جِنْ إِرِنْ وَنَّنْ؟ وَ يَتَٻَ غَنِنْ إِرِنْ وَنَّنْ؟ ذَاعَ عِيَ حَيْڢَرْ دَ جَمَعَ أَ رَانَ طَيَ نٜىٰ؟ كُواْ ذَاعَ عِيَ حَيْڢَرْ دَ أَلْعُمَّ نَنْ دَنَنْ؟ عَمَّا دَظَرَرْ سِهِيُواْنَ تَڢَارَ نَڧُدَ، سَيْ تَحَيْڢِ یَیَنْتَ؞ 9 بَذَنْكَيْ مُتَنٜىٰنَ غَ بَاكِنْ حَيْڢُوَ، حَرْ إِنْ كَاسَسَا أَحَيْڢَرْ دَسُوبَ؞ نِے دَ نَكٜىٰ كَٰوُاْ حَيْڢُوَ، بَذَنْ كُلّٜىٰ مَحَيْڢَبَ؞ نِے يَهْوٜىٰهْ نَا ڢَطَا؞ 10 كُيِڢَضٍ ثِكِ تَرٜىٰدَ عُرُوشَلِيمَ! كُيِمُرْنَ دَ عِتَ، يَا كُو مَاسُ ڧَوْنَرْتَ! كُيِمُرْنَ دَ ڢَضٍ ثِكِ دَ عِتَ، يَا كُو دَ كُكَيِ كُوكَا دُواْمِنْتَ أَدَا! 11 غَمَا ذَاكُجِ دَاطِنْتَ، كَمَرْ جَرِرِ مَيْ جِنْ دَاطِنْ نُواْنُوانْ مَامَرْسَ، كُشَا دَاطِنْتَ سُواْسَيْ، كُجِ دَاطِے دَغَ ثِكِنْ يَوَنْ طَوْكَكَرْتَ؞» 12 غَمَا إِنْجِ يَهْوٜىٰهْ، «ذَنْسَا سَلَمَرْتَ تَيَلْوَتَ كَمَرْ ضُوَنْدَ يَٻَرْكٜىٰ دَغَ كُواْغِ؞ ذَنْسَا طَوْكَكَرْ أَلْعُمَّيْ تَذُواْ مَتَ كَمَرْ أَمْبَلِيَرْ ضُوَ؞ ذَاكُجِ دَاطِنْ رٜىٰنُوانْ دَتَكٜىٰيِ مُكُ، كُجِ دَاطِے يَدَّ تَكٜىٰ رِڧٜىٰكُ أَ حَنُّ، كَمَرْ جَرِرِ مَيْ جِنْ دَاطِے أَ حَنُّنْ مَامَرْسَ؞ 13 يَدَّ مَامَا تَكٜىٰ تَعَظَنْتَرْدَ يَرُوانْتَ، حَكَ ذَنْ تَعَظَنْتَرْ دَكُو، ذَاكُ كُوَ تَعَظَنْتُو أَ عُرُوشَلِيمَ؞» 14 سَعَدَّ كُكَغَ وَنَّنْ، ظُكَاتَنْكُ ذَاسُيِ ڢَضٍ ثِكِ؞ ڧَرْڢِنْ جِكِنْكُ ذَيْ دَاوُاْ دَ سَوْرِ كَمَرْ يَدَّ ثِيَوَ تَكَنْيِ غِرْمَ دَ سَوْرِ؞ كُواْوَ كُوَ ذَيْ غَانٜىٰ إِيكُوانْ حَنُّنْ يَهْوٜىٰهْ يَنَ تَرٜىٰدَ بَايِنْسَ، عَمَّا ڢُشِنْسَ يَنَ غَابَادَ أَبُواْكَنْ غَابَنْسَ؞ 15 غَاشِ يَهْوٜىٰهْ ذَيْذُواْ دَ وُتَا، كٜىٰكُنَنْ دُواْكِنْسَ سُذُواْ كَمَرْ غُوغُوَ؞ يَهْوٜىٰهْ ذَيْذُواْ دَ ڢُشِنْ حُكُنْثِنْسَ دَ كُمَ ڟَاوَتَرْوَرْسَ تَوُتَ مَيْ ذَاڢِ؞ 16 غَمَا دَ وُتَا يَهْوٜىٰهْ ذَيْ حُكُنْتَ مُتَنٜىٰ، دَ تَكُواْبِنْسَ ذَيْ حُكُنْتَ دُكَنْ یَنْ أَدَمْ، مُتَنٜىٰنْ دَ ذَيْ كَشٜىٰ ذَاسُيِيَوَ؞ 17 إِنْجِ يَهْوٜىٰهْ «ڧَرْشٜىٰ يَيِ كُسَ دُواْمِنْ وَطَنْدَ سُكَ ڟَبْتَثٜىٰ كَنْسُ دُواْمِنْ يِنْ سُجَّدَ غَ غُمَكَ أَغُواْنَكِنْسُ، دُواْمِنْ كُمَ وَطَنْدَ سُكَيِ جٜىٰرِنْ ڠُونُواْ ذُوَا وُرِنْ دَسُكٜىٰ ثِنْ نَامَنْ أَلَدٜىٰ دَ نَٻٜىٰرَ دَ نَسَوْرَنْ أَبُبُوَ مَاسُ بَنْ ڨَمَ؞ 18 غَمَا نِے نَا سَنْ تُنَانِنْسُ دَ أَيُّكَنْسُ؞ إِنَ ذُوَا دُواْمِنْ إِنْ تَتَّارَ مُتَنٜىٰنْ كُواْوَثٜىٰ أَلْعُمَّ دَ نَكُواْوَنٜىٰ يَرٜىٰ، ذَاسُذُواْ سُغَ طَوْكَكَرْ إِيكُواْنَ؞ 19 ذَنْ كَڢَ عَلَمَ عَثِكِنْسُ؞ دَغَ ثِكِنْ ضَغُواْوَرْسُ، ذَنْ عَيْكِ وَطَنْسُ ذُوَاغَ أَلْعُمَّيْ دَ يَنْكُنَنْ بَاكِنْ تٜىٰكُ عِنْدَ مُتَنٜىٰنْ بَسُ تَٻَجِنْ لَابَرِنْ سُونَنْدَ نَيِبَ، بَسُ كُمَ غَ طَوْكَكَتَبَ؞ ذَنْ عَيْكٜىٰسُ ذُوَا ڧَسَاشٜىٰ كَمَرْ سِڢٜىٰنْ دَ لِبِيَ دَ لُدْ، مَاسُ عِيَ هَرْبِنَّنْ دَ تُبَلْ دَ هٜىٰلَّسْ؞ ذَاسُ كُوَيِ شٜىٰلَرْ طَوْكَكَتَ غَ دُكَنْ أَلْعُمَّيْ؞ 20 ذَاعَكَٰوُاْ دُكَنْ یَنْعُوَنْكُ دَغَ ثِكِنْ دُكَنْ أَلْعُمَّيْ، أَ مِيڧَ مِنِسُ ݣَوْتَا؞ ذَاعَكَٰوُاْسُ عَبَبَّنْ تُدُنَ مَيْ ڟَرْكِے، وَتُواْ عُرُوشَلِيمَ؞ ذَاعَكَٰوُاْسُ عَكَنْ دَوَكِ دَ جَاكُنَ دَ رَاڧُمَ دَ كٜىٰكُنَنْ دُواْكِ دَ كٜىٰكُنَنْ شَانُو كَمَرْ يَدَّ إِسْرَٰٓءِيلَاوَا سُكٜىٰ كَٰوُاْ هَدَايَ ثِكِنْ ݣُونُواْ مَيْ ڟَبْتَ عَثِكِنْ غِدَانَ؞ 21 ذَنْ كُمَسَا وَطَنْسُ سُذَمَ ڢِرِسْتُواْثِے دَ لَوِيَاوَا؞ نِے يَهْوٜىٰهْ نَا ڢَطَا؞» 22 «كَمَرْ يَدَّ سَابُوَرْ سَمَ دَ سَابُوَرْ ڧَسَا ذَاسُ كَسَنْثٜىٰ تَوُرِنْ إِيكُواْنَ، حَكَ ذُرِيَرْكُ دَ سُونَنْكُ ذَاسُ دَوَّمَ؞ 23 ذَيْ كَسَنْثٜىٰ ثٜىٰوَ دَغَ وَنِ بِكٍ سَابُوانْ وَتَ ذُوَا وَنِ دَغَ كُمَ رَانَرْ هُوتُ تَمَكُواْ ذُوَا وَنِ، دُكَنْ یَنْ أَدَمْ ذَاسُذُواْ سُرُسُنَ أَغَبَنَ ثِكِنْ سُجَّدَ؞ نِے يَهْوٜىٰهْ نَا ڢَطَا؞ 24 سَعَدَّ سُكٜىٰ ڢِتُواْوَ ذَاسُغَ غَوَوَّكِنْ مُتَنٜىٰنْ دَ سُكَيِ مِنِ تَاوَيٜىٰ؞ ڟُڟُواْڟِنْ دَسُكٜىٰ ثِنْسُ بَذَاسُ تَٻَ مُتُوَبَ، وُتَرْ دَتَكٜىٰ ڧُواْنَسُ كُمَ بَذَاعَ عِيَ كَشٜىٰ تَبَ؞ ذَاسُ ذَمَ أَبِنْ ڨَمَ غَ دُكَنْ یَنْ أَدَمْ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria