عِشَايَ 63 - أَتَّوْرَتْ دَ أَنَّبَاوَا

نَصَرَرْ يَهْوٜىٰهْ عَكَنْ أَلْعُمَّيْ

¹ وَنٜىٰنٜىٰ وَنَّنْ مَيْ ذُوَا دَغَ عٜىٰدُوامْ، دَغَ بُواظْرَ سَنْيٜىٰ دَ جَجَّيٜىٰنْ كَايَ؟ وَنٜىٰنٜىٰ وَنَّنْ مَيْ سَنْيٜىٰ دَ كَايَ مَاسُ دَرَجَ وَنْدَ يَكٜىٰ تَڢِيَ دَ غِرْمَ دَ إِيكُواْ؟ ‏«‏أَيْ، نِنٜىٰ!‏ إِنَ شٜىٰلَرْ نَصَرَاتَ، إِنَدَ إِيكُوانْ يِنْ ثٜىٰتُواْ؞»‏

² مٜىٰيَسَا رِيغُنَنْكَ سُنْ ذَمَ جَجَّيٜىٰ، كَمَرْ نَمَيْ تَتَّاكٜىٰ یَیَنْ إِنَبِے؟

³ ‏«‏نِے كَطَيْ نَتَتَّكٜىٰ أَلْعُمَّيْ كَمَرْ یَیَنْ إِنَبِے؞ دَغَ ثِكِنْ ڧَبِيلُ، بَاوَنْدَ يَتَيْمَكٜىٰنِ؞ نَتَتَّكٜىٰسُ ثِكِنْ ڢُشِنَ، نَامَمَّڟٜىٰسُ ثِكِنْ ذَاڢِنْ ڢُشِنَ؞ جِنِنْسُ يَبَظُو أَ رِيغُنَنَ، يَسَا كَايَانَ سُنْ ڧَظَنْتُ؞

⁴ غَمَا رَانَرْ رَامُوَا تَيِ أَ ذُوثِيَاتَ، شٜىٰكَرَرْ ڢَنْسَ كُمَ تَ إِسُواْ؞

⁵ نَدُدُّوبَ عَمَّا بَابُ مَيْ تَيْمَكُواْ، نَيِ بَڧِنْ ثِكِ دُوانْ بَابُ مَيْ غُواْيُوانْ بَايَ؞ سَبُواْدَ حَكَ نَسَا هَنُّونَ نَعَيْكَتَ ثٜىٰتُواْ، ڢُشِنَ كُمَ يَڧَرْڢَڢَانِ؞

⁶ عَثِكِنْ ڢُشِنَ نَتَتَّكٜىٰ أَلْعُمَّيْ، ثِكِنْ ذَاڢِنْ ڢُشِنَ نَسَا سُكَ بُغُ، نَظُبَرْ دَ جِنِنْ رَنْسُ عَڧَسَا؞»‏

تُنَانِ عَكَنْ أَلْحٜىٰرِنْ يَهْوٜىٰهْ غَ إِسْرَٰٓءِيلَ

⁷ ذَنْيِ شٜىٰلَرْ ڧَوْنَ مَرَرْ ثَنْجَاوَا تَ يَهْوٜىٰهْ، إِنْتُنَ دَ دُكَنْ أَيُّكَنْسَ مَاسُ إِسَ يَبُواْ؞ ذَنْ يَبٜىٰشِ دُوانْ دُكَنْ أَبِنْدَ يَيِ مَنَ، دَ يَوَنْ أَلْحٜىٰرِنْ دَ يَيِ وَ غِدَنْ إِسْرَٰٓءِيلَ، دَ جِنْڧَنْدَ يَنُونَ مَنَ، بِسَغَ ڧَوْنَرْسَ مَرَرْ ثَنْجَاوَا؞

⁸ غَمَا يَهْوٜىٰهْ يَاثٜىٰ، ‏«‏بَاشَكَّ إِسْرَٰٓءِيلَ مُتَنٜىٰنَ نٜىٰ، يَارَا نٜىٰ وَطَنْدَ بَذَاسُ رُوطٜىٰنِبَ؞»‏ سَيْ يَذَمَ مَيْ ثٜىٰتُوانْسُ؞

⁹ عَثِكِنْ دُكَنْ دَامُوَرْسُ شِے مَا يَدَامُ؞ مَلاَىِٕكَنْسَ نٜىٰ يَثٜىٰثٜىٰسُ؞ ثِكِنْ ڧَوْنَرْسَ دَ تَوْسَيِنْسَ نٜىٰ يَڢَنْشٜىٰسُ، تُنْدَا يَطَوْكٜىٰسُ يَغُواْيٜىٰسُ يَنَ كِيَايٜىٰسُ؞

¹⁰ عَمَّا دُكْدَهَكَ سُنْيِ مَسَ تَاوَيٜىٰ، سُكَ ٻَاتَ وَ رُوحُنْسَ مَيْ ڟَرْكِے رَيْ؞ سَبُواْدَ حَكَ يَجُويَ يَذَمَ أَبُواْكِنْ غَابَنْسُ، شِ دَ كَنْسَ يَيِ يَاڧِ دَسُو؞

¹¹ سَيْ جَمَعَرْسَ سُكَ تُنَ دَ ݣُونَكِنْ دَا، سُكَ تُنَ دَ زَامَانِنْ مُوسَٰى بَاوَنْسَ؞ إِنَا يَهْوٜىٰهْ يَكٜىٰ وَنْدَ يَبِيدَسُو تَثِكِنْ تٜىٰكُ، تَرٜىٰدَ مَكِيَايِنْ جَمَعَرْسَ؟ إِنَا شِے يَكٜىٰ وَنْدَ يَسَا رُوحُنْسَ مَيْ ڟَرْكِے يَكَسَنْثٜىٰ أَڟَكِيَرْ جَمَعَرْسَ؟

¹² إِنَا شِے يَكٜىٰ وَنْدَ يَسَا حَنُّنْسَ مَيْ دَرَجَ يَبَا حَنُّنْ مُوسَٰى إِيكُوانْسَ؟ إِنَا شِے يَكٜىٰ وَنْدَ يَرَبَ ضُوً تٜىٰكُ أَغَبَنْسُ، دُواْمِنْ يَسَامُواْ وَكَنْسَ سُونَ مَرَرْ ڧَارٜىٰوَ؟

¹³ إِنَا شِے يَكٜىٰ وَنْدَ يَبِيدَسُو تَظُرْڢَڢَّنْ تٜىٰكُ؟ كَمَرْ يَدَّ يَكَنْ ذَمَ وَدُواْكِ دَ سَوْڧِ يَيِ غُدُ أَ ڢِيلِ، حَكَ يَهْوٜىٰهْ يَبِے دَ مُتَنٜىٰنْسَ، بَسُ كُواْ يِتُنْتُٻٜىٰبَ؞

¹⁴ كَمَرْ يَدَّ عَكَنْبِدَ شَانُو عَݣُورِ مَيْ ثِيَوَ دُوانْ سَوْڧِنْ سَامُنْ عَبِنْثِ، حَكَ رُوحٌ يَهْوٜىٰهْ يَبَا مُتَنٜىٰنْسَ هُوتُ؞ حَكَ يَهْوٜىٰهْ يَبِے دَ مُتَنٜىٰنْسَ دُواْمِنْ يَكَٰوُاْوَ سُونَنْسَ دَرَجَ؞

أَدُّعَ دُواْمِنْ سَامُنْ جِنْڧَيْ دَ تَيْمَكُواْ

¹⁵ يَا يَهْوٜىٰهْ، دُوبٜىٰمُ دَغَ سَمَ كَغَنِ، دَغَ وُرِنْكَ مَيْ ڟَرْكِے مَيْ دَرَجَ؞ إِنَا ڨُوظُوانْكَ دَ إِيكُواْنَّنْ نَاكَ؟ إِنَا نِيَّرْ ذُوثِيَارْكَ دَ تَوْسَيِنْكَ غَرٜىٰمُ؟ كَجَنْيٜىٰسُ دَغَ غَرٜىٰمُ!‏

¹⁶ عَمَّا كَيْنٜىٰ بَابَنْمُ، كُواْ دَمَا كَكَنْمُ إِبْرَٰهِيمْ بَيْسَنْ مُبَ، كُواْ دَمَا كَكَنْمُ إِسْرَٰٓءِيلَ بَيْسَنْ دَمُوبَ؞ يَا يَهْوٜىٰهْ، كَيْنٜىٰ بَابَنْمُ تُنْدَغَ دَا كَيْ مَيْ ڢَنْسَرْمُ نٜىٰ؞

¹⁷ يَا يَهْوٜىٰهْ، دُوانْمٜىٰ كَسَا مُكَ كَوْثٜىٰ دَغَ حَنْيَرْكَ؟ دُوانْمٜىٰ كَتَوْرَرَ ذُوثِيَارْمُ دُواْمِنْ مُكَاسَ جِنْ ڟُواْرُوانْكَ؟ سَيْ كَجُويُواْ سَبُواْدَمُو بَايِنْكَ، سَبُواْدَمُو ذُرِيَرْكَ تَغَادُواْ؞

¹⁸ مُتَنٜىٰنْكَ مَاسُ ڟَرْكِے مُنْ مَلَّكِ يَنْكِنْ وُرِنْكَ مَيْ ڟَرْكِے نَطَنْ لُواْكَثِ؞ عَمَّا يَنْذُ أَبُواْكَنْ غَابَنْمُ سُنْ تَتَّاكٜىٰشِ حَرْ ڧَسَا؞

¹⁹ مُنْ ذَمَ كَمَرْ وَطَنْدَ بَكَ تَٻَ مُلْكِنْسُبَ، كَمَرْ وَطَنْدَ بَعَسَنْسُ دَ سُونَنْكَبَ!‏