عِشَايَ 60 - أَتَّوْرَتْ دَ أَنَّبَاوَا

طَوْكَكَ مَيْ ذُوَا تَ عُرُوشَلِيمَ

¹ إِنْجِ يَهْوٜىٰهْ، ‏«‏تَاشِ كِحَصْكَكَ، يَا كٜىٰ عُرُوشَلِيمَ، غَمَا حَصْكٜىٰنْكِ يَذُواْ!‏ غَمَا طَوْكَكَرْ يَهْوٜىٰهْ تَنَ حَصْكَكَاوَا عَكَنْكِ!‏

² غَاشِ، دُهُ يَرُڢٜىٰ دُونِيَا، بَڧِنْ دُهُ يَرُڢٜىٰ ڧَبِيلُ؞ عَمَّا عَكَنْكِ حَصْكٜىٰنْ يَهْوٜىٰهْ يَنَ حَصْكَكَاوَا، عَكَنْكِ كُمَ طَوْكَكَرْسَ تَنَ بَيَّنَ؞

³ أَلْعُمَّيْ ذَاسُذُواْ وُرِنْ حَصْكٜىٰنْكِ، سَرَاكُنَ كُمَ وُرِنْ وَلْڧِيَرْ حَصْكٜىٰنْكِ؞

⁴ ‏«‏طَغَ عِدَنُونْكِ، كِدُوبَ كٜىٰوَيٜىٰ، كِغَنِ، مُتَنٜىٰنْكِ سُنَ تَتَّارُوَ، سُنَ ذُوَا وُرِنْكِ؞ غَا یَیَنْكِ مَظَا سُنَ ذُوَا دَغَ نٜىٰسَ، یَیَنْكِ مَتَ كُمَ أَنَ رِڧٜىٰ دَسُو أَ حَنُّ؞

⁵ ذَاكِ غَنِ كِحَصْكَكَ دَ ڢَضٍ ثِكِ، ذُوثِيَارْكِ ذَاتَ ثِكَ دَ ڢَضٍ ثِكِ، غَمَا أَرْزِڧِنْ ثِنِكِ عَتٜىٰكُ ذَاعَ كَٰوُاْ غَرٜىٰكِ، عِ، أَرْزِڧِنْ أَلْعُمَّيْ ذَاعَ كَٰوُاْ وُرِنْكِ؞

⁶ دُبُنْ دُبَّنْ رَاڧُمَ ذَاسُ رُڢٜىٰ ڧَسَرْكِے، ڧأَنَانً رَاڧُمَ دَغَ مَدْيَنَ دَ عٜىٰڢَ، دَ وَطَنْدَ سُكٜىٰ دَغَ شٜىٰبَ ذَاسُذُواْ؞ ذَاسُ كَٰوُاْ ظِينَارِيَ دَ كَايَنْ تُرَارٜىٰ، مُتَنٜىٰنْسُ ذَاسُيِ شٜىٰلَرْ لَابَرِ، لَابَرِ مَيْ دَاطِے عَكَنْ أَبِنْدَ يَهْوٜىٰهْ يَيِ؞

⁷ دُكَنْ غَرْكُنَنْ تُمَكِنْ كٜىٰدَرْ ذَاعَ تَارَ مِكِ دُواْمِنْ هَدَايَ، رَغُنَنْ يَنْكِنْ نٜىٰبَيُواتْ نٜىٰ ذَاعَ كَٰوُاْ دُواْمِنْ بِيَنْ بُڧَاتَرْكِ؞ ذَاسُ ذَمَ أَبِنْ كَرْٻَ عَكَنْ بَغَدٜىٰنَ، تَهَكَ ذَنْ ڧَارَ دَرَجَرْ غِدَانَ مَيْ دَرَجَ؞

⁸ ‏«‏مٜىٰنٜىٰنٜىٰ نُڢِنْ جِضَاغٜىٰنَّنْ مَاسُ ذُوَا دَ سَوْرِ كَمَرْ غِذَغِظَيْ، كَمَرْ كُرْثِيُواْيِ مَاسُ كُواْمُواْوَ غِدَا؟

⁹ بَاشَكَّ، سُونٜىٰ جِضَاغٜىٰ دَغَ يَنْكُنَنْ بَاكِنْ تٜىٰكُ، جِضَاغٜىٰنْ ضُوَ دَغَ تَرْشِشْ سُنَ بِيدَسُو، سُنَ كَٰوُاْ یَیَنْكِ دَغَ ڧَسَاشٜىٰنْ نٜىٰسَ، طَوْكٜىٰ دَ أَظُرْڢَا دَ ظِينَارِيَرْسُ، دُواْمِنْ سُغِرْمَمَ سُونَنْ يَهْوٜىٰهْ اللَّهْ نْكِ، سُونَنْ مَيْ ڟَرْكِنْ نَ إِسْرَٰٓءِيلَ سَبُواْدَ يَدَرَجَنْتَرْ دَكٜىٰ؞

¹⁰ ‏«‏بَڧِينٜىٰ ذَاسُ سَاكٜىٰ غِنَا كَتَنْ‌غَرْكِ، سَرَاكُنَنْسُ كُمَ ذَاسُ بِيَ بُڧَاتَرْكِ؞ كُواْدَيَكٜىٰ عَثِكِنْ ڢُشِنَ نَحُكُنْتَكِ، عَمَّا يَنْذُ ثِكِنْ أَلْحٜىٰرِنَ نَيِمِكِ جِنْڧَيْ؞

¹¹ ڧُواْڢُواْڢِنْكِ ذَاسُ كَسَنْثٜىٰ عَبُوطٜىٰ كُلُّمْ، دَرٜىٰ دَ رَانَ بَذَاعَ رُڢٜىٰسُبَ، دُواْمِنْ أَلْعُمَّيْ سُيِ تَكَٰوُاْ مِكِ أَرْزِڧِنْسُ، سَرَاكُنَنْسُ سُيِ جٜىٰرِنْ ڠُونُواْ ذُوَا وُرِنْكِ؞

¹² غَمَا دُكْ أَلْعُمَّ كُواْ مُلْكِ وَنْدَ بَذَيْ بَوْتَا مِكِ بَ، ذَيْ هَلَّكَ، أَلْعُمَّنَّنْ ذَاعَ كَوَرْ دَسُو غَبَاطَيَ؞

¹³ ‏«‏ذَاعَكَٰوُاْ طَوْكَكَرْ لٜىٰبَنُوانْ وُرِنْكِ، عِتَتُوَ مَاسُ ݣَوْ كَمَرْ نَڢِرْ، دَ نَأَرْمُوانْ دَ نَسٜىٰدَ، دُواْمِنْ عَيِ وَ وُرِينَ مَيْ ڟَرْكِے أَدُواْ، عِ، ذَنْ طَوْكَكَ غِدَانَ عِنْدَ ڧَڢَاڢُنَ سُكٜىٰ هُوتَوَا؞

¹⁴ يَا كٜىٰ عُرُوشَلِيمَ، یَیَنْ مُتَنٜىٰنْ دَ سُكَ وُلَڧَنْتَكِ، ذَاسُذُواْ سُدُرْڧُسَ أَغَبَنْكِ، دُكَنْ وَطَنْدَ سُكَيِ مِكِ رٜىٰنِ، ذَاسُذُواْ سُڢَاطِ أَغَبَنْكِ؞ ذَاسُ كِرَكِ بِرْنِنْ يَهْوٜىٰهْ، سِهِيُواْنَ نَ مَيْ ڟَرْكِنَّنْ نَ إِسْرَٰٓءِيلَ؞

¹⁵ كُواْدَيَكٜىٰ أَنْڧِيكِ أَنْكُمَ يَاشٜىٰكِ، حَرْ بَابُ مَيْ سُوانْبِے تَثِكِنْكِ، دُكْدَهَكَ ذَنْ مَيْدَكٜىٰ أَبِنْ دَرَجَ، أَبِنْ ڢَضٍ ثِكِ غَ دُكَنْ ذَامَانَيْ؞

¹⁶ ذَاكِ شَنْيٜىٰ أَرْزِڧِنْ أَلْعُمَّيْ كَمَرْ يَدَّ جَرِرِ يَكَنْ شَنْيٜىٰ نُواْنُوانْ مَامَا، ذَاكِ سَامِ أَبِنْ بِيَنْ بُڧَاتَرْكِ دَغَ سَرَاكُنَ؞ تَهَكَ ذَاكِ سَنِ ثٜىٰوَ نِے يَهْوٜىٰهْ، نِے مَيْ ثٜىٰتُوانْكِ نٜىٰ، مَيْ ڢَنْسَرْكِے نٜىٰ اللَّهْ مَيْ إِيكُواْ نَ يَعْڧُوبَ؞

¹⁷ ‏«‏ذَنْ كَٰوُاْ مِكِ ظِينَارِيَ مَيْمَكُوانْ تَغُلَّ، أَظُرْڢَا مَيْمَكُوانْ بَڧِنْ ڧَرْڢٜىٰ، تَغُلَّ مَيْمَكُوانْ إِتَاثٜىٰ، بَڧِنْ ڧَرْڢٜىٰ كُمَ مَيْمَكُوانْ دُوڟٜىٰ؞ ذَنْسَا سَلَمَ تَلُورَ دَكٜىٰ، أَدَلْثِے كُمَ تَيِ مُلْكِ عَكَنْكِ؞

¹⁸ بَذَاعَ ڧَارَ جِنْ سُورُوتُنْ تَاشِنْ حَنْكَلِبَ، بَذَاعَ ڧَارَ كَٰوُاْ وَ ڧَسَرْكِے ٻَرْنَبَ؞ ذَاكِ كُوَ كِرَا كَتَنْ‌غَرْكِ ثٜىٰتُواْ، ڧُواْڢُواْڢِنْكِ كُمَ يَبُواْ؞

¹⁹ ‏«‏رَانَ بَذَاتَ ڧَارَ ذَمَ حَصْكٜىٰنْكِ دَ رَانَبَ، كُواْ وَتَ يَذَمَ حَصْكٜىٰنْكِ دَ دَرٜىٰبَ؞ غَمَا يَهْوٜىٰهْ ذَيْ ذَمَ حَصْكٜىٰنْكِ حَرْ أَبَدَا، اللَّهْ نْكِ نٜىٰ ذَيْ ذَمَ دَرَجَرْكِ؞

²⁰ حَصْكٜىٰ بَذَيْ دَيْنَ حَصْكَكَاوَا عَكَنْكِبَ، حَصْكٜىٰنْدَ يَڢِ نَرَانَ دَ وَتَ كُمَ بَذَيْ جَنْيٜىٰبَ؞ غَمَا يَهْوٜىٰهْ ذَيْ ذَمَ حَصْكٜىٰنْكِ حَرْ أَبَدَا، ݣُونَكِنْ بَڧِنْ ثِكِنْكِ كُمَ ذَاسُ ڧَارٜىٰ؞

²¹ دُكَنْ مُتَنٜىٰنْكِ ذَاسُ ذَمَ مَاسُ أَدَلْثِے، ذَاسُ كُوَ غَاجِ سُومَلَّكِ ڧَسَرْ حَرْ أَبَدَا؞ جَمَعَتَ رٜىٰشٜىٰ نٜىٰ وَنْدَ نَدَسَ، عَيْكِنْ حَنُّوَنَ نٜىٰ دُواْمِنْ عَبَيَّنَ دَرَجَتَ؞

²² عِيَلِ نَڧَرْشٜىٰ عَثِكِنْكِ ذَيْ ذَمَ ذُرِيَ، مَڢِے ڧَنْڧَنْتَ عَثِكِنْكِ كُمَ ذَيْ ذَمَ أَلْعُمَّ مَيْ ڧَرْڢِے؞ نِے يَهْوٜىٰهْ نٜىٰ، دَ سَوْرِ ذَنْسَا وَنَّنْ يَثِكَ أَدَيْدَيْ لُواْكَثِ؞»‏