عِشَايَ 57 - أَتَّوْرَتْ دَ أَنَّبَاوَاأَنْ ڟَاوَتَا وَ إِسْرَٰٓءِيلَاوَا عَكَنْ بِنْ غُمَكَ 1 مَاسُ أَدَلْثِے سُنَ مُتُوَ، عَمَّا بَاوَنْدَ يَكُلَ؞ أَنْ ݣُوشِ مَاسُ أَمِنْثِ أَنْتَڢِے دَسُو، عَمَّا بَابُوَنْدَ يَغَانٜىٰ؞ أَنْ ݣُوشِ مَاسُ أَدَلْثِنٜىٰ دُواْمِنْ عَكِيَايٜىٰسُ دَغَ مُغُنْتَا؞ 2 مَاسُ تَڢِيَ ثِكِنْ أَدَلْثِنَّنْ سُنْ مُتُ سُنْ شِغَ ثِكِنْ سَلَمَ سُنَ هُوتَوَا ثِكِنْ كَبَرِنْسُ؞ 3 عَمَّا كُو كُذُواْ نَنْ، يَا كُو یَیَنْ مَيْ سِحِرِ، ذُرِيَرْ مَيْ ظِنَ دَ كَارُوَ! 4 وَ كُكٜىٰيِ مَسَ بَعَ؟ غَ وَ كُكٜىٰ بُوطٜىٰ بَاكِ كُنَيِ مَسَ رٜىٰنِ؟ كُو بَ یَیَنْ ذُنُوبِنْ غَنْغَنْثِ نٜىٰبَ؟ كُو بَ ذُرِيَرْ مَڧَضْيَاتَ نٜىٰبَ؟ 5 مُوغُوَرْ شَعَوَرْكُ تَكَيْكُ غَ يِنْ لَلَتَ أَوُرِنْ سُجَّدَ ڟَكَانِنْ عِتَتُوَ مَرَسَ بُوشٜىٰوَ، دَ ڧَرْڧَشِنْ كُواْوَنٜىٰ إِتَاثٜىٰ مَيْ بَادَ إِنُوَ؞ كُنَ كَكَّشٜىٰ یَیَنْكُ عَثِكِنْ ݣُورِ، دَ ثِكِنْ مَڢَكَا أَ مَنْيَنْ دُوَڟُو؞ 6 ثِكِنْ دُوَڟُو مَاسُ سَنْڟِ عَݣُورِ، ثَنْ نٜىٰ أَلُّواْلِنْكِ سُكٜىٰ، سُونٜىٰ رَبُوانْكِ؞ كِنَ مِيڧَ مُسُ هَدَايَ تَشَا، كِنَ مِيڧَ مُسُ هَدَايَ تَهَڟِ؞ ذَاعَبَا نِے حَڧُرِ عَكَنْ أَبُبُوَنَّنْ نٜىٰ؟ 7 عَكَنْ مَنْيَنْ تُدَّيْ، كِنْ شِرْيَ غَدُوانْكِ، ثَنْ كِكٜىٰ ذُوَا مِيڧَ هَدَايُ نَكَارُوَنْثِ؞ 8 عَبَايَنْ ڧُواْڢُواْڢِ دَ ڢِرَمْ نَڧُواْڢَ كِنْ كَڢَ عَلَمَرْ عُمَرْنِنَ، عَمَّا كِنْيِ كَارُوَنْثِ دَ مَسُواْيِنْكِ، كِنْ يَاشٜىٰنِ دُواْمِنْ غُمَكَ؞ كِنْ ڧَارَ بُوطٜىٰ غَدُوانْكِ، كِنْ يِ يَرْجٜىٰجٜىٰنِيَ دَسُو، كِنَ ڧَوْنَرْ ݣُونَ دَسُو أَغَدُوانْسُ، عِنْدَ كِكٜىٰ غَنِنْ ڟِرَيْثِنْسُ؞ 9 كِنْ تَڢِے وُرِنْ سَرْكِے دَ مَيْدَ تُرَارٜىٰ مَيْ يَوَ؞ كِنْ عَيْكَ دَ وَكِلَيْ أَوُرَارٜىٰ مَاسُ نِيسَ، حَرْ مَا وَطَنْسُ سُكَ غَنْغَرَ ذُوَا وُرِنْ ذَمَنْ مَتَتُّو؞ 10 كِنْ غَجِ دَ يَوَنْ تَڢِيَرْكِ، عَمَّا بَكِثٜىٰ «دُكْ بَنْظَنٜىٰ!» بَ؞ كِنْ سَامِ سَابُنْتَاوَا أَ رَنْكِ، دُواْمِنْ حَكَ بَاكِ ڢِدَّ ذُوثِيَابَ؞ 11 إِنْجِ يَهْوٜىٰهْ، «وَ كِكَجِڟُواْرُوانْسَ دَ ڢَرْغَبَ حَكَ، حَرْ كِكَيِ ڧَضْيَا؟ بَكِمَا تُنَ دَنِے بَ، بَكِيِ تُنَانِنَبَ؟ سَبُواْدَ نَدَطٜىٰ إِنَ شِضُ، شِے يَسَا بَكِجِڟُواْرُواْنَبَ؞ 12 ذَنْ تُواْنَ أَسِيرِنْ إِرِنْ أَدَلْثِنْكِ دَ أَيُّكَنْكِ، عَمَّا بَذَاسُ أَمْڢَانٜىٰكِبَ؞ 13 سَعَدَّ كِكَيِ كُوكَنْ نٜىٰمَنْ تَيْمَكُواْ، بَرِ غُمَكَنْ دَ كِكَ تَتَّارَ سُكُٻُتَرْ دَكٜىٰ؞ إِسْكَ ذَاتَ ݣُوشٜىٰسُ تَتَڢِے دَسُو، نُمْڢَشِ كُمَ يَكَوَرْ دَسُو؞ عَمَّا دُكْ وَنْدَ يَدُواْغَرَ غَرٜىٰنِ، ذَيْ غَاجِ ڧَسَرْ، يَكُمَ مَلَّكِ تُدُنَ مَيْ ڟَرْكِے؞» أَلْڧَوَرِنْ تَيْمَكُواْ دَ تَعَظِيَّ 14 يَهْوٜىٰهْ يَثٜىٰ «كُغِنَ! كُغِنَ! كُشِرْيَ حَنْيَ مَيْݣَوْ، كُكَوَرْدَ كُواْوَنٜىٰ أَبِنْسَا تُنْتُٻٜىٰ دَغَ كَنْ حَنْيَرْ مُتَنٜىٰنَ؞» 15 إِنْجِ شِے وَنْدَ يَكٜىٰ ظَوْنٜىٰ عَثَنْ سَمَ، مَطَوْكَكِ مَرَرْ ڢَرْكُواْ مَرَرْ ڧَرْشٜىٰ، شِے وَنْدَ سُونَنْسَ مَيْ ڟَرْكِے نٜىٰ، «إِنَ ظَوْنٜىٰ عَثَنْ سَمَ أَوُرِے مَيْ ڟَرْكِے، عَمَّا إِنَ كُمَ ظَوْنٜىٰ دَ مَيْ ذُوثِيَارْ تُوبَ دَ مَيْ سَوْڧِنْ كَيْ، دُواْمِنْ إِنْ سَابُنْتَا رُوحُ نَمَيْ سَوْڧِنْ كَيْ، إِنْكُمَ سَابُنْتَا ذُوثِيَارْ مَيْ ذُوثِيَارْ تُوبَ؞ 16 غَمَا بَذَنْ ثِيغَبَدَ يِنْ غَابَبَ، بَذَنْيِ ڢُشِے حَرْ أَبَدَابَ؞ إِنْ بَهَكَبَ، رُوحٌ طَنْ أَدَمْ ذَيْڢِدَّ رَيْ، كُمَ غَاشِ، نِنٜىٰ نَابَاشِ نُمْڢَشِ؞ 17 سَبُواْدَ مُغُنْتَارْسُ دَ ݣُوطَيِنْسُ، نَيِ ڢُشِے دَسُو؞ ثِكِنْ ڢُشِنَ نَحُكُنْتَسُ نَٻُواْيٜىٰ ڢُسْكَتَ، عَمَّا سُكَيِ تَبِنْ ذُوثِيَارْسُ سُنْيِ تَكُواْمَوَ دَ بَايَ؞ 18 نَلُورَ نَكُمَ غَانٜىٰ دَ هَنْيُواْيِنْسُ، عَمَّا ذَنْ وَرْكَرْدَسُو؞ ذَنْ كُمَ بِيدَسُو إِنْ تَعَظَنْتَرْ دَسُو، 19 إِنْ جُويَرْدَ مَكُواْكِنْسُ ذُوَا وَاڧَرْ يَبُواْ؞ عَيِ شٜىٰلَرْ سَلَمَ، سَلَمَ غَ وَطَنْدَ سُكٜىٰ نٜىٰسَ دَ نَكُسَ، ذَنْ كُوَ وَرْكَرْدَسُو؞ نِے يَهْوٜىٰهْ نَا ڢَطَا؞ 20 عَمَّا مُوغَيٜىٰ كَمَ دَ تٜىٰكُ مَيْ هَوْكَ نٜىٰ، كَمَ دَ تٜىٰكُنْ دَ بَاتَ عِيَ هُوتَوَا، وَنْدَ ضُوَنْتَ يَكٜىٰ ڢِتَرْدَ لَاكَ دَ دَتِّ وَجٜىٰ؞ 21 بَابُ سَلَمَ غَ مُوغَيٜىٰ،» إِنْجِ اللَّهْ نَا؞ |
Hausa Common Language Ajami Bible © The Bible Society of Nigeria, 2020
Bible Society of Nigeria