عِشَايَ 56 - أَتَّوْرَتْ دَ أَنَّبَاوَا

أَلْبَرْكَ غَ دُكَنْ أَلْعُمَّيْ

¹ إِنْجِ يَهْوٜىٰهْ، ‏«‏كُيِ غَسْكِيَ كُعَيْكَتَ أَدَلْثِے، غَمَا بَدَ دَطٜىٰوَبَ ثٜىٰتُواْنَ ذَيْذُواْ، عَيْكِنْ أَدَلْثِنْدَ نَيِ، ذَاعَ بَيَّنَشِ؞

² مَيْ أَلْبَرْكَ نٜىٰ مُتُمِنْ دَ يَكٜىٰيِنْ وَنَّنْ، وَنْدَ يَكٜىٰ كِيَايٜىٰ رَانَرْ هُوتُ تَمَكُواْ، طَنْ أَدَمْ وَنْدَ يَكٜىٰ رِڧٜىٰ دَ عِتَ كَمْ، وَنْدَ بَايَ كُوَ ڧَظَنْتَرْدَ عِتَ، وَنْدَ يَكَنْڧِ عَيْكَتَ كُواْوَثٜىٰ إِرِنْ مُغُنْتَا؞»‏

³ كَدَ بَڧُوانْدَ يَهَطَ كَنْسَ دَ مُتَنٜىٰنْ يَهْوٜىٰهْ يَثٜىٰ، ‏«‏حَڧِيڧَ يَهْوٜىٰهْ ذَيْ وَارٜىٰنِ دَغَ جَمَعَرْسَ؞»‏ كَدَ وَنِ بَابَا يَثٜىٰ، ‏«‏أَيْ، نِے بُوسَشّٜىٰنْ إِتَاثٜىٰ نٜىٰ!‏»‏

⁴ يَهْوٜىٰهْ يَنَدَ أَبِنْدَ ذَيْ ڢَطَا وَبَابَانِّنْ، ‏«‏عِدَنْ كُكَ كِيَايٜىٰ رَانَرْ هُوتُ تَمَكُواْ، كُكَ ذَاٻِ يِنْ أَبُبُوَنْ دَ سُكَ غَمْشٜىٰنِ، كُكَ رِڧٜىٰ يَرْجٜىٰجٜىٰنِيَتَ دَ أَمِنْثِ،

⁵ ذَنْبَاكُ سُونَ عَثِكِنْ غِدَانَ، أَبِنْ تُنَاوَا عَثِكِنْ جَمَعَتَ، وَنْدَ ذَيْڢِ نَیَیَ مَظَا دَ مَاتَا؞ ذَنْبَاكُ سُونَنْ دَ ذَيْ دَوَّمَ، وَنْدَ بَذَيْ ٻَثٜىٰ دَغَ جَمَعَبَ؞»‏

⁶ يَهْوٜىٰهْ كُمَ يَنَدَ أَبِنْدَ ذَيْ ڢَطَا وَبَڧِ، وَطَنْدَ سُكَ حَطَ كَنْسُ دَ جَمَعَرْسَ دُواْمِنْ سُيِ مَسَ حِدِمَ، سُڧَوْنَثِ سُونَنْسَ، سُكُمَ ذَمَ بَايِنْسَ، وَتُواْ دُكَنْ بَڧِنْ دَ سُكَ كِيَايٜىٰ رَانَرْ هُوتُ تَمَكُواْ، بَسُيِ بَنْظَ دَ عِتَبَ، سُكَ كُمَ رِڧٜىٰ يَرْجٜىٰجٜىٰنِيَرْسَ؞

⁷ غَ بَڧِنَّنْ يَهْوٜىٰهْ يَثٜىٰ، ‏«‏ذَنْ كَٰوُاْكُ وُرِنْ بَبَّنْ تُدُنَ مَيْ ڟَرْكِے، إِنْسَا كُيِ مُرْنَ أَ غِدَانَ نَأَدُّعَ؞ هَدَايُنْكُ نَڧُواْنَاوَا دَ بَيٜىٰ بَيٜىٰنْكُ ذَاسُ ذَمَ أَبِنْ كَرْٻَ عَبَغَدٜىٰنَ؞ غَمَا ذَاعَ ثٜىٰ دَ غِدَانَ، ‏‹‏غِدَنْ أَدُّعَ دُواْمِنْ دُكَنْ ڧَبِيلُ؞›‏ »‏

⁸ إِنْجِ عُبَنْ‌غِجِ يَهْوٜىٰهْ وَنْدَ يَتَتَّارَ إِسْرَٰٓءِيلَاوَنْ دَ عَكَ كُواْرَ، ‏«‏ذَنْ ڧَارَ تَتَّارُواْ وَطَنْسُ، بَنْدَ وَطَنْدَ نَارِغَا نَا تَتَّارَ؞»‏

شُوغَبَنِّنْ بَنْظَ نَ إِسْرَٰٓءِيلَ

⁹ كُو أَلْعُمَّيْ، كُذُواْ دُكَنْكُ كَمَرْ نَمُواْمِنْ دَاجِ، كَمَرْ نَمُواْمِنْ كُرْمِ، كُذُواْ كُثِنْيٜىٰ إِسْرَٰٓءِيلَ؞

¹⁰ مَاسُ ڟَرُوانْ إِسْرَٰٓءِيلَ مَكَڢِ نٜىٰ، دُكَنْسُ بَسُ سَنْ كُواْمٜىٰبَ، سُو بٜىٰبَيٜىٰنْ كَرْنُكَ نٜىٰ، بَسُ عِيَيِنْ هَوْشِبَ، سُنَ ݣُونْثٜىٰ، سُنَ تَمَڢَرْكِ، سُنَ يَوَنْ سُوانْ بَرْثِ؞

¹¹ سُو كَرْنُكَ نٜىٰ مَاسُ ݣُوطَيِ، بَاسَ ڧُواْشِ؞ سُو مَاسُ كِيوُاْ نٜىٰ مَرَرْ غَانٜىٰوَ، كُواْوَنّٜىٰنْسُ يَجُويَ يَنَ بِنْ حَنْيَرْسَ، كُواْوَ يَنَ تَنٜىٰمَ وَكَنْسَ رِيبَ كَوَيْ؞

¹² سُكَنْ ثٜىٰ ‏«‏ذُواْ مُسَامُواْ ضُوً إِنَبِے، بَرِ مُشَا حَرْ سَيْمُنْ بُغُ؞ غُواْبٜىٰ ذَيْ كَسَنْثٜىٰ كَمَرْ يَوْ، كُواْ مَا ڢِيٜىٰدَ حَكَ؞»‏