عِشَايَ 55 - أَتَّوْرَتْ دَ أَنَّبَاوَا

كِرَا غَ رَيْ عَيَلْوَثٜىٰ

¹ يَهْوٜىٰهْ يَا ثٜىٰ، ‏«‏دُكْ مَيْ جِنْ ڧِشِنْ ضُوَ، يَذُواْ!‏ ذُواْ غَ ضُوَ أَنَنْ!‏ دُكْ مَرَرْ كُطِ مَا، يَذُواْ يَسَيَ يَثِ!‏ ذُواْ كَسَيِ ضُوً إِنَبِے دَ مَدَرَ، بَاتَرٜىٰدَ كُطِ كُواْ ثِنِكِبَ؞

² دُوانْمٜىٰ كُكٜىٰ كَشٜىٰ كُطِ عَكَنْ أَبِنْدَ بَ عَبِنْثِبَ؟ دُوانْمٜىٰ كُمَ كُنَ كَشٜىٰ كُطِنْ عَيْكِنْكُ عَكَنْ أَبِنْدَ بَيْ بِيَ بُڧَاتَبَ؟ كُجِنِ دَݣَوْ، كُثِ عَبِنْثِ مَيْݣَوْ، كُجِ وَ رَنْكُ دَاطِے دَ عَبِنْثِ مَڢِے ݣَوْ؞

³ كُكَسَ كُنّٜىٰنْكُ، كُذُواْ وُرِينَ، كُجِ، ذَاكُ كُمَ رَايُ؞ ذَنْ كُوَيِ يَرْجٜىٰجٜىٰنِيَ تَهَرْ أَبَدَا دَكُو، تَبَّتَاثِّيَرْ ڧَوْنَرْدَ نَيِ وَ دَاوُدَ؞

⁴ غَاشِ، نَسَا دَاوُدَ يَذَمَ شَيْدَ غَ ڧَبِيلُ، يَذَمَ شُوغَبَادَ شُوغَبَنْ يَاڧِ غَ أَلْعُمَّيْ؞

⁵ غَاشِ، ذَاكَ كِرَا أَلْعُمَّنْ دَ بَكَ سَنْسُبَ، أَلْعُمَّنْ دَ بَسُ سَنْكَبَ ذَاسُ غُدُ سُذُواْ وُرِنْكَ؞ ذَاسُيِ حَكَ غَمَا نِے يَهْوٜىٰهْ اللَّهْ نْكَ نٜىٰ، نِے مَيْ ڟَرْكِنَّنْ نَ إِسْرَٰٓءِيلَ، نَاسَا أَغِرْمَمَكَ؞»‏

⁶ كُنٜىٰمِ يَهْوٜىٰهْ تُنْ أَنَ عِيَ سَامُنْسَ، كُيِ كِرَنْسَ سَعَدَّ يَكٜىٰ كُسَ؞

⁷ بَرِ مَيْ مُغُنْتَا يَبَرْ حَنْيَرْسَ، مَرَرْ أَدَلْثِے كُمَ يَبَرْ تُنَانِنْسَ؞ بَرِ يَكُواْمُواْ غَ يَهْوٜىٰهْ، شِيكُوَ ذَيْ يِمَسَ جِنْڧَيْ، يَكُواْمُواْ غَ يَهْوٜىٰهْ غَمَا أَشِرْيٜىٰ يَكٜىٰ يَغَاڢَرْثٜىٰ شِ؞

⁸ إِنْجِ يَهْوٜىٰهْ، ‏«‏غَمَا تُنَانِنَ بَكَمَرْ تُنَانِنْكُ بَنٜىٰ، أَلْعَمُرَنْكُ كُمَ بَكَمَرْ أَلْعَمُرَانَ بَنٜىٰ؞

⁹ كَمَرْ يَدَّ سَمَّيْ سُكٜىٰ نٜىٰسَ دَ ڧَسَا، حَكَنَنْ أَلْعَمُرَانَ سُكٜىٰ نٜىٰسَ دَ نَاكُ، تُنَانِنَ كُمَ سُكٜىٰ نٜىٰسَ دَ نَاكُ؞

¹⁰ ‏«‏مَغَنَتَ كَمَرْ ضُوً سَمَ دَ دُوسَرْ ڧَنْڧَرَ تَكٜىٰ، وَطَنْدَ سُكٜىٰ سَوْكُواْوَ دَغَ سَمَ، كُمَ بَاسَ كُواْمَاوَا سَيْ سُنْ جِڧٜىٰ ڧَسَا؞ سُكَنْ سَا ڧَسَا تَڢِتَرْدَ ڟِرٜىٰ ڟِرٜىٰ، تَبَا وَمَنُواْمِ إِرِ دُوانْ شُوكَ، غَ مَيْ بُڧَاتَ كُمَ أَبِنْدَ ذَيْثِ؞

¹¹ حَكَ مَا مَغَنَ دَغَ بَاكِنَ تَكٜىٰ، بَذَاتَ كَاسَ ثِكَ دَلِيلِنْدَ نَ عَيْكٜىٰتَبَ؞ لَلَّيْ ذَاتَ ثِكَ أَبِنْدَ نَكٜىٰ نُڢِ، ذَاتَ يَلْوَتَ ثِكِنْ أَبِنْدَ نَ عَيْكٜىٰتَ تَيِ؞

¹² ‏«‏ذَاكُ ڢِتَ ثِكِنْ ڢَضٍ ثِكِ، ذَاعَ بِدَكُو ثِكِنْ سَلَمَ؞ تُدَّيْ دَ مَنْيَنْ تُدَّيْ ذَاسُ ٻَرْكٜىٰ دَ وَاڧَا تَرٜىٰدَكُو، دُكَنْ عِتَتُوَ ذَاسُ بُغَ حَنُّ دُواْمِنْ مُرْنَ!‏

¹³ مَيْمَكُوانْ ڧَيَ، إِتَاثٜىٰنْ سٜىٰدَ ذَيْ تُواْهُ، مَيْمَكُوانْ إِتَاثٜىٰنْ وُتَا وُتَا، إِتَاثٜىٰنْ مُرْتِلْ ذَيْڢِتُواْ؞ وَنَّنْ دُكَ ذَيْ ذَمَ شَيْدَ غَ عَيْكِنْ دَ نِے يَهْوٜىٰهْ نَيِ، عَلَمَ ثٜىٰ دَ ذَاتَ كَسَنْثٜىٰ حَرْ أَبَدَا؞»‏