عِشَايَ 50 - أَتَّوْرَتْ دَ أَنَّبَاوَا

يَهْوٜىٰهْ يَتَبَّتَرْ ذَيْ سَابُنْتَا إِسْرَٰٓءِيلَ

¹ إِنْجِ يَهْوٜىٰهْ، ‏«‏عِدَنْ كُنَ ڟَمَّنِ نَا كُواْرِ مُتَنٜىٰنَ كَمَرْ يَدَّ مُتُمْ يَكَنْ سَكِ مَاتَرْسَ، تُواْ، إِنَا تَكَرْدَرْ سَكِنْ عَوْرٜىٰنْدَ نَبَاتَ؟ عِدَنْ كُنَ ڟَمَّنِ نَا سَيَرْ دَكُو یَیَنَ غَ مَيْبِنَ بَاشِ، تُواْ، إِنَا يَكٜىٰ؟ أَعَ، كُنْ تَڢِے بَوْتَا سَبُواْدَ لَيْڢُواْڢِنْكُنٜىٰ، سَبُواْدَ ذُنُبَنْكُ نَغَنْ‌غَنْثِنٜىٰ أَنْكَوَرْدَ مَامَرْكُ؞

² دُوانْمٜىٰ بَابُ مُتُمْ أَوُرِنْ، سَعَدَّ نَذُواْ إِنْكُٻُتَرْ دَكُو؟ دُوانْمٜىٰ بَابُ مُتُمِنْدَ يَأَمْسَ، سَعَدَّ نَيِ كِرَا؟ هَنُّونَ يَكَاسَ نٜىٰ دَ بَذَيْ عِيَ ڢَنْسَبَ؟ كُواْ كُوَ بَ نِے دَ إِيكُواْ إِنْكُٻُتَرْ دَكُو نٜىٰ؟ دَ عُمَرْنِنَ نَا سَا تٜىٰكُ تَبُوشٜىٰ، نَامَيْدَ رَاڢُڢُّكَ سُكَ ذَمَ هَمَادَ؞ كِڢَيٜىٰ عَثِكِنْسُ سُكَ مُتُ سُنَ وَرِ سَبُواْدَ رَشِنْ ضُوَ؞

³ إِنَدَ إِيكُواْ إِنْمَيْدَ سَرَرِنْ سَمَ دُهُ، كَمَرْ بَڧَڧٜىٰنْ رِيغُنَنْ نُونَ بَڧِنْ ثِكِ؞»‏

وَاڧَ تَ عُكُ تَذَاٻَٻّٜىٰنْ بَاوَنْ يَهْوٜىٰهْ

⁴ عُبَنْ‌غِجِ يَهْوٜىٰهْ يَبَانِ هَرْشٜىٰنْ أَلْمَجِرِنْ دَ عَكَ هُواْرَرْ، دُواْمِنْ إِنْ سَنْ يَدَّ ذَنْ ڧَرْڢَڢَ مَرَرْ ڧَرْڢِے دَ مَغَنَ؞ كُواْوَثٜىٰ سَاڢِيَ يَكَنْ تَاشٜىٰنِ، يَكَنْ تَاشٜىٰنِ تَمَغَنَ عَكُنّٜىٰنَ دُواْمِنْ إِنْجِ كَمَرْ أَلْمَجِرِنْ دَ عَكَهُواْرَرْ؞

⁵ عُبَنْ‌غِجِ يَهْوٜىٰهْ يَبُوطٜىٰ كُنّٜىٰنَ، بَنْ كُوَيِ مَسَ تَاوَيٜىٰ كُواْ إِنْ جُويَا إِنْ رَبُ دَشِيبَ؞

⁶ نَبَادَ بَايَنَ غَ مَاسُ دُوكَنَ، نَبَادَ كُمَتُنَ غَ مَاسُ جَنْ غٜىٰمُنَ؞ بَنْ ٻُواْيٜىٰ ڢُسْكَتَ دَغَ ذَاغِ دَ كُمَ تُواْڢَوَرْ مِيَوْبَ؞

⁷ سَبُواْدَ عُبَنْ‌غِجِ يَهْوٜىٰهْ يَنَ تَيْمَكُواْنَ، شِے يَسَا بَعَڧَسْڧَنْتَرْ دَنِے بَ؞ سَبُواْدَ تَيْمَكُوانْسَ، نَسَا كَيْ، نَسَنِ بَذَنْ شَا كُنْيَابَ؞

⁸ مَيْ تَبَّتَرْ نِے مَرَرْ لَيْڢِے نٜىٰ يَنَ كُسَ؞ وَ ذَيْ عِيَ كَٰوُاْ ڧَارَ عَكَيْنَ؟ بَرِ مُڟَيَ مُڢُسْكَنْثِ جُونَ!‏ وَنٜىٰنٜىٰ أَبُواْكِنْ غَابَنَ؟ سَيْ يَمَڟُواْ كُسَ مُجِ؞

⁹ حَڧِيڧَ، عُبَنْ‌غِجِ يَهْوٜىٰهْ يَنَ تَيْمَكُواْنَ؞ وَ ذَيْ عِيَ ثٜىٰوَ نِے مَيْ لَيْڢِے نٜىٰ؟ لَلَّيْ مَاسُ زَرْغِنَ ذَاسُ ڟُوڢَ كَمَرْ رِغَا، ذَاسُ شُوطٜىٰ كَمَرْ رِغَرْ دَ غَضَ سُكَ ثِنْيٜىٰ؞

¹⁰ وَنٜىٰنٜىٰ عَثِكِنْكُ يَكٜىٰ ڟُواْرُوانْ يَهْوٜىٰهْ، يَنَ كُمَ بِيَيَّ دَ مَغَنَرْ بَاوَنْسَ؟ كُواْدَيَكٜىٰ يَنَ تَڢِيَ ثِكِنْ دُهُ، كُمَ بَابُ حَصْكٜىٰ، دُكْدَهَكَ، بَرِ يَدُواْغَرَ غَ سُونَنْ يَهْوٜىٰهْ، يَسَا ذُوثِيَا غَ اللَّهْ نْسَ؞

¹¹ حَڧِيڧَ، كُو دَ كُكٜىٰ هُورَ وُتَا، كُنَ تَنَدَ وَكَنْكُ حَصْكٜىٰنْ ڢِتِلُ، سَيْ كُيِ تَڢِيَ ثِكِنْ حَصْكٜىٰنْ وُتَرْكُ، دَ نَڢِتِلُنْ دَ كُكَ كُنَّ؞ غَا أَبِنْدَ ذَنْيِ مُكُ دَ هَنُّونَ، ذَاكُ ݣُونْتَ ثِكِنْ عَذَابَ؞