عِشَايَ 49 - أَتَّوْرَتْ دَ أَنَّبَاوَا

وَاڧَ تَبِيُ تَذَاٻَٻّٜىٰنْ بَاوَنْ يَهْوٜىٰهْ

¹ كُجِنِ، يَا كُو يَنْكُنَنْ بَاكِنْ تٜىٰكُ، كُسَوْرَرَ، كُو ڧَبِيلُنْ دَ كُكٜىٰ عَثَنْ نٜىٰسَ!‏ تُنْكَاڢِنْ أَحَيْڢٜىٰنِ، يَهْوٜىٰهْ يَكِرَنِ، تُنْدَغَ ثِكِنْ ثِكِنْ مَامَاتَ يَكِرَا سُونَنَ؞

² يَمَيْدَ بَاكِنَ يَيِ كَيْڢِ كَمَرْ تَكُواْبِے، عَڧَرْڧَشِنْ إِنُوَرْ حَنُّنْسَ، يَٻُواْيٜىٰنِ؞ يَسَ نَذَمَ كَمَرْ كِبِيَرْ دَ عَكَ شِرْيَ، عَثِكِنْ غِدَنْ كِبِيَرْسَ يَٻُواْيٜىٰنِ؞

³ يَثٜىٰ مِنِ ‏«‏إِسْرَٰٓءِيلَ، كَيْ بَاوَنَنٜىٰ، عَثِكِنْكَ ذَنْ بَيَّنَ طَوْكَكَتَ؞»‏

⁴ عَمَّا نَثٜىٰ ‏«‏نَيِ عَيْكِ عَبَنْظَنٜىٰ، نَمُواْضِ ڧَرْڢِينَ بَابُ أَمْڢَانِ؞»‏ دُكْدَهَكَ نَبَرْ حَكِّنَ أَ حَنُّنْ يَهْوٜىٰهْ، سَكَمَكُواْنَ كُمَ يَنَ أَ حَنُّنْ اللَّهْ نَا؞

⁵ يَهْوٜىٰهْ يَا صِڢَّتَانِ عَثِكِنْ ثِكِنْ مَامَاتَ دُواْمِنْ إِنْ ذَمَ بَاوَنْسَ، إِنْ دَاوُاْ دَ ذُرِيَرْ يَعْڧُوبَ ذُوَا غَرٜىٰشِ، دُواْمِنْ إِنْ تَتَّارَ جَمَعَرْ إِسْرَٰٓءِيلَ وُرِنْسَ؞ غَمَا نَا سَامِ دَرَجَ أَغَبَنْ يَهْوٜىٰهْ، اللَّهْ نَا كُمَ شِينٜىٰ تُوشٜىٰنْ ڧَرْڢِينَ؞

⁶ يَنْذُ ڢَا يَهْوٜىٰهْ يَا ثٜىٰمِنِ، ‏«‏بَاوَنَ، عَيْكِنْدَ نَبَاكَ نَتَادَ ذُرِيَرْ يَعْڧُوبَ، نَمَيَرْدَ ضَغُواْوَرْ إِسْرَٰٓءِيلَ، ڧَرَمِنْ أَبُنٜىٰ؞ ذَنْ كُمَسَا كَذَمَ حَصْكٜىٰ غَ أَلْعُمَّيْ، دُواْمِنْ ثٜىٰتُواْنَ يَكَيْ حَرْ إِيَاكَرْ دُونِيَا؞»‏

⁷ إِنْجِ يَهْوٜىٰهْ، مَيْ ڢَنْسَرْ إِسْرَٰٓءِيلَ، مَيْ ڟَرْكِنْسَ، غَ وَنْدَ مُتَنٜىٰ سُكٜىٰ ڧِنْسَ، وَنْدَ أَلْعُمَّيْ سُكٜىٰ ڨَمَرْسَ، وَنْدَ يَكٜىٰ بَاوَنْ مَاسُ مُلْكِ، ‏«‏سَرَاكُنَ ذَاسُ تَاشِ ڟَيٜىٰ سُبَاكَ غِرْمَ، شُوغَبَنِّ ذَاسُ رُسُنَ دَ ڢُسْكَرْسُ حَرْ ڧَسَا، سَبُواْدَ يَهْوٜىٰهْ مَيْ أَمِنْثِ، مَيْ ڟَرْكِے نَ إِسْرَٰٓءِيلَ، شِينٜىٰ يَذَاٻٜىٰكَ؞»‏

يَهْوٜىٰهْ ذَيْ دَاوُاْ دَ إِسْرَٰٓءِيلَ غِدَا

⁸ إِنْجِ يَهْوٜىٰهْ، ‏«‏أَ لُواْكَثِنْ نُونَ أَلْحٜىٰرِنَ، نَأَمْسَ مَكَ، أَ رَانَرْ ثٜىٰتُواْ نَتَيْمَكٜىٰكَ، نَكِيَايٜىٰكَ، نَكُمَ بَادَكَيْ كَذَمَ يَرْجٜىٰجٜىٰنِيَ غَ مُتَنٜىٰ، دُواْمِنْ أَ سَابُنْتَا ڧَسَرْ، دُواْمِنْ أَ مَيَرْوَ كُواْوَ أَبِنْ غَادُوانْسُ وَنْدَ يَكٜىٰ كُڢَيْ،

⁹ دُواْمِنْ عَثٜىٰ وَیَنْ كُرْكُكُ، ‏‹‏كُڢِتُواْ،›‏ عَكُمَثٜىٰ وَمَاسُ ذَمَ أَدُهُ، ‏‹‏كُڢِتُواْ ذُوَا وُرِنْ حَصْكٜىٰ!‏›‏ ‏«‏سَعَدَّ سُكٜىٰ تَڢِيَ عَكَنْ حَنْيَ، بَذَاسُ رَسَ كُواْمٜىٰبَ، كَمَرْ تُمَكِنْ دَسُكٜىٰ كِيوُاْ كُواْعِنَ، حَرْ مَا عَكَنْ تُدَّيْ مَرَرْ ثِيَوَ؞

¹⁰ بَذَاسُ تَٻَ جِنْ يُنْوَ كُواْ ڧِشِبَ، بَذَاسُ شَا ذَاڢِنْ رَانَ كُواْ نَدَاجِنْ يَشِبَ، غَمَا شِے مَيْ تَوْسَيِنْسُ نٜىٰ ذَيْبِيدَسُو، ذَيْبِيدَسُو ذُوَا مَٻُٻُّغَرْ ضُوَ؞

¹¹ دُكَنْ تُدَّنْ دَسُكٜىٰ أَغَبَنْسُ، ذَنْ مَيْدَسُو حَنْيَ، إِنْكُمَ شِرْيَ هَنْيُواْيِنَ مَاسُ ݣَوْ؞

¹² دُوبَ، مُتَنٜىٰنَ ذَاسُذُواْ دَغَ ثَنْ نٜىٰسَ، وَطَنْسُ كُمَ ذَاسُذُواْ دَغَ أَرٜىٰوَ، دَغَ يَمَّ دَغَ كُمَ كُدَنْثِنْ مَصَرْ؞»‏

¹³ كُرٜىٰرَ وَاڧَرْ ڢَضٍ ثِكِ، يَا كُو سَمَّيْ!‏ كُيِ إِيهٌ ڢَضٍ ثِكِ، يَا كٜىٰ دُونِيَا!‏ كُٻَرْكٜىٰ دَ وَاڧَا، يَا كُو مَنْيَنْ دُوَڟُو!‏ غَمَا يَهْوٜىٰهْ يَاتَعَظَنْتَرْدَ جَمَعَرْسَ، ذَيْجِے تَوْسَيِنْ مُتَنٜىٰنْسَ مَاسُ شَنْ وَهَلَ؞

¹⁴ عَمَّا مُتَنٜىٰنْ سِهِيُواْنَ سُكَثٜىٰ، ‏«‏أَيْ، يَهْوٜىٰهْ يَا يَاشٜىٰمُ، عُبَنْ‌غِجِ يَا مَنْتَادَمُو؞»‏

¹⁵ سَيْ يَهْوٜىٰهْ يَأَمْسَ يَثٜىٰ، ‏«‏مَثٜىٰ ذَاتَ عِيَ مَنْتَاوَا دَ جَرِرِنْتَ نٜىٰ؟ ذَاتَ عِيَ ڧِنْ جِنْ تَوْسَيِنْ طَنْ ثِكِنْتَ نٜىٰ؟ يَيِوُ مَثٜىٰ تَمَنْتَادَ طَنْ ثِكِنْتَ، عَمَّا نِے كَمْ، بَذَنْ تَٻَ مَنْتَاوَا دَكٜىٰ عُرُوشَلِيمَ بَ؞

¹⁶ دُوبَ، نَظَانَ سُونَنْكِ عَتَڢِنْ هَنُّونَ، بَذَنْ تَٻَ مَنْتَاوَا دَ كٜىٰبَ؞ كُلُّمْ كَتَنْ‌غَرْ بِرْنِنْكِ تَنَ ثِكِنْ تُنَانِنَ؞

¹⁷ مَاسُ غِنَكِ سُنَ سَوْرِنْ ذُوَا، مَاسُ هَلَكَاكِ ذَاسُبَرْكِ؞

¹⁸ كِطَغَ عِدَنُونْكِ سَمَ، كِدُوبَ كٜىٰوَيٜىٰ كِغَنِ، یَیَنْكِ سُنَ تَتَّارُوَ سُنَ دَاوُاْوَ غِدَا؞ حَڧِيڧَ، نِے يَهْوٜىٰهْ نَا ضَنْڟٜىٰ دَ رَيْنَ ثٜىٰوَ یَیَنْكِ ذَاسُ ذَمَ مِكِ كَمَرْ كَايَنْ أَدُواْ، ذَاكِيِ تَاڧَمَ دَسُو كَمَرْ يَدَّ أَمَرْيَ تَكَنْيِ دَ أَدُوانْتَ؞

¹⁹ ‏«‏كُواْدَيَكٜىٰ أَنْلَلَتَرْدَ ڧَسَرْ، أَنْهَلَّكَرْ دَ عِتَ حَرْ تَذَمَ كُڢَيْ، حَڧِيڧَ سَبُواْدَ يَوَنْ مُتَنٜىٰنْ دَ ذَاسُذُواْ، يَنْذُ ڢَاطِنْ ڧَسَرْ ذَيْ كَاسَ مِكِ، وَطَنْدَ سُكَ لَلَتَرْدَكٜىٰ أَدَا ذَاسُيِ نٜىٰسَ دَكٜىٰ؞

²⁰ یَیَنْكِ وَطَنْدَ عَكَ حَيْڢَ أَ لُواْكَثِنْ ذَمَنْ بَوْتَرْكِ، وَتَرَانَ ذَاسُ ثٜىٰمِكِ، ‏‹‏وَنَّنْ وُرِے يَكَاسَ مَنَ، عَڧَارَ مَنَ وُرِنْ ذَمَ؞›‏

²¹ سَعَنً ذَاكِثٜىٰ وَكَنْكِ، ‏‹‏وَ يَحَيْڢَ مِنِ یَیَ دَيَوَ حَكَ؟ نَا رَسَ یَیَنَ، بَانَ كُمَ حَيْڢُوَ، أَنْكُواْرٜىٰنِ، أَنْ كَيْنِ بَوْتَا، تُواْ، وَنٜىٰنٜىٰ يَيِ رٜىٰنُوانْ وَطَنَّنْ یَیَ؟ غَمَا أَنْبَرْنِ دَا بَا كُواْوَ، يَنْذُ دَغَ إِنَا وَطَنَّنْ یَیَ سُكَ ڢِتُواْ؟›‏ »‏

²² إِنْجِ عُبَنْ‌غِجِ يَهْوٜىٰهْ، ‏«‏غَاشِ، ذَنْ طَغَ هَنُّونَ غَ أَلْعُمَّيْ، ذَنْ تَادَ عَلَمَ غَ ڧَبِيلُ، أَ حَنُّنْسُ ذَاسُ كَٰوُاْ یَیَنْكِ مَظَا، عَكَڢَطَرْسُ كُمَ ذَاسُ كَٰوُاْ یَیَنْكِ مَتَ؞

²³ سَرَاكُنَ ذَاسُ لُورَ دَ یَیَنْكِ، سَرَوْنِيُواْيِ ذَاسُيِ رٜىٰنُوانْسُ؞ ذَاسُ رُسُنَ دَ ڢُسْكَرْسُ حَرْ ڧَسَا سُلَّشٜىٰ ڧُورَرْ ڧَڢَرْكِ سُبَاكِ غِرْمَ؞ سَعَنً ذَاكِ سَنِ نِنٜىٰ يَهْوٜىٰهْ، وَطَنْدَ سُكَسَا رَيْ عَكَيْنَ كُمَ بَذَاسُشَا كُنْيَابَ؞»‏

²⁴ وَ ذَيْ عِيَ ڨُوثٜىٰ كَايَنْ دَ سُواْجَ يَݣُوشٜىٰ عَيَاڧِ؟ وَ ذَيْ عِيَ كُٻُتَرْدَ وَطَنْدَ عَكَ كَامَ عَيَاڧِ دَغَ مُوغُنْ سَرْكِے؟

²⁵ بَاشَكَّ، إِنْجِ يَهْوٜىٰهْ، ‏«‏ذَاعَ كُٻُتَرْدَ وَطَنْدَ عَكَ كَامَ عَيَاڧِ، ذَاعَ ڨُوثٜىٰ كَايَنْ دَ مَرَرْ تَوْسَيِ يَݣُوشٜىٰ؞ غَمَا نِے ذَنْيِ غَابَادَ دُكْ مَيْ غَابَادَكٜىٰ، ذَنْكُوَ كُٻُتَرْدَ یَیَنْكِ؞

²⁶ ذَنْسَا مَاسُ ڟَنَنْتَ مِكِ سُثِنَمً جِكِنْسُ، ذَاسُ بُغُ دَ جِنِنْسُ كَمَرْ دَ ضُوً إِنَبِے؞ سَعَنً دُكَنْ یَنْ أَدَمْ ذَيْسَنِ ثٜىٰوَ نِنٜىٰ يَهْوٜىٰهْ مَيْ ثٜىٰتُوانْكِ، نِنٜىٰ مَيْ ڢَنْسَرْكِے، مَيْ إِيكُواْ نَ يَعْڧُوبَ؞»‏