عِشَايَ 42 - أَتَّوْرَتْ دَ أَنَّبَاوَاوَاڧَ تَڢَرْكُواْ تَذَاٻَٻّٜىٰنْ بَاوَنْ يَهْوٜىٰهْ 1 إِنْجِ يَهْوٜىٰهْ، «غَا بَاوَنَ وَنْدَ نَڧَرْڢَڢَ، ذَاٻَٻّٜىٰنَ وَنْدَ ذُوثِيَاتَ تَكٜىٰ جِنْ دَاطِنْسَ؞ نَسَا رُوحُنَ عَكَنْسَ، شِے ذَيْ كَٰوُاْ يِنْ غَسْكِيَ غَ أَلْعُمَّيْ؞ 2 بَذَيْ يِ إِيهُ كُواْ يَتَادَ مُرْيَرْسَبَ، كُواْ يَيِ مَغَنَ دَ ڧَرْڢِے عَتِيتِبَ؞ 3 كَرَنْ دَيَرَسَ ڧَرْڢِے، بَذَيْ كَرْيَ شِيبَ، ڢِتِلَرْ دَ عَكَ ضَغٜىٰ وُتَرْتَ، بَذَيْ كَشٜىٰتَبَ؞ ثِكِنْ أَمِنْثِ ذَيْ كَٰوُاْ يِنْ غَسْكِيَ؞ 4 ڨُوظُوانْسَ بَذَيْ رَغُبَ، بَذَيْ مَا رَسَ ڧَرْڢِبَ، سَيْ يَكَڢَ يِنْ غَسْكِيَ عَدُونِيَا؞ مُتَنٜىٰنْ يَنْكُنَنْ بَاكِنْ تٜىٰكُ كُوَ سُنَ مَرْمَرِنْ كُواْيَرْوَرْسَ؞» 5 إِنْجِ اللَّهْ وَنْدَ شِينٜىٰ يَهْوٜىٰهْ، وَنْدَ يَحَلِثِّ سَمَّيْ، يَشِمْڢِطَاسُ، وَنْدَ يَيِ دُونِيَا دَ دُكَنْ أَبِنْدَ يَكٜىٰ ڟِرُواْوَ عَثِكِنْتَ، وَنْدَ يَبَادَ نُمْڢَشِ غَ مُتَنٜىٰنْ دُونِيَا، وَنْدَ يَبَادَ رُوحٌ رَيْ غَ مَاسُ تَڢِيَ عَثِكِنْتَ؞ 6 «نِے يَهْوٜىٰهْ، نَا كِرَاكَ دُواْمِنْ إِنْ نُونَ أَدَلْثِنَ، ذَنْ رِڧٜىٰكَ دَ حَنُّ إِنْ صِڢَّتَاكَ، دُواْمِنْ كَذَمَ يَرْجٜىٰجٜىٰنِيَتَ غَ مُتَنٜىٰ، كَكُمَ ذَمَ حَصْكٜىٰ غَ أَلْعُمَّيْ، 7 دُواْمِنْ كَبُوطٜىٰ إِدَانُنْ دَ سُكَ مَكَنْثٜىٰ، كَسَكِ وَطَنْدَ عَكَ ڧُلّٜىٰ عَكُرْكُكُ، كَڢِتَرْدَ وَطَنْدَ سُكٜىٰ ذَمَ ثِكِنْ دُهُنْ رَامِنْ كُرْكُكُ؞ 8 «نِنٜىٰ يَهْوٜىٰهْ، سُونَنَ كٜىٰنَنْ؞ بَذَنْ بَا كُواْوَ طَوْكَكَتَبَ، بَ كُوَ ذَنْبَرْ غُنْكِ يَكَرْٻِ يَبُوانْ دَ كُكٜىٰ بَانِبَ؞ 9 غَاشِ، أَبُبُوَنْ دَ سُكَ وُثٜىٰ، دَا نَسَنَرْدَسُو، يَنْذُ سُنْثِكَ؞ يَنْذُ إِنَ سَنَرْدَ سَابَبِّنْ أَبُبُوَ كَاڢِنْ مَا سُڢَرُ؞ كَاڢِنْ سُڢَرُ، نَاڢَطَا مُكُسُ؞» سَابُوَرْ وَاڧَرْ يَبُواْ غَ يَهْوٜىٰهْ 10 كُرٜىٰرَ سَابُوَرْ وَاڧَا غَ يَهْوٜىٰهْ، يَبُوانْسَ كُمَ دَغَ إِيَاكَرْ دُونِيَا! كُو دَ كُكٜىٰ تَڢِيَ عَكَنْ تٜىٰكُ، دَ دُكَنْ أَبِنْدَ يَكٜىٰ ثِكِنْتَ، كُيَبٜىٰشِ! كُو يَنْكُنَنْ بَاكِنْ تٜىٰكُ دَ كُو مَذَوْنَنْسُ، كُرٜىٰرَ مَسَ يَبُواْ! 11 بَرِ هَمَادَ دَ غَرُرُوَنْتَ سُتَادَ مُرْيَ، تَرٜىٰدَ مَذَوْنَنْ ڧَوْيُكَنْ كٜىٰدَرْ! بَرِ مَذَوْنَنْ سٜىٰلَ سُيِ وَاڧَرْ ڢَضٍ ثِكِ، سُيِ إِيهُ دَغَ كَنْ مَنْيَنْ تُدَّيْ! 12 بَرِ سُيِ شٜىٰلَرْ طَوْكَكَرْ يَهْوٜىٰهْ، سُسَنَرْدَ يَبُوانْسَ عَيَنْكُنَنْ بَاكِنْ تٜىٰكُ! 13 يَهْوٜىٰهْ يَا ڢِتَ كَمَرْ ڠُونِنْ يَاڧِ، كَمَرْ مَيْ عِيَ يَاڧِ، يَتَادَ نِيَّرْسَ، يَيِ كِرَرِنْ يَاڧِ يَيِ إِيهُ، يَنُونَ ڠُونِنْتَرْسَ كَنْ أَبُواْكَنْ غَابَنْسَ؞ يَهْوٜىٰهْ يَا يِأَلْڧَوَرِنْ طَوْكَرْ مَتَاكِ 14 يَهْوٜىٰهْ يَثٜىٰ، «نَا دَطٜىٰ نَايِ شِضُ، نَا ڧِ يِنْ مَغَنَ نَايِ ذَمَنْ حَڧُرِ؞ عَمَّا يَنْذُ لُواْكَثِنْ طَوْكَرْ مَتَاكِ يَايِ، ذَنْيِ كُوكَا دَ نِيشِ كَمَرْ مَثٜىٰ مَيْ نَڧُدَ؞ 15 ذَنْ هَلَّكَرْ دَ تُدَّيْ دَ مَنْيَنْ تُدَّيْ، إِنْ بُوسَرْ دَ ثِيَوَرْسُ دَ عِتَتُوَنْسُ، ذَنْ مَيْدَ رَاڢُڢُّكَ سُذَمَ وُرِنْ ڟِبِرَيْ، ذَنْ بُوسَرْ دَ تَڢْكُنَنْ ضُوَ؞ 16 ذَنْ جَغُواْرَنْثِ مَكَڢِ عَتَهَنْيَرْ دَ بَسُ تَٻَ سَنِبَ، أَ هَنْيُواْيِنْ دَ بَسُ سَنِبَ، ذَنْبِيدَسُو؞ ذَنْ مَيْدَ دُهُنْسُ يَذَمَ حَصْكٜىٰ، وُرَارٜىٰنْ غَرْغَدَ، ذَنْ مَيْدَسُو سُمُلْ؞ أَبُبُوَنْ دَ ذَنْيِ كٜىٰنَنْ، بَكُوَ ذَنْ ڢَاسَ يِنْسُبَ؞ 17 دُكَنْ مَاسُ دُواْغَضَ غَ غُمَكَ، مَاسُثٜىٰ وَصِڢُّواْڢِنْ ظُبِے، ‹كُو نٜىٰ أَلُّواْلِنْمُ،› ذَاعَ ڧَسْڧَنْتَرْ دَسُو سُشَا كُنْيَا؞» إِسْرَٰٓءِيلَ تَا كَاسَ كُواْيُواْ 18 «كُكَسَ كُنّٜىٰ كُجِ، يَا كُو كُرَمٜىٰ! كُطَغَ عِدُواْ كُدُوبَ، يَا كُو مَكَڢِ! 19 شِنْ، وَنٜىٰنٜىٰ مَكَهُواْ، إِنْ بَ بَاوَنَبَ؟ وَنٜىٰنٜىٰ كُرْمَ، إِنْ بَ طَنْ عَيْكَنَبَ؟ وَنٜىٰنٜىٰ مَكَهُواْ كَمَرْ وَنْدَ نَذَاٻَا، كُواْ مَكَهُواْ كَمَرْ بَاوَنْ يَهْوٜىٰهْ؟ 20 شِينٜىٰ مَيْ غَنِنْ أَبُبُوَ مَاسُيَوَ، عَمَّا بَايَ لُورَ دَسُو؞ شِينٜىٰ مَيْ كُنّٜىٰ عَبُوطٜىٰ عَمَّا بَايَ جِنْ مَغَنَ؞» 21 سَبُواْدَ أَدَلْثِنْسَ، يَهْوٜىٰهْ يَاجِ دَاطِے يَطَوْكَكَ كُواْيَرْوَرْسَ يَكُمَ غِرْمَمَتَ؞ 22 عَمَّا سُو جَمَعَثٜىٰ دَ عَكَيِ مُسُ ڢَشِ، عَكَيِ مُسُ ڨُوثٜىٰ، جَمَعَثٜىٰ وَدَّ عَكَتَرٜىٰ عَثِكِنْ رَامُكَ، وَدَّ عَكَ ٻُواْيٜىٰ عَكُرْكُكُ؞ سُنْ ذَمَ كَايَنْ دَ عَكَ ڨُوثٜىٰ عَيَاڧِ، بَابُ مَيْ كُٻُتَرْ دَسُو؞ سُنْ ذَمَ كَمَرْ كَايَنْ دَ عَكَ ڨُوثٜىٰ عَيَاڧِ، بَابُ مَيْ ثٜىٰوَ «أَ مَيَرْ دَسُو!» 23 وَنٜىٰنٜىٰ عَثِكِنْكُ ذَيْ كَسَ كُنّٜىٰ يَجِ وَنَّنْ؟ وَنٜىٰنٜىٰ ذَيْبَادَ حَنْكَلِ يَجِ أَبُبُوَ مَاسُ ذُوَا نَنْ غَبَ؟ 24 وَنٜىٰنٜىٰ يَبَادَ ذُرِيَرْ يَعْڧُوبَ غَ مَيْ ڢَشِنَّنْ؟ وَنٜىٰنٜىٰ يَبَادَ إِسْرَٰٓءِيلَ غَ مَيْ ڨُوثٜىٰنَّنْ؟ أَيْ بَ يَهْوٜىٰهْ بَنٜىٰ؟ شِينٜىٰ وَنْدَ سُكَيِ مَسَ ذُنُوبِ، شِينٜىٰ وَنْدَ سُكَڧِ بِنْ حَنْيَرْسَ، سُكَڧِ يِنْ بِيَيَّ دَ كُواْيَرْوَرْسَ؞ 25 سَبُواْدَ وَنَّنْ نٜىٰ يَهْوٜىٰهْ يَظُبَ ذَاڢِنْ ڢُشِنْسَ، يَظُبَ مُسُ وُتَرْ يَاڧِ؞ وُتَرْ تَكٜىٰوَيٜىٰسُ، عَمَّا بَسُ غَانٜىٰبَ؞ وُتَرْ تَڧُواْنٜىٰسُ، عَمَّا بَسُ كُواْيِ وَنِ أَبُبَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria