عِشَايَ 28 - أَتَّوْرَتْ دَ أَنَّبَاوَاسَڧُوانْ كَيْتُواْ نَڢَرْكُواْ حُكُنْثِ عَكَنْ سَمَرِيَ 1 كَيْتُوانْكِ، يَا سَمَرِيَ أَمُلْكٍ إِسْرَٰٓءِيلَ! كٜىٰ دَ كِكٜىٰ ذَمَ عَكَنْ تُدُ ثِكِنْ ڧَسَا مَيْ أَمْڢَانِ، كَمَرْ هُولَرْ سَرْكِے مَيْ أَدُوانْ ڢُلَوَ، أَبِنْ تَاڧَمَ نَمَاسُ بُغُوَ، نَمَاسُ ڧِبَ سَبُواْدَ يَوَنْ عَبِنْثِ، حَڧِيڧَ دَرَجَرْ أَدُوانْكِ تَنَ شُوطٜىٰوَ! 2 غَاشِ، يَهْوٜىٰهْ يَنَدَ وَنِ، وَنِ مَيْ إِيكُواْ مَيْ ڧَرْڢِے، مَيْيِ ٻَرْنَ كَمَرْ إِسْكَ مَيْ ڧَنْڧَرَ، كَمَرْ بَبَّرْ إِسْكَ مَيْ هَلَّكَرْوَ، كَمَرْ بَبَّنْ ضُوً سَمَ، كَمَرْ أَمْبَلِيَ مَيْ شَاڢٜىٰ ڧَسَا؞ 3 كٜىٰ هُولَرْ سَرْكِے مَيْ أَدُوانْ ڢُلَوَ، أَبِنْ تَاڧَمَرْ نَنْ نَمَاسُ بُغُوَ، ذَاعَ رُشٜىٰكِ حَرْ ڧَسَا عَتَتَّاكَ؞ 4 دَرَجَرْ أَدُوانْكِ عَكَنْ مَاسُ ڧِبَ سَبُواْدَ يَوَنْ عَبِنْثِ، ذَاتَ شُوطٜىٰ؞ ذَاتَ ذَمَ كَمَرْ نُونً ڢَارِ نَیَیَنْ ٻَوْرٜىٰ، وَنْدَ دَظَرَرْ وَنِ يَغَنِ، ذَيْ ڟِنْكٜىٰ يَثِنْيٜىٰ نَنْ دَنَنْ؞ 5 أَ رَانَرْ نَنْ، يَهْوٜىٰهْ مَيْ ضُنْدُنَا ذَيْ ذَمَ كَمَرْ هُولَرْ سَرْكِے مَيْ دَرَجَ، كَمَرْ هُولَ مَيْ أَدُوانْ ڢُلَوَ مَيْݣَوْ غَ ضَغُواْوَرْ جَمَعَرْسَ؞ 6 يَهْوٜىٰهْ ذَيْبَادَ رُوحٌ يِنْ أَدَلْثِے غَ مَيْ شَرِيعَ، ڧَرْڢِنْ حَلِ كُمَ غَ مَاسُ ڟَرٜىٰ ڧُواْڢَرْ بِرْنِ دَغَ أَبُواْكَنْ غَابَا؞ حُكُنْثِ عَكَنْ شُوغَبَنِّ مَاسُ ڧَضْيَا 7 أَنَّبَاوَا دَ ڢِرِسْتُواْثِے سُنَ تَنْغَطِ سُنَ بُغُوَ دَ غِيَ، سُنَ تَتُنْتُٻٜىٰ سَبُواْدَ ضُوً إِنَبِے؞ سُنَ ضِكِثِيوَ سَبُواْدَ يَوَنْ ضُوً إِنَبِے، سُنَ غَنِنْ دُهُ دُهُ ثِكِنْ رُعُيُواْيِنْسُ، سُنَ كُسْكُرٜىٰ ثِكِنْ يِنْ شَرِيعَ؞ 8 تٜىٰبُرَنْ عَبِنْثِنْسُ، سُنْثِكَسُ دَ أَمَيْ، بَابُوُرِ مَيْ ڟَبْتَ؞ 9 حَرْ سُنَ غُنَغُنِ سُنَ ثٜىٰوَ «وَنٜىٰنٜىٰ شِ دَ يَكٜىٰسُواْ يَكُواْيَ مَنَ؟ وَنٜىٰنٜىٰ يَكٜىٰ بُڧَاتَرْ كُواْيَرْوَرْسَ؟ أَغَنِنْسَ مُو یَنْ يَارَا نٜىٰ دَ عَكٜىٰ ڧُواْڧَرِنْ يَيٜىٰوَ دَغَ شَنْ مَامَا؟ 10 أَبِنْ دَمُكٜىٰجِ، سُورُوتُ عَكَنْ سُورُوتُ، لَيِ عَكَنْ لَيِ، كَطَنْ أَنَنْ كَطَنْ عَثَنْ؞» 11 تُواْ، عِدَنْ بَذَاكُ سَوْرَرَبَ، يَهْوٜىٰهْ ذَيْ يِمَغَنَ دَكُو، دَ هَرْشٜىٰنْ دَ كُنّٜىٰنْكُ بَسُ سَابَا جِبَ، دَ يَرٜىٰنْ مُتَنٜىٰنْ دَ بَنَكُبَ؞ 12 غَمَا يَارِغَا يَثٜىٰمُكُ «أَوُرِينَ أَݣَويْ هُوتَوَا، بَرِ مَاسُ غَاجِيَ سُسَامِ هُوتُ، أَنَنْ نٜىٰ وُرِنْ سَلَمَ،» عَمَّا كُنْڧِجِ؞ 13 سَبُواْدَ حَكَ مَغَنَرْ يَهْوٜىٰهْ ذَاتَ ذَمَ مُكُ سُورُوتُ عَكَنْ سُورُوتُ، لَيِ عَكَنْ لَيِ، كَطَنْ أَنَنْ كَطَنْ عَثَنْ؞ تَهَكَ ذَاكُيِ غَبَ، كُڢَاطِ دَ بَايَ، ذَاكُجِ ثِيوُاْ، ذَاعَ كَامَكُ، عَكَيْكُ بَوْتَا؞ 14 دُواْمِنْ حَكَ، كُجِ مَغَنَرْ يَهْوٜىٰهْ، يَا كُو مَاسُ بَعَ، كُو دَ كُكٜىٰيِنْ مُلْكِ أَ عُرُوشَلِيمَ؞ 15 كُنَ بُغَ ڧِرْجِ ثٜىٰوَ «أَيْ، مُنْ طَوْرَ يَرْجٜىٰجٜىٰنِيَ دَ مُتُوَ، دَ وُرِنْ ذَمَنْ مَتَتُّو، مُنَدَ أَلْڧَوَرِ؞ أَسَعَدَّ بَبَّرْ مَسِيڢَرْ نَنْ تَٻُلُّواْ، بَذَاتَ تَٻَمُبَ، غَمَا مُنْ مَيْدَ ڧَضْيَا وُرِنْ ٻُيَنْمُ، رُوطُ كُمَ إِنُوَرْ هُوتَوَارْمُ؞» 16 يَنْذُ ڢَا إِنْجِ عُبَنْغِجِ يَهْوٜىٰهْ، «غَاشِ، إِنَ كَڢَ دُوڟٜىٰ أَ سِهِيُواْنَ، دُوڟٜىٰنْ دَ عَكَ ڠُودَ عَكَ تَبَّتَرْ، دُوڟٜىٰ مَيْ دَرَجَ مَڢِے أَمْڢَانِ أَغِنِ، تَبَّتَاثّٜىٰنْ تُوشٜىٰ، ‹دُكْ مَيْ أَمِنْثٜىٰ دَشِ، بَذَيْ ڢِرْغِتَبَ؞› 17 ذَنْ مَيْدَ شَرِيعَرْ غَسْكِيَ تَذَمَ إِغِيَرْ أَوُانْ غِنِنْ، أَدَلْثِے كُمَ ذَيْ ذَمَ أَبِنْ ڠُوجِنْ؞ إِسْكَ مَيْ ڧَنْڧَرَ ذَاتَ شَارٜىٰ دُكَنْ وُرِنْ ٻُيَنْكُ نَڧَضْيَا، أَمْبَلِيَرْ ضُوَ ذَاتَ هَلَّكَرْ دَ إِنُوَرْ هُوتَوَارْكُ؞ 18 يَرْجٜىٰجٜىٰنِيَرْكُ دَ مُتُوَ، ذَاعَ كَوَرْ، أَلْڧَوَرِنْكُ دَ وُرِنْ ذَمَنْ مَتَتُّو، بَذَيْ ڟَيَبَ؞ سَعَدَّ بَبَّرْ مَسِيڢَرْ نَنْ تَٻُلُّواْ، ذَاتَ هَلَكَاكُ؞ 19 كُواْوَنٜىٰ لُواْكَثِنْ دَ ذَاتَ ٻُلُّواْ مُكُ، مَسِيڢَ ذَاتَ ݣُوشٜىٰكُ؞ ذَاتَيِ تَأَوْكُواْ مُكُ كُواْوَثٜىٰ سَاڢِيَ عَكَيْ عَكَيْ، كُواْ دَ رَانَ كُواْ دَدَرٜىٰ؞» غَانٜىٰوَرْ وَنَّنْ سَڧُواْ ذَاتَ كَٰوُاْ رَظَنَ! 20 غَمَا ذَيْ ذَمَ مُكُ كَمَرْ كَرِنْ مَغَنَ مَيْ ثٜىٰوَ غَدُوانْ ݣُونْثِيَرْكُ غَجٜىٰرٜىٰ نٜىٰ، بَعَ عِيَ مِيڧَ ڧَڢَا، بَرْغُوانْ رُڢُوَرْكُ كُمَ ڢَاطِنْسَ يَكَاسَ، بَعَ عِيَ رُڢٜىٰ جِكِے دُكَ؞ 21 غَمَا يَهْوٜىٰهْ ذَيْ يِيَاڧِ كَمَرْ يَدَّ يَيِ عَتُدُنْ ڢٜىٰرَظِمْ؞ ذَيْ يِڢُشِے كَمَرْ يَدَّ يَيِ أَ ݣُورِنْ غِبٜىٰيُوانْ؞ يَهْوٜىٰهْ ذَيْ عَيْكَتَ وَنَّنْ، كُواْدَيَكٜىٰ بَ حَكَ أَيُّكَنْسَ سُكٜىٰبَ، أَبِنْ كُوَ مَيْبَنْ مَامَاكِ نٜىٰ! 22 سَيْ كُبَرْ يِنْبَعَ؞ إِنْ بَهَكَبَ، ذَاعَ ڧَارَ نَوْيِنْ غُنْغُمٜىٰنْكُ؞ غَمَا نَاجِ دَغَ وُرِنْ عُبَنْغِجِ يَهْوٜىٰهْ مَيْ ضُنْدُنَا ثٜىٰوَ يَعُمَرْتَ أَ هَلَّكَ دُكَنْ ڧَسَرْ؞ حِكِمَرْ يَهْوٜىٰهْ ثِكِنْ يِنْ حُكُنْثِ 23 كُكَسَ كُنّٜىٰ، كُجِ مَغَنَاتَ، كُمَيْدَ حَنْكَلِ غَ أَبِنْدَ نَكٜىٰ ڢَطَا؞ 24 كُواْ مَنُواْمِ يَكَنْيِ كَڢْتُنْ غُواْنَرْسَ بَابُ شُوكَ نٜىٰ؟ كُواْ يَكَنْيِ تَبُوطٜىٰ ڧَسَا يَنَ تَنُواْمٜىٰ تَهَكَ كَوَيْ؟ 25 دَظَرَرْ يَغَمَ ڠَرَنْ غُواْنَرْ، بَ يَكَنْيِ شُوكٜىٰ شُوكٜىٰنْسَبَ؟ بَ يَكَنْ يَيَّڢَا إِرِنْ طَطُّواْيَ دَ كُمِنْ، يَشُوكَ أَلْكَمَ أَ جٜىٰرٜىٰ، يَشُوكَ حَڟِنْ بَلٜىٰ لَيِ لَيِ، يَشُوكَ حَڟِ دُواْمِنْ غُرَاسَ أَوُرِنْسَبَ؟ 26 يَسَنْ يَدَّ ذَيْ يِ عَيْكِنْسَ، غَمَا اللَّهْ يَنَ كُواْيَ مَسَ؞ 27 بَايَ بُغُنْ طَطُّواْيَ دَ ڧَتُوانْ سَنْدَنْ بُغُنْ حَڟِ، كُواْ يَجَا كٜىٰكٜىٰنْ شَانُو دُواْمِنْ أَ سَامِ ڨُويُواْيِنْ كُمِنْ، عَمَّا دَ یَنْ سَنْدُنَ نٜىٰ يَكٜىٰ بُغُنْسُ أَ حَنْكَلِ؞ 28 عَكَنْ نِڧَ حَڟِ دُواْمِنْ غُرَاسَ، عَمَّا بَعَبُغُنْسَ حَرْ حَرْ بَ، عَكَنْبِدَ كٜىٰكٜىٰنْ شَانُو دَ دَوَكِ عَكَيْ، عَمَّا بَاتَرٜىٰدَ يَٻَاتَ ڟَابَرْبَ؞ 29 دُكَنْ وَنَّنْ حِكِمَ دَغَ وُرِنْ يَهْوٜىٰهْ مَيْ ضُنْدُنَا نٜىٰ؞ شِ ڠُونِنْ بَادَ شَوَرَا نٜىٰ، ثِكٜىٰ يَكٜىٰ كُمَ دَ عَيْنِحِنْ حِكِمَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria