عِشَايَ 25 - أَتَّوْرَتْ دَ أَنَّبَاوَا

وَاڧَرْ يَبُواْ غَ يَهْوٜىٰهْ

¹ يَا يَهْوٜىٰهْ، كَيْنٜىٰ اللَّهْ نَا، ذَنْ طَوْكَكَاكَ، إِنْ يَبِے سُونَنْكَ؞ غَمَا كَايِ أَيُّكَنْ بَنْ مَامَاكِ، تُنْ تُنِ كَيِ نُڢِنْسُ ثِكِنْ أَمِنْثِ دَ غَسْكِيَ؞

² غَمَا كَا مَيْدَ بِرْنِ تُلِنْ كُڢَيْ، بِرْنِ مَيْ كَتَنْ‌غَ كُوَ يَذَمَ كُڢَيْ، غِدَنْ سَرْكِے نَبَڧِ يَٻَثٜىٰ، بَذَاعَ سَاكٜىٰ غِنَا شِ بَ كُمَ؞

³ سَبُواْدَ حَكَ جَمَعَرْ أَلْعُمَّيْ مَاسُ إِيكُواْ ذَاسُ غِرْمَمَكَ؞ بِرَنٜىٰنْ أَلْعُمَّيْ مَرَسَ تَوْسَيِ ذَاسُ جِڟُواْرُوانْكَ؞

⁴ غَمَا كَيْ وُرِنْ ٻُيَ نٜىٰ غَ تَلَكَاوَا، كَيْ وُرِنْ ٻُيَ نٜىٰ غَ مَاسُ بُڧَاتَ عَثِكِنْ وَهَلَرْسُ؞ كَيْ نٜىٰ وُرِنْ ٻُيَنْمُ دَغَ ضُوَ مَيْ ڧَنْڧَرَ، إِنُوَرْمُ كُمَ دَغَ ذَاڢِنْ رَانَ؞ غَمَا إِسْكَ مَرَرْ تَوْسَيِ كَمَرْ ضُوَ مَيْ ڧَنْڧَرَ نٜىٰ عَكَنْمُ،

⁵ كَمَرْ ذَاڢِنْ هَمَادَ؞ عَمَّا كَڟَيْ دَ هَيَانِيَرْ بَاڧِ كَمَرْ يَدَّ إِنُوَرْ غِرْغِجٜىٰ تَكَنْ تَرٜىٰ ذَاڢِنْ رَانَ؞ كَڟَيْ دَ وَاڧَرْ نَصَرَا دَغَ بَاكِنْ مَرَسَ تَوْسَيِ؞

يَهْوٜىٰهْ يَشِرْيَ بِكِ

⁶ يَهْوٜىٰهْ مَيْ ضُنْدُنَا ذَيْ شِرْيَ بِكِ؞ عَكَنْ وَنَّنْ بَبَّنْ تُدُ ذَيْ شِرْيَ وَدُكَنْ ڧَبِيلُ بِكٍ عَبِنْثِ مَڢِے ݣَوْ، بِكٍ ضُوً إِنَبِے مَڢِے ݣَوْ؞

⁷ عَكَنْ وَنَّنْ بَبَّنْ تُدُ ذَيْ رُشٜىٰ أَبِنْدَ يَرُڢٜىٰ عِدُوانْ دُكَنْ ڧَبِيلُ، دَ ذَنٜىٰنْدَ يَرُڢٜىٰ دُكَنْ أَلْعُمَّنْ دُونِيَا؞

⁸ عُبَنْ‌غِجِ يَهْوٜىٰهْ ذَيْ هَلَّكَ مُتُوَ حَرْ أَبَدَا!‏ ذَيْ كُمَ شَارٜىٰ هَوَيٜىٰ دَغَ دُكَنْ ڢُسْكُواْكِ؞ يَهْوٜىٰهْ ذَيْ كَوَرْدَ كُنْيَرْ دَ مُتَنٜىٰنْسَ سُكَشَا عَدُونِيَا دُكَ؞ يَهْوٜىٰهْ نٜىٰ يَڢَطَا؞

⁹ عِ، ذَاعَ ثٜىٰ أَ رَانَرْ نَنْ، ‏«‏لَلَّيْ وَنَّنْ اللَّهْ نْمُ نٜىٰ!‏ مُنْ دُواْغَضَ أَغَرٜىٰشِ يَكُوَ ثٜىٰثٜىٰمُ!‏ شِينٜىٰ يَهْوٜىٰهْ وَنْدَ مُكَ سَا رَيْ غَرٜىٰشِ!‏ بَرِ مُيِ مُرْنَ دَ ڢَضٍ ثِكِ عَثِكِنْ ثٜىٰتُوانْدَ يَكَٰوُاْ مَنَ؞»‏

¹⁰ غَمَا حَنُّنْ يَهْوٜىٰهْ ذَيْ ڟَرٜىٰ بَبَّنْ تُدُنَّنْ؞ عَمَّا ذَاعَ تَتَّاكَ مُتَنٜىٰنْ مُواْوَبْ أَوُرِنْسُ، كَمَرْ يَدَّ شَانُو سُكٜىٰ تَاكَ ثِيَوَ أَ لَاكَ؞

¹¹ كُواْ دَ سُنْ مِيڧَ حَنُّوَنْسُ كَمَرْ ذَاسُيِ إِيُواْ سُڢِتَ دَغَ وُرِنْ، دُكْدَهَكَ، اللَّهْ ذَيْ ڧَسْڧَنْتَرْ دَسُو، حَنُّوَنْسُ ذَاسُ كَاسَ كَامَ أَبِنْ تَيْمَكُواْ؞

¹² عِ، مَنْيَنْ غِنٜىٰ غِنٜىٰ نَكَتَنْ‌غَرْ مُواْوَبْ اللَّهْ ذَيْ رُشٜىٰسُ، يَسَوْكَرْ دَسُو حَرْ ڧَسَا سُذَمَ ڧُورَا؞