عِشَايَ 19 - أَتَّوْرَتْ دَ أَنَّبَاوَا

حُكُنْثِ عَكَنْ مَصَرْ

¹ غَا سَڧُواْ غَمٜىٰدَ مَصَرْ؞ غَاشِ، يَهْوٜىٰهْ يَنَ ذُوَا عَكَنْ غِرْغِجٜىٰ مَيْ سَوْرِنْ غُدُ، يَنَ ذُوَا ڧَسَرْ مَصَرْ؞ غُمَكَنْ مَصَرْ سُنَ ڢِرْغِتَ أَغَبَنْسَ، ظُكَاتَنْ مَصَرَاوَا كُمَ سُنَ نَرْكٜىٰوَ؞

² إِنْجِ يَهْوٜىٰهْ، ‏«‏ذَنْ ذُغَ مُتُمِنْ مَصَرْ عَكَنْ وَنِ مُتُمِنْ مَصَرْ، طَنْعُوَ ذَيْ يِڢَطَ دَ طَنْعُوَنْسَ، مَڨُوبْثِ كُمَ دَ مَڨُوبْثِنْسَ، بِرْنِ ذَيْ يِڢَطَ دَ بِرْنِ، مُلْكِ كُمَ ذَيْ يِڢَطَ دَ مُلْكِ؞

³ مَصَرَاوَا ذَاسُ ڢِدَّ ذُوثِيَا، ذَنْ رُشٜىٰ نُڢِنْسُ؞ ذَاسُ نٜىٰمِ تَيْمَكُواْ وُرِنْ غُمَكَ، دَ رُوحُواْحِنْ مَتَتُّو دَ بُواْكَيٜىٰ، دَ مَاسُ حَطَكَيْ دَ رُوحُواْحِنْ مَتَتُّو؞

⁴ ذَنْ بَادَ مَصَرَاوَا أَ حَنُّنْ مُوغُنْ شُوغَبَا، سَرْكِے مَيْ ذَاڢِنْ رَيْ ذَيْ يِمُلْكِنْسُ؞ نِے عُبَنْ‌غِجِ يَهْوٜىٰهْ مَيْ ضُنْدُنَا نَا ڢَطَا؞»‏

⁵ ضُوَ ذَيْ بُوشٜىٰ دَغَ كُواْغِنْ نِلُ، كُواْغِ كُمَ ذَيْ شَنْيٜىٰ يَبُوشٜىٰ؞

⁶ رَاڢُڢُّكَ ذَاسُيِ وَرِ، ڧأَنَانً رَاڢِ كُمَ ذَاسُ شَنْيٜىٰ سُبُوشٜىٰ، ثِيَوَرْ إِوَ دَ دُواْغُوَرْ ثِيَوَ ذَاسُ مُتُ؞

⁷ كُواْوَنٜىٰ ڟِرُواْ عَبَاكِنْ كُواْغِنْ نِلُ ذَيْ بُوشٜىٰ، دُكْ أَبِنْدَ عَكَ شُوكَ عَبَاكِنْ كُواْغِنْ، إِسْكَ ذَاتَهُورَ حَرْ يَبُوشٜىٰ يَٻَثٜىٰ؞

⁸ مَاسُ كَامُنْ كِيڢِ ذَاسُيِ بَڧِنْ ثِكِ، دُكَنْ مَاسُ جٜىٰڢَ ڧُوغِيَ أَ كُواْغِنْ نِلُ ذَاسُيِ مَكُواْكِ؞ عِ، مَاسُ سَا رَاغَرْ كَامُنْ كِيڢِ ذَاسُ دَامُ ڨُورَيْ؞

⁹ مَاسُ سَنَعَرْ سَاڧَرْ رَمَ ذَاسُ دَامُ، مَاسُ سَاڧَ تُڢَاڢِنْ لِيلِنْ ذَاسُ ڢِدَّ ذُوثِيَا؞

¹⁰ مَاسُ سَاڧَ تُڢَاڢِ ذَاسُ ضِكِثِے، دُكَنْ ڠُونَيٜىٰنْ عَيْكِ ذَاسُ دَامُ؞

¹¹ حَڧِيڧَ دَتَّاوَنْ ذُواْوَنْ وَوَيٜىٰ نٜىٰ، مَاسُ حِكِمَ نَ ڢِرْعَوْنَ سُنَ بَادَ شَوَرَرْ وَوَنْثِ؞ تَيَيَا ذَاكُثٜىٰ وَ ڢِرْعَوْنَ، ‏«‏نِے طَيَ نٜىٰ دَغَ ثِكِنْ مَاسُ حِكِمَ، نِے ذُرِيَرْ سَرَاكُنَ نَدَا نٜىٰ؟»‏

¹² تُواْ، إِنَا مَاسُ حِكِمَ نَاكُ سُكٜىٰ؟ بَرِ سُڢَطَا مُكُ يَنْذُ، بَرِ سُسَنَرْ أَبِنْدَ يَهْوٜىٰهْ مَيْ ضُنْدُنَا يَشِرْيَ يَيِ وَڧَسَرْ مَصَرْ؞

¹³ دَتَّاوَنْ ذُواْوَنْ سُنْ ذَمَ وَوَيٜىٰ، دَتَّاوَنْ مٜىٰمْڢِسْ مَاسُ رُوطِنْ كَنْسُ نٜىٰ، شُوغَبَنِّنْ مَصَرْ سُنْ سَا مُتَنٜىٰنْسُ سُنَ تَنْ‌غَطِ؞

¹⁴ يَهْوٜىٰهْ يَهُورَ مُسُ إِسْكَرْ رُوطُ عَثِكِنْسُ؞ وَنَّنْ يَسَا مَصَرْ تَنَ تَنْ‌غَطِ عَثِكِنْ دُكَنْ أَيُّكَنْتَ، كَمَرْ يَدَّ مَيْ بُغُوَ يَكَنْيِ تَنْ‌غَطِ يَيِ أَمَيْ؞

¹⁵ بَابُ مَيْ تَيْمَكُوانْ مَصَرْ يَنْذُ، كُواْ مَيْ أَرْزِڧِ كُواْ مَتَلَوْثِ كُواْ بَبَّ كُواْ ڧَرَمِ؞

مَصَرَاوَا ذَاسُيِ وَ يَهْوٜىٰهْ سُجَّدَ

¹⁶ أَ رَانَرْ نَنْ مَصَرَاوَا ذَاسُ ذَمَ كَمَرْ مَاتَا، ذَاسُيِ ضَوَرْ جِكِے نَجِنْ ڟُواْرُواْ سَبُواْدَ يَهْوٜىٰهْ مَيْ ضُنْدُنَا يَمِيڧَ حَنُّنْسَ دُواْمِنْ يَحُكُنْتَسُ؞

¹⁷ ڧَسَرْ يَهُودَ ذَاتَ ذَمَ أَبِنْ ڟُواْرُواْ غَ مَصَرَاوَا؞ دُكْ وَنْدَ يَجِ سُونَنْ يَهُودَ ذَيْڢِرْغِتَ سَبُواْدَ أَبِنْدَ يَهْوٜىٰهْ يَنُڢَ عَكَنْسُ؞

¹⁸ أَ رَانَرْ نَنْ بِرَنٜىٰ بِيَرْ نَڧَسَرْ مَصَرْ ذَاسُيِ يَرٜىٰنْ كَنْعَنَ سُكُمَ طَوْكِ ضَنْڟُوَا دَ سُونَنْ يَهْوٜىٰهْ مَيْ ضُنْدُنَا؞ طَيَ دَغَ بِرَنٜىٰنَّنْ ذَاعَ كِرَتَ ‏«‏بِرْنِنْ هَلَّكَ»‏؞

¹⁹ أَ رَانَرْ نَنْ ذَاعَ سَامِ بَغَدٜىٰ غَ يَهْوٜىٰهْ أَڟَكِيَرْ ڧَسَرْ مَصَرْ، كُمَ ذَاعَ سَامِ دُوڟٜىٰنْ شَيْدَ غَ يَهْوٜىٰهْ عَ إِيَاكَرْ ڧَسَرْتَ؞

²⁰ وَنَّنْ ذَيْ ذَمَ عَلَمَ دَ كُمَ شَيْدَ تَ يَهْوٜىٰهْ مَيْ ضُنْدُنَا عَڧَسَرْ مَصَرْ؞ غَمَا سَعَدَّ ذَاسُيِ كُوكَا غَ يَهْوٜىٰهْ سَبُواْدَ مَاسُ مُسُ دَنِّيَ، يَهْوٜىٰهْ ذَيْ عَيْكُواْ مُسُ دَ مَيْ ثٜىٰتُواْ مَيْ ڟَرٜىٰسُ وَنْدَ ذَيْ كُٻُتَرْ دَسُو؞

²¹ يَهْوٜىٰهْ ذَيْسَا أَ سَنْشِ أَ مَصَرْ؞ أَ رَانَرْ نَنْ مُتَنٜىٰنْ مَصَرْ ذَاسُ كُمَ سَنْ يَهْوٜىٰهْ، سُكُمَ مِيڧَ مَسَ هَدَايُ دَ بَيٜىٰ بَيٜىٰ؞ ذَاسُيِ ضَنْڟُوَا تَمُسَمَّنْ غَ يَهْوٜىٰهْ سُكُمَ ثِكَ ضَنْڟُوَارْ؞

²² عِ، يَهْوٜىٰهْ ذَيْ بُغِ مَصَرْ، عَمَّا ذَيْ وَرْكَرْدَ عِتَ؞ مَصَرْ ذَاتَ كُواْمَ غَ يَهْوٜىٰهْ، ذَيْ كُوَ جِ أَدُّعُواْعِنْتَ يَوَرْكَرْدَ عِتَ؞

²³ أَ رَانَرْ نَنْ ذَاعَيِ وَتَ حَنْيَ مَيْݣَوْ دَغَ مَصَرْ ذُوَا أَسُّرِيَ؞ تَهَكَ مُتُمِنْ أَسُّرِيَ ذَيْ عِيَ ذُوَا مَصَرْ، مُتُمِنْ مَصَرْ شِے مَا ذَيْ عِيَ ذُوَا أَسُّرِيَ، كُمَ مَصَرَاوَا دَ أَسُّرِيَاوَا ذَاسُيِ سُجَّدَ تَرٜىٰ؞

²⁴ أَ رَانَرْ نَنْ إِسْرَٰٓءِيلَ ذَاتَ ذَمَ تَ عُكُ تَرٜىٰدَ مَصَرْ دَ أَسُّرِيَ، سُذَمَ حَنْيَرْ أَلْبَرْكَ غَ دُكَنْ دُونِيَا؞

²⁵ يَهْوٜىٰهْ مَيْ ضُنْدُنَا ذَيْسَا مُسُ أَلْبَرْكَ يَنَ ثٜىٰوَ ‏«‏أَلْبَرْكَ تَا تَبَّتَا عَكَنْ مَصَرْ مُتَنٜىٰنَ دَ أَسُّرِيَ عَيْكِنْ حَنُّوَنَ دَ إِسْرَٰٓءِيلَ جَمَعَتَ تَغَادُواْ؞»‏