عِشَايَ 15 - أَتَّوْرَتْ دَ أَنَّبَاوَا

حُكُنْثِ عَكَنْ مُواْوَبْ

¹ غَا سَڧُواْ غَمٜىٰدَ مُواْوَبْ؞ أَ دَرٜىٰ طَيَ أَنْهَلَّكَ غَرِنْ أَرْ، سَيْ ڧَسَرْ مُواْوَبْ تَيِ ڟِتْ، أَدَرٜىٰ طَيَ أَنْهَلَّكَ غَرِنْ كِرْ، سَيْ ڧَسَرْ مُواْوَبْ تَيِ ڟِتْ؞

² مُتَنٜىٰنْ غَرِنْ دِبُوانْ سُنْ هَوْ كَنْ تُدَّيْ، ذَاسُيِ كُوكَا أَوُرَارٜىٰنْ سُجَّدَ؞ مُتَنٜىٰنْ مُواْوَبْ سُنَ كُوكَا دَ بَڧِنْ ثِكِ سَبُواْدَ أَنْرُشٜىٰ ڧَوْيُكَنْ نٜىٰبُواْ دَ مٜىٰدٜىٰبَ؞ دُواْمِنْ أَ نُونَ بَڧِنْ ثِكِ، كُواْوَ يَ أَسْكٜىٰ كَنْسَ دَ غٜىٰمُنْسَ؞

³ عَتِيتُنَ، سُنَ سَنْيٜىٰ دَ رِيغُنَنْ نُونَ بَڧِنْ ثِكِ، أَ رُڢِنْ غِدَاجٜىٰنْسُ دَ أَ ڢِيلَيٜىٰ نَثِكِنْ غَرِ، كُواْوَ دَ كُواْوَ يَنَ كُوكَا يَنَ هَوَيٜىٰ؞

⁴ مُتَنٜىٰنْ هٜىٰشْبُوانْ دَ نَ عٜىٰلٜىٰيَلٜىٰ سُنَ كُوكَا، حَرْ أَنَ عِيَ جِنْ مُرْيَرْسُ ثَنْ أَ يَهَظَ؞ حَرْ مَا سُواْجُواْجِنْ مُواْوَبْ سُنَ إِيهُ سَبُواْدَ سُنْ ڢِدَّ ذُوثِيَا؞

ثِكِنْ شِرِنْ حُكُنْثِ، يَهْوٜىٰهْ يَجِ تَوْسَيِ

⁵ ذُوثِيَاتَ تَنَ كُوكَا سَبُواْدَ ڧَسَرْ مُواْوَبْ، مُتَنٜىٰنْتَ سُنْ غُدُ ذُوَا ذُواْوَرْ دَ عٜىٰغْلَتْ شٜىٰلِشِيَ؞ غَمَا ثِكِنْ هَوْرَاوَا أَ حَنْيَرْ لُهِتْ، سُنَ تَڢِيَ سُنَ كُوكَا؞ عَكَنْ حَنْيَرْ حُواْرُواْنَيِمْ سُنَ تَادَ كُوكَنْ نُونَ بَڧِنْ ثِكِ؞

⁶ رَاڢِنْ نِمْرِمْ يَبُوشٜىٰ، ثِيَوَرْ بَاكِنْ رَاڢِنْ تَيَنْڨُونٜىٰ، بَابُ غَنْيٜىٰنْدَ يَرَغُ؞

⁷ سَبُواْدَ حَكَ مُتَنٜىٰنْ سُنَ غُدُ سُنَ ڧٜىٰتَرٜىٰوَ تَݣُورِنْ عِتَتُوَنْ بَاكِنْ رَاڢِ، سُنَ غُدُ دَ أَرْزِڧِنْسُ، سُنَ طَوْكٜىٰ دَ كَايَنْ دَ سُكَ تَارَ؞

⁸ غَمَا عَكُواْعِنَ عَڧَسَرْ مُواْوَبْ أَنَ جِنْ مُرْيَرْ كُوكَنْسُ، كُوكَنْ يَكَيْ ثَنْ غَرِنْ عٜىٰغْلَيِمْ، حَرْ مَا يَكَيْ ثَنْ غَرِنْ بٜىٰيٜىٰرْ عٜىٰلِمْ؞

⁹ غَمَا ضُوً رَاڢِ أَغَرِنْ دِبُوانْ يَيِ جَاوُرْ دَ جِنِنْ مُتَنٜىٰنْ دَ عَكَ كَشٜىٰ؞ دُكْدَهَكَ ذَنْ ڧَارَ مُسُ، ذَنْ عَيْكَ دَ ذَاكِ غَ مُتَنٜىٰنْ مُواْوَبْ دَ سُكَ ڟِيرَا، غَ ضَغُواْوَرْ مُتَنٜىٰنْ ڧَسَرْ؞