يُوشَعُ 14 - أَتَّوْرَتْ دَ أَنَّبَاوَا

ضُواْڧُوانْ يُوشَعُ غَ إِسْرَٰٓءِيلَ

¹ يَا إِسْرَٰٓءِيلَ، كُجُويُواْ غَ يَهْوٜىٰهْ اللَّهْ نْكُ، غَمَا لَيْڢُواْڢِنْكُ سُنْ سَا كُنَ يِنْ تُنْتُٻٜىٰ؞

² كُكُواْمَ وُرِنْ يَهْوٜىٰهْ دَ مَغَنَ كُثٜىٰ مَسَ ‏«‏كَغَاڢَرْتَا مَنَ لَيْڢُواْڢِنْمُ، كَكَرْٻٜىٰمُ سَبُواْدَ أَلْحٜىٰرِنْكَ، مُو كُوَ ذَامُ يَبٜىٰكَ دَ بَاكِنْمُ، أَمَيْمَكُوانْ هَدَايَرْ بِجِمَيْ؞

³ أَسُّرِيَ بَذَاتَ عِيَ ثٜىٰتُوانْمُبَ، بَذَامُ دُواْغَضَ عَكَنْ دَوَكِنْ يَاڧِبَ، كُواْ كُوَ مُثٜىٰوَ عَيْكِنْ حَنُّوَنْمُ، ‏‹‏كُونٜىٰ أَلُّواْلِنْمُ؞›‏ غَمَا أَوُرِنْكَ نٜىٰ مَرَرْ إِيَايٜىٰ يَكَنْ سَامِ جِنْڧَيْ؞»‏

تَبَّثِنْ سَامُنْ غَاڢَرَرْ ذُنُبَيْ

⁴ إِنْجِ يَهْوٜىٰهْ، ‏«‏جُويَا بَايَنْدَ سُكٜىٰيِ مِنِ، ذَنْ غَاڢَرْتَا مُسُ؞ ذَنْ ڧَوْنَثٜىٰسُ دَ ذُوثِيَاتَ أَ سَكٜىٰ، غَمَا ڢُشِنَ عَكَنْسُ يَݣُونْتَ؞

⁵ ذَنْ ذَمَ كَمَرْ رَٻَ غَ إِسْرَٰٓءِيلَ؞ ذَاسُ يَلْوَتَ كَمَرْ ڢُلَوَرْ دَاجِ، ذَاسُ مِيڧٜىٰ سَيْوُاْيِنْسُ كَمَرْ مَنْيَنْ عِتَتُوَنْ سٜىٰدَ نَ لٜىٰبَنُوانْ؞

⁶ رَسَّنْسُ ذَاسُ يَطُ، ݣَنْسُ ذَيْ ذَمَ كَمَرْ نَ عِتَتُوَنْ ظَيْتُنْ، ذَاسُيِ ڧَنْشِ كَمَرْ عِتَتُوَنْ سٜىٰدَ نَ لٜىٰبَنُوانْ؞

⁷ وَطَنْدَ سُكَذُواْ سُذَوْنَ عَڧَرْڧَشِنْ إِنُوَرْسُ، ذَاسُيِ نُواْمَنْ حَڟِ دَيَوَ، سُيِ یَیَ كَمَرْ إِتَاثٜىٰنْ إِنَبِے؞ ڧَنْشِنْسُ ذَيْسَامِ سُنَ كَمَرْ ضُوً إِنَبِے نَ لٜىٰبَنُوانْ؞

⁸ ‏«‏مُتَنٜىٰنْ إِسْرَٰٓءِيلَ عَ أَرٜىٰوَ ذَاسُثٜىٰ، ‏‹‏إِنَا ضُوَنْمُ دَ غُمَكَ؟›‏ غَمَا نِے اللَّهْ نْسُ نٜىٰ، نِنٜىٰ ذَنْ سَوْرَرٜىٰسُ إِنْيِمُسُ أَلْبَرْكَ؞ كَمَرْ إِتَاثٜىٰ مَيْ يَوَنْ غَنْيٜىٰ كُواْرٜىٰ شَرْ، حَكَ نِے يَهْوٜىٰهْ ذَنْسَا سُيَلْوَتَ، نِنٜىٰ تُوشٜىٰنْ أَلْبَرْكَرْسُ؞»‏

ڧَرْشٜىٰنْ مَغَنَ

⁹ وَنٜىٰنٜىٰ مَيْ حِكِمَ؟ تُواْ، بَرِ يَڢَهِمْثِ أَبُبُوَنَّنْ؞ وَنٜىٰنٜىٰ مَيْ غَانٜىٰوَ؟ بَرِ يَسَنْدَسُو؞ غَمَا هَنْيُواْيِنْ يَهْوٜىٰهْ دَيْدَيْنٜىٰ، مَاسُ غَسْكِيَ أَ ظُوثِ سُكَنْيِ تَڢِيَ عَكَنْسُ لَاڢِيَ، عَمَّا مَاسُ ذُنُوبِنْ غَنْ‌غَنْثِ سُكَنْيِ تُنْتُٻٜىٰ عَكَنْسُ؞