إِبْرَانِيَاوَا 7 - أَتَّوْرَتْ دَ أَنَّبَاوَا

ڟَارِنْ ڢِرِسْتِ إِرِنَّ مَلْكِصَدِڧْ

¹ وَنَّنْ مَلْكِصَدِڧْ شِے سَرْكِنْ سَلٜىٰمْ نٜىٰ دَ كُمَ ڢِرِسْتِ نَ اللَّهْ مَڢِے طَوْكَكَ؞ يَسَدُ دَ إِبْرَٰهِيمْ أَ لُواْكَثِنْ دَ إِبْرَٰهِيمْ يَكٜىٰ دَاوُاْوَ بَايَنْدَ يَثِ نَصَرَا عَيَاڧِنْ دَ يَيِ دَ وَطَنْسُ سَرَاكُنَ؞ دَ سُكَ سَدُ، مَلْكِصَدِڧْ يَسَاوَ إِبْرَٰهِيمْ أَلْبَرْكَ،

² إِبْرَٰهِيمْ كُوَ يَبَاشِ زَكَّ تَكُواْمٜىٰ؞ دَ ڢَرْكُواْ دَيْ، مَعَنَرْ سُونَنْ مَلْكِصَدِڧْ عِتَثٜىٰ ‏«‏سَرْكِنْ أَدَلْثِے؞»‏ سَعَنً كُمَ شِے سَرْكِنْ سَلٜىٰمْ نٜىٰ، وَتُواْ ‏«‏سَرْكِنْ سَلَمَ؞»‏

³ مَلْكِصَدِڧْ كُوَ بَاشِ دَ بَابَ كُواْ مَامَا كُواْ أَصَلِ؞ بَاشِ دَ ڢَرْكُوانْ ݣُونَكِے كُواْ ڧَرْشٜىٰنْ رَيْ؞ عَمَّا كَمَرْ طَنْ اللَّهْ، شِ ڢِرِسْتِنٜىٰ حَرْ أَبَدَا؞

⁴ كُدُوبِے إِرِنْ غِرْمَنْ مُتُمِنَّنْ؞ حَرْ إِبْرَٰهِيمْ كَكَنْ كَاكَنِّنْمُ يَبَاشِ زَكَّ تَكَايَنْ دَشِ إِبْرَٰهِيمْ يَڨُوثٜىٰ عَيَاڧِ؞

⁵ بِسَغَ كُواْيَرْوَرْ مُوسَٰى، دُكَنْ ذُرِيَرْ لَوِ وَطَنْدَ سُو ڢِرِسْتِنٜىٰ سُكَنْ كَرْٻِ زَكَّ دَغَ حَنُّنْ جَمَعَ، وَتُواْ دَغَ حَنُّنْ یَنْعُوَنْسُ، كُواْدَيَكٜىٰ سُو مَا ذُرِيَرْ إِبْرَٰهِيمْ نٜىٰ؞

⁶ عَمَّا مَلْكِصَدِڧْ، وَنْدَ أَصَلِنْسَ بَا طَيَ بَنٜىٰ دَ ذُرِيَرْ لَوِ، يَكَرْٻِ زَكَّ أَ حَنُّنْ إِبْرَٰهِيمْ، يَكُمَ أَلْبَرْكَثِ إِبْرَٰهِيمْ وَنْدَ شِينٜىٰ عَكَيِ مَسَ أَلْكَوَرَنْ؞

⁷ بَاشَكَّ وَنْدَ يَكٜىٰسَا أَلْبَرْكَ يَڢِ وَنْدَ يَكٜىٰ كَرْٻَرْ أَلْبَرْكَ غِرْمَ؞

⁸ غَاشِمَا ڢِرِسْتُواْثِے نَظُرِيَرْ لَوِ، كُواْدَيَكٜىٰ سُو مَاسُ مُتُوَانٜىٰ، سُكَنْ كَرْٻِ زَكَّ دَغَ حَنُّنْ مُتَنٜىٰ؞ عَمَّا غَمٜىٰدَ مَلْكِصَدِڧْ، وَنْدَ يَكَرْٻِ زَكَّ دَغَ حَنُّنْ إِبْرَٰهِيمْ، أَنْبَادَ شَيْدَ ثٜىٰوَ شِے رَايَيّٜىٰنٜىٰ؞

⁹ حَرْ مَا أَنَ عِيَ ثٜىٰوَ لَوِ دَكَنْسَ، وَنْدَ ذُرِيَرْسَثٜىٰ مَيْ كَرْٻَرْ زَكَّ، يَبَادَ تَاسَ زَكَّ تَهَنُّنْ إِبْرَٰهِيمْ؞

¹⁰ أَنَ عِيَ ڢَطِ حَكَ دُواْمِنْ أَ لُواْكَثِنْ دَ إِبْرَٰهِيمْ يَسَدُ دَ مَلْكِصَدِڧْ بَ أَرِغَا أَنْحَيْڢِ لَوِ بَ تُكُنَ، عَمَّا يَنَ ثِكِنْ جِكِنْ كَكَنْسَ؞

عِيسَىٰ ڢِرِسْتِنٜىٰ بِسَغَ ڟَارِنْ مَلْكِصَدِڧْ

¹¹ غَاشِ، ڟَارِنْ ڢِرِسْتُواْثِے إِرِنْ نَظُرِيَرْ لَوِ يَذُواْ تَرٜىٰدَ كُواْيَرْوَرْ مُوسَٰى وَدَّ عَكَبَا إِسْرَٰٓءِيلَاوَا؞ دَا عَثٜىٰ عَيْكِنْ ڢِرِسْتُواْثِے نَظُرِيَرْ لَوِ يَنَ عِيَ كَٰوُاْ ذَمَ ثِكَكّٜىٰ، أَيْ دَا بَادَلِيلِنْ دَ وَنِ ڢِرِسْتِ دَبَمْ يَسَاكٜىٰ ذُوَا، وَنْدَ يَكٜىٰ بِسَغَ ڟَارِنْ مَلْكِصَدِڧْ، بَبِسَغَ ڟَارِنْ هَٰرُونَ بَ؞

¹² غَمَا عِدَنْ أَنْثَنْجَ ڟَارِنْ ڢِرِسْتُواْثِے، دُواْلٜىٰنٜىٰ عَثَنْجَ كُواْيَرْوَرْ مَا؞

¹³ شِے وَنْدَ عَكَ ڢَطِ وَطَنَّنْ أَبُبُوَنْ عَكَنْسَ، وَتُواْ عُبَنْ‌غِجِنْمُ، يَا ڢِتُواْ دَغَ وَتَ ذُرِيَ نٜىٰ دَبَمْ؞ بَا كُواْ طَيَ دَغَ ذُرِيَرْسَ دَ يَتَٻَ يِنْ حِدِمَ أَمَڟَيِنْ ڢِرِسْتِ؞

¹⁴ لَلَّيْ عُبَنْ‌غِجِنْمُ يَا ڢِتُواْ دَغَ ذُرِيَرْ يَهُودَ نٜىٰ، وَدَّ مُوسَٰى بَيْيِ وَنِ ذَنْثٜىٰ عَكَنْتَبَ لُواْكَثِنْ دَيَكٜىٰ مَغَنَ غَمٜىٰدَ ڢِرِسْتُواْثِے؞

¹⁵ وَنَّنْ مَغَنَ تَا ڧَارَ ڢِتُواْوَ أَ ڢِيلِ سُواْسَيْ، سَعَدَّ وَنِ ڢِرِسْتِ دَبَمْ يَبَيَّنَ، وَنْدَ يَكٜىٰ كَمَرْ مَلْكِصَدِڧْ؞

¹⁶ وَنَّنْ كُوَ يَا ذَمَ ڢِرِسْتِ بَا بِسَغَ وَتَ دُواْكَا كُواْ ڧَٰعِدَ غَمٜىٰدَ ذُرِيَرْ یَنْ أَدَمْ بَ، عَمَّا بِسَغَ إِيكُوانْ رَيْ مَرَرْ ڧَارٜىٰوَ؞

¹⁷ غَمَا أَنْيِ شَيْدَ غَمٜىٰدَشِ ثٜىٰوَ ‏«‏كَيْ ڢِرِسْتِنٜىٰ نَهَرْ أَبَدَا، بِسَغَ ڟَارِنْ مَلْكِصَدِڧْ؞»‏

¹⁸ أَنْ كَوَرْدَ كُواْيَرْوَرْ تَدَا أَغٜىٰڢٜىٰ كٜىٰنَنْ سَبُواْدَ رَشِنْ إِيكُوانْتَ دَ رَشِنْ أَمْڢَانِنْتَ؞

¹⁹ كُواْيَرْوَرْ مُوسَٰى بَتَ إِسَ تَسَا وَنِ أَبُ يَذَمَ ثِكَكّٜىٰبَ؞ عَمَّا يَنْذُ عَكَ شِرْيَ وَتَ سَا ذُوثِيَا مَڢِے ݣَوْ وَنْدَ تَوُرِنْسَ مُكٜىٰ مَڟُواْوَ كُسَدَ اللَّهْ؞

²⁰ اللَّهْ يَا تَبَّتَرْ دَ وَنَّنْ شِرِ تَرٜىٰدَ ضَنْڟُوَا؞ سَوْرَنْ ڢِرِسْتُواْثِنْ سُكَنْ شِغَ عَيْكِنْسُ بَاتَرٜىٰدَ ضَنْڟُوَابَ؞

²¹ عَمَّا وَنَّنْ يَذَمَ ڢِرِسْتِنٜىٰ تَرٜىٰدَ ضَنْڟُوَارْ دَ اللَّهْ يَيِ ثٜىٰوَ ‏«‏عُبَنْ‌غِجِ يَارِغَا يَا ضَنْڟٜىٰ، بَذَيْ كُمَ ثَنْجَ نُڢِنْسَبَ، ‏‹‏كَيْ ڢِرِسْتِنٜىٰ نَهَرْ أَبَدَا؞›‏ »‏

²² بِسَغَ وَنَّنْ ضَنْڟُوَا نٜىٰ كُمَ عِيسَىٰ يَذَمَ مَيْ تَبَّتَرْ دَ يَرْجٜىٰجٜىٰنِيَ مَڢِے ݣَوْ؞

²³ ڢِرِسْتُواْثِے إِرِنْ نَدَا سُنْيِيَوَ دُواْمِنْ مُتُوَ تَكَنْ هَنَاسُ ثِيغَبَدَ عَيْكِنْسُ؞

²⁴ عَمَّا عِيسَىٰ يَنَ رِڧٜىٰ دَ مَڟَيِنْ ڢِرِسْتِ نَهَرْ أَبَدَا، دُواْمِنْ شِے دَكَنْسَ يأَنَانً حَرْ أَبَدَا؞

²⁵ سَبُواْدَ حَكَ يَنَدَ إِيكُواْ، يَوْ دَ كُلُّمْ، يَثٜىٰثِ دُكْ وَطَنْدَ سُكٜىٰ مَڟُواْوَ كُسَدَ اللَّهْ تَوُرِنْسَ، تُنْدَيَكٜىٰ كُلُّمْ أَ رَايٜىٰ يَكٜىٰ، دُواْمِنْ يَيِ ضُواْڧُواْ غَ اللَّهْ أَمَدَدِنْسُ؞

²⁶ إِرِنْ وَنَّنْ بَبَّنْ ڢِرِسْتِنٜىٰ مُكٜىٰ بُڧَاتَ؞ شِے كُوَ مَيْ ڟَرْكِے نٜىٰ، مَرَرْ لَيْڢِے، مَرَرْ تَبُواْ، أَنْوَارٜىٰشِ دَغَ مَاسُ ذُنُوبِ، أَنْكُمَ طَوْكَكَاشِ غَبَ دَ سَمَّيْ؞

²⁷ شِے بَا كَمَرْ وَطَنْثَنْ مَنْيَنْ ڢِرِسْتُواْثِے بَنٜىٰ؞ بَايَ بُڧَاتَ يَدِنْ‌غَ مِيڧَاوَ هَدَايَ كُلُّمْ، وَتُواْ يَڢَارَ مِيڧَاوَ سَبُواْدَ نَاسَ ذُنُبَيْ كَاڢِنْ يَمِيڧَ سَبُواْدَ ذُنُبَنْ جَمَعَ؞ شِ كَمْ يَا مِيڧَ تَاسَ هَدَايَ سَوْ طَيَ تَكْ، أَ لُواْكَثِنْدَ يَمِيڧَ كَنْسَ؞

²⁸ غَمَا بِسَغَ كُواْيَرْوَرْ مُوسَٰى عَكَنْ ذَاٻِ بَبَّنْ ڢِرِسْتِ ثِكِنْ كَاسَوَرْسَ دَغَ ثِكِنْ مُتَنٜىٰ؞ عَمَّا أَلْڧَوَرِنَّنْ دَ اللَّهْ يَيِ تَرٜىٰدَ ضَنْڟُوَا، يَ إِسُواْ نٜىٰ بَايَنْدَ أَنْبَادَ كُواْيَرْوَرْ مُوسَٰى؞ بِسَغَ أَلْڧَوَرِنَّنْ نٜىٰ عَكَ نَطَ طَنْ وَنْدَ أَنْمَيْدَشِ ثِكَكّٜىٰ حَرْ أَبَدَا؞