إِبْرَانِيَاوَا 5 - أَتَّوْرَتْ دَ أَنَّبَاوَا

¹ عَكَنْ ذَاٻِ كُواْوَنٜىٰ بَبَّنْ ڢِرِسْتِ دَغَ ثِكِنْ مُتَنٜىٰنٜىٰ دُواْمِنْ يَيِ حِدِمَ أَمَدَدِنْ سَوْرَنْ مُتَنٜىٰ عَكَنْ أَلْعَمُرَنْ اللَّهْ؞ شِينٜىٰ مَيْ مِيڧَ بَيٜىٰ بَيٜىٰ دَ هَدَايُ سَبُواْدَ ذُنُبَيْ؞

² تُنْدَيَكٜىٰ شِ دَ كَنْسَ يَنَدَ نَاسَ كَاسَوَ، يَنَ عِيَ يَبِے دَ مَرَسَ سَنِ دَ مَاسُ كَوْثٜىٰ حَنْيَ أَ حَنْكَلِ؞

³ سَبُواْدَ كَاسَوَرْ نَنْ تَاسَ، يَذَمَ تِلَسْ يَمِيڧَ هَدَايُ، بَا سَبُواْدَ ذُنُبَنْ جَمَعَ كَطَيْبَ، عَمَّا سَبُواْدَ نَاسَ ذُنُبَنْ مَا؞

⁴ بَاوَنْدَ ذَيْ ذَاٻَا وَكَنْسَ عَيْكِنَّنْ مَيْ دَرَجَ؞ مُتُمْ يَكَنْ ذَمَ بَبَّنْ ڢِرِسْتِنٜىٰ بِسَغَ كِرَنْ اللَّهْ، كَمَرْ يَدَّ عَكَ كِرَا هَٰرُونَ؞

⁵ حَكَكُمَ أَلْمَسِيحُ بَيْ طَوْكَكَ كَنْسَ يَذَمَ بَبَّنْ ڢِرِسْتِبَ؞ أَ مَيْمَكُوانْ حَكَ، اللَّهْ يَثٜىٰ مَسَ، ‏«‏كَيْ طَانَ نٜىٰ، يَوْ نَا ذَمَ عُبَنْكَ؞»‏

⁶ يَسَاكٜىٰيِنْ مَغَنَ أَوَنِ وُرِے يَثٜىٰ، ‏«‏كَيْ ڢِرِسْتِنٜىٰ نَهَرْ أَبَدَا، بِسَغَ ڟَارِنْ مَلْكِصَدِڧْ؞»‏

⁷ أَ لُواْكَثِنْ دَ عِيسَىٰ يَكٜىٰ ثِكِنْ دُونِيَا، يَمِيڧَ أَدُّعُواْعِ دَ ضُواْڧٜىٰ ضُواْڧٜىٰ تَرٜىٰدَ كُوكَ مَيْ ڟَنَنِ دَ هَوَيٜىٰ؞ يَكُوَ مِيڧَ أَدُّعُواْعِنْسَ غَ اللَّهْ وَنْدَ يَنَ عِيَ ثٜىٰتُوانْسَ دَغَ مُتُوَ؞ دُواْمِنْ شِے مَيْ بِيَيَّ نٜىٰ ثِكِنْ ڟُواْرُوانْ اللَّهْ، اللَّهْ يَكَرْٻِ ضُواْڧُوانْسَ؞

⁸ كُواْدَيَكٜىٰ عِيسَىٰ طَنْ اللَّهْ نٜىٰ، يَكُواْيِ يِنْ بِيَيَّ تَهَنْيَرْ عَذَابَرْدَ يَشَا؞

⁹ بَايَنْدَ يَكَيْ غَ ذَمَ ثِكَكّٜىٰ، سَيْ يَذَمَ تُوشٜىٰنْ ثٜىٰتُواْ نَهَرْ أَبَدَا غَ دُكْ مَاسُ يِمَسَ بِيَيَّ؞

¹⁰ تَهَكَ كُمَ اللَّهْ يَنَطَشِ بَبَّنْ ڢِرِسْتِ بِسَغَ ڟَارِنْ مَلْكِصَدِڧْ؞

غَرْغَطِ عَكَنْ جُويَا بَايَ

¹¹ مُنَدَ أَبُبُوَ دَيَوَ دَمُكٜىٰسُواْ مُڢَطَا غَمٜىٰدَ وَنَّنْ ذَنْثٜىٰ، عَمَّا يَنَدَ وُيَ مُبَيَّنَ مُكُ، غَمَا بَاكُ دَ سَوْرِنْ غَانٜىٰوَ؞

¹² كُواْدَيَكٜىٰ عَيَنْظُ كَمْ يَا كَمَاتَ دَ كُنْ ذَمَ مَاسُ كُواْيَرْوَا، عَمَّا حَرْ يَنْذُ كُنَ بُڧَاتَرْ وَنِ يَسَاكٜىٰ مَيْمَيْتَ مُكُ كُواْيَرْوَا مَيْ سَوْڧِ تَكَلْمَرْ اللَّهْ؞ بَكُ إِسَ ثِنْ عَبِنْثِ مَيْ كَوْرِ بَ، سَيْشَنْ نُواْنُواْ كَوَيْ!‏

¹³ دُكْ وَنْدَ نُواْنُواْ نٜىٰ عَبِنْثِنْسَ، شِ جَرِرِ نٜىٰ، بَيْ كُوَ سَنْ كُواْمٜىٰ غَمٜىٰدَ كُواْيَرْوَا تَ أَدَلْثِبَ؞

¹⁴ عَمَّا عَبِنْثِ مَيْ كَوْرِ شِينٜىٰ نَوَطَنْدَ سُكَيِ غِرْمَ؞ وَطَنَّنْ سُونٜىٰ مَاسُ ڧُواْڧَرِنْ يِنْ أَمْڢَانِ دَ حَنْكَلِنْسُ كُلُّمْ، حَرْ مَا سُنَ عِيَ بَمْبَنْتَ نَغَرْتَادَ مُغُنْتَا؞