إِبْرَانِيَاوَا 3 - أَتَّوْرَتْ دَ أَنَّبَاوَا

يَدَّ عِيسَىٰ يَڢِ مُوسَٰى

¹ سَبُواْدَ حَكَ، یَنْعُوَنَ ڟَرْكَكَا، كُو دَ كُكَ سَامِ كِرَنَّنْ نَسَمَ كُو مَا، كُيِ تُنَانِ عَكَنْ عِيسَىٰ وَنْدَ شِينٜىٰ مَنْذُواْ دَ بَبَّنْ ڢِرِسْتِ نَبَنْ‌غَسْكِيَرْ دَمُكٜىٰ شَيْدَاوَا؞

² عِيسَىٰ يَيِ أَمِنْثِ غَ وَنْدَ يَذَاٻٜىٰ شِ، كَمَرْ يَدَّ مُوسَٰى يَيِ أَمِنْثِ أَ عَيْكِنْسَ عَثِكِنْ جَمَعَرْ اللَّهْ؞

³ مُتُمِنْدَ يَغِنَ غِدَا يَاڢِ غِدَنْ دَرَجَ؞ حَكَكُمَ عِيسَىٰ يَ إِسَ أَطَوْكَكَ شِ ڢِيٜىٰدَ مُوسَٰى؞

⁴ غَمَا كُواْوَنٜىٰ غِدَا يَنَدَ وَنْدَ يَغِنَ شِ، عَمَّا اللَّهْ نٜىٰ يَغِنَ كُواْمٜىٰ؞

⁵ مُوسَٰى يَيِ أَمِنْثِ أَ عَيْكِنْسَ نَبَاوَ عَثِكِنْ جَمَعَرْ اللَّهْ، يَكُمَيِ شَيْدَ غَمٜىٰدَ أَبُبُوَنْ دَ ذَاعَ ڢَطَا نَنْ غَبَ؞

⁶ عَمَّا أَلْمَسِيحُ يَيِ أَمِنْثِ عَكَنْ شِ طَا نٜىٰ وَنْدَ أَنْبَا شِ إِيكُواْ عَكَنْ دُكَنْ جَمَعَرْ اللَّهْ؞ مُونٜىٰ كُمَ جَمَعَرْ نَنْ تَاسَ عِدَنْ مُنْثِيغَبَدَ ڧَرْڢِنْ ذُوثِيَارْمُ، مُنَ كُمَسَا ذُوثِيَا غَ أَبُبُوَنْ دَمُكٜىٰ بٜىٰغٜىٰ عَكَنْسُ؞

غَرْغَطِ عَكَنْ رَشِنْ بَنْ‌غَسْكِيَ

⁷ سَبُواْدَ حَكَ، كَمَرْ يَدَّ رُوحُ مَيْ ڟَرْكِے يَثٜىٰ، ‏«‏يَوْ عِدَنْ كُنْجِ مُرْيَرْ اللَّهْ،

⁸ كَدَ كُيِ تَوْرِنْ ذُوثِيَا كَمَرْ يَدَّ كُكَيِ أَ لُواْكَثِنْ تَاوَيٜىٰنَّنْ، كَمَرْ رَانَرْ دَ عَكَ ڠُودَانِ أَدَاجِ؞

⁹ عَثَنْ نٜىٰ كَاكَنِّنْكُ سُكَ ڠُودَانِ، سُكَغَ أَيُّكَنَ حَرْ شٜىٰكَرَا أَرْبَعِنْ؞

¹⁰ شِيَسَا نَيِ ڢُشِے دَ وَنْثَنْ ڟَارَا، سَيْ نَثٜىٰ، ‏‹‏كُلُّمْ سُنَ ڧِينَ أَ ذُوثِيَارْسُ، بَسُ كُوَ سَنْ هَنْيُواْيِنَابَ؞›‏

¹¹ سَيْ نَيِڢُشِے نَيِ ضَنْڟُوَا ثٜىٰوَ ‏‹‏بَذَاسُ شِغَ هُوتُنَ بَسَمْ؞›‏ »‏

¹² یَنْعُوَنَ، كُتَبَّتَرْ ثٜىٰوَ بَا وَنِ عَثِكِنْكُ وَنْدَ ذُنُوبِ دَ رَشِنْ بَنْ‌غَسْكِيَ أَ ذُوثِيَارْسَ سُنْ سَاشِ يَجُويَ بَايَ غَ اللَّهْ مَيْ رَيْ؞

¹³ عَمَّا كُدِنْ‌غَ ڧَرْڢَڢَ جُونَ كُواْوَثٜىٰ رَانَ؞ كُيِ أَمْڢَانِ دَ كُواْوَنٜىٰ ظَرَڢِ وَنْدَ عَكٜىٰثٜىٰ دَشِ ‏«‏يَوْ»‏، دُواْمِنْ كَدَ كُواْ طَيَنْكُ يَذَمَ مَيْ تَوْرِنْ ذُوثِيَا تَوُرِنْ رُوطُ نَذُنُوبِ؞

¹⁴ مُو مَاسُ تَرَيَّ دَ أَلْمَسِيحُ نٜىٰ عِدَنْ مُنْ ڟَيَ دَ ڧَرْڢِے عَكَنْ أَمِنْثٜىٰوَرْمُ تَڢَارِ حَرْ ذُوَا ڧَرْشٜىٰ؞

¹⁵ كَمَرْ يَدَّ عَكَثٜىٰ، ‏«‏يَوْ عِدَنْ كُنْجِ مُرْيَرْ اللَّهْ، كَدَ كُيِ تَوْرِنْ ذُوثِيَا كَمَرْ يَدَّ كُكَيِ أَ لُواْكَثِنْ تَاوَيٜىٰنَّنْ؞»‏

¹⁶ سُوَنٜىٰنٜىٰ وَطَنْدَ سُكَجِ مُرْيَرْ اللَّهْ، دُكْدَهَكَ، سُكَيِ مَسَ تَاوَيٜىٰ؟ أَيْ، سُونٜىٰ دُكَنْ مُتَنٜىٰنْ دَ مُوسَٰى يَبِے دَسُو دَغَ ڧَسَرْ مَصَرْ؞

¹⁷ سُوَنٜىٰنٜىٰ وَطَنْدَ اللَّهْ يَيِ ڢُشِے دَسُو حَرْ شٜىٰكَرَا أَرْبَعِنْ؟ أَيْ، سُونٜىٰ وَطَنْدَ سُكَيِ ذُنُوبِ، سُكَ ڢَاطِ سُكَ مُتُ أَدَاجِ؞

¹⁸ سُوَنٜىٰنٜىٰ وَطَنْدَ اللَّهْ يَيِ ضَنْڟُوَا عَكَنْسُ ثٜىٰوَ بَذَاسُ شِغَ هُوتُنْسَ بَسَمْ؟ أَيْ، سُونٜىٰ وَطَنْدَ سُكَڧِيِّنْ بِيَيَّ؞

¹⁹ سَبُواْدَ حَكَ مُنْ‌غَ ثٜىٰوَ رَشِنْ بَنْ‌غَسْكِيَ نٜىٰ يَسَا بَسُ عِيَ شِغَ هُوتُنَّنْبَ؞