هَغَّيْ 2 - أَتَّوْرَتْ دَ أَنَّبَاوَا

طَوْكَكَرْ سَابُوانْ غِدَنْ يَهْوٜىٰهْ

¹ أَوَتَنْ بَݣَويْ، أَ رَانَ تَعَشِرِنْ دَ طَيَ، سَيْ يَهْوٜىٰهْ يَيِ مَغَنَ تَبَاكِنْ أَنَّبِے هَغَّيْ ثٜىٰوَ

² ‏«‏كَيِ مَغَنَ دَ ظٜىٰرُبَّبٜىٰلْ طَنْ شٜىٰيَلْتِيٜىٰلْ ڠُومْنَنْ يَهُودَ دَ يُواْشُوَ طَنْ يٜىٰهُواْظَدَكْ بَبَّنْ ڢِرِسْتِ دَ كُمَ دُكَنْ ضَغُواْوَرْ جَمَعَرْ؞ كَتَمْبَيٜىٰسُ كَثٜىٰ،

³ ‏‹‏وَنٜىٰنٜىٰ يَضَغٜىٰ دَ رَيْ عَثِكِنْكُ دَ يَغَ وَنَّنْ غِدَنْ يَهْوٜىٰهْ دَ طَوْكَكَرْسَ تَدَا؟ تُواْ، يَيَ كُكٜىٰ غَنِنْسَ عَيَنْظُ؟ أَغَنِنْكُ بَعَبَاكِنْ كُواْمٜىٰ يَكٜىٰ بَ، كُواْ بَهَكَبَ؟

⁴ عَمَّا يَنْذُ كُيِ ڧَرْڢِنْ ذُوثِيَا، كَيْ ظٜىٰرُبَّبٜىٰلْ دَكَيْ يُواْشُوَ طَنْ يٜىٰهُواْظَدَكْ بَبَّنْ ڢِرِسْتِ؞ كُيِ ڧَرْڢِنْ ذُوثِيَا، يَا كُو جَمَعَرْ ڧَسَرْ، إِنْجِ يَهْوٜىٰهْ؞ كُيِ عَيْكِ، غَمَا نِے يَهْوٜىٰهْ مَيْ ضُنْدُنَا إِنَ تَرٜىٰدَكُو؞

⁵ سَعَدَّ كُكَ ڢِتَ دَغَ ڧَسَرْ مَصَرْ نَيِمُكُ أَلْڧَوَرِ ثٜىٰوَ رُوحُنَ ذَيْ كَسَنْثٜىٰ تَرٜىٰدَكُو؞ حَكَ كُوَ يَكٜىٰ هَرْوَيَوْ، سَبُواْدَ حَكَ كَدَ كُجِڟُواْرُواْ؞›‏

⁶ ‏«‏غَمَا إِنْجِ يَهْوٜىٰهْ مَيْ ضُنْدُنَا، ‏‹‏بَ دَ جِمَاوَابَ، ذَنْ سَاكٜىٰ غِرْغِظَ كُواْمٜىٰ، سَمَ دَ ڧَسَا، تٜىٰكُ دَ بُوسَشِّيَرْ ڧَسَا؞

⁷ ذَنْ غِرْغِظَ دُكَنْ ڧَسَاشٜىٰنْ أَلْعُمَّيْ، ذَاسُ كُوَ كَٰوُاْ أَرْزِڧِنْسُ أَ غِدَانَ؞ ذَنْ كُوَ ثِكَ غِدَنَّنْ دَ طَوْكَكَ،›‏ إِنْجِ يَهْوٜىٰهْ مَيْ ضُنْدُنَا؞

⁸ ‏‹‏أَيْ، أَظُرْڢَا تَاوَثٜىٰ، ظِينَارِيَ كُمَ تَاوَثٜىٰ،›‏ إِنْجِ يَهْوٜىٰهْ مَيْ ضُنْدُنَا؞

⁹ ‏‹‏طَوْكَكَرْ سَابُوانْ غِدَنْ ذَاتَڢِ تَ غِدَانَ تَدَا،›‏ إِنْجِ يَهْوٜىٰهْ مَيْ ضُنْدُنَا؞ ‏‹‏أَوَنَّنْ وُرِے كُوَ ذَنْ كَٰوُاْ أَلْبَرْكَ دَ سَلَمَ،›‏ إِنْجِ يَهْوٜىٰهْ مَيْ ضُنْدُنَا؞»‏

مَيْ بِيَيَّ ذَيْ سَامِ أَلْبَرْكَ

¹⁰ أَ رَانَ تَعَشِرِنْ دَ حُطُ غَ وَتَنْ تَرَ، عَثِكِنْ شٜىٰكَرَا تَبِيُ تَمُلْكٍ دَرِيُسْ، سَيْ يَهْوٜىٰهْ يَيِ مَغَنَ تَبَاكِنْ أَنَّبِے هَغَّيْ ثٜىٰوَ

¹¹ ‏«‏إِنْجِ يَهْوٜىٰهْ مَيْ ضُنْدُنَا، كَتَمْبَيِ ڢِرِسْتُواْثِے رَعَيِنْسُ غَمٜىٰدَ وَنَّنْ دُواْكَا؞

¹² كَثٜىٰ، ‏‹‏عِدَنْ مُتُمْ يَنَ رِڧٜىٰ دَ نَامَنْ دَ عَكَ كٜىٰٻٜىٰ مَيْ ڟَرْكِے أَ رِغَرْسَ، عِدَنْ رِغَرْ تَتَٻَ غُرَاسَ، كُواْ دَڢَڢّٜىٰنْ عَبِنْثِ، كُواْ ضُوً إِنَبِے، كُواْ مَيْ، كُواْ كُواْوَنٜىٰ عَبِنْثِ، وَنَّنْ ذَيْ ڟَرْكَكٜىٰ أَبِنْدَ رِغَرْ تَتَٻَ؟›‏ »‏ سَيْ ڢِرِسْتُواْثِنْ سُكَ أَمْسَ سُكَثٜىٰ ‏«‏أَعَ، بَذَيْ ڟَرْكَكُبَ؞»‏

¹³ سَعَنً هَغَّيْ يَثٜىٰ ‏«‏تُواْ، عِدَنْ مُتُمْ دَ يَڧَظَنْتَرْ دَكَنْسَ تَوُرِنْ تَٻَ غَاوَا، يَتَٻَ وَنِ دَغَ ثِكِنْ وَطَنَّنْ أَبُبُوَ، كُواْ ذَاسُ ڧَظَنْتُ؟»‏ سَيْ ڢِرِسْتُواْثِنْ سُكَ أَمْسَ ‏«‏عِ، ذَاسُ ڧَظَنْتُ؞»‏

¹⁴ سَعَنً هَغَّيْ يَأَمْسَ مُسُ يَثٜىٰ ‏«‏تُواْ، إِنْجِ يَهْوٜىٰهْ، ‏‹‏حَكَ يَكٜىٰدَ مُتَنٜىٰنَّنْ دَ كُمَ أَلْعُمَّرْ نَنْ دَتَكٜىٰ أَغَبَنَ؞ حَكَ يَكٜىٰ مَا دَ دُكْ عَيْكِنْ حَنُّوَنْسُ دَ دُكْ أَبِنْدَ سُكَ مِيڧَ هَدَايَ، دُكَنْسُ سُنْ ڧَظَنْتُ؞

¹⁵ ‏«‏ ‏‹‏تُواْ، سَيْ كُدُوبِے رَايُوَرْكُ دَغَ يَنْذُ ذُوَا نَنْ غَبَ؞ كَاڢِنْ مَا كُكَ ڢَارَ سَا دُوڟٜىٰ بِسَ وَنِ دُوڟٜىٰ نَغِنَ غِدَنْ يَهْوٜىٰهْ، يَيَ رَايُوَرْكُ تَكٜىٰ؟

¹⁶ كُكَنْجٜىٰ وُرِنْ تُلِنْ حَڟِ دَ سَا رَيْ ثٜىٰوَ ذَاكُ عَوْنَ حَڟِ مُودُ عَشِرِنْ، عَمَّا سَيْ كُتَرَرْ دَ مُودُ غُواْمَ كَثَلْ!‏ كُكَنْ تَڢِے طِبَنْ ضُوً إِنَبِے دَ سَا رَيْ ذَاكُ سَامِ لِتَ طَرِے دَغَ تُلُنْسَ، عَمَّا سَيْ كُتَرَرْ دَ لِتَ أَرْبَعِنْ كَثَلْ!‏

¹⁷ نَا سَوْكَرْ مُكُ دَ إِسْكَ مَيْ ذَاڢِ تَسَا أَمْڢَانِنْ غُواْنَرْكُ يَيَنْڨُونٜىٰ دَ ڢُمْڢُنَ دَ ڧَنْڧَرَ عَكَنْ غُواْنَكِنْكُ، دُكْدَهَكَ بَكُ كُواْمُواْ وُرِينَبَ،›‏ إِنْجِ يَهْوٜىٰهْ؞

¹⁸ ‏‹‏تُواْ، سَيْ كُدُوبِے رَايُوَرْكُ دَݣَوْ دَغَ يَنْذُ ذُوَا نَنْ غَبَ، وَتُواْ دَغَ رَانَ تَعَشِرِنْ دَ حُطُ غَ وَتَنْ تَرَ، رَانَرْ دَ عَكَ كَڢَ تُوشٜىٰنْ غِنِنْ غِدَنْ يَهْوٜىٰهْ؞ إِنَ سُواْ كُيِ تُنَانِ غَمٜىٰدَ وَنَّنْ تَمْبَيَ؞

¹⁹ بَابُ سَوْرَنْ إِرِنَّهَڟِ أَ ضُمْبُنَنْكُ، تُنْدَ عَكَيِ شُوكَ؞ يَنْذُ عِتَتُوَنْ إِنَبِنْكُ دَ عِتَتُوَنْ ٻَوْرٜىٰ دَ نَرُمَّنْ دَ نَظَيْتُنْ، بَذَاسُ ثِيغَبَدَ بَادَ أَمْڢَانِ مَرَرْ ݣَوْبَ؞ عَمَّا دَغَ وَنَّنْ رَانَ حَرْ ذُوَا نَنْ غَبَ، لَلَّيْ ذَنْسَا مُكُ أَلْبَرْكَرْ أَمْڢَانِنْ غُواْنَ مَيْݣَوْ؞›‏ »‏

يَهْوٜىٰهْ يَيِ وَ ظٜىٰرُبَّبٜىٰلْ أَلْڧَوَرِ

²⁰ سَعَنً يَهْوٜىٰهْ يَسَاكٜىٰيِنْ مَغَنَ دَ أَنَّبِے هَغَّيْ أَ رَانَ تَعَشِرِنْ دَ حُطُنَّنْ غَ وَتَنْ تَرَ دَ ثٜىٰوَ

²¹ ‏«‏كَيِ مَغَنَ دَ ظٜىٰرُبَّبٜىٰلْ ڠُومْنَنْ يَهُودَ كَثٜىٰ مَسَ، ‏‹‏ذَنْ غِرْغِظَ سَمَ دَ ڧَسَا؞

²² ذَنْ كُمَ تُمْٻُكٜىٰ مُلْكٍ ڧَسَاشٜىٰ؞ إِنَ سُواْ إِنْ كَرْيَ ڧَرْڢِنْ مُلْكٍ ڧَسَاشٜىٰنْ أَلْعُمَّيْ، ذَنْ كُمَ تُمْٻُكٜىٰ كٜىٰكُنَنْ دُواْكِ دَ مَاسُ هَوَنْسُ؞ دَوَكِ ذَاسُ ڢَاطِ، مَاسُ هَوَنْسُ كُمَ ذَاسُ كَكَّشٜىٰ جُونَ دَ تَكُبَ؞›‏

²³ يَهْوٜىٰهْ مَيْ ضُنْدُنَا يَثٜىٰ، ‏‹‏أَ رَانَرْ نَنْ، يَا ظٜىٰرُبَّبٜىٰلْ طَنْ شٜىٰيَلْتِيٜىٰلْ بَاوَنَ، ذَنْ طَوْكٜىٰكَ إِنْسَا كَذَمَ كَمَرْ ذُواْبٜىٰنْ هَاتِمِنَ، كَمَرْ يَدَّ سَرْكِے يَكٜىٰيِنْ أَمْڢَانِ دَ ذُواْبٜىٰنْ هَاتِمِنْ مُلْكِنْسَ، غَمَا نَا ذَاٻٜىٰكَ نَمُسَمَّنْ،›‏ إِنْجِنِ يَهْوٜىٰهْ مَيْ ضُنْدُنَا؞»‏