ڢَارَوَ 8 - أَتَّوْرَتْ دَ أَنَّبَاوَا

بَبَّرْ أَمْبَلِيَرْ ضُوَ تَا ڢَرَ جَنْيٜىٰوَ

¹ اللَّهْ كُوَ يَا تُنَ دَ نُوحُ دَ دُكَنْ دَبُّواْبِنْ دَاجِ دَ نَغِدَا دَسُكٜىٰ عَثِكِنْ جِضْغٍ تَرٜىٰ دَشِ؞ سَيْ يَعَيْكَدَ إِسْكَ تَهُورَ بِسَ دُونِيَا، ضُوَيٜىٰ كُوَ سُكَ جَنْيٜىٰ؞

² عَكَ تُواْشٜىٰ مَٻُٻُّغَرْ ظُرْڢَڢَّنْ تٜىٰكُنَ دَ تَغُواْغِنْ سَمَ، عَكَ ڟَيَرْدَ ضُوً سَمَ،

³ ضُوَيٜىٰ كُوَ أَ حَنْكَلِ سُنْيِ تَجَنْيٜىٰوَ دَغَ ڧَسَا؞ بَايَنْ ݣُونَ طَرِے دَ حَمْسِنْ سَيْ ضُوَيٜىٰنْ سُكَ رَغُ؞

⁴ أَ رَانَ تَشَا بَݣَويْ غَ وَتَ نَبَݣَويْ، سَيْ ضُوَ يَسَوْكَرْ دَ جِضْغٍ عَكَنْ وَنِ بَبَّنْ تُدُ عَيَنْكِنْ مَنْيَنْ تُدَّنْ أَرَرَاتْ؞

⁵ ضُوَيٜىٰنْ كُوَ سُكَ ثِيغَبَدَ جَنْيٜىٰوَ حَرْ وَتَ نَغُواْمَ؞ أَ رَانَ تَڢَرْكُواْ غَ وَتَ نَغُواْمَ نٜىٰ كَوُنَنْ مَنْيَنْ تُدَّيْ سُكَ بَيَّنَ؞

⁶ بَايَنْ ݣُونَ أَرْبَعِنْ، سَيْ نُوحُ يَبُوطٜىٰ طَنْ رَامِ أَجِضْغٍ دَ يَيِ،

⁷ سَيْ يَسَكِ حَنْكَكَ؞ حَنْكَكَ كُوَ يَيِ تَكَيْوَ دَ كَٰوُاْوَ حَرْ لُواْكَثِنْ دَ ضُوَيٜىٰنْ سُكَ بُوشٜىٰ عَڧَسَا؞

⁸ سَيْ يَكُمَ عَيْكِ كُرْثِيَ يَغَنِ كُواْ ضُوَيٜىٰنْ سُنْ جَنْيٜىٰ دَغَ ڧَسَا؞

⁹ عَمَّا كُرْثِيَرْ بَتَسَامِ وُرِنْ سَا ڧَڢَا بَ، غَمَا أَݣَويْ ضُوَ كُواْعِنَ عَدُونِيَا، دُواْمِنْ حَكَ تَا كُواْمَ وُرِنْسَ؞ سَيْ نُوحُ يَمِيڧَ حَنُّنْسَ يَطَوْكٜىٰتَ، يَشِغَرْدَ عِتَ ثِكِنْ جِضْغٍ؞

¹⁰ بَايَنْدَ يَجِرَا ݣُونَ بَݣَويْ كُمَ، سَيْ نُوحُ يَا سَاكٜىٰ سَكِنْ كُرْثِيَرْ تَڢِتَ دَغَ جِضْغٍ؞

¹¹ سَعَدَّ كُرْثِيَرْ تَكُواْمَ دَ يَمَّ، سَيْغَا طَنْيٜىٰنْ غَنْيٜىٰنْ ظَيْتُنْ عَبَاكِنْتَ وَنْدَ تَڟِنْكَ؞ تَهَكَنٜىٰ نُوحُ يَسَنِ ثٜىٰوَ ضُوَيٜىٰ سُنْ جَنْيٜىٰ دَغَ ڧَسَا؞

¹² بَايَنْدَ يَجِرَا ݣُونَ بَݣَويْ، سَيْ يَسَاكٜىٰ سَكِنْ كُرْثِيَرْ، عَمَّا بَتَڧَارَ دَاوُاْوَبَ؞

¹³ أَ رَانَ تَڢَرْكُواْ، غَ وَتَ نَڢَرْكُواْ أَ شٜىٰكَرَا تَطَرِے شِدَ دَ طَيَ بَايَنْ حَيْڢُوَرْ نُوحُ، ضُوً يَا بُوشٜىٰ دَغَ ڧَسَا؞ نُوحُ يَا بُوطٜىٰ مُرْڢِنْ جِضْغٍ، سَيْ يَغَ ڢُسْكَرْ ڧَسَا تَنَ كَنْ بُوشٜىٰوَ؞

¹⁴ كَاڢِنْ رَانَ تَعَشِرِنْ دَ بَݣَويْ غَ وَتَ نَبِيُ، دُكَنْ ڧَسَا تَا بُوشٜىٰ كَڢْ!‏

ڢِتُواْوَ دَغَ جِضْغٍ

¹⁵ سَيْ اللَّهْ يَثٜىٰ وَ نُوحُ،

¹⁶ ‏«‏دُكَنْكُ كُڢِتَ دَغَ جِضْغٍ، كَيْ دَ مَاتَرْكَ دَ یَیَنْكَ مَظَا دَ مَاتَنْسُ تَرٜىٰدَكَيْ؞

¹⁷ كَڢِتَرْدَ كُواْوَثٜىٰ حَلِتَّ مَيْ رَيْ دَتَكٜىٰ تَرٜىٰدَكَيْ؞ كُواْوَنٜىٰ أَبُ مَيْ رَيْ، ڟُنْڟَيٜىٰ دَ دَبُّواْبِے دَ كُواْوَنٜىٰ أَبُ مَيْ رَرَّڢٜىٰ عَڧَسَا، أَ ڢِتَرْدَسُو، دُواْمِنْ سُثِثِّكَ دُونِيَا، سُيِ تَحَيْڢُوَ سُواْسَيْ، سُيَلْوَتَ عَدُونِيَا؞»‏

¹⁸ نُوحُ يَا ڢِتَ دَغَ جِضْغٍ تَرٜىٰدَ مَاتَرْسَ دَ یَیَنْسَ مَظَا دَ مَاتَنْسُ؞

¹⁹ كُواْوَنٜىٰ أَبُ مَيْ رَيْ دَ كُواْوَنٜىٰ أَبُ مَيْ رَرَّڢٜىٰ عَڧَسَا دَ كُواْوَنٜىٰ إِرِنْ ڟُنْڟُ دَ كُواْوَنٜىٰ أَبُ مَيْ مُواْڟِ عَڧَسَا، كُواْوَنٜىٰ أَبُ بِسَغَ إِرِنْسَ سُكَ ڢِتَ دَغَ جِضْغٍ دَنْ‌غِ دَنْ‌غِ؞

يَهْوٜىٰهْ يَايِ وَ نُوحُ أَلْڧَوَرِ

²⁰ سَيْ نُوحُ يَغِنَ بَغَدٜىٰنْ هَدَايَ غَ يَهْوٜىٰهْ؞ يَا طَوْكَ دَغَ كُواْوَثٜىٰ إِرِنْ دَبَّ مَرَرْ ڧَظَنْتَادَ كُمَ دَغَ كُواْوَنٜىٰ إِرِنْ ڟُنْڟُ مَرَرْ ڧَظَنْتَا يَمِيڧَسُ هَدَايَ تَڧُواْنَاوَا عَكَنْ بَغَدٜىٰنْ؞

²¹ سَعَدَّ يَهْوٜىٰهْ يَا جِ ڧَنْشِنْ هَدَايَرْ سَيْيَثٜىٰ أَ رَنْسَ ‏«‏كُواْ كَطَنْ بَذَنْ سَاكٜىٰ لَعَنْتَ ڧَسَا سَبُواْدَ طَنْ أَدَمْ بَ، كُواْدَيَكٜىٰ تُنَانِنْ ذُوثِيَارْسَ يَنَ ثِكٜىٰ دَ مُغُنْتَا تُنْ يَنَ ڧَرَمِ؞ بَذَنْ كُمَ سَاكٜىٰ هَلَّكَ كُواْوَنٜىٰ أَبُ مَيْ رَيْ كَمَرْ يَدَّ نَيِبَ؞

²² ‏«‏حَرْ إِيَاكَرْ ݣُونَكِنْ دُونِيَا، لُواْكَثِنْ شُوكَ إِرِ دَ نَغِرْبِے، دَ نَسَنْيِ دَ نَذَاڢِ، دَ نَدَمِنَ دَ نَرَانِ، دَ رَانَ دَ دَرٜىٰ، بَذَاسُ دَيْنَبَ؞»‏