ڢَارَوَ 34 - أَتَّوْرَتْ دَ أَنَّبَاوَا

أَنْ تِلَسْتَ دِنَتُ أَنْ ݣُونَ دَ عِتَ

¹ وَتَرَانَ سَيْ دِنَتُ، یَرْ مَثٜىٰنْ دَ لَيْعَتُ تَحَيْڢَ وَ يَعْڧُوبَ، تَڢِتَ دُواْمِنْ تَظِيَارْثِ وَطَنْسُ یَنْ مَاتَانْ ڧَسَرْ؞

² أَݣَويْ وَنِ مُتُمْ مَيْ سُونَ هَمُوارْ، مُتُمِنْ هِوِ، شُوغَبَنْ وُرِنْ، يَنَدَ طَا مَيْ سُونَ شٜىٰكٜىٰمْ؞ سَعَدَّ شٜىٰكٜىٰمْ يَغَ دِنَتُ، سَيْ يَثَڢْكٜىٰتَ، يَتِلَسْتَاتَ يَݣُونَ دَ عِتَ؞

³ سَيْ رَنْسَ يَكُواْمَ غَ دِنَتُ یَرْ يَعْڧُوبَ؞ يَڧَوْنَثٜىٰتَ، يَيِ مَتَ مَغَنَ مَيْ دَاطِے؞

⁴ سَيْ شٜىٰكٜىٰمْ يَيِ مَغَنَ دَ بَابَنْسَ هَمُوارْ يَثٜىٰ ‏«‏أَ طَوْكُواْ مِنِ يَارِنْيَرْ نَنْ تَذَمَ مَاتَتَ؞»‏

⁵ يَعْڧُوبَ كُوَ يَا جِ يَدَّ شٜىٰكٜىٰمْ يَا ڧَظَنْتَرْدَ دِنَتُ، عَمَّا بَيْثٜىٰ كُواْمٜىٰبَ؞ يَا جِرَا سَيْ دَ یَیَنْسَ وَطَنْدَ سُكَ تَڢِے كِيوُانْ شَانُنْسَ أَدَاجِ سُكَ دَاوُاْ؞

⁶ سَعَدَّ هَمُوارْ بَابَنْ شٜىٰكٜىٰمْ يَتَڢِے وُرِنْ يَعْڧُوبَ دُواْمِنْ يَيِ مَغَنَ دَشِ،

⁷ یَیَ مَظَا نَ يَعْڧُوبَ سُنْ دَاوُاْ دَغَ دَاجِ؞ سَعَدَّ سُكَجِ لَابَرِنْ، أَبِنْ يَا ظَڢٜىٰسُ كُمَ سُكَيِ ڢُشِے سُواْسَيْ، غَمَا شٜىٰكٜىٰمْ يَيِ أَبِنْ رٜىٰنِ غَ جَمَعَرْ إِسْرَٰٓءِيلَ تَوُرِنْ ݣُونَ دَ یَرْ يَعْڧُوبَ، غَمَا بَيْ كَمَاتَ عَيِ وَنَّنْ أَبُبَ؞

⁸ عَمَّا هَمُوارْ يَيِ مَغَنَ دَسُو يَنَ ثٜىٰوَ ‏«‏طَانَ شٜىٰكٜىٰمْ يَنَ مَرْمَرِنْ یَرْكُ دَ ذُوثِيَارْسَ؞ إِنَ ضُواْڧُوانْكُ كُبَاشِ عِتَ تَذَمَ مَاتَرْسَ؞

⁹ تَهَكَ سَيْ مُكَڢَ زُمُنْثِنْ عَوْرٜىٰ تَرٜىٰدَكُو، كُو ذَاكُ عَوْرِ یَنْ مَاتَنْمُ، مُو مَا سَيْ مُعَوْرِ یَنْ مَاتَنْكُ؞

¹⁰ ذَاكُ ذَوْنَ أَڟَكَانِنْمُ، ڧَسَرْمُ كُوَ تأَنَانً دُواْمِنْ أَمْڢَانِنْكُ، كُذَوْنَ عَثِكِ، كُيِ كَاسُوَنْثِ دَمُو، كُسَيِ ڢِيلَيٜىٰ كُيِ غِدَاجٜىٰ عَثِكِ؞»‏

¹¹ سَيْ شٜىٰكٜىٰمْ شِے مَا يَثٜىٰ وَبَابَنْ دِنَتُ دَ یَنْعُوَنْتَ ‏«‏إِنَ نٜىٰمَنْ ڢَضٍ جِنِ أَعِدَنُونْكُ، دُكْ أَبِنْدَ كُكَثٜىٰ إِنْبَايَرْ، ذَنْ بَايَرْ؞

¹² دُكْ إِرِنْ كُطِنْ عَوْرٜىٰ كُواْ كَايَنْ عَوْرٜىٰنْ دَ كُكَ ڟَارَا مِنِ، ذَنْبَاكُ؞ نِے دَيْ، كُبَانِ يَارِنْيَرْ إِنْعَوْرَ؞»‏

¹³ یَیَنْ يَعْڧُوبَ مَظَا سُكَ أَمْسَ وَ شٜىٰكٜىٰمْ دَ بَابَنْسَ هَمُوارْ ثِكِنْ مُنَاڢُنْثِ، غَمَا يَا ڧَظَنْتَرْدَ یَرْعُوَرْسُ دِنَتُ؞

¹⁴ سُكَثٜىٰ ‏«‏بَذَامُ عِيَ بَادَ یَرْعُوَرْمُ غَ وَنْدَ بَعَيِ مَسَ كَاثِيَ بَ، غَمَا أَبِنْ كُنْيَا نٜىٰ أَغَرٜىٰمُ؞

¹⁵ تَ وَنَّنْ أَبُ نٜىٰ كَطَيْ ذَامُ يَرْدَ مُكُ، وَتُواْ كُواْوَنٜىٰ نَمِجِ أَغَرِنْكُ يَيِ كَاثِيَ، دُواْمِنْ كُذَمَ كَمَرْمُ؞

¹⁶ سَعَنً ذَامُ بَاكُ یَنْ مَاتَنْمُ كُعَوْرَ، سَيْ مُو مَا مُعَوْرِ یَنْ مَاتَنْكُ؞ ذَامُ كُوَ ذَوْنَ دَكُو مُذَمَ طَيَ دَكُو؞

¹⁷ عَمَّا عِدَنْ بَكُ سَوْرَرٜىٰمُ كُنْيَرْدَ أَنْيِ مُكُ كَاثِيَبَ، تُواْ، ذَامُ طَوْكِ یَرْمُ، مُتَڢِے؞»‏

¹⁸ مَغَنَرْسُ كُوَ تَايِ وَ هَمُوارْ دَ طَنْسَ شٜىٰكٜىٰمْ دَاطِے؞

¹⁹ سَوْرَيِنَّنْ كُوَ بَيْيِ وَتَ وَتَ بَ، غَمَا ذُوثِيَارْسَ تَنَ مَرْمَرِنْ یَرْ يَعْڧُوبَ سُواْسَيْ؞ شِينٜىٰ كُوَ عَكَڢِے غِرْمَمَاوَا أَغِدَنْ هَمُوارْ؞

²⁰ سَيْ هَمُوارْ دَ طَنْسَ شٜىٰكٜىٰمْ سُكَذُواْ أَوُرِنْ تَارُوَ نَڧُواْڢَرْ غَرِ؞ سُكَيِ مَغَنَ دَ مُتَنٜىٰنْ غَرِنْسُ سُكَثٜىٰ،

²¹ ‏«‏وَطَنَّنْ مُتَنٜىٰ بَاسُ دَ دَامُوَ دَمُو؞ بَرِ سُيِ ذَمَ أَغَرِنْ سُيِ كَاسُوَنْثِنْسُ، غَمَا ڧَسَرْ تَنَدَ ڢَاطِ دُواْمِنْمُ دُكَ؞ بَرِ مُعَوْرِ یَیَنْسُ مَاتَا، سَعَنً مُو مَا مُبَاسُ یَیَنْمُ مَاتَا سُعَوْرَ؞

²² مُتَنٜىٰنَّنْ ذَاسُ يَرْدَ سُذَوْنَ دَمُو، سُكُمَ ذَمَ طَيَ دَمُو تَوَنَّنْ أَبُ نٜىٰ كَطَيْ، وَتُواْ سَيْ كُواْوَنٜىٰ نَمِجِ أَغَرِنْمُ يَيِ كَاثِيَ كَمَرْسُ؞

²³ إِنْ حَكَنٜىٰ، بَشَانُونْسُ دَ كَايَنْسُ دَ دُكَنْ دَبُّواْبِنْسُ ذَاسُ ذَمَ نَامُبَ؟ عِدَنْ دَيْ مُكَ يَرْدَ، أَيْ، ذَاسُ ذَوْنَ تَرٜىٰدَمُو؞»‏

²⁴ دُكَنْ وَطَنْدَ سُكَذُواْ وُرِنْ تَارُوَ نَڧُواْڢَرْ غَرِ، سُكَ يَرْدَ دَ مَغَنَرْ هَمُوارْ دَ طَنْسَ شٜىٰكٜىٰمْ؞ عَكَ كُوَيِ وَكُواْوَنٜىٰ نَمِجِ نَغَرِنْ كَاثِيَ؞

یَیَنْ يَعْڧُوبَ سُنْثِ أَمَانَرْ غَرِنْ شٜىٰكٜىٰمْ

²⁵ أَ رَانَ تَ عُكُ، سَعَدَّ سُكٜىٰ ثِكِنْ ذَاڢِنْ ثِيوُاْ، سَيْ یَیَ مَظَا بِيُ نَ يَعْڧُوبَ، وَتُواْ سِمٜىٰيُوانْ دَ لَوِ، یَنْعُوَنْ دِنَتُ، سُكَ طَوْكِ تَكُبَنْسُ، سُكَ ڢَاطَوَ غَرِنْ بَاڟَمَّنِ؞ سُكَ كَكَّشٜىٰ دُكَنْ مَذَنْ؞

²⁶ سُكَ كَشٜىٰ هَمُوارْ دَ طَنْسَ شٜىٰكٜىٰمْ، سُكَ طَوْكِ دِنَتُ دَغَ غِدَنْ شٜىٰكٜىٰمْ سُكَ تَڢِے دَ عِتَ؞

²⁷ سَعَنً سَوْرَنْ یَیَ مَظَا نَ يَعْڧُوبَ، سُكَبِے كَنْ غَوَوَّكِنْ، سُكَ ڨُوثٜىٰ أَرْزِڧِنْ غَرِنْ، سَبُواْدَ أَنْ ڧَظَنْتَرْدَ یَرْعُوَرْسُ؞

²⁸ سُكَ ݣُوشِ شَانُنْسُ دَ أَوَكِنْسُ دَ جَاكُنَنْسُ دَ دُكَنْ أَبِنْدَ يَكٜىٰ أَغَرِنْدَ نَكٜىٰوَيٜىٰنْسَ؞

²⁹ دُكَنْ أَرْزِڧِنْسُ دَ يَارَنْسُ ڧَنَانَا دَ مَاتَنْسُ دَ دُكَنْ أَبِنْدَ سُكٜىٰ ثِكِنْ غِدَاجٜىٰنْسُ، دُكَ سُكَ ݣُوشٜىٰ؞

³⁰ سَيْ يَعْڧُوبَ يَثٜىٰ وَ سِمٜىٰيُوانْ دَ لَوِ ‏«‏كُنْجَٰوُاْ وَهَلَ عَكَيْنَ، كُنْسَا نَذَمَ أَبِنْ ڨَمَ أَعِدَانُنْ مَذَوْنَنْ ڧَسَرْ، وَتُواْ كَنْعَنِيَاوَا دَ ڢٜىٰرِظِّيَاوَا؞ مُو بَامُ دَيَوَ، عِدَنْ سُكَ تَارُ مَنَ دُواْمِنْ سُڢَاطَ مَنَ دَ يَاڧِ، أَيْ، ذَاسُ هَلَكَانِ دَ غِدَانَ؞»‏

³¹ عَمَّا یَیَنْسَ سُكَثٜىٰ ‏«‏تُواْ، دُوانْمٜىٰ ذَامُ بَرْسُ سُيِ دَ یَرْعُوَرْمُ كَمَرْ عِتَ كَارُوَثٜىٰ؟»‏