ڢَارَوَ 18 - أَتَّوْرَتْ دَ أَنَّبَاوَا

يَهْوٜىٰهْ يَايِ وَ إِبْرَٰهِيمْ دَ سَارَةُ أَلْڧَوَرِنْ طَا

¹ يَهْوٜىٰهْ كُوَ يَا بَيَّنَ غَ إِبْرَٰهِيمْ دَ ڟَكَرْ رَانَ، أَ لُواْكَثِنْ دَ إِبْرَٰهِيمْ يَكٜىٰ ظَوْنٜىٰ عَڧُواْڢَرْ تٜىٰنْتِنْسَ كُسَدَ عِتَتُوَنْ ڟَاڢِ نَ مَمْرٜىٰ؞

² دَ إِبْرَٰهِيمْ يَطَغَ عِدَنُونْسَ، سَيْ يَغَ مُتَنٜىٰ عُكُ أَغَبَنْسَ كُسَدَشِ؞ دَ يَغَنْسُ، سَيْ يَشٜىٰڧَ دَ غُدُ دَغَ ڧُواْڢَرْ تٜىٰنْتِنْسَ دُواْمِنْ يَتَرْيٜىٰسُ؞ سَيْ يَرُسُنَ دَ ڢُسْكَرْسَ حَرْ ڧَسَا،

³ يَثٜىٰ ‏«‏يَا عُبَنْ‌غِجِنَ، إِنْ نَسَامِ ڢَضٍ جِنِ أَغَبَنْكَ، كَدَ كَوُثٜىٰ غِدَنْ بَاوَنْكَ؞

⁴ بَرِ عَكَٰوُاْ طَنْ ضُوَ كُوَنْكٜىٰ ڧَڢَاڢُنْكُ، كُهُوتَ أَغِنْدِنْ إِتَاثٜىٰنَّنْ؞

⁵ بَرِ كُمَ إِنْكَٰوُاْ دُنْڧُلٜىٰنْ غُرَاسَ دُواْمِنْ كُثِ كُسَامِ ڧَرْڢِے، تُنْدَيَكٜىٰ كُنْذُواْ وُرِنْ بَاوَنْكُ؞ بَايَنْ حَكَ سَيْ كُوُثٜىٰ؞»‏ سَيْ سُكَ أَمْسَ سُكَثٜىٰ ‏«‏كَيِ أَبِنْدَ كَڢَطَا؞»‏

⁶ إِبْرَٰهِيمْ يَا رُوغَ ذُوَا ثِكِنْ تٜىٰنْتِ يَثٜىٰ وَ سَارَةُ ‏«‏كِيِسَوْرِ كِشِرْيَ مُودُ عُكُ نَغَارِ مَيْ لَوْشِ كِدَمَشِ، كِيِ وَيْنَ؞»‏

⁷ سَيْ إِبْرَٰهِيمْ يَيِ غُدُ ذُوَا وُرِنْ غَرْكٜىٰنْ شَانُو، يَطَوْكِ طَنْ بِجِمِ مَيْ لَاڢِيَ، يَبَا وَنِ سَوْرَيِ يَشِرْيَ دَ سَوْرِ؞

⁸ يَا طَوْكِ كِنْدِرْمُواْ دَ مَدَرَ دَ طَنْ بِجِمِنْ دَ عَكَ شِرْيَ، يَأَجِيٜىٰ أَغَبَنْسُ؞ سَعَنً يَا جَا غٜىٰڢٜىٰ يَنَ جِضَانْسُ يَايِنْ دَسُكٜىٰثِ؞

⁹ سُكَثٜىٰ مَسَ ‏«‏إِنَا مَاتَرْكَ سَارَةُ؟»‏ يَا أَمْسَ يَثٜىٰ ‏«‏تَنَ ثِكِنْ تٜىٰنْتِ؞»‏

¹⁰ سَيْ طَيَنْسُ يَثٜىٰ ‏«‏ذَنْ سَاكٜىٰ كُواْمَاوَا وُرِنْكَ وَرْهَكَ شٜىٰكَرَا مَيْ ذُوَا، غَمَا سَارَةُ ذَاتَ حَيْڢَ مَكَ طَا؞»‏ سَارَةُ كُوَ تَنَ عَبَايَنْسُ عَڧُواْڢَرْ تٜىٰنْتِ تَسَ كُنّٜىٰ تَنَجِ؞

¹¹ غَاشِ كُوَ، إِبْرَٰهِيمْ دَ سَارَةُ سُنْ ڟُوڢَ، شٜىٰكَرُنْسُ كُمَ سُنْيِيَوَ؞ سَارَةُ كُمَ تَادَينَ غَنِنْ أَلْعَادَرْ مَاتَا؞

¹² سَيْ سَارَةُ تَيِدَارِيَا أَ رَنْتَ، تَنَ ثٜىٰوَ ‏«‏بَايَنْ نَڟُوڢَ، عُبَنْ‌غِجِنَ كُمَ يَا ڟُوڢَ، وَنٜىٰ سَوْرَنْ جِنْ دَاطِنْ ݣُونَ تَرٜىٰ كُمَ يَضَغٜىٰ أَغَرٜىٰمُ؟»‏

¹³ سَيْ يَهْوٜىٰهْ يَثٜىٰ وَ إِبْرَٰهِيمْ ‏«‏دُوانْمٜىٰ سَارَةُ تَيِدَارِيَا تَثٜىٰ، ‏‹‏حَرْ ذَنْعِيَ حَيْڢَرْ طَا دُكْ دَ ڟُوڢَتَ يَنْذُ؟›‏

¹⁴ أَݣَويْ أَبِنْدَ يَتَٻَ ڢِنْ ڧَرْڢِنْ يَهْوٜىٰهْ نٜىٰ؟ دَيْدَيْ لُواْكَثِنْدَ نَسَا، ذَنْ كُواْمُواْ وُرِنْكَ شٜىٰكَرَا مَيْ ذُوَا، كُمَ سَارَةُ ذَاتَ حَيْڢِ طَا؞»‏

¹⁵ عَمَّا سَارَةُ تَايِ مُسُو، تَنَ ثٜىٰوَ ‏«‏أَيْ، بَنْيِ دَارِيَابَ،»‏ غَمَا تَنَجِنْ ڟُواْرُواْ؞ سَيْ يَثٜىٰ ‏«‏أَعَ، لَلَّيْ كِنْيِ دَارِيَا؞»‏

إِبْرَٰهِيمْ يَا يِ ضُواْڧُواْ أَمَدَدِنْ سُواْدُوامْ

¹⁶ سَعَنً مُتَنٜىٰنْ سُكَتَاشِ دَغَ وُرِنْ، سُكَ تَڢِے عِنْدَ ذَاسُ عِيَ هَنْ‌غٜىٰنْ سُواْدُوامْ؞ إِبْرَٰهِيمْ كُوَ يَيِمُسُ رَكِيَ دُواْمِنْ يَيِ بَنْ ݣُونَ دَسُو؞

¹⁷ يَهْوٜىٰهْ يَاثٜىٰ أَ رَنْسَ ‏«‏تُواْ، ذَنْ ٻُواْيٜىٰوَ إِبْرَٰهِيمْ أَبِنْدَ نَكٜىٰ شِرِنْ عَيْكَتَاوَا نٜىٰ؟

¹⁸ غَاشِ كُمَ، ذُرِيَرْ إِبْرَٰهِيمْ ذَاتَيِيَوَ تَذَمَ بَبَّرْ ڧَبِيلَ، غَ دُكَنْ سَوْرَنْ ڧَبِيلُنْ دُونِيَا، ذَيْذَمَ مُسُ حَنْيَرْ أَلْبَرْكَ؞

¹⁹ غَمَا نَا ذَاٻٜىٰ شِ دُواْمِنْ يَعُمَرْثِ یَیَنْسَ دَ غِدَنْسَ سُكِيَايٜىٰ حَنْيَتَ تَوُرِنْ يِنْ أَدَلْثِے دَ غَسْكِيَ، دُواْمِنْ نِے يَهْوٜىٰهْ إِنْ تَبَّتَرْوَ إِبْرَٰهِيمْ أَبِنْدَ نَيِمَسَ أَلْڧَوَرِ؞»‏

²⁰ سَيْ يَهْوٜىٰهْ يَثٜىٰ وَ إِبْرَٰهِيمْ ‏«‏تُنْدَيَكٜىٰ كُوكَنْ مُتَنٜىٰ غَمٜىٰدَ مُغُنْتَارْ سُواْدُوامْ دَ غُواْمُواْرَ يَيِيَوَ، ذُنُوبِنْسُ كُمَ يَيِ مُونِ ڨُورَيْ،

²¹ ذَنْ غَنْ‌غَرَ إِنْ‌غَنِ إِنْبِنْثِكَ كُواْ كُوكَنْ دَيَذُواْ غَرٜىٰنِ حَكَ يَكٜىٰ؞»‏

²² سَعَنً مُتَنٜىٰنْ سُكَ جُويَا دَغَ وُرِنْ ذُوَا سُواْدُوامْ، عَمَّا إِبْرَٰهِيمْ يَا ڟَيَ أَغَبَنْ يَهْوٜىٰهْ؞

²³ سَيْ إِبْرَٰهِيمْ يَمَڟُواْ كُسَ، يَثٜىٰ ‏«‏أَشٜىٰ، ذَاكَ هَلَّكَ مَيْ أَدَلْثِے تَرٜىٰدَ مَيْ مُغُنْتَا؟

²⁴ دَا عَثٜىٰ أَݣَويْ مَاسُ أَدَلْثِے حَمْسِنْ ثِكِنْ بِرْنِنْ، ذَاكَ هَلَّكَ وُرِنْ؟ بَذَاكَ يَاڢٜىٰ مُسُ سَبُواْدَ مَاسُ أَدَلْثِنَّنْ حَمْسِنْ دَسُكٜىٰ ثِكِنْسَبَ؟

²⁵ بَذَيْ يِوُ كَيِ إِرِنْ وَنَّنْ أَبُبَ، وَتُواْ كَكَشٜىٰ مَيْ أَدَلْثِے تَرٜىٰدَ مَيْ مُغُنْتَا!‏ أَشٜىٰ، كَا مَيْشٜىٰسُ إِرِ طَيَ كٜىٰنَنْ؟ بَذَيْ يِوُ كَيِ حَكَبَ!‏ كَيْ دَ كَكٜىٰ مَيْ شَرِيعَرْ دُكَنْ دُونِيَا، بَذَاكَيِ شَرِيعَ دَيْدَيْبَ؟»‏

²⁶ سَيْ يَهْوٜىٰهْ يَثٜىٰ ‏«‏عِدَنْ نَسَامِ مَاسُ أَدَلْثِے حَمْسِنْ عَثِكِنْ سُواْدُوامْ، ذَنْ يَاڢٜىٰ وَدُكَنْ بِرْنِنْ سَبُواْدَسُو؞»‏

²⁷ إِبْرَٰهِيمْ يَا ثٜىٰ ‏«‏غَاشِ نَيِ ڧَرْڢِنْ ذُوثِيَا إِنَ مَغَنَ دَ عُبَنْ‌غِجِ، نِے دَ نَكٜىٰ بَكُواْمٜىٰبَنٜىٰ، عَمَّا تُرْٻَيَا نٜىٰ دَ تُواْكَ كَوَيْ؞

²⁸ تُواْ دَاعَثٜىٰ ذَاعَ سَامِ مَاسُ أَدَلْثِے أَرْبَعِنْ دَ بِيَرْ مَيْمَكُوانْ حَمْسِنْ ڢَا؟ ذَاكَ هَلَّكَ بِرْنِنْ دُكَ سَبُواْدَ رَشِنْ بِيَرْ طِنْ؟»‏ سَيْ يَأَمْسَ ‏«‏بَذَنْ هَلَّكَ بِرْنِنْبَ، إِنْ نَسَامِ أَرْبَعِنْ دَ بِيَرْ أَوُرِنْ؞»‏

²⁹ إِبْرَٰهِيمْ يَا سَاكٜىٰ ثٜىٰوَ ‏«‏تُواْ دَاعَثٜىٰ ذَاعَ سَامِ أَرْبَعِنْ أَوُرِنْ ڢَا؟»‏ سَيْ يَأَمْسَ ‏«‏سَبُواْدَ أَرْبَعِنْ طِنْ، بَذَنْيِبَ؞»‏

³⁰ إِبْرَٰهِيمْ يَا ثٜىٰ ‏«‏كَدَ دَيْ عُبَنْ‌غِجِ يَيِ ڢُشِے، ذَنْسَاكٜىٰيِنْ مَغَنَ؞ دَاعَثٜىٰ ذَاعَ سَامِ تَلَاتِنْ أَوُرِنْ ڢَا؟»‏ سَيْ يَأَمْسَ ‏«‏بَذَنْيِبَ، إِنْ نَسَامِ تَلَاتِنْ أَوُرِنْ؞»‏

³¹ إِبْرَٰهِيمْ يَاثٜىٰ ‏«‏غَاشِ، نَيِ ڧَرْڢِنْ ذُوثِيَا إِنَ مَغَنَ دَ عُبَنْ‌غِجِ؞ تُواْ دَاعَثٜىٰ ذَاعَ سَامِ عَشِرِنْ أَوُرِنْ ڢَا؟»‏ سَيْ يَأَمْسَ ‏«‏سَبُواْدَ عَشِرِنْ طِنْ، بَذَنْ هَلَّكَ وُرِنْبَ؞»‏

³² إِبْرَٰهِيمْ يَاثٜىٰ ‏«‏كَدَ دَيْ عُبَنْ‌غِجِ يَيِ ڢُشِے!‏ ذَنْ سَاكٜىٰيِنْ مَغَنَ سَوْ طَيَنَّنْ كَطَيْ؞ تُواْ دَاعَثٜىٰ ذَاعَ سَامِ غُواْمَ أَوُرِنْ ڢَا؟»‏ سَيْ يَأَمْسَ ‏«‏سَبُواْدَ غُواْمَ طِنْ، بَذَنْ هَلَّكَ وُرِنْبَ؞»‏

³³ سَعَدَّ يَهْوٜىٰهْ يَغَمَيِنْ مَغَنَ دَ إِبْرَٰهِيمْ، سَيْيَتَڢِے؞ إِبْرَٰهِيمْ شِے مَا يَكُواْمَ غِدَا؞