ڢَارَوَ 14 - أَتَّوْرَتْ دَ أَنَّبَاوَا

إِبْرَمْ يَا ثٜىٰثِ لُوطُ دَغَ حَنُّنْ سَرَاكُنَ حُطُ

¹ أَنَانً أَ زَامَانِنْ سَرَاكُنَ حُطُنَّنْ، سَرْكِے أَمْرَڢٜىٰلْ نَ شِنَرْ دَ سَرْكِے أَرِيُواكْ نَ عٜىٰلَّسَرْ دَ سَرْكِے كٜىٰدُوارْلَيُواْمٜىٰرْ نَا عٜىٰلَمْ دَ سَرْكِے تِدَلْ نَ غُواْيِمْ،

² سُكَ ڢِتَ سُكَيِ يَاڧِ دَ سَرَاكُنَ بِيَرْ نَنْ، سَرْكِے بٜىٰرَ نَ سُواْدُوامْ دَ سَرْكِے بِرْشَ نَ غُواْمُواْرَ دَ سَرْكِے شِنَبْ نَ أَدْمَ دَ سَرْكِے شٜىٰمٜىٰبٜىٰرْ نَ ظٜىٰبُواْيِمْ دَ كُمَ سَرْكِنْ بٜىٰلَ، وَتُواْ ذُواْوَرْ؞

³ دُكَنْسُ سُنْ حَطَ كَنْسُ أَ ݣُورِنْ سِدِّمْ، وَتُواْ تٜىٰكُنْ غِشِرِ؞

⁴ دَلِيلِنْ دَ سَرَاكُنَنَّنْ سُكَ شِغَ يَاڧِ، شِينٜىٰ سُنْيِ شٜىٰكَرَا غُواْمَشَا بِيُ سُنَ بَوْتَاوَ سَرْكِے كٜىٰدُوارْلَيُواْمٜىٰرْ، عَمَّا أَ شٜىٰكَرَا تَغُواْمَشَا عُكُ، سَيْ سُكَيِ تَاوَيٜىٰ؞

⁵ أَ شٜىٰكَرَا تَغُواْمَشَا حُطُ، شِ كٜىٰدُوارْلَيُواْمٜىٰرْ دَ سَرَاكُنَنْ دَسُكٜىٰ تَرٜىٰ دَشِ سُكَ ڢِتَ دُواْمِنْ سُݣُونْتَرْ دَ تَاوَيٜىٰنْ؞ سُكَثِ نَصَرَا عَكَنْ رٜىٰڢَيَاوَا أَ عَشْتٜىٰرُواتْ كَرْنَيِمْ دَ ظُظَاوَا أَ هَمْ دَ عٜىٰمَاوَا أَ ڢِيلِنْ كِرِيَتَيِمْ،

⁶ دَ كُمَ هُواْرِيَاوَا نَيَنْكِنْ تُدَّنْ سٜىٰيِرْ حَرْ ذُوَا عٜىٰلْڢَرَنْ عَبَاكِنْ دَاجِنْدَ بَا كُواْوَ؞

⁷ سَيْ سُكَ كُمَ جُويَا سُكَ كُواْمَ عٜىٰنْمِشْڢَتْ، وَتُواْ كَدٜىٰشْ؞ سُكَ كُمَثِ نَصَرَا عَكَنْ دُكَنْ يَنْكِنْ أَمَلٜىٰكَاوَا دَ نَ أَمُواْرِيَاوَا، وَطَنْدَ سُكٜىٰ ذَمَ أَ هَظَظُوانْ تَمَرْ؞

⁸ سَعَنً سَرَاكُنَنْ سُواْدُوامْ دَ نَ غُواْمُواْرَ دَ نَ أَدْمَ دَ نَ ظٜىٰبُواْيِمْ دَ نَ بٜىٰلَ، وَتُواْ ذُواْوَرْ، سُكَ ڢِتَ سُكَ حَطَكَيْ دُواْمِنْ يَاڧِ أَ ݣُورِنْ سِدِّمْ؞

⁹ سُكَ ڢُسْكَنْثِ سَرْكِے كٜىٰدُوارْلَيُواْمٜىٰرْ نَ عٜىٰلَمْ دَ سَرْكِے تِدَلْ نَ غُواْيِمْ دَ سَرْكِے أَمْرَڢٜىٰلْ نَ شِنَرْ دَ سَرْكِے أَرِيُواكْ نَ عٜىٰلَّسَرْ، وَتُواْ سَرَاكُنَ حُطُ سُنَ غَابَادَ بِيَرْ كٜىٰنَنْ؞

¹⁰ ݣُورِنْ سِدِّمْ كُوَ يَنَ ثِكٜىٰ دَ رَامُكَ نَوَنِ أَبُ كَمَرْ مَنْݣُولْتَ؞ سَعَدَّ سَرَاكُنَنْ سُواْدُوامْ دَ غُواْمُواْرَ دَ سُواْجُواْجِنْسُ سُكٜىٰ غُدُ دَغَ يَاڧِ، سَيْ وَطَنْسُنْسُ سُكَ ڢَاطَ ثِكِنْ رَامُكَنْ؞ سَوْرَنْ سَرَاكُنَ عُكُ دَ سُواْجُواْجِنْسُ كُمَ سُكَ غُدُ ذُوَا يَنْكِنْ تُدَّيْ؞

¹¹ سَيْ سَرَاكُنَ حُطُنَّنْ سُكَ ݣُوشِ دُكَنْ كَايَنْ سُواْدُوامْ دَ غُواْمُواْرَ دَ دُكَنْ عَبِنْثِنْسُ، سُكَ تَڢِے؞

¹² سُكَ كُمَ طَوْكِ لُوطُ يَرُوانْ طَنْعُوَنْ إِبْرَمْ وَنْدَ يَكٜىٰ ذَمَ ثِكِنْ سُواْدُوامْ، تَرٜىٰدَ كَايَنْسَ، سُكَ تَڢِے؞

¹³ سَيْ وَنِ وَنْدَ يَڟِيرَا يَذُواْ يَڢَطَا وَ إِبْرَمْ مُتُمِنْ إِبْرَانِيَاوَا، وَنْدَ يَكٜىٰ ذَمَ أَوَجٜىٰنْ عِتَتُوَنْ ڟَاڢِ نَ مَمْرٜىٰ؞ مَمْرٜىٰ كُوَ مُتُمِنْ أَمُوارْ نٜىٰ، طَنْعُوَنْ عٜىٰشْكُوالْ دَ أَنٜىٰرْ، سُو مَاسُ حَطَكَيْ دَ إِبْرَمْ نٜىٰ دُواْمِنْ يَاڧِ؞

¹⁴ سَعَدَّ إِبْرَمْ يَجِ ثٜىٰوَ أَنْكَامَ طَنْ دَنْ‌غِنْسَ وُرِنْ يَاڧِ، سَيْ يَجَغُواْرَنْثِ مُتَنٜىٰنْسَ طَرِے عُكُ دَ غُواْمَشَا تَݣُوسْ، وَطَنْدَ عَكَ حَيْڢٜىٰسُ أَغِدَنْسَ، عَكَ كُمَ كُواْيَ مُسُ يِنْ يَاڧِ، سُكَيِ تَبِنْ سَرَاكُنَنْ حَرْ ذُوَا يَنْكِنْ دَنْ عَ أَرٜىٰوَ؞

¹⁵ دَ دَدَّرٜىٰ سَيْ يَرَرَّبَ مَاسُيِمَسَ يَاڧِ؞ إِبْرَمْ دَ مَاسُيِمَسَ حِدِمَ سُكَيِ تَبِنْسُ حَرْ هُواْبَ، تَأَرٜىٰوَثِنْ دِمَشْڧُ؞

¹⁶ سَيْ يَݣُوشِ دُكَنْ كَايَنْ، يَكُمَ دَاوُاْ دَ لُوطُ طَنْ طَنْعُوَنْسَ دَ دُكَنْ كَايَنْسَ، تَرٜىٰدَ مَاتَادَ سَوْرَنْ مُتَنٜىٰنْ؞

مَلْكِصَدِڧْ يَا سَا وَ إِبْرَمْ أَلْبَرْكَ

¹⁷ أَ لُواْكَثِنْ دَ إِبْرَمْ يَدَاوُاْ دَغَ نَصَرَرْ دَ يَيِ عَكَنْ سَرْكِے كٜىٰدُوارْلَيُواْمٜىٰرْ دَ سَوْرَنْ سَرَاكُنَنْ دَسُكٜىٰ تَرٜىٰ دَشِ، سَيْ سَرْكِنْ سُواْدُوامْ يَڢِتَ دُواْمِنْ يَتَرْيٜىٰشِ أَ ݣُورِنْ شَوٜىٰ، وَتُواْ ݣُورِنْ سَرْكِے؞

¹⁸ سَيْ سَرْكِے مَلْكِصَدِڧْ نَبِرْنِنْ سَلٜىٰمْ يَكَٰوُاْ غُرَاسَ دَ ضُوً إِنَبِے؞ مَلْكِصَدِڧْ ڢِرِسْتِنٜىٰ نَ اللَّهْ مَڢِے طَوْكَكَ؞

¹⁹ يَا سَا وَ إِبْرَمْ أَلْبَرْكَ يَثٜىٰ، ‏«‏أَلْبَرْكَ تَا تَبَّتَا غَ إِبْرَمْ دَغَ اللَّهْ مَڢِے طَوْكَكَ، اللَّهْ وَنْدَ يَحَلِثِّ سَمَ دَ دُونِيَا؞

²⁰ أَلْبَرْكَ تَا تَبَّتَا غَ اللَّهْ مَڢِے طَوْكَكَ وَنْدَ يَبَادَ أَبُواْكَنْ غَابَنْ إِبْرَمْ أَهَنُّنْسَ؞»‏ سَيْ إِبْرَمْ يَبَا شِ زَكَّ تَدُكْ أَبِنْدَ يَڨُوثٜىٰ؞

²¹ سَيْ سَرْكِنْ سُواْدُوامْ يَثٜىٰ وَ إِبْرَمْ ‏«‏كَبَانِ مُتَنٜىٰنْ كَوَيْ، كَرِڧٜىٰ كَايَنْ دُواْمِنْ كَنْكَ؞»‏

²² عَمَّا إِبْرَمْ يَاثٜىٰ وَسَرْكِنْ سُواْدُوامْ ‏«‏نَارِغَا نَا ضَنْڟٜىٰ دَ سُونَنْ يَهْوٜىٰهْ اللَّهْ مَڢِے طَوْكَكَ، وَنْدَ يَا حَلِثِّ سَمَ دَ دُونِيَا،

²³ ثٜىٰوَ بَذَنْ طَوْكِ كُواْ أَلُّورَ، كُواْ إِغِيَرْ تَاكَلْمِ، كُواْ وَنِ أَبِنْدَ يَكٜىٰ نَاكَ بَ، دُواْمِنْ كَدَ كَثٜىٰ، ‏‹‏نِنٜىٰ نَا مَيْدَ إِبْرَمْ مَيْ أَرْزِڧِ؞›‏

²⁴ بَذَنْ طَوْكِ كُواْمٜىٰبَ، سَيْ أَبِنْدَ مَاسُيِمِنِ يَاڧِ سُكَثِ دَ كُمَ رَبُوانْ مُتَنٜىٰنْ دَ سُكَيِ غُواْيُوانْ بَايَنَ، وَتُواْ سُو أَنٜىٰرْ دَ عٜىٰشْكُوالْ دَ كُمَ مَمْرٜىٰ؞ عَبَاسُ نَاسُ رَبُواْ؞»‏