ڢَارَوَ 13 - أَتَّوْرَتْ دَ أَنَّبَاوَا

إِبْرَمْ دَ لُوطُ سُنْ رَبُ

¹ سَيْ إِبْرَمْ يَتَاشِ دَغَ ڧَسَرْ مَصَرْ تَرٜىٰدَ مَاتَرْسَ دَ لُوطُ دَ دُكَنْ أَبِنْدَ يَكٜىٰدَشِ، سُكَ كُواْمَ نٜىٰغٜىٰبْ؞

² إِبْرَمْ كُوَ يَيِ أَرْزِڧِ سُواْسَيْ، يَنَدَ دَبُّواْبِنْ غِدَا دَ أَظُرْڢَا دَ ظِينَارِيَ؞

³ يَا ثِيغَبَدَ تَڢِيَرْسَ دَغَ ذَنْ‌غُواْ ذُوَا ذَنْ‌غُواْ دَغَ نٜىٰغٜىٰبْ حَرْ ذُوَا بٜىٰتٜىٰلْ، عِنْدَ دَا يَكَڢَ تٜىٰنْتِنْسَ ڟَكَانِنْ غَرِنْ بٜىٰتٜىٰلْ دَ نَ أَيْ،

⁴ عِنْدَ دَا يَغِنَ بَغَدٜىٰ لُواْكَثِنْ دَيَكٜىٰ وُثٜىٰوَ؞ أَوُرِنْ إِبْرَمْ يَا كِرَا غَ سُونَنْ يَهْوٜىٰهْ ثِكِنْ سُجَّدَ؞

⁵ لُوطُ وَنْدَ يَتَڢِے تَرٜىٰدَ إِبْرَمْ، شِے مَا يَنَدَ غَرْكُنَنْ تُمَكِ دَ أَوَكِ دَ نَشَانُو دَ كُمَ عِيَلِنْسَ دَ بَايِنْسَ؞

⁶ وَنَّنْ يَا سَا حَرْ ڢِيلَيٜىٰنْ كِيوُاْ سُكَ كَاسَ مُسُ، غَمَا دَبُّواْبِنْسُ سُنَدَ يَوَ يَدَّ بَذَاسُ عِيَ ذَمَ تَرٜىٰبَ؞

⁷ أَݣَويْ كُمَ رَشِنْ ذَمَنْ لَاڢِيَ ڟَكَانِنْ مَكِيَايَنْ دَبُّواْبِنْ إِبْرَمْ دَ مَكِيَايَنْ دَبُّواْبِنْ لُوطُ؞ أَ لُواْكَثِنَّنْ كَنْعَنِيَاوَا دَ ڢٜىٰرِظِّيَاوَا سُنَ عَڧَسَرْ؞

⁸ سَيْ إِبْرَمْ يَثٜىٰ وَ لُوطُ ‏«‏كَدَ رَشِنْ ذَمَنْ لَاڢِيَ يَشِغَ ڟَكَانِينَ دَكَيْ، كُواْ ڟَكَانِنْ مَاسُيِمَكَ كِيوُاْ دَ مَاسُيِمِنِ كِيوُاْ، غَمَا مُو یَنْعُوَ نٜىٰ؞

⁹ أَيْ، غَا ڢِيلَيٜىٰنْ ڧَسَرْ دُكَ أَغَبَنْكَ!‏ سَيْ مُرَبُ؞ عِدَنْ ذَاكَبِے حَنُّنْ هَغُ، نِے ذَنْبِے نَدَمَ، عِدَنْ كُمَ ذَاكَبِے حَنُّنْ دَامَ، نِے ذَنْبِے نَهَغُ؞»‏

¹⁰ سَيْ لُوطُ يَطَغَ عِدَنُونْسَ، يَغَ ثٜىٰوَ ݣُورِنْ يُواْدَنْ حَرْ ذُوَا ذُواْوَرْ يَنَ ثِكٜىٰ دَ ثِيَوَرْ كِيوُاْ دَ وُرَارٜىٰنْ ضُوَ كَمَرْ غُواْنَرْ عَيْدَنْ وَدَّ يَهْوٜىٰهْ يَيِ، كُواْ كُمَ كَمَرْ ݣُورِنْ نِلُ أَ مَصَرْ؞ وَنَّنْ يَا كَسَنْثٜىٰ كَاڢِنْ يَهْوٜىٰهْ يَهَلَّكَ سُواْدُوامْ دَ غُواْمُواْرَ؞

¹¹ دُواْمِنْ حَكَ لُوطُ يَا ذَاٻَا وَكَنْسَ ݣُورِنْ يُواْدَنْ؞ لُوطُ يَا كُمَ كَامَ حَنْيَ يَا نُڢِ غَبَسْ؞ تَهَكَ سُكَ رَبُ دَ جُونَ؞

¹² إِبْرَمْ يَا ذَوْنَ عَڧَسَرْ كَنْعَنَ، عَمَّا لُوطُ يَا ذَوْنَ ثِكِنْ يَنْكِنْ بِرَنٜىٰنْ دَسُكٜىٰ عَݣُورِ، دَغَ نَنْ يَا غُسَ يَا كَڢَ تٜىٰنْتِنْسَ كُسَدَ سُواْدُوامْ؞

¹³ مُتَنٜىٰنْ سُواْدُوامْ كُوَ مُوغَيٜىٰ نٜىٰ، مَاسُ عَيْكَتَ مُغُنْتَا ڨُورَيْ، مَاسُ غَابَادَ يَهْوٜىٰهْ؞

إِبْرَمْ يَا ڧَوْرَ ذُوَا هٜىٰبْرُوانْ

¹⁴ بَايَنْدَ لُوطُ يَا رَبُ دَ إِبْرَمْ، سَيْ يَهْوٜىٰهْ يَثٜىٰ وَ إِبْرَمْ ‏«‏دَغَ عِنْدَ كَكٜىٰ ڟَيٜىٰ، طَغَ عِدَنُونْكَ كَدُوبَ تَأَرٜىٰوَ دَ تَكُدُ دَ تَغَبَسْ دَ تَيَمَّ؞

¹⁵ غَمَا دُكَنْ ڧَسَرْدَ كَغَنِ، ذَنْبَاكَ، كَيْ دَ ذُرِيَرْكَ حَرْ أَبَدَا؞

¹⁶ ذَنْسَا ذُرِيَرْكَ سُيِيَوَ كَمَرْ تُرْٻَيَرْ ڧَسَا، حَرْ إِنْ وَنِ ذَيْ عِيَ ڧِرْغَ تُرْٻَيَرْ ڧَسَا، تُواْ، ذَاعَ عِيَ ڧِرْغَ ذُرِيَرْكَ؞

¹⁷ تَاشِ، كَيِتَڢِيَ ثِكِنْ ڧَسَرْ، إِيَاكَرْ ڢَاطِنْتَ دَ ڟَوُانْتَ، غَمَا ذَنْبَاكَ عِتَ؞»‏

¹⁸ دُواْمِنْ حَكَ إِبْرَمْ يَتَاشِ يَڧَوْرَ يَذَوْنَ وَجٜىٰنْ عِتَتُوَنْ ڟَاڢِ نَ مَمْرٜىٰ، وَطَنْدَ سُكٜىٰ أَ هٜىٰبْرُوانْ؞ أَوُرِنْ إِبْرَمْ يَا غِنَا بَغَدٜىٰ غَ يَهْوٜىٰهْ؞