هِظْڧِيَالْ 43 - أَتَّوْرَتْ دَ أَنَّبَاوَاطَوْكَكَرْ يَهْوٜىٰهْ تَا كُواْمُواْ هَيْكَلِ 1 بَايَنْ وَنَّنْ سَيْ مُتُمِنْ يَسَاكٜىٰ كَيْنِ ڧُواْڢَرْ دَتَكٜىٰ ڢُسْكَنْتَرْ غَبَسْ؞ 2 غَاشِ كُوَ ڧُنْشِنْ حَصْكٜىٰنْ طَوْكَكَرْ اللَّهْ نَ إِسْرَٰٓءِيلَ يَنَ ذُوَا دَغَ غَبَسْ؞ ڧَارَرْ ذُوَانْسَ تَيِ كَمَرْ ڧَارَرْ مُواْڟِنْ تٜىٰكُ؞ دُونِيَا كُوَ تَحَصْكَكَ سَبُواْدَ حَصْكٜىٰنْ طَوْكَكَرْسَ؞ 3 رُعُيَرْدَ نَغَنِ تَنَ كَمَ دَ رُعُيَرْدَ نَغَنِ أَدَا، سَعَدَّ اللَّهْ يَذُواْ دُواْمِنْ يَهَلَّكَرْ دَ بِرْنِنْ، كُمَ كَمَرْ رُعُيَرْدَ نَغَنِ عَبَاكِنْ كُواْغِنْ كٜىٰبَرْ؞ سَيْ نَڢَاطِ دَ ڢُسْكَ حَرْ ڧَسَا؞ 4 يَايِنْ دَ ڧُنْشِنْ حَصْكٜىٰنْ طَوْكَكَرْ يَهْوٜىٰهْ يَشِغَ هَيْكَلِنْ تَڧُواْڢَرْ دَتَكٜىٰ ڢُسْكَنْتَرْ غَبَسْ، 5 سَيْ رُوحٌ يَطَغَنِ، يَكَٰوُاْنِ عَثِكِنْ ڢِيلِ نَثِكِ؞ ڧُنْشِنْ حَصْكٜىٰنْ طَوْكَكَرْ يَهْوٜىٰهْ كُوَ يَثِكَ هَيْكَلِنْ؞ 6 سَعَدَّ مُتُمِنَّنْ يَكٜىٰ ڟَيٜىٰ كُسَدَنِے، سَيْ نَجِ وَنِ يَنَ مَغَنَ دَنِے دَغَ ثِكِنْ هَيْكَلِنْ؞ 7 يَثٜىٰ مِنِ «يَا كَيْ طَنْ مُتُمْ، وَنَّنْ وُرِينٜىٰ كُجٜىٰرَرْ مُلْكِنَ دَ وُرِنْ دَ ذَنْسَا تَڢِنْ ڧَڢَاڢُنَ، عِنْدَ ذَنْ ذَوْنَ عَثِكِنْ جَمَعَتَ إِسْرَٰٓءِيلَ حَرْ أَبَدَا؞ غِدَنْ إِسْرَٰٓءِيلَ بَذَاسُ ڧَارَ ڧَظَنْتَرْدَ سُونَنَ بَ كُمَ، كُواْ سُو، كُواْ سَرَاكُنَنْسُ؞ بَذَاسُ ڧَارَ ڧَظَنْتَرْدَ سُونَنَ تَوُرِنْ يِنْ كَارُوَنْثِ أَوُرِنْ سُجَّدَ بَ، بَ كُوَ ذَاسُ ڧَارَ كَكَّڢَ أَبُبُوَنْ تُنَاوَا دَ سَرَاكُنَنْ دَ سُكَ مُتُ أَوُرَارٜىٰنْ سُجَّدَ عَتُدَّيْبَ؞ 8 سُنْ ڧَظَنْتَرْدَ سُونَنَ مَيْ ڟَرْكِے سَعَدَّ سُكَ كَڢَ ڧُواْڢَرْ غِدَنْسُ كُسَدَ ڧُواْڢَتَ، سُكَ كُمَ كَڢَ ڢِرَمْ نَڧُواْڢَرْسُ كُسَدَ ڢِرَمْ نَوَ، بَنْغُواْ نٜىٰ كَطَيْ يَرَبَ ڟَكَانِينَ دَسُو؞ سُكَ ڧَظَنْتَرْدَ سُونَنَ مَيْ ڟَرْكِے تَوُرِنْ أَيُّكَنْسُ نَبَنْ ڨَمَرْ دَسُكَ عَيْكَتَ؞ سَبُواْدَ حَكَ نَهَلَكَاسُ ثِكِنْ ڢُشِنَ؞ 9 يَنْذُ، بَرِ سُكَوَرْدَ كَارُوَنْثِنْسُ نَسُجَّدَ غَ غُمَكَنْسُ دَ صِڢُّواْڢِنْ سَرَاكُنَنْسُ دَغَ غَرٜىٰنِ، نِے كُوَ ذَنْ ذَوْنَ عَثِكِنْسُ حَرْ أَبَدَا؞ 10 «يَا كَيْ طَنْ مُتُمْ، سَيْ كَبَيَّنَوَ غِدَنْ إِسْرَٰٓءِيلَ يَدَّ هَيْكَلِنْ يَكٜىٰ، كَكُمَسَا سُعَوْنَ شِرِنْ هَيْكَلِنْ؞ بَرِ سُجِ كُنْيَا سَبُواْدَ مُغُنْتَارْسُ؞ 11 عِدَنْ سُنْجِ كُنْيَرْ دُكَنْ أَبِنْدَ سُكَ عَيْكَتَ، سَيْ كَبَيَّنَ مُسُ شِرِنْ هَيْكَلِنْ دَ ڟَارِنْسَ دَ وُرَارٜىٰنْ ڢِتَرْسَ دَ شِغُواْوَرْسَ دَ كَمَنِّنْسَ دُكَ؞ كَسَنَرْ مُسُ دَ دُكَنْ ڧَٰعِدُواْدِنْسَ دَ دُكَنْ شِرِنْسَ دَ دُواْكُواْكِنْسَ، كَكُمَ رُبُوتَ أَغَبَنْسُ دُواْمِنْ سُكِيَايٜىٰ ڟَارِنْسَ، سُكُمَ كِيَايٜىٰ دُكَنْ ڧَٰعِدُواْدِنْسَ؞ 12 وَنَّنْ عِتَثٜىٰ كُواْيَرْوَرْ هَيْكَلِنْ، دُكَنْ ڢِيلِنْ دَيَكٜىٰ عَكَنْ تُدُ عِنْدَ عَكَغِنَ هَيْكَلِ، ذَيْ ذَمَ وُرِنْ دَ عَكَ كٜىٰٻٜىٰ دَ ڟَرْكِے؞ حَڧِيڧَ وَنَّنْ عِتَثٜىٰ كُواْيَرْوَرْ هَيْكَلِنْ؞» بَغَدٜىٰ 13 وَنَّنْ شِينٜىٰ غِرْمَنْ بَغَدٜىٰنْ بِسَغَ دُواْغُوانْ كَمُ، كُواْوَنٜىٰ دُواْغُوانْ كَمُ طَيَ كُوَ يَڧُنْشِ كَمُ طَيَ دَ ڧَارِنْ تَڢِنْ حَنُّ طَيَ؞ لَمْبَتُنْ دَ عَكَحَڧَ كٜىٰوَيٜىٰ دَ بَغَدٜىٰنْ، ظُرْڢِنْسَ يَكَيْ كَمُ طَيَ، ڢَاطِنْسَ كُمَ كَمُ طَيَ؞ ڢِرَمْ دَ عَكَيِ كٜىٰوَيٜىٰ دَ بَاكِنْسَ كُمَ ڢَاطِنْسَ تَڢِنْ حَنُّ طَيَ نٜىٰ؞ وَنَّنْ شِينٜىٰ ڟَيِنْ تُوشٜىٰنْ بَغَدٜىٰنْ؞ 14 بَغَدٜىٰنْ يَڟَيَ عَكَنْ تُوشٜىٰ، يَنَ كُمَ دَ سَاشٜىٰ عُكُ؞ سَشٜىٰ نَڧَسَا، ڟَيِنْسَ كَمُ بِيُ نٜىٰ، ڢَاطِنْسَ كُمَ كَمُ طَيَ؞ سَشٜىٰ نَڟَكِيَ، ڟَيِنْسَ كَمُ حُطُ نٜىٰ، ڢَاطِنْسَ كُمَ كَمُ طَيَ؞ 15 سَشٜىٰ نَسَمَ، وَتُواْ عِنْدَ عَكٜىٰ ڧُواْنَهَدَايَ، ڟَيِنْسَ كَمُ حُطُنٜىٰ؞ عَكُواْوَثٜىٰ ݣُونَ أَݣَويْ ڧَهُوانْدَ يَمِيڧٜىٰ سَمَ؞ 16 سَشٜىٰنَّنْ نَسَمَ نَبَغَدٜىٰنْ كُوَ ڟَوُانْسَ دَ ڢَاطِنْسَ أَبُ طَيَ نٜىٰ، وَتُواْ، ڟَيِنْسَ كَمُ غُواْمَشَا بِيُ نٜىٰ، ڢَاطِنْسَ كُمَ كَمُ غُواْمَشَا بِيُ نٜىٰ؞ 17 سَشٜىٰ نَڟَكِيَ كُمَ ڟَوُانْسَ دَ ڢَاطِنْسَ أَبُ طَيَنٜىٰ، وَتُواْ، ڟَوُانْسَ كَمُ غُواْمَشَا حُطُنٜىٰ، ڢَاطِنْسَ كُمَ كَمُ غُواْمَشَا حُطُنٜىٰ؞ يَنَ دَ ڢِرَمْ كٜىٰوَيٜىٰ دَ بَاكِنْسَ مَيْ ڢَاطِنْ رَبِنْ كَمُ، يَنَ كُمَ دَ لَمْبَتُ كٜىٰوَيٜىٰ مَيْ ظُرْڢِنْ كَمُ طَيَنٜىٰ؞ مَتَاكَلَنْ بَغَدٜىٰنْ كُوَ سُنَ ڢُسْكَنْتَرْ غَبَسْ؞ 18 سَيْ مُتُمِنْ يَثٜىٰ مِنِ «يَا كَيْ طَنْ مُتُمْ، إِنْجِنِ عُبَنْغِجِ يَهْوٜىٰهْ، وَطَنَّنْ سُونٜىٰ ڧَٰعِدُواْدِنْ بَغَدٜىٰنْ، ڧَٰعِدُواْدِنْ مِيڧَ هَدَايُ نَڧُواْنَاوَا دَ كُمَ ڧَٰعِدُواْدِ نَيَيَّڢَا جِنِ عَكَنْ بَغَدٜىٰنْ أَ لُواْكَثِنْ دَ عَكَ غِنَاشِ؞ 19 ڢِرِسْتُواْثِے نَ عِيَلِنْ ظَدُواكْ نَظُرِيَرْ لَوِ سُونٜىٰ مَاسُ يِنْ كُسَ دُواْمِنْ سُيِحِدِمَ أَغَبَنَ؞ سَيْ كُبَاسُ بِجِمِ نَيِنْ هَدَايَ تَوَنْكٜىٰ ذُنُوبِ؞ نِے عُبَنْغِجِ يَهْوٜىٰهْ نَا ڢَطَا؞ 20 ذَاكَ طِبَ دَغَ جِنِنْسَ، كَسَا عَكَنْ ڧَهُواْنِ حُطُ نَبَغَدٜىٰنْ، كَكُمَسَا عَكَنْ ݣُونَ حُطُ نَسَاشٜىٰ نَڟَكِيَ نَبَغَدٜىٰنْ دَ كُمَ عَكَنْ ڢِرَمْ دَيَكٜىٰ كٜىٰوَيٜىٰ دَ بَاكِنْسَ؞ تَهَكَ ذَاكَ ڟَبْتَثٜىٰ بَغَدٜىٰنْ، كَيِ هَدَايَرْ طَوْكَرْ أَلْحَكِنْ ذُنُوبِ دُواْمِنْسَ؞ 21 ذَاكَ كُمَ طَوْكِ بِجِمِنْ نَيِنْ هَدَايَ تَوَنْكٜىٰ ذُنُوبِ، كَكُمَ كَيْشِ أَ سَاشٜىٰنْ هَيْكَلِنْ دَ عَكَ شِرْيَ عَبَايَنْ وُرِنْ دَ عَكَ كٜىٰٻٜىٰ دَ ڟَرْكِے، كَڧُواْنٜىٰشِ؞ 22 «أَ رَانَ تَبِيٜىٰ، ذَاكَ مِيڧَ بُنْسُرُ مَرَرْ تَبُواْ هَدَايَ تَوَنْكٜىٰ ذُنُوبِ؞ ذَاعَكُمَ ڟَبْتَثٜىٰ بَغَدٜىٰنْ كَمَرْ يَدَّ دَا عَكَ ڟَبْتَثٜىٰشِ دَ جِنِنْ بِجِمِ؞ 23 سَعَدَّ كَغَمَ ڟَبْتَثٜىٰ بَغَدٜىٰنْ، سَيْ كَمِيڧَ بِجِمِ مَرَرْ تَبُواْ دَ ضَغُواْ مَرَرْ تَبُواْ دَغَ ثِكِنْ غَرْكٜىٰنْ؞ 24 ذَاكَ مِيڧَسُ أَغَبَنْ يَهْوٜىٰهْ، ڢِرِسْتُواْثِے ذَاسُسَا غِشِرِ عَكَنْ نَامَنْسُ، سُكُمَ مِيڧَ دَبُّواْبِنَّنْ هَدَايَ تَڧُواْنَاوَا غَ يَهْوٜىٰهْ؞ 25 «كُواْوَثٜىٰ رَانَ حَرْ ݣُونَ بَݣَويْ ڢِرِسْتُواْثِے ذَاسُيِ تَمِيڧَ عَكُيَ طَيَ دَ بِجِمِ طَيَ دَ ضَغُواْ طَيَ، دُكَنْسُ مَرَرْ تَبُواْنٜىٰ، دُواْمِنْ هَدَايَ تَوَنْكٜىٰ ذُنُوبِ؞ 26 ݣُونَ بَݣَويْ ڢِرِسْتُواْثِے ذَاسُيِ تَمِيڧَ هَدَايَ دُواْمِنْ أَڟَبْتَثٜىٰ بَغَدٜىٰ؞ تَهَكَ ذَاسُ كٜىٰٻٜىٰشِ؞ 27 سَعَدَّ وَطَنَّنْ ݣُونَكِے سُكَ وُثٜىٰ دَغَ رَانَ تَتَݣُوسْ ذُوَا غَبَ، ڢِرِسْتُواْثِے ذَاسُ مِيڧَ هَدَايَ تَڧُواْنَاوَا دَ تَڠَرَنْ زُمُنْثِ عَكَنْ بَغَدٜىٰنْ؞ نِے كُوَ ذَنْ كَرْٻٜىٰكُ؞ نِے عُبَنْغِجِ يَهْوٜىٰهْ نَا ڢَطَا؞» |
Hausa Common Language Ajami Bible © The Bible Society of Nigeria, 2020
Bible Society of Nigeria