هِظْڧِيَالْ 34 - أَتَّوْرَتْ دَ أَنَّبَاوَامَكِيَايَنْ ڧَضْيَا نَ إِسْرَٰٓءِيلَ 1 يَهْوٜىٰهْ يَايِ مَغَنَ دَنِے ثٜىٰوَ 2 «يَا كَيْ طَنْ مُتُمْ، كَيِ أَنَّبْثِ غَابَادَ مَكِيَايَنْ إِسْرَٰٓءِيلَ، كَثٜىٰ مُسُ، ‹يَا كُو مَكِيَايَنْ إِسْرَٰٓءِيلَ، إِنْجِنِ عُبَنْغِجِ يَهْوٜىٰهْ، كَيْتُواْ، كَيْتُواْ، كُو مَكِيَايَنْ جَمَعَرْ إِسْرَٰٓءِيلَ وَطَنْدَ كُكٜىٰ كِيوُانْ كَنْكُ نٜىٰ كَطَيْ! أَشٜىٰ، بَيْ كَمَاتَ مَيْ كِيوُاْ نٜىٰ يَيِ كِيوُانْ تُمَكِبَ؟ 3 كُنَ ثِنْ كِڟٜىٰنْسُ، كُنَيِ وَكَنْكُ رِيغُنَ دَ غَاشِنْسُ، كُنَ يَنْكَ تُمَكِ مَاسُ ڧِبَ، عَمَّا بَكُيِ كِيوُانْ تُمَكِنْبَ؞ 4 بَكُ ڧَرْڢَڢَ مَرَسَ ڧَرْڢِبَ، بَكُ وَرْكَرْدَ مَرَسَ لَاڢِيَ بَ، بَكُ طَوْرَ وَطَنْدَ سُكَ كَرْيٜىٰبَ، بَكُ نٜىٰمُواْ كُمَيْدَ وَطَنْدَ سُكَ كَوْثٜىٰ بَ، عَمَّا دَ ڧَرْڢِے دَ يَجِ كُنْ مَلَّكٜىٰسُ؞ 5 دُواْمِنْ حَكَ سُكَ وَرْوَڟُ سَبُواْدَ بَابُ مَكِيَايِ؞ سُكَ ذَمَ عَبِنْثِ غَ دُكَنْ نَمُواْمِنْ دَاجِ؞ 6 تُمَكِنَ سُنْ وَڟٜىٰ، سُنَ يَٰوُاْ كُواْعِنَ عَكَنْ تُدَّيْ دَ كُمَ عَثِكِنْ دُوَڟُو، تُمَكِينَ سُنْ وَڟٜىٰ كُواْعِنَ عَدُونِيَا دُكَ، بَاوَنْدَ يَتَڢِے نٜىٰمَنْسُ؞ 7 « ‹دُواْمِنْ حَكَ، يَا كُو مَكِيَايَ، كُجِ مَغَنَرْ يَهْوٜىٰهْ؞ 8 إِنْجِنِ عُبَنْغِجِ يَهْوٜىٰهْ، غَاشِ تُمَكِينَ سُنْ ذَمَ أَبِنْ ڢَرَوْتَ غَ دُكَنْ نَمُواْمِنْ دَاجِ سَبُواْدَ بَابُ مَكِيَايَ؞ مَكِيَايَ كُوَ بَسُ نٜىٰمُواْ تُمَكِينَبَ، عَمَّا سُنَ كِيوُانْ كَنْسُ نٜىٰ، بَسُيِ كِيوُانْ تُمَكِينَبَ؞ 9 يَا كُو مَكِيَايَ، كُجِ مَغَنَرْ يَهْوٜىٰهْ؞ 10 إِنْجِنِ عُبَنْغِجِ يَهْوٜىٰهْ، حَڧِيڧَ، نَا ضَنْڟٜىٰ دَ رَيْنَ، إِنَ غَابَادَكُو، ذَنْ نٜىٰمِ تُمَكِينَ دَغَ حَنُّنْكُ؞ ذَنْ حَنَ كُثِيَرْدَ تُمَكِنْ، كُو مَكِيَايَنْ بَذَاكُ ڧَارَ كِيوُانْ كَنْكُبَ كُمَ؞ ذَنْ كُٻُتَرْدَ تُمَكِينَ دَغَ بَاكِنْكُ، دُواْمِنْ كَدَ سُڧَارَ ذَمَ عَبِنْثِ أَغَرٜىٰكُ؞› » اللَّهْ نٜىٰ مَكِيَايِ مَيْݣَوْ 11 «إِنْجِنِ عُبَنْغِجِ يَهْوٜىٰهْ، نِے دَكَيْنَ ذَنْبِے بَايَ، إِنْ نٜىٰمِ تُمَكِينَ، كُمَ ذَنْ سَامُواْسُ؞ 12 كَمَرْ يَدَّ مَكِيَايَ يَكَنْ نٜىٰمِ تُمَكِنْسَ سَعَدَّ تُمَكِنْسَ سُكَ وَڟٜىٰ، حَكَ نِے ذَنْ نٜىٰمِ تُمَكِينَ؞ ذَنْ كُوَ كُٻُتَرْ دَسُو، إِنْ دَاوُاْ دَسُو دَغَ دُكَنْ وُرَارٜىٰنْ دَ عَكَ وَاڟَرْ دَسُو أَ رَانَرْ غِرْغِجٜىٰ دَ بَڧِنْ دُهُ؞ 13 نِے كُوَ ذَنْ ڢِتَرْ دَسُو دَغَ سَوْرَنْ ڧَبِيلُ، إِنْ تَتَّارُواْسُ دَغَ ڧَسَاشٜىٰ، إِنْ كَٰوُاْسُ ثِكِنْ ڧَسَرْسُ؞ نِے دَكَيْنَ ذَنْ ثِيَرْ دَسُو عَكَنْ تُدَّنْ إِسْرَٰٓءِيلَ، عَبَاكِنْ مَٻُٻُّغَرْ ضُوَ دَ كُمَ دُكَنْ وُرَارٜىٰنْ دَ مُتَنٜىٰ سُكٜىٰ دَ ذَمَ عَڧَسَرْ؞ 14 نِے ذَنْ ثِيَرْ دَسُو أَوُرِنْ كِيوُاْ مَيْݣَوْ؞ كَنْ تُدَّنْ إِسْرَٰٓءِيلَ كُوَ ذَاسُ ذَمَ وُرِنْ كِيوُانْسُ؞ ثَنْ ذَاسُ ݣُونْتَ عَكَنْ ثِيَوَرْ كِيوُاْ مَيْ لَاڢِيَ، ذَاسُيِ كِيوُاْ عَكَنْ ثِيَوَ مَيْ لَاڢِيَ عَكَنْ تُدَّنْ إِسْرَٰٓءِيلَ؞ 15 نِے دَكَيْنَ ذَنْ ذَمَ مَكِيَايِنْ تُمَكِينَ، إِنْ كَيْسُ وُرِنْ هُوتَوَا؞ نِے عُبَنْغِجِ يَهْوٜىٰهْ نَا ڢَطَا؞ 16 نِے ذَنْ نٜىٰمُواْ وَطَنْدَ سُكَ ٻَتَ، إِنْكُواْمُواْ دَ وَطَنْدَ سُكَ كَوْثٜىٰ، إِنْطَوْرَ وَطَنْدَ سُكَ كَرْيَ، إِنْڧَرْڢَڢَ مَرَسَ ڧَرْڢِے، عَمَّا مَاسُ ڧِبَ دَ مَاسُ ڧَرْڢِے ذَنْ هَلَّكَ؞ عِ، ذَنْيِ كِيوُانْ تُمَكِينَ دَ أَدَلْثِے؞ 17 «كُو ڢَا، يَا غَرْكٜىٰنْ تُمَكِينَ، إِنْجِنِ عُبَنْغِجِ يَهْوٜىٰهْ، ذَنْ شَرْعَنْتَ ڟَكَانِنْ تُمَكِ دَ تُمَكِ، ڟَكَانِنْ رَغُنَ دَ بُنْسُرَيْ؞ 18 أَغَنِنْكُ، ڧَنْڧَنِنْ أَبُ نٜىٰ كُيِ كِيوُاْ عَكَنْ لَاڢِيَيَّرْ ثِيَوَ؟ بَايَنْ حَكَ، سَيْ كُتَتَّكٜىٰ سَوْرَنْ ثِيَوَرْ دَ ڧَڢَاڢُنْكُ؟ سَعَدَّ كُنْ شَا ضُوَ مَيْ لَاڢِيَ، يَنَدَ ݣَوْ كُݣُوٻَ سَوْرَنْ ضُوً دَ ڧَڢَاڢُنْكُ؟ 19 أَغَنِنْكُ، دُواْلٜىٰنٜىٰ تُمَكِينَ سُثِ أَبِنْدَ كُنْ تَتَّاكٜىٰدَ ڧَڢَاڢُنْكُ، سُكُمَ شَا أَبِنْدَ كُنْ ݣُوٻَ دَ ڧَڢَاڢُنْكُ؟ 20 «سَبُواْدَ حَكَ، إِنْجِنِ عُبَنْغِجِ يَهْوٜىٰهْ، نِے دَكَيْنَ ذَنْ شَرْعَنْتَ ڟَكَانِنْ تُمَكِ مَاسُ ڧِبَ دَ تُمَكِ مَرَسَ ڧِبَ؞ 21 تُنْدَ كُو مَاسُ ڧِبَ كُنَ تَتُورَ مَرَرْ ڧَرْڢِے دَ كَڢَطُنْكُ، كُنَ تَسُواْكٜىٰسُ دَ ڧَهُواْنِنْكُ، حَرْ سَيْ دَ كُنْ وَاڟَرْدَسُو، 22 ذَنْ ثٜىٰثِ غَرْكٜىٰنْ تُمَكِينَ؞ بَذَاسُ ڧَارَ ذَمَ أَبِنْ ڢَرَوْتَ غَ وَنِ بَكُمَ؞ ذَنْ كُمَ شَرْعَنْتَ ڟَكَانِنْ تُنْكِيَ دَ تُنْكِيَ؞ 23 «ذَنْ كَڢَ مُتُمْ طَيَ مَكِيَايِ، بَاوَنَ دَاوُدَ، شِيكُوَ ذَيْثِيَرْ دَسُو؞ ذَيْ كُوَ ذَمَ مَكِيَايَنْسُ؞ 24 نِے يَهْوٜىٰهْ كُمَ ذَنْ ذَمَ اللَّهْ نْسُ، بَاوَنَ دَاوُدَ ذَيْ ذَمَ سَرْكِنْسُ؞ نِے يَهْوٜىٰهْ نَا ڢَطَا؞ 25 «ذَنْيِ يَرْجٜىٰجٜىٰنِيَرْ سَلَمَ دَسُو، إِنْكُمَ كُواْرِ مُوغَيٜىٰنْ نَمُواْمِنْ دَاجِ دَغَ ڧَسَرْ، دُواْمِنْ تُمَكِنْ سُذَوْنَ لَاڢِيَ عَثِكِنْ دَاجِ، سُكُمَ هُوتَ عَثِكِنْ كُرْمِ لَاڢِيَ؞ 26 ذَنْ مَيْدَسُو دَ يَنْكُنَ كٜىٰوَيٜىٰ دَ تُدُنَ حَنْيَرْ سَامُنْ أَلْبَرْكَ؞ ذَنْ كُمَ عَيْكَ دَ ضُوً سَمَ أَدَيْدَيْ لُواْكَثِنْسَ، ذَيْ كُمَ ذَمَ ضُوً أَلْبَرْكَ؞ 27 عِتَتُوَنْ غُواْنَكِ ذَاسُيِ یَیَ، ڧَسَا كُمَ ذَاتَ بَادَ أَمْڢَانِ؞ مُتَنٜىٰنَ ذَاسُ ذَوْنَ لَاڢِيَ عَڧَسَرْسُ؞ ذَاسُ سَنِ ثٜىٰوَ نِنٜىٰ يَهْوٜىٰهْ، سَعَدَّ نَكَرْيَ غُنْغُمٜىٰنْ دَنِّيَرْسُ، إِنْكُمَ كُٻُتَرْ دَسُو دَغَ حَنُّوَنْ وَطَنْدَ سُكَ رِڧٜىٰسُ عَثِكِنْ بَوْتَا؞ 28 بَذَاسُ ڧَارَ ذَمَ أَبِنْ ݣُوسَ غَ أَلْعُمَّيْ بَ، نَمُواْمِنْ دَاجِ نَڧَسَرْ بَذَاسُ ڧَارَ ثِنْيٜىٰسُبَ؞ ذَاسُ ذَوْنَ عَڧَسَرْ لَاڢِيَ، بَاوَنْدَ ذَيْ ڟُواْرَتَرْ دَسُو؞ 29 ذَنْسَا غُواْنَكِنْسُ سُبَادَ حَڟِ سُواْسَيْ دُواْمِنْ كَدَ يُنْوَ يَڧَارَ ثِنْيٜىٰسُ عَڧَسَرْ، بَكُوَ ذَاسُ سَاكٜىٰ شَنْ ذَاغِ أَوُرِنْ أَلْعُمَّيْبَ؞ 30 ذَاسُ سَنِ ثٜىٰوَ نِے يَهْوٜىٰهْ اللَّهْ نْسُ إِنَ تَرٜىٰدَسُو، كُمَ سُو غِدَنْ إِسْرَٰٓءِيلَ مُتَنٜىٰنَنٜىٰ؞ نِے عُبَنْغِجِ يَهْوٜىٰهْ نَا ڢَطَا؞ 31 كُو تُمَكِينَ نٜىٰ، تُمَكِنْ دَ نَكٜىٰ كِيوُانْسُ، نِے كُوَ اللَّهْ نْكُ نٜىٰ؞ نِے عُبَنْغِجِ يَهْوٜىٰهْ نَا ڢَطَا؞» |
Hausa Common Language Ajami Bible © The Bible Society of Nigeria, 2020
Bible Society of Nigeria