هِظْڧِيَالْ 33 - أَتَّوْرَتْ دَ أَنَّبَاوَا

هِظْڧِيَالْ مَيْ ڟَرُواْ نَ إِسْرَٰٓءِيلَ

¹ يَهْوٜىٰهْ يَايِ مَغَنَ دَنِے ثٜىٰوَ

² ‏«‏يَا كَيْ طَنْ مُتُمْ، كَيِ مَغَنَ دَ مُتَنٜىٰنْكَ، كَڢَطَا مُسُ ثٜىٰوَ ‏‹‏سَعَدَّ نَظَرٜىٰ تَكُواْبِے عَكَنْ وَتَ ڧَسَا، سَيْ مُتَنٜىٰنْ ڧَسَرْ سُنْ ذَاٻِ مُتُمْ طَيَ دَغَ ثِكِنْسُ، سُنْ سَا شِ يَذَمَ مَيْ ڟَرُوانْسُ؞

³ عِدَنْ يَا غَ تَكُواْبِے يَنَ ذُوَا عَكَنْ ڧَسَرْ، سَعَنً يَبُوسَ ڧَهُواْ دُواْمِنْ يَڢَطَكَرْ دَ مُتَنٜىٰ،

⁴ عِدَنْ وَنِ يَجِ ڧَارَرْ ڧَهُوانْ بَيْ كُلَ بَ، عِدَنْ تَكُواْبِنْ يَذُواْ يَكَشٜىٰشِ، أَلْحَكِنْ جِنِنْسَ يَنَ كَنْسَ؞

⁵ تُنْدَ يَجِ ڧَارَرْ ڧَهُواْ عَمَّا بَيْ كُلَ بَ، أَلْحَكِنْ جِنِنْسَ يَنَ عَكَنْسَ؞ عَمَّا عِدَنْ يَا كُلَ دَ ڢَطَكَرْوَرْ، ذَيْثٜىٰثِ كَنْسَ؞

⁶ عَمَّا عِدَنْ مَيْ ڟَرُوانْ يَغَ تَكُواْبِے يَنَ ذُوَا، بَيْ بُوسَ ڧَهُوانْ دُواْمِنْ يَڢَطَكَرْ دَ مُتَنٜىٰنْ بَ، حَرْ تَكُواْبِنْ يَذُواْ يَكَشٜىٰ وَنِ دَغَ ثِكِنْسُ، مُتُمِنَّنْ دَ عَكَ كَشٜىٰ يَمُتُ سَبُواْدَ لَيْڢِنْسَ نٜىٰ، عَمَّا ذَنْ نٜىٰمِ أَلْحَكِنْ جِنِنْسَ دَغَ حَنُّنْ طَنْ ڟَرُوانْ؞›‏

⁷ ‏«‏يَنْذُ ڢَا، يَا كَيْ طَنْ مُتُمْ، نَامَيْدَكَيْ مَيْ ڟَرُوانْ غِدَنْ إِسْرَٰٓءِيلَ؞ دُكْ سَعَدَّ كَجِ مَغَنَ دَغَ بَاكِنَ، سَيْ كَڢَطَكَرْ دَسُو؞

⁸ عِدَنْ نَاثٜىٰ وَمُوغُنْ مُتُمْ، ‏‹‏يَا كَيْ مُوغُنْ مُتُمْ، لَلَّيْ ذَاكَ مُتُ،›‏ كَيْ كُوَ بَكَيِ مَغَنَ دُواْمِنْ كَڢَطَكَرْ دَ مُوغُنْ مُتُمِنَّنْ دُواْمِنْ يَجُويُواْ يَبَرْ مُوغُوَرْ حَنْيَرْسَبَ، مُوغُنْ مُتُمِنَّنْ ذَيْ مُتُ عَثِكِنْ مُغُنْتَارْسَ، عَمَّا ذَنْ نٜىٰمِ أَلْحَكِنْ جِنِنْسَ دَغَ حَنُّنْكَ؞

⁹ عَمَّا عِدَنْ كَا ڢَطَكَرْ دَ مُوغُنْ دُواْمِنْ يَجُويُواْ يَبَرْ مُوغُوَرْ حَنْيَرْسَ، شِيكُوَ بَيْ جُويُواْ يَبَرْ مُوغُوَرْ حَنْيَرْسَبَ، ذَيْ مُتُ سَبُواْدَ لَيْڢِنْسَ، عَمَّا ذَاكَ كُٻُتَرْدَ رَنْكَ؞

¹⁰ ‏«‏يَنْذُ ڢَا، يَا كَيْ طَنْ مُتُمْ، كَڢَطَا وَ غِدَنْ إِسْرَٰٓءِيلَ ثٜىٰوَ سُونٜىٰ سُكَثٜىٰ، ‏‹‏صَاٻُواْ صَاٻُوانْمُ دَ كُمَ ذُنُبَنْمُ سُنْيِ مَنَ نَوْيِ، كُمَ مُنْ لَلَثٜىٰ سَبُواْدَسُو؞ يَيَ ڢَا ذَامُ رَايُ؟›‏

¹¹ تُواْ، كَڢَطَا مُسُ كَثٜىٰ، ‏‹‏حَڧِيڧَ، نَا ضَنْڟٜىٰ دَ رَيْنَ، إِنْجِنِ عُبَنْ‌غِجِ يَهْوٜىٰهْ، بَانَجِنْ دَاطِنْ مُتُوَرْ مُوغُنْ مُتُمْ، عَمَّا نَا ڢِے سُواْ مُوغُنْ مُتُمْ يَجُويُواْ يَبَرْ حَنْيَرْسَ يَرَايُ؞ كُجُويُواْ!‏ كُجُويُواْ دَغَ مُوغَيٜىٰنْ هَنْيُواْيِنْكُ!‏ دُوانْمٜىٰ ذَاكُ مُتُ، يَا كُو غِدَنْ إِسْرَٰٓءِيلَ؟›‏

¹² ‏«‏يَا كَيْ طَنْ مُتُمْ، سَيْ كَڢَطَا وَمُتَنٜىٰنْكَ ثٜىٰوَ أَدَلْثِنْ مَيْ أَدَلْثِے بَذَيْ كُٻُتَرْ دَشِيبَ، سَعَدَّ يَيِ ذُنُوبِنْ غَنْ‌غَنْثِ؞ مُغُنْتَارْ مُوغُ كُمَ بَذَاتَ سَا يَمُتُبَ عِدَنْ يَا جُويُواْ دَغَ مُغُنْتَارْسَ؞ مَيْ أَدَلْثِے كُوَ عِدَنْ يَا يِ ذُنُوبِ، أَدَلْثِنْسَ نَدَا بَذَيْسَا يَرَايُبَ؞

¹³ عِدَنْ نَاثٜىٰ وَمَيْ أَدَلْثِے بَاشَكَّ ذَيْ رَايُ، عَمَّا يَدُواْغَرَ دَ أَدَلْثِنْ دَ يَكٜىٰيِ، سَعَنً يَشِغَ يِنْ لَيْڢِے، بَذَاعَ تُنَ دَ أَيُّكَنْ أَدَلْثِنْسَ نَدَا بَ؞ عَمَّا ذَيْ مُتُ سَبُواْدَ لَيْڢِنْدَ يَيِ؞

¹⁴ عِدَنْ نَا ثٜىٰ وَمُوغُنْ مُتُمْ، ‏‹‏بَاشَكَّ ذَاكَ مُتُ،›‏ عَمَّا عِدَنْ يَا جُويُواْ دَغَ ذُنُوبِنْسَ، يَيِ أَدَلْثِے دَ غَسْكِيَ كُمَ،

¹⁵ عِدَنْ مُوغُنْ مُتُمِنَّنْ يَمَيْدَ أَبِنْ جِنْ‌غِنَرْ دَ عَكَ كَرْٻِ بَاشِ، يَكُمَ مَيْدَ أَبِنْدَ يَڨُوثٜىٰ، يَبِے ڧَٰعِدُواْدِنْ رَيْ، يَدَيْنَ يِنْ مُغُنْتَا، حَڧِيڧَ ذَيْ رَايُ، بَذَيْ مُتُبَ؞

¹⁶ ذُنُبَنْسَ نَدَا وَطَنْدَ يَيِ، كُواْ طَيَ بَذَاعَ تُنَ دَشِيبَ؞ تُنْدَ يَيِ أَبِنْدَ يَكٜىٰ دَيْدَيْ دَ غَسْكِيَ كُمَ، حَڧِيڧَ ذَيْ رَايُ؞

¹⁷ ‏«‏دُكْدَهَكَ، مُتَنٜىٰنْكَ سُنْ ثٜىٰ، ‏‹‏حَنْيَرْ عُبَنْ‌غِجِ بَدَيْدَيْ بَثٜىٰ؞›‏ أَشٜىٰ، هَنْيُواْيِنْسُ نٜىٰ بَدَيْدَيْبَ!‏

¹⁸ سَعَدَّ مَيْ أَدَلْثِے يَجُويَ دَغَ أَدَلْثِنْسَ، يَشِغَ يِنْ مُغُنْتَا، ذَيْ مُتُ سَبُواْدَ لَيْڢِنْسَ؞

¹⁹ عِدَنْ مُوغُنْ مُتُمِنَّنْ يَجُويُواْ دَغَ مُغُنْتَارْسَ، يَشِغَ يِنْ أَبِنْدَ يَكٜىٰ دَيْدَيْ دَ غَسْكِيَ كُمَ، ذَيْ رَايُ سَبُواْدَ أَبِنْدَ يَيِ؞

²⁰ دُكْدَهَكَ، كُكَثٜىٰ، ‏‹‏حَنْيَرْ عُبَنْ‌غِجِ بَ دَيْدَيْبَ ثٜىٰ؞›‏ يَا كُو غِدَنْ إِسْرَٰٓءِيلَ، ذَنْ شَرْعَنْتَ كُواْوَنٜىٰ طَيَنْكُ بِسَغَ أَيُّكَنْسَ؞»‏

سَڧُواْ غَمٜىٰدَ ڢَاطُوَرْ عُرُوشَلِيمَ

²¹ أَ رَانَ تَبِيَرْ غَ وَتَنْ غُواْمَ، أَ شٜىٰكَرَا تَغُواْمَشَا بِيُ، وَنِ مُتُمِنْدَ يَڟِيرَا دَغَ عُرُوشَلِيمَ يَذُواْ وُرِينَ، يَثٜىٰ ‏«‏بِرْنِنْ يَڢَاطِ؞»‏

²² كَاڢِنْ مُتُمِنَّنْ يَذُواْ وُرِينَ، حَنُّنْ يَهْوٜىٰهْ يَارِغَا يَاسَوْكَ عَكَيْنَ دَ يَمَّ، كُمَ يَارِغَا يَبُوطٜىٰ بَاكِنَ أَ لُواْكَثِنْ دَ مُتُمِنْ يَذُواْ دَ سَڢٜىٰ؞ بَاكِنَ يَنَ بُوطٜىٰ، بَنْ ذَمَ بٜىٰبٜىٰبَ كُمَ؞

وَطَنْدَ سُكَ ڟِيرَا أَ يَهُودَ

²³ يَهْوٜىٰهْ يَايِ مَغَنَ دَنِے ثٜىٰوَ

²⁴ ‏«‏يَا كَيْ طَنْ مُتُمْ، مَذَوْنَنْ وُرَارٜىٰنْ دَ عَكَ لَلَتَرْ عَڧَسَرْ إِسْرَٰٓءِيلَ سُنَ تَثٜىٰ وَ ‏‹‏إِبْرَٰهِيمْ مُتُمْ طَيَنٜىٰ، دُكْدَهَكَ يَمَلَّكِ دُكَنْ ڧَسَرْ، عَمَّا مُو دَيَوَ مُكٜىٰ، حَڧِيڧَ أَنْبَامُ ڧَسَرْ مَلَّكَثٜىٰ تَغَادُواْ؞›‏

²⁵ سَبُواْدَ حَكَ، غَ أَبِنْدَ نِے عُبَنْ‌غِجِ يَهْوٜىٰهْ نَثٜىٰ، ‏‹‏تُنْدَ كُنَ ثِنْ نَامَ دَ جِنِنْسَ، كُنَ كَڢَ عِدَنُونْكُ غَ غُمَكَنْكُ، كُنَ كُمَ ظُبْدَ جِنِ، أَغَنِنْكُ ذَاكُ مَلَّكِ ڧَسَرْ؟

²⁶ كُنَ دُواْغَضَ عَكَنْ تَكُواْبِنْكُ، كُنَ عَيْكَتَ أَبُبُوَنْ بَنْ ڨَمَ، كُواْوَنّٜىٰنْكُ يَنَ ظِنَ دَ مَاتَرْ مَڨُوبْثِنْسَ، أَغَنِنْكُ ذَاكُمَلَّكِ ڧَسَرْ؟›‏

²⁷ ‏«‏ڢَطَا مُسُ كَثٜىٰ، ‏‹‏إِنْجِنِ عُبَنْ‌غِجِ يَهْوٜىٰهْ، نَا ضَنْڟٜىٰ دَ رَيْنَ ثٜىٰوَ وَطَنْدَ سُكٜىٰ ذَمَ أَوُرَارٜىٰنْ دَ عَكَ لَلَتَرْ، ذَاعَ كَشٜىٰسُ دَ تَكُواْبِے؞ وَطَنْدَ سُكٜىٰ ذَمَ أَ ڢِيلَيٜىٰ، ذَنْبَادَسُو غَ نَمُواْمِنْ دَاجِ سُثِنْيٜىٰسُ؞ وَطَنْدَ سُكٜىٰ ثِكِنْ ٻُيَ عَكُواْڠُونِّ كُمَ، بَلَعِ ذَيْ كَشٜىٰسُ؞

²⁸ ذَنْمَيْدَ ڧَسَرْ كُڢَيْ دَ أَبِنْ بَنْظَ، ڧَرْڢِنْ دَتَكٜىٰ تَاڧَمَ دَشِ ذَيْ ڧَارٜىٰ؞ تُدَّنْ إِسْرَٰٓءِيلَ ذَاسُ ذَمَ كُڢَيْ دَ أَبِنْ ڟُواْرُواْ حَرْ بَاوَنْدَ ذَيْ عِيَبِے تَثِكِنْسُ؞

²⁹ سَعَدَّ نَمَيْدَ ڧَسَرْ كُڢَيْ دَ أَبِنْ بَنْظَ سَبُواْدَ دُكَنْ أَبُبُوَنْ بَنْ ڨَمَرْ دَسُكَ عَيْكَتَ، ذَاسُ سَنِ ثٜىٰوَ نِنٜىٰ يَهْوٜىٰهْ؞›‏

³⁰ ‏«‏يَنْذُ ڢَا، يَا كَيْ طَنْ مُتُمْ، مُتَنٜىٰنْكَ سُنَ مَغَنَرْكَ أَوَجٜىٰنْ كَتَنْ‌غَ؞ عَبَاكِنْ ڧُواْڢُواْڢِنْ غِدَاجٜىٰ كُمَ سُنَ مَغَنَ دَ جُونَ، طَنْعُوَ دَ طَنْعُوَنْسَ، سُنَ ثٜىٰوَ ‏‹‏كُذُواْ كُجِ مَغَنَرْ دَتَذُواْ دَغَ وُرِنْ يَهْوٜىٰهْ؞›‏

³¹ سُكَنْذُواْ وُرِنْكَ كَمَرْ يَدَّ مُتَنٜىٰ سُكَنْ ذُواْ، سُكَنْ ذَوْنَ أَغَبَنْكَ كَمَرْ سُونٜىٰ مُتَنٜىٰنَ نَڨُورَيْ؞ سُكَنْجِ أَبِنْدَ كَكٜىٰ ڢَطِ، عَمَّا بَذَاسُ عَيْكَتَ بَ؞ غَمَا دَ بَاكِ نٜىٰ سُنَ نُونَ سُو مَاسُ أَمِنْثِ نٜىٰ، عَمَّا سُنْ سَا ذُوثِيَارْسُ عَكَنْ سَامُنْ ڧَظَامَرْ رِيبَ؞

³² غَاشِ، أَغَرٜىٰسُ كَذَمَ كَمَرْ مَيْ وَاڧَرْ ڧَوْنَنٜىٰ، مَيْ رٜىٰرَ وَاڧَا دَ مُرْيَ مَيْ دَاطِے دَ ڠُونِنْ كِطِ كَوَيْ؞ سُنَجِنْ أَبِنْدَ كَكٜىٰ ڢَطِ، عَمَّا أَبِنْ بَيْتَٻَ ذُوثِيَارْسُبَ؞

³³ ‏«‏حَڧِيڧَ، أَبِنْدَ كَڢَطَا ذَيْثِكَ!‏ سَعَدَّ يَثِكَ، ذَاسُ سَنِ ثٜىٰوَ تُنْدَا مَا أَݣَويْ أَنَّبِے عَثِكِنْسُ؞»‏