هِظْڧِيَالْ 26 - أَتَّوْرَتْ دَ أَنَّبَاوَا

أَنَّبْثِ غَابَادَ بِرْنِنْ تَيَ

¹ أَنَانً أَ رَانَ تَڢَرْكُواْ غَ وَتَنْ غُواْمَشَا طَيَ، سَيْ يَهْوٜىٰهْ يَيِ مَغَنَ دَنِے ثٜىٰوَ

² ‏«‏يَا كَيْ طَنْ مُتُمْ، غَ أَبِنْدَ تَيَ تَڢَطَا عَكَنْ عُرُوشَلِيمَ، ‏«‏ ‏‹‏مَادَلَّ!‏ عُرُوشَلِيمَ تَ رُشٜىٰ!‏ أَنْ رُشٜىٰتَ وَدَّ تَكٜىٰ ڧُواْڢَرْ حَطُوَرْ ڧَبِيلُ!‏ يَنْذُ ڧُواْڢَ تَبُوطُ دُواْمِنَ، ذَنْ ڧُواْشِ تُنْدَ تَذَمَ كُڢَيْ؞›‏

³ سَبُواْدَ حَكَ، إِنْجِنِ عُبَنْ‌غِجِ يَهْوٜىٰهْ، غَاشِ، إِنَ غَابَادَكٜىٰ، يَا تَيَ!‏ ذَنْ تُرُواْ مِكِ أَلْعُمَّيْ دَيَوَ يَدَّ تٜىٰكُ تَكَنْ كَٰوُاْ رَاڧُمَنْ ضُوَ، سُيِ غَابَادَكٜىٰ؞

⁴ ذَاسُ هَلَّكَ كَتَنْ‌غَرْ تَيَ سُرُرُّشٜىٰ غِنٜىٰ غِنٜىٰنْتَ مَاسُ ڟَيِ؞ ذَنْ شَارٜىٰ ڧَسَرْتَ كَكَڢْ، إِنْ بَرْ دُوَڟُو ظَلَّ؞

⁵ ذَاتَ ذَمَ وُرِنْ شَنْيَ أَبِنْ كَامُنْ كِيڢِ كَمَرْ ڟِبِرِے أَڟَكِيَرْ تٜىٰكُ؞ نِے عُبَنْ‌غِجِ يَهْوٜىٰهْ نَا ڢَطَا؞ ذَاتَ ذَمَ كَمَرْ غَنِمَ غَ أَلْعُمَّيْ،

⁶ مُتَنٜىٰنْ ڧَوْيُكَ نَڢِيلِنْ ڧَسَرْتَ كُمَ، ذَاعَ كَكَّشٜىٰسُ دَ تَكُواْبِے؞ سَعَنً ذَاسُ سَنِ ثٜىٰوَ نِنٜىٰ يَهْوٜىٰهْ؞

⁷ ‏«‏سَبُواْدَ حَكَ إِنْجِنِ عُبَنْ‌غِجِ يَهْوٜىٰهْ دَغَ أَرٜىٰوَ ذَنْ كَٰوُاْ سَرْكِے نٜىٰبُكَدْنٜىٰزَّرْ نَ بَابِيلَ، سَرْكِنْ سَرَاكُنَ؞ ذَيْذُواْ تَرٜىٰدَ دَوَكِ دَ كٜىٰكُنَنْ دُواْكِ دَ مَاسُ هَوَنْ دَوَكِ دَ ضُنْدُنَارْ سُواْجُواْجِ مَاسُ ڧَرْڢِے دُواْمِنْ يَيِ غَابَادَ تَيَ؞

⁸ ‏«‏مُتَنٜىٰنْ ڧَوْيُكَ نَڢِيلِنْ ڧَسَرْتَ كُمَ، ذَيْ هَلَّكَرْ دَسُو دَ تَكُواْبِے؞ ذَيْ تَادَ أَبُبُوَنْ هَوْرَ كَتَنْ‌غَ دُواْمِنْ يَاڧِ، ذَيْ تَارَ ڧَسَا دُواْمِنْ يَهَوْ تَكَتَنْ‌غَرْ بِرْنِ، ذَيْ تَادَ غَرْكُوُاْيِنْ غَابَا عَكَنْكِ؞

⁹ دَ ڧَرْڢِنْ غُنْ‌غُمَنْ رُشٜىٰ كَتَنْ‌غَ، ذَيْ بُبُّغَ كَتَنْ‌غَرْكِ، دَ غَتُرَنْسَ ذَيْ رُرُّشٜىٰ غِنٜىٰ غِنٜىٰنْكِ مَاسُ ڟَيِ؞

¹⁰ دَوَكِنْسَ ذَاسُيِيَوَ، حَرْ ڧُورَرْ غُدُنْسُ ذَاتَ رُڢٜىٰكِ؞ يَوَنْ ڧَارَرْ دَوَكِ دَ ڧَارَرْ ڧَڢَاڢُنْ كٜىٰكُنَنْسُ ذَيْسَا كَتَنْ‌غَرْكِ تَغِرْغِظَ؞ سَرْكِنْ ذَيْ شِغَ ڧُواْڢُواْڢِنْ بِرْنِنْكِ، كَمَرْ يَدَّ سُواْجُواْجِ سُكَنْ شِغَ بِرْنِنْ دَ عَكَ رُشٜىٰ كَتَنْ‌غَرْسَ؞

¹¹ دَ ڧَڢَاڢُنْ دَوَكِنْسَ ذَيْ تَتَّاكَ دُكَنْ تِيتُنَنْكِ؞ ذَيْ كَكَّشٜىٰ مُتَنٜىٰنْكِ دَ تَكُواْبِے، مَنْيَنْ غِنْشِڧَنْكِ ذَاسُ ڢَاطِ حَرْ ڧَسَا؞

¹² ذَاسُ ݣُوشٜىٰ أَرْزِڧِنْكِ، سُكُمَ ݣُوشٜىٰ كَايَنْ كَاسُوَنْثِنْكِ؞ ذَاسُ رُرُّشٜىٰ كَتَنْ‌غَرْكِ، سُكُمَ هَلَّكَ غِدَاجٜىٰنْكِ مَاسُ ݣَوْ؞ دُووَڟُنْكِ دَ كَتَكَنْكِ دَ ڧُورَرْ ڧَسَرْكِے ذَاسُ ظُبَرْ دَسُو عَثِكِنْ تٜىٰكُ؞

¹³ ذَنْسَا أَدَيْنَ رٜىٰرَ وَاڧُواْڧِنْكِ، بَ كُوَ ذَاعَ ڧَارَ جِنْ ڧَارَرْ كِطِنْ مُواْلُوانْكِبَ؞

¹⁴ ذَنْ مَيْشٜىٰكِ بَبَّنْ دُوڟٜىٰ مَيْ ڢَاطِ، ذَنْسَا كِذَمَ وُرِنْ شَنْيَ رَاغَرْ كَامُنْ كِيڢِ؞ بَذَاعَ سَاكٜىٰ غِنَكِبَ، غَمَا نِے عُبَنْ‌غِجِ يَهْوٜىٰهْ نَا ڢَطَا؞»‏

¹⁵ ‏«‏إِنْجِنِ عُبَنْ‌غِجِ يَهْوٜىٰهْ، غَ أَبِنْ نَكٜىٰ ڢَطِ عَكَنْ تَيَ؞ يَنْكُنَنْ بَاكِنْ تٜىٰكُنْكِ ذَاسُ غِرْغِظَ يَايِنْ دَ سُكَجِ ڧَارَرْ ڢَاطُوَرْكِ دَ نِيشِنْ وَطَنْدَ عَكَيِ مُسُ رَوْنِ دَ إِيهٌ كَشٜىٰ كَشٜىٰنْ دَ عَكَيِ عَثِكِنْكِ؞

¹⁶ دُكَنْ سَرَاكُنَنْ غَرُضُوً بَاكِنْ تٜىٰكُ كُوَ ذَاسُ سَوْكَ دَغَ كُجٜىٰرُنْ مُلْكِنْسُ؞ ذَاسُ تُوٻٜىٰ رِيغُنَنْسُ، سُثِرٜىٰ رِيغُنَنْسُ مَاسُ أَدُوانْ سَاڧَ؞ ضَوَرْ جِكِے ذَاتَ كَامَسُ سُواْسَيْ، ذَاسُ ذَوْنَ عَڧَسَا؞ ذَاسُدِنْ‌غَ ذَمَ ثِكِنْ ضَوَرْ جِكِے، سُرَسَ أَبِنْدَ ذَاسُ ڢَطَا عَكَنْكِ؞

¹⁷ ذَاسُيِ مَكُواْكِ دُواْمِنْكِ سُثٜىٰ، ‏«‏ ‏‹‏يَيَ عَكَيِ كِنْ ٻَثٜىٰ دَغَ بَاكِنْ تٜىٰكُ، كٜىٰ دَ كِكٜىٰ سَنَنّٜىٰنْ بِرْنِ؟ يَيَ عَكَيِ كِنْ ٻَثٜىٰ دَغَ بَاكِنْ تٜىٰكُ، كٜىٰ دَ كِكَ تَٻَ ذَمَ ڟِبِرِے مَيْ ڧَرْڢِے عَتٜىٰكُ، كٜىٰ دَ مَذَوْنَنْكِ سُنْ تَٻَ ذَمَ أَبِنْ ڟُواْرُواْ غَ دُكَنْ وَطَنْدَ سُكٜىٰ ذَمَ كٜىٰوَيٜىٰ دَكٜىٰ؟

¹⁸ عَمَّا يَنْذُ ڧَسَاشٜىٰ نَبَاكِنْ تٜىٰكُ ذَاسُيِ ضَوَرْ جِكِے أَ رَانَرْ ڢَاطُوَرْكِ، ڟِبِرَيْ عَتٜىٰكُ، ذَاسُ ڢِرْغِتَ سَبُواْدَ ڧَارٜىٰوَرْكِ؞›‏ »‏

¹⁹ ‏«‏غَمَا إِنْجِنِ عُبَنْ‌غِجِ يَهْوٜىٰهْ، سَعَدَّ نَمَيْدَكٜىٰ كُڢَيْ كَمَرْ بِرَنٜىٰنْ دَ بَعَتَٻَ ذَمَ عَثِكِ بَ، ذَنْ نُڟَرْ دَكٜىٰ ثِكِنْ ظُرْڢِنْ تٜىٰكُ، إِنْ رُڢٜىٰكِ دَ ضُوَ مَيْ يَوَ؞

²⁰ ذَنْ جٜىٰڢَرْ دَكٜىٰ عَڧَسَا تَرٜىٰدَ وَطَنْدَ سُكَ غَنْ‌غَرَ ذُوَا وُرِنْ ذَمَنْ مَتَتُّو، ذُوَا وُرِنْ مُتَنٜىٰنْ دَا؞ ذَنْ كُمَسَا كِذَوْنَ عَڧَرْڧَشِنْ ڧَسَا، أَوُرِنْ دَيَكٜىٰ كُڢَيْ تُنْدَا، تَرٜىٰدَ وَطَنْدَ سُنْ رِغَا سُنْ غَنْ‌غَرَ وُرِنْ ذَمَنْ مَتَتُّو؞ بَذَاكِ سَاكٜىٰ دَاوُاْ كِطَوْكِ وُرِنْ ذَمَنْكِ عَثِكِنْ دُونِيَرْ مَاسُ رَيْ بَكُمَ؞

²¹ ذَنْسَا ڧَرْشٜىٰنْكِ يَذَمَ أَبِنْ ڟُواْرُواْ، بَذَاعَ ڧَارَ غَنِنْكِبَ؞ كُواْ أَنّٜىٰمٜىٰكِ مَا، بَذَاعَ غَنْكِبَ؞ نِے عُبَنْ‌غِجِ يَهْوٜىٰهْ نَا ڢَطَا؞»‏