هِظْڧِيَالْ 24 - أَتَّوْرَتْ دَ أَنَّبَاوَا

ݣُوتَنْثِنْ تُكُنْيَ مَيْ تَڢَسَ

¹ أَ رَانَ تَغُواْمَ غَ وَتَنْ غُواْمَ أَ شٜىٰكَرَا تَتَرَ، سَيْ يَهْوٜىٰهْ يَيِ مَغَنَ دَنِے ثٜىٰوَ

² ‏«‏يَا كَيْ طَنْ مُتُمْ، كَرُبُوتَ سُونَنْ وَنَّنْ رَانَ، وَنَّنْ رَانَ ثٜىٰ رَانَرْ دَ سَرْكِنْ بَابِيلَ يَكٜىٰوَيٜىٰ عُرُوشَلِيمَ دُواْمِنْ يَاڧِ؞

³ كَيِ وَجَمَعَرْ نَنْ مَيْ تَاوَيٜىٰ مَغَنَ دَ ݣُوتَنْثِ، كَثٜىٰمُسُ، ‏‹‏إِنْجِنِ عُبَنْ‌غِجِ يَهْوٜىٰهْ، ‏«‏ ‏‹‏سَيْ كَكَڢَ تُكُنْيَ عَكَنْ وُتَا، كَظُبَ ضُوَ عَثِكِنْتَ؞

⁴ كَظُبَ عَثِكِنْتَ غَٻَ غَٻَرْ نَامَ، دُكَنْ غَٻُواْٻِ مَاسُ ݣَوْ، ذَاٻَا ثِنْيَ دَ كَڢَطَ، ثِكَ تُكُنْيَرْ دَ ذَاٻَٻُّنْ ڧَسُسُوَ؞

⁵ طَوْكِ مَڢِے ݣَوْ دَغَ غَرْكٜىٰنْ، كَسَا إِتَاثٜىٰنْ وُتَا عَڧَرْڧَشِنْ تُكُنْيَرْ؞ كَبَرْ نَامَنْ يَتَڢَسَ سُواْسَيْ، يَدَڢُ تَرٜىٰدَ ڧَسُسُوَنْ؞

⁶ ‏«‏ ‏‹‏حَڧِيڧَ، إِنْجِنِ عُبَنْ‌غِجِ يَهْوٜىٰهْ، كَيْتُوانْ بِرْنِنَّنْ مَيْ ظُبْدَ جِنِ!‏ تُكُنْيَ ثٜىٰ مَيْ دَتِّ، وَدَّ دَتِّنْتَ بَيْ ڢِتَ دَغَ ثِكِنْتَ بَ!‏ ڢِتَرْ دَكُواْمٜىٰ عَثِكِنْتَ غَٻَ غَٻَ، كَدَ كَدَامُ دَ ذَاٻَا؞

⁷ غَمَا جِنِنْ دَ تَظُبَرْ يَنَ ثِكِنْتَ، تَظُبَشِ عَكَنْ دُوڟٜىٰ أَ ڢِيلِ؞ بَتَ ظُبَ جِنِنْ عَڧَسَا، عِنْدَ ذَاعَ رُڢٜىٰ دَ ڧُورَا بَ؞

⁸ دَ نُڢِنْ تَادَ ڢُشِنَ، دُواْمِنْ إِنْيِ رَامُوَا، نَظُبَ جِنِنْ دَ تَ ظُبَرْ عَكَنْ دُوڟٜىٰ أَڢِيلِ، دُواْمِنْ كَدَ أَ رُڢٜىٰشِ؞

⁹ حَڧِيڧَ، إِنْجِنِ عُبَنْ‌غِجِ يَهْوٜىٰهْ، كَيْتُوانْ بِرْنِ مَيْ ظُبْدَ جِنِ!‏ نِے مَا ذَنْ ڧَارَ يَوَنْ إِتَاثٜىٰنْ وُتَرْ؞

¹⁰ تَارَ غُنْ‌غُمَيْ، كَكُنَّ وُتَا، كَدَڢَ نَامَنْ سُواْسَيْ، كَهَطَ كَايَنْ يَجِ عَثِكِ، عَبَرْ ڧَسُسُوَنْ سُڧُواْنٜىٰ؞

¹¹ أَطُواْرَ تُكُنْيَرْ نَنْ مَرَرْ كُواْمٜىٰ عَبِسَنْ غَرْوَشِنْ، عَبَرْتَ تَيِ ذَاڢِ، حَرْ تَغُلَّرْتَ تَيِ جَاوُرْ، دَتِّنْتَ يَنَرْكٜىٰ عَثِكِنْتَ، ڧَظَنْتَرْتَ كُمَ تَڧُواْنٜىٰ ڧُرْمُسْ؞

¹² عَبَنْظَ نَغَجِيَرْ دَكَيْنَ، دَتِّنْتَ يَڧِ ڢِتَ دَغَ ثِكِنْتَ، أَجٜىٰڢَرْ دَ ڧَظَنْتَرْ ثِكِنْ وُتَا!‏

¹³ دُكْ دَ ڟَبْتَثٜىٰوَرْدَ نَيِ مِكِ، ڟَبْتَثٜىٰوَ دَغَ أَيُّكَنْكِ نَبَنْ ڨَمَ، بَاكِ ڟَبْتَثٜىٰ دَغَ ڧَظَنْتَرْكِبَ؞ بَذَاكِ سَاكٜىٰ سَامِ ڟَبْتَثٜىٰوَبَ سَيْ لُواْكَثِنْدَ نَغَمَ ڢُشِنَ عَكَنْكِ؞

¹⁴ ‏«‏ ‏‹‏نِے يَهْوٜىٰهْ نَا ڢَطَا، لُواْكَثِ يَنَ ذُوَا دَ ذَنْ طَوْكِ مَتَاكِ؞ نِے كُوَ بَذَنْ ثَنْجَ نِيَّتَبَ، بَذَنْ جَنْيٜىٰبَ، بَ كُوَ ذَنْ دَيْنَبَ؞ ذَنْ شَرْعَنْتَكِ بِسَغَ هَنْيُواْيِنْكِ دَ رَايُوَرْكِ؞ نِے عُبَنْ‌غِجِ يَهْوٜىٰهْ نَا ڢَطَا؞›‏ »‏

مَاتَرْ هِظْڧِيَالْ تَا مُتُ

¹⁵ يَهْوٜىٰهْ يَايِ مَغَنَ دَنِے ثٜىٰوَ

¹⁶ ‏«‏يَا كَيْ طَنْ مُتُمْ، غَاشِ ڢَرَتْ طَيَ ذَنْ طَوْكٜىٰ مَكَ أَبِنْدَ كَڢِ ڧَوْنَ دَغَ غَرٜىٰكَ، عَمَّا ڢَا بَذَاكَيِ كُوكَا، كُواْ مَكُواْكِ، كُواْ كَظُبَرْدَ هَوَيٜىٰبَ؞

¹⁷ كَيِ أَجِيَرْ ذُوثِيَا، عَمَّا بَذَاكَيِ دَ ڧَرْڢِبَ؞ كَدَ كَيِ مَكُواْكِ سَبُواْدَ وَدَّ تَمُتُ؞ كَنَطَ ضَوَنِنْكَ، كَسَا تَاكَلْمَنْكَ؞ كَدَ كَسَا حَنُّ عَكُمَتُ دُواْمِنْ نُونَ بَڧِنْ ثِكِ، كُواْ كَثِ عَبِنْثِ نَمَاسُ مَكُواْكِ؞»‏

¹⁸ سَيْ نَيِ مَغَنَ دَ مُتَنٜىٰ دَ سَڢٜىٰ دَ يَمَّ كُمَ مَاتَتَ تَمُتُ؞ وَشٜىٰغَرِ نَيِ يَدَّ عَكَ عُمَرْثٜىٰنِ؞

¹⁹ مُتَنٜىٰنْ كُوَ سُكَثٜىٰ مِنِ ‏«‏مٜىٰيَسَا كَنَ يِنْهَكَ، بَذَاكَ ڢَطَا مَنَ مَعَنَرْ وَطَنَّنْ أَبُبُوَ أَغَرٜىٰمُبَ؟»‏

²⁰ سَيْ نَثٜىٰ مُسُ ‏«‏يَهْوٜىٰهْ يَا ڢَطَا مِنِ،

²¹ إِنْيِ مَغَنَ دَ غِدَنْ إِسْرَٰٓءِيلَ ثٜىٰوَ ‏‹‏إِنْجِنِ عُبَنْ‌غِجِ يَهْوٜىٰهْ، ذَنْيِ بَنْظَ دَ وُرِينَ مَيْ ڟَرْكِے، أَبِنْ تَاڧَمَرْكُ، أَبِنْدَ كُكَڢِ ڧَوْنَ، أَبِنْدَ كُمَ يَكٜىٰ ڢَرَنْتَ مُكُ ذُوثِيَا؞ یَیَنْكُ مَظَا دَ مَاتَا وَطَنْدَ كُكَ بَرْسُ عَبَايَ، ذَاعَ كَشٜىٰسُ دَ تَكُواْبِے؞

²² ذَاكُ كُوَيِ كَمَرْ يَدَّ نَيِ، بَذَاكُ سَا حَنُّ عَكُمَتُ دُواْمِنْ نُونَ بَڧِنْ ثِكِيبَ، بَذَاكُثِ عَبِنْثِ نَمَاسُ مَكُواْكِبَ؞

²³ ذَاكُ نَطَ ضَوَنِنْكُ عَكَوُنَنْكُ كُسَا تَاكَلْمَنْكُ، بَذَاكُيِ مَكُواْكِ كُواْ كُوكَا بَ، عَمَّا ذَاكُ لَلَثٜىٰ عَثِكِنْ لَيْڢُواْڢِنْكُ كُنَ تَيِنْ نِيشِ؞

²⁴ تَهَكَ، هِظْڧِيَالْ ذَيْ ذَمَ عَلَمَ أَغَرٜىٰكُ؞ ذَاكُيِ كَمَرْ يَدَّ يَيِ؞ سَعَدَّ وَنَّنْ يَڢَرُ، ذَاكُ سَنِ ثٜىٰوَ نِنٜىٰ عُبَنْ‌غِجِ يَهْوٜىٰهْ؞›‏

²⁵ ‏«‏كَيْ كُمَ، يَا كَيْ طَنْ مُتُمْ، ذَنْ كَوَرْدَ وُرِنْ ٻُيَنْسُ دَغَ ثِكِنْسُ، وَتُواْ هَيْكَلِ، أَبِنْ تَاڧَمَرْسُ دَ دَرَجَرْسُ دَ أَبِنْدَ سُكَڢِے ڧَوْنَ دَ أَبِنْدَ يَكٜىٰ ڢَرَنْتَ مُسُ ذُوثِيَا، إِنْكُمَ كَوَرْدَ یَیَنْسُ مَظَا دَ مَاتَا؞

²⁶ أَ رَانَرْ نَنْ، وَنْدَ يَغُدُ دُواْمِنْ يَڟِيرَا ذَيْ كَٰوُاْ مَكَ لَابَرِ دَ كُنّٜىٰنْكَ ذَاكَجِے؞

²⁷ أَ رَانَرْ نَنْ، بَاكِنْكَ ذَيْ بُوطٜىٰ يَيِ مَغَنَ دَ وَنْدَ يَغُدُ يَڟِيرَا، بَذَاكَ كَاسَ يِنْ مَغَنَبَ كُمَ؞ تَهَكَ، ذَاكَ ذَمَ عَلَمَ أَغَرٜىٰسُ، سُو كُوَ ذَاسُ سَنِ ثٜىٰوَ نِنٜىٰ يَهْوٜىٰهْ؞»‏