هِظْڧِيَالْ 22 - أَتَّوْرَتْ دَ أَنَّبَاوَا

عُرُوشَلِيمَ مَيْ ظُبْ دَ جِنِ

¹ يَهْوٜىٰهْ يَايِ مَغَنَ دَنِے ثٜىٰوَ

² ‏«‏يَا كَيْ طَنْ مُتُمْ، كَيْ سَيْ كَيِ مُسُ شَرِيعَ؞ كَيِ وَبِرْنِنَّنْ مَيْ ظُبْدَ جِنِ شَرِيعَ؞ سَيْ كَسَنَرْ مَسَ دَ دُكَنْ أَيُّكَنْسَ نَبَنْ ڨَمَ؞

³ سَيْ كَثٜىٰ، ‏‹‏إِنْجِ عُبَنْ‌غِجِ يَهْوٜىٰهْ، كَيْتُوانْكَ، يَا كَيْ بِرْنِ مَيْ ظُبْدَ جِنِ عَثِكِنْكَ!‏ وَنَّنْ يَجَٰوُاْ لُواْكَثِنْ حُكُنْثِنْكَ، يَا كَيْ مَيْيِنْ غُمَكَ، دُواْمِنْ كَڧَظَنْتَرْ دَكَنْكَ!‏

⁴ أَلْحَكِنْكَ يَتَبَّتَا سَبُواْدَ ظُبْدَ جِنِنْدَ كَيِ، كَا ڧَظَنْتَرْ دَكَنْكَ تَوُرِنْ غُمَكَنْدَ كَيِ؞ كَا مَڟُواْ دَ ݣُونَكِنْكَ كُسَ، شٜىٰكَرُنْ دَ عَكَ ڧَدَّرَ مَكَ سُنْثِكَ؞ سَبُواْدَ حَكَ نَا مَيْدَكَيْ أَبِنْ بَعَ أَعِدُوانْ أَلْعُمَّيْ، كَذَمَ أَبِنْ دَارِيَا غَ دُكَنْ ڧَسَاشٜىٰ؞

⁵ وَطَنْدَ سُكٜىٰ كُسَدَ وَطَنْدَ سُكٜىٰ نٜىٰسَ، ذَاسُيِ مَكَ بَعَ، كَيْ بِرْنِ مَيْ مُوغُنْ سُونَ، ثِكٜىٰ دَ تَادَ حَنْكَلِ؞

⁶ ‏«‏ ‏‹‏غَاشِ، كُواْوَنٜىٰ شُوغَبَنْ إِسْرَٰٓءِيلَ وَنْدَ يَكٜىٰ عَثِكِنْكَ، كُواْوَنّٜىٰنْسُ بِسَغَ إِيكُوانْ دَ يَكٜىٰدَشِ، يَنَاثٜىٰ ثِكِنْ ظُبْدَ جِنِ؞

⁷ عَثِكِنْكَ أَنَ مَيْدَ إِيَايٜىٰ مَظَا دَ مَاتَا بَا وَنِ أَبُ بَنٜىٰ؞ بَڧِنْ دَسُكٜىٰ ذَمَ عَثِكِنْكَ أَنَ يِمُسُ دَنِّيَ، أَنَ كُمَ وُلَڧَنْتَ مَرَايُ دَ مَاتَانْدَ مَذَنْسُ سُكَ مُتُ؞

⁸ كَرٜىٰنَ أَبُبُوَنَ دَ عَكَ كٜىٰٻٜىٰ دَ ڟَرْكِے، كَيِ بَنْظَ دَ رَانَرْ هُوتُ تَمَكُواْ تَاوَ؞

⁹ عَثِكِنْكَ أَݣَويْ مُتَنٜىٰ مَاسُ بَظَ مَغَنَرْ ٻَاتَ سُونَ دُواْمِنْ أَ ظُبْدَ جِنِ؞ أَݣَويْ كُمَ مُتَنٜىٰنْ دَسُكٜىٰ ثِنْ عَبِنْثِنْ هَدَايَرْدَ عَكَ مِيڧَا وَغُمَكَ عَتُدَّيْ، سُنَ كُمَ عَيْكَتَ لَلَتَ عَثِكِنْكَ؞

¹⁰ عَثِكِنْكَ أَݣَويْ مُتَنٜىٰنْ دَسُكٜىٰ ݣُونَ دَ مَاتَانْ بَابَنْسُ؞ عَثِكِنْكَ كُمَ وَطَنْسُ سُنَ ݣُونَ دَ مَاتَا أَ لُواْكَثِنْ غَنِنْ أَلْعَادَرْسُ؞

¹¹ وَنِ يَعَيْكَتَ أَبِنْ ڨَمَ دَ مَاتَرْ مَڨُوبْثِنْسَ، وَنِ كُمَ يَڧَظَنْتَرْ دَ مَاتَرْ طَنْسَ دَ لَلَتَ، حَرْ مَا عَثِكِنْكَ وَنِ يَݣُونَ دَ یَرْعُوَرْسَ، وَتُواْ وَدَّ بَابَنْسُ طَيَ؞

¹² عَثِكِنْكَ مُتَنٜىٰ سُنَ كَرْٻَرْ ثِنْ حَنْثِ دُواْمِنْ سُظُبْدَ جِنِ؞ كَنَ كَرْٻَرْ ڧَظَامَرْ رِيبَ، كَنَ كُمَ كَرْٻَرْ ڧَارِ دَغَ رِيبَرْ بَاشِ، كَنَ ثِنْ رِيبَ عَكَنْ مَڨُوبْثِنْكَ تَوُرِنْ ثُوتَرْ دَ كَكٜىٰيِ مَسَ؞ كَا كُوَ مَنْتَادَنِے؞ نِے عُبَنْ‌غِجِ يَهْوٜىٰهْ نَا ڢَطَا؞

¹³ ‏«‏ ‏‹‏غَاشِ، نَا بُغَ حَنُّوَنَ سَبُواْدَ ڧَظَامَرْ رِيبَرْدَ كَثِ دَ ظُبْدَ جِنِنْ دَ عَكَيِ عَثِكِنْكَ؞

¹⁴ كُواْ ڧَرْڢِنْ ذُوثِيَارْكَ ذَيْ عِيَ جِمْرٜىٰوَ؟ كُواْ حَنُّوَنْكَ ذَاسُيِ ڧَرْڢِے أَ رَانَرْ دَ ذَنْ غَمُ دَكَيْ؟ نِے يَهْوٜىٰهْ نَا ڢَطَا، ذَنْ كُوَ عَيْكَتَ؞

¹⁵ ذَنْ وَاڟَرْ دَكَيْ كُواْعِنَ ثِكِنْ أَلْعُمَّيْ، إِنْكُمَ رَرَّبَكَ ثِكِنْ ڧَسَاشٜىٰ، ذَنْ كُوَ كَوَرْدَ ڧَظَنْتَرْكَ دَغَ ثِكِنْكَ؞

¹⁶ أَ عِدُوانْ أَلْعُمَّيْ، ذَاعَيِ بَنْظَ دَنِے تَدَلِيلِنْكَ، كَيْ كُوَ ذَاكَ سَنِ ثٜىٰوَ نِنٜىٰ يَهْوٜىٰهْ؞›‏ »‏

وُتَرْ اللَّهْ مَيْ ڟَبْتَثٜىٰوَ

¹⁷ يَهْوٜىٰهْ يَايِ مَغَنَ دَنِے ثٜىٰوَ

¹⁸ ‏«‏يَا كَيْ طَنْ مُتُمْ، أَغَرٜىٰنِ غِدَنْ إِسْرَٰٓءِيلَ سُنْ ذَمَ كَمَرْ دَتِّنْ دَ مَڧٜىٰرِ يَظُبَرْ بَايَنْدَ يَتَاثٜىٰ أَظُرْڢَا؞ دُكَنْسُ سُنْ ذَمَ كَمَرْ تَغُلَّ دَ كُظَ دَ بَڧِنْ ڧَرْڢٜىٰ دَ دَرْمَرْ دَ عَكَ بَرِ عَثِكِنْ وُتَا؞ سُنْ ذَمَ كَمَرْ دَتِّنْ أَظُرْڢَرْ دَ مَڧٜىٰرِ يَظُبَرْ؞

¹⁹ سَبُواْدَ حَكَ، إِنْجِنِ عُبَنْ‌غِجِ يَهْوٜىٰهْ، دُواْمِنْ دُكَنْكُ كُنْ ذَمَ كَمَرْ دَتِّنْ دَ مَڧٜىٰرِ يَظُبَرْ، ذَنْ تَتَّرَاكُ أَ عُرُوشَلِيمَ؞

²⁰ ذَنْ تَتَّرَاكُ كَمَرْ يَدَّ مُتُمْ يَكَنْ تَتَّارَ أَظُرْڢَا دَ تَغُلَّ دَ بَڧِنْ ڧَرْڢٜىٰ دَ دَرْمَ دَ كُمَ كُظَ عَثِكِنْ وُتَرْ مَڧٜىٰرَ، دُواْمِنْ أَ هُورَ وُتَا عَكَنْسُ سُنَرْكٜىٰ؞ حَكَ ذَنْ تَتَّرَاكُ عَثِكِنْ ڢُشِنَ دَ ثِكِنْ ذَاڢِنْ ڢُشِنَ إِنْ نَرْكَرْ دَكُو؞

²¹ ذَنْ تَتَّرَاكُ إِنْهُورَ مُكُ وُتَرْ ذَاڢِنْ ڢُشِنَ، ذَاكُ كُوَ نَرْكٜىٰ أَڟَكِيَرْتَ؞

²² كَمَرْ يَدَّ عَكَنْ نَرْكٜىٰ أَظُرْڢَا أَوُتَرْ مَڧٜىٰرَ، حَكَ ذَاكُ نَرْكٜىٰ عَثِكِنْتَ؞ ذَاكُ سَنِ نِے يَهْوٜىٰهْ نٜىٰ نَظُبُواْ مُكُ ذَاڢِنْ ڢُشِنَ؞»‏

ذُنُبَنْ شُوغَبَنِّنْ إِسْرَٰٓءِيلَ

²³ يَهْوٜىٰهْ يَايِ مَغَنَ دَنِے ثٜىٰوَ

²⁴ ‏«‏يَا كَيْ طَنْ مُتُمْ، كَثٜىٰ مَتَ، ‏‹‏كٜىٰ ڧَسَاثٜىٰ مَرَرْ ڟَبْتَ، وَدَّ أَ رَانَرْ ڢُشِنَ بَعَوَنْكٜىٰكِ دَ ضُوً سَمَبَ؞›‏

²⁵ ڧُنْ‌غِيَرْ أَنَّبَاوَنْتَ مَاسُ حَطِنْ بَاكِ سُنَ كَمَ دَ ذَاكِ مَيْ رُورِ يَايِنْ دَيَكٜىٰ يَيَّاغٜىٰ دَبَّرْدَ يَكَامَ؞ سُنْ ثِنْيٜىٰ رَايُكَنْ مُتَنٜىٰ، سُنْ ڨُوثٜىٰ كَايَنْ أَجِيَ دَ أَبُبُوَ مَاسُ دَرَجَ؞ سُنْ كُمَسَا مَاتَادَيَوَ سُنْ رَسَ مَذَنْسُ؞

²⁶ ڢِرِسْتُواْثِنْتَ سُنْ ٻَاتَ كُواْيَرْوَاتَا، سُنْيِ بَنْظَ دَ أَبُبُوَنَ دَ عَكَ كٜىٰٻٜىٰ دَ ڟَرْكِے؞ بَسُ نُونَ بَمْبَنْثِ ڟَكَانِنْ أَبِنْدَ يَكٜىٰ مَيْ ڟَرْكِے دَ مَرَرْ ڟَرْكِے بَ؞ بَسُ كُواْيَوَ مُتَنٜىٰ بَمْبَنْثِنْ أَبِنْدَ يَكٜىٰ مَرَرْ ڟَبْتَ دَ مَيْ ڟَبْتَبَ؞ بَنْدَ حَكَمَا سُنْ مَيْدَ رَانَكُنْ هُوتُ نَمَكُواْ نَوَ أَبِنْ بَنْظَ؞ حَرْ سُونَنَ يَڧَظَنْتُ عَثِكِنْسُ؞

²⁷ شُوغَبَنِّنْ دَسُكٜىٰ ذَمَ عَثِكِنْتَ كَمَ دَ ݣَرْكٜىٰتَيْ نٜىٰ مَاسُ يَيَّاغٜىٰ دَبَّرْ دَسُكَ كَامَ، سُنَ ظُبْدَ جِنِ، سُنَيِنْ كِسَنْ كَيْ دُواْمِنْ سُسَامِ ڧَظَامَرْ رِيبَ؞

²⁸ أَنَّبَاوَنْتَ سُنْ ٻُواْيٜىٰ ذُنُبَنْسُ كَمَرْ مَاسُ شَاڢٜىٰ بَنْ‌غُواْ دَ ڢَرَرْ ڧَسَا، سُنَ غَنِنْ رُعُيَرْ ڧَضْيَا، سُنَ كُمَيِنْ مُسُ دُوبَانْ ڧَضْيَا، سُنَ ثٜىٰوَ ‏‹‏إِنْجِ عُبَنْ‌غِجِ يَهْوٜىٰهْ،›‏ كُواْدَيَكٜىٰ نِے يَهْوٜىٰهْ بَنْ يِمَغَنَبَ؞

²⁹ مُتَنٜىٰنْ ڧَسَرْ سُنَيِنْ عَيْكِنْ ڨُوثٜىٰ دَ يِنْڢَشِ؞ سُنَتَيِ وَمَتَلَوْتَ دَ مَاسُ بُڧَاتَ دَنِّيَ، سُنَ تَيِ وَبَڧِ ثُوتَا بَابُ ڟُواْرُواْ؞

³⁰ نَا نٜىٰمِ مُتُمْ دَغَ ثِكِنْسُ وَنْدَ ذَيْ ڠَرَ كَتَنْ‌غَرْ يَڟَيَ أَغَبَنَ أَمَدَدِنْ ڧَسَرْ دُواْمِنْ كَدَ إِنْهَلَّكَرْ دَ عِتَ؞ عَمَّا بَنْ سَامِ كُواْوَبَ؞

³¹ سَبُواْدَ حَكَ، نَا ظُبَ ڢُشِنَ عَكَنْسُ؞ نَا ثِنْيٜىٰسُ دَ ذَاڢِنْ وُتَرْ ڢُشِنَ؞ نَا سَاكَ مُسُ بِسَغَ حَلِنْسُ؞ نِے يَهْوٜىٰهْ نَا ڢَطَا؞»‏