ڢِتُواْوَ 6 - أَتَّوْرَتْ دَ أَنَّبَاوَا1 سَيْ يَهْوٜىٰهْ يَثٜىٰ وَ مُوسَٰى «يَنْذُ ذَاكَغَ أَبِنْدَ ذَنْيِ دَ ڢِرْعَوْنَ؞ دَ هَنُّونَ مَيْ إِيكُواْ ذَنْ تِلَسْتَشِ يَبَرْسُ سُتَڢِے؞ عِ دَ هَنُّونَ مَيْ إِيكُواْ ذَنْسَاشِ يَكُواْرٜىٰسُ دَغَ ڧَسَرْسَ؞» اللَّهْ يَا سَاكٜىٰ كِرَنْ مُوسَٰى 2 اللَّهْ كُوَ يَثٜىٰ وَ مُوسَٰى، «نِنٜىٰ يَهْوٜىٰهْ؞ 3 غَ إِبْرَٰهِيمْ، غَ إِسْحَٰڧَ، غَ يَعْڧُوبَ نَبَيَّنَ كَيْنَ اللَّهْ مَيْ إِيكُواْ دُكَ؞ عَمَّا دَ ثِكَكِّيَرْ مَعَنَرْ سُونَنَ يَهْوٜىٰهْ، بَنْسَا سُكَسَنِّ دَشِيبَ؞ 4 «نَكُمَ كَڢَ يَرْجٜىٰجٜىٰنِيَتَ دَسُو ثٜىٰوَ ذَنْبَاسُ ڧَسَرْ كَنْعَنَ، ڧَسَا عِنْدَ سُكَيِ ذَمَنْ بَڧُنْثِ؞ 5 يَنْذُ نَجِ نِشٜىٰ نِشٜىٰنْ إِسْرَٰٓءِيلَاوَا، وَطَنْدَ مَصَرَاوَا سُكَ مَيَرْدَسُو بَايِ، نَاكُوَ تُنَ دَ يَرْجٜىٰجٜىٰنِيَتَ؞ 6 سَبُواْدَ حَكَ كَثٜىٰ وَ إِسْرَٰٓءِيلَاوَا، ‹نِنٜىٰ يَهْوٜىٰهْ؞ ذَنْ ڢِتَرْ دَكُو دَغَ دَنِّيَرْ مَصَرَاوَا؞ ذَنْ كُٻُتَرْ دَكُو دَغَ بَوْتَرْسُ؞ ذَنْ ڢَنْشٜىٰكُ دَ مَنْيَنْ أَيُّكَنْ بَنْ مَامَاكِ دَ كُمَ حُكُنْثِ مَيْ ذَاڢِ عَكَنْسُ؞ 7 ذَنْ طَوْكٜىٰكُ كُذَمَ جَمَعَتَ، نِے كُوَ ذَنْذَمَ اللَّهْ نْكُ؞ كُو كُوَ ذَاكُ سَنِ ثٜىٰوَ نِنٜىٰ يَهْوٜىٰهْ اللَّهْ نْكُ، وَنْدَ يَثٜىٰثٜىٰكُ دَغَ دَنِّيَرْ مَصَرَاوَا؞ 8 ذَنْ كَٰوُاْكُ ثِكِنْ ڧَسَرْدَ نَرَنْڟٜىٰ ذَنْبَا إِبْرَٰهِيمْ دَ إِسْحَٰڧَ دَ يَعْڧُوبَ؞ ذَنْبَاكُ ڧَسَرْ تَذَمَ مَلَّكَرْكُ تَغَادُواْ؞ نِنٜىٰ يَهْوٜىٰهْ؞› » 9 مُوسَٰى كُوَ يَا ڢَطَا وَ إِسْرَٰٓءِيلَاوَا وَنَّنْ مَغَنَ، عَمَّا سُنْڧِے كَسَ كُنّٜىٰ أَغَرٜىٰشِ، غَمَا سُنَدَ ٻَثِنْ رَيْ سَبُواْدَ ڟَنَنِنْ عَيْكِنْ بَوْتَا؞ 10 سَيْ يَهْوٜىٰهْ يَيِ مَغَنَ دَ مُوسَٰى، 11 «كَكُواْمَ وُرِنْ سَرْكِے ڢِرْعَوْنَ نَ مَصَرْ كَڢَطَا مَسَ يَبَرْ جَمَعَرْ إِسْرَٰٓءِيلَ سُڢِتَ دَغَ ڧَسَرْسَ؞» 12 عَمَّا مُوسَٰى يَأَمْسَا وَ يَهْوٜىٰهْ يَثٜىٰ «دُوبَ، تُنْدَيَكٜىٰ إِسْرَٰٓءِيلَاوَا بَسُ كَسَ كُنّٜىٰ غَرٜىٰنِبَ، يَيَ ڢِرْعَوْنَ ذَيْ كَسَ كُنّٜىٰ أَغَرٜىٰنِ، نِے مُتُمْ مَيْ نَوْيِنْ بَاكِ؟» 13 يَهْوٜىٰهْ يَيِ مَغَنَ دَ مُوسَٰى دَ هَٰرُونَ، يَعُمَرْثٜىٰسُ يَثٜىٰ «كُكُواْمَ وُرِنْ جَمَعَرْ إِسْرَٰٓءِيلَ دَ سَرْكِے ڢِرْعَوْنَ نَ مَصَرْ، كُڢَطَا مُسُ ثٜىٰوَ نَعُمَرْثٜىٰكُ كُڢِتَرْدَ جَمَعَرْ إِسْرَٰٓءِيلَ دَغَ ثِكِنْ ڧَسَرْ مَصَرْ؞» أَصَلِنْ مُوسَٰى دَ هَٰرُونَ 14 وَطَنَّنْ سُونٜىٰ شُوغَبَنِّنْ غِدَاجٜىٰنْ كَاكَنِّنْ جَمَعَرْ إِسْرَٰٓءِيلَ؞ یَیَ مَظَا نَ رَعُبَيْنُ، طَنْ ڢَارِ نَ إِسْرَٰٓءِيلَ، سُونٜىٰ هَنُواكْ دَ ڢَلُّ دَ هٜىٰظْرُوانْ دَ كَرْمِ؞ وَطَنَّنْ سُونٜىٰ دَنْ‌غُواْغِنْ رَعُبَيْنُ؞ 15 یَیَ مَظَا نَ سِمٜىٰيُوانْ سُونٜىٰ يٜىٰمُيٜىٰلْ دَ يَمِنْ دَ عُواْهَدْ دَ يَكِنْ دَ ذُواْهَرْ دَ طَالُوتَ وَنْدَ یَرْ ڧَسَرْ كَنْعَنَ تَحَيْڢَ؞ وَطَنَّنْ سُونٜىٰ دَنْ‌غُواْغِنْ سِمٜىٰيُوانْ؞ 16 وَطَنَّنْ سُونٜىٰ سُونَيٜىٰنْ یَیَ مَظَا نَ لَوِ، بِسَغَ شٜىٰكَرُنْسُ، غٜىٰرْشُوانْ دَ كُواْهَتْ دَ مٜىٰرَرِ؞ لَوِ يَيِ شٜىٰكَرَا طَرِے طَيَ دَ تَلَاتِنْ دَ بَݣَويْ كَاڢِنْ يَمُتُ؞ 17 یَیَ مَظَا نَ غٜىٰرْشُوانْ سُونٜىٰ لِبْنِ دَ شِمٜىٰيِ دَ دَنْ‌غِنْسُ؞ 18 یَیَ مَظَا نَ كُواْهَتْ سُونٜىٰ أَمْرَمْ دَ إِظْهَرْ دَ هٜىٰبْرُوانْ دَ عُظِّيٜىٰلْ؞ كُواْهَتْ كُوَ يَيِ شٜىٰكَرَا طَرِے طَيَ دَ تَلَاتِنْ دَ عُكُ كَاڢِنْ يَمُتُ؞ 19 یَیَ مَظَا نَ مٜىٰرَرِ سُونٜىٰ مَلِ دَ مُشِ؞ وَطَنَّنْ سُونٜىٰ دَنْ‌غُواْغِنْ لَوِ بِسَغَ ڟَارَرْسُ؞ 20 أَمْرَمْ يَا عَوْرِ يُواْكَبٜىٰدْ یَرْعُوَرْ بَابَنْسَ، تَا كُوَ حَيْڢَ مَسَ هَٰرُونَ دَ مُوسَٰى؞ أَمْرَمْ يَيِ شٜىٰكَرَا طَرِے طَيَ دَ تَلَاتِنْ دَ بَݣَويْ كَاڢِنْ يَمُتُ؞ 21 یَیَ مَظَا نَ إِظْهَرْ سُونٜىٰ ڧَارُونَ دَ نٜىٰڢٜىٰكْ دَ ظِكِرِ؞ 22 یَیَ مَظَا نَ عُظِّيٜىٰلْ سُونٜىٰ مِشَيٜىٰلْ دَ عٜىٰلْظَڢَنْ دَ سِتِرِ؞ 23 هَٰرُونَ يَا عَوْرِ عٜىٰلِشٜىٰبَ، یَرْ أَمِّنَدَبْ یَرْعُوَرْ نَشُوانْ، تَا كُوَ حَيْڢَ مَسَ نَدَبْ دَ أَبِهُ دَ عٜىٰلٜىٰيَظَرْ دَ عِتَمَرْ؞ 24 یَیَ مَظَا نَ ڧَارُونَ سُونٜىٰ أَسِّرْ دَ عٜىٰلْكَنَ دَ أَبِيَسَڢْ؞ وَطَنَّنْ سُونٜىٰ دَنْ‌غُواْغِنْ ڧَارُونَ؞ 25 عٜىٰلٜىٰيَظَرْ طَنْ هَٰرُونَ يَا عَوْرِ طَيَ دَغَ ثِكِنْ یَیَ مَتَ نَ ڢُتِيٜىٰلْ، تَا كُوَ حَيْڢَ مَسَ ڢِنٜىٰهَسْ؞ وَطَنَّنْ سُونٜىٰ شُوغَبَنِّنْ غِدَاجٜىٰنْ كَاكَنِّنْ لَوِ بِسَغَ دَنْ‌غُواْغِنْسُ؞ 26 وَنَّنْ هَٰرُونَ دَ مُوسَٰى سُونٜىٰ وَطَنْدَ يَهْوٜىٰهْ يَيِ مُسُ مَغَنَ ثٜىٰوَ «كُڢِتَرْدَ جَمَعَرْ إِسْرَٰٓءِيلَ دَغَ ڧَسَرْ مَصَرْ، ڧُنْ‌غِيَ ڧُنْ‌غِيَ؞» 27 وَنَّنْ مُوسَٰى دَ هَٰرُونَ سُونٜىٰ سُكَيِ مَغَنَ دَ سَرْكِے ڢِرْعَوْنَ نَ مَصَرْ دُواْمِنْ يَبَرْ جَمَعَرْ إِسْرَٰٓءِيلَ سُڢِتَ دَغَ مَصَرْ؞ مَيْمَيْتَاوَرْ لَابَرِنْ كِرَنْ مُوسَٰى 28 أَ رَانَرْدَ يَهْوٜىٰهْ يَيِ مَغَنَ دَ مُوسَٰى عَڧَسَرْ مَصَرْ يَثٜىٰ، 29 «نِنٜىٰ يَهْوٜىٰهْ؞ سَيْ كَڢَطَا وَ سَرْكِے ڢِرْعَوْنَ نَ مَصَرْ دُكَنْ أَبِنْدَ نَڢَطَا مَكَ؞» 30 عَمَّا مُوسَٰى يَثٜىٰ وَ يَهْوٜىٰهْ «غَاشِ، نِے مُتُمْ مَيْ نَوْيِنْ بَاكِنٜىٰ، يَيَ ڢِرْعَوْنَ ذَيْ كَسَ كُنّٜىٰ غَرٜىٰنِ؟» |
Hausa Common Language Ajami Bible © The Bible Society of Nigeria, 2020
Bible Society of Nigeria