ڢِتُواْوَ 30 - أَتَّوْرَتْ دَ أَنَّبَاوَا

بَغَدٜىٰ نَڧُواْنَ تُرَارٜىٰ

¹ ‏«‏ذَاكَيِ بَغَدٜىٰ نَ إِتَاثٜىٰنْ عَكَشِيَ دُواْمِنْ ڧُواْنَ تُرَارٜىٰ؞

² ڟَوُانْسَ ذَيْ كَيْ ڧَڢَا طَيَ دَ رَبِے، ڢَاطِنْسَ كُمَ ڧَڢَا طَيَ دَ رَبِے، وَتُواْ ڟَوُانْ دَ ڢَاطِنْ دَيْدَيْنٜىٰ؞ ڟَيِنْسَ ذَيْ كَيْ ڧَڢَا عُكُ؞ عَكُواْوَنٜىٰ ݣُونَ حُطُ نَبَغَدٜىٰنْ، ذَاكَيِ ڧَهُواْ حَطٜىٰ دَشِ؞

³ ذَاكَ رُڢٜىٰ جِكِنْ بَغَدٜىٰنْ دَ ظِينَارِيَ ظَلَّ دَ سَمَنْسَ دَ غٜىٰڢٜىٰ غٜىٰڢٜىٰنْسَ دَ ڧَهُواْنِنْسَ؞ كَيِ وَدُكَنْ بَاكِنْ غٜىٰڢٜىٰ غٜىٰڢٜىٰنْسَ أَدُوانْ ظِينَارِيَ؞

⁴ ذَاكَيِ ذُواْبٜىٰ بِيُ نَظِينَارِيَ دُواْمِنْسَ؞ ذَاكَ كَڢَسُ عَڧَسَا دَ بَاكِنْ غٜىٰڢٜىٰ غٜىٰڢٜىٰنْسَ أَغٜىٰڢٜىٰ بِيُ نَبَغَدٜىٰنْ؞ ذُواْبَّنَّنْ ذَاسُ رِڧٜىٰ سَنْدُنَنْ دَ ذَاعَ طَوْكَ بَغَدٜىٰنْ؞

⁵ سَنْدُنَنْ ذَاعَيِ سُونٜىٰ دَ إِتَاثٜىٰنْ عَكَشِيَ عَكُمَ رُڢٜىٰ جِكِنْسُ دَ ظِينَارِيَ؞

⁶ ذَاكَ أَجِيٜىٰ بَغَدٜىٰ نَڧُواْنَ تُرَارٜىٰ أَغَبَنْ لَبُلٜىٰنْدَ يَتَرٜىٰ عَݣُوتِنْ شَيْدَرْ يَرْجٜىٰجٜىٰنِيَ، وَنْدَ مُرْڢِنْسَ شِينٜىٰ وُرِنْ طَوْكَرْ أَلْحَكِنْ ذُنُوبِ عِنْدَ ذَنْسَدُ دَكَيْ؞

⁷ كُواْوَثٜىٰ سَاڢِيَ سَعَدَّ هَٰرُونَ يَشِغُواْ يَشِرْيَ ڢِتِلُ، ذَيْ ڧُواْنَ تُرَارٜىٰ مَيْ ڧَنْشِ عَكَنْ بَغَدٜىٰنْ؞

⁸ كُواْوَثٜىٰ يَمَّ سَعَدَّ يَكٜىٰ شِرْيَ ڢِتِلُ، ذَيْ ڧُواْنَ تُرَارٜىٰنَّنْ؞ هَدَايَرْ تُرَارٜىٰ مَيْ ڧَنْشِ كٜىٰنَنْ أَغَبَنْ يَهْوٜىٰهْ دَغَ نَنْ حَرْ إِيَاكَرْ ڟَارَرَّكِنْكُ؞

⁹ بَذَاكَ مِيڧَ تُرَارٜىٰ مَرَرْ ڟَرْكِے عَكَنْ وَنَّنْ بَغَدٜىٰبَ، كُواْ هَدَايَ تَڧُواْنَاوَا، كُواْ هَدَايَ تَهَڟِ، كُواْ هَدَايَ تَأَبِنْشَا؞

¹⁰ سَوْ طَيَ تَكْ أَ شٜىٰكَرَا هَٰرُونَ ذَيْ ڟَبْتَثٜىٰ بَغَدٜىٰنْ تَوُرِنْ سَا جِنِ عَڧَهُواْنِنْسَ حُطُ؞ ذَيْ يِوَنَّنْ دَ جِنِنْ بِجِمِنْ هَدَايَ تَطَوْكَرْ أَلْحَكِنْ ذُنُوبِ؞ ذَاعَ دِنْ‌غَ يِنْ وَنَّنْ سَوْ طَيَ أَ شٜىٰكَرَا دَغَ نَنْ حَرْ إِيَاكَرْ ڟَارَرَّكِنْكُ؞ وَنَّنْ بَغَدٜىٰ، أَنْكٜىٰٻٜىٰشِ دَ ڟَرْكِے نٜىٰ غَ يَهْوٜىٰهْ؞»‏

هَرَاجِ دُواْمِنْ تٜىٰنْتِنْ كَسَنْثٜىٰوَرْ يَهْوٜىٰهْ

¹¹ يَهْوٜىٰهْ كُوَ يَثٜىٰ وَ مُوسَٰى،

¹² ‏«‏سَعَدَّ ذَاكَ ڧِرْغَ مُتَنٜىٰنْ إِسْرَٰٓءِيلَ، أَ لُواْكَثِنْ، كُواْوَنٜىٰ مُتُمْ ذَيْبِيَ هَرَاجِ غَ يَهْوٜىٰهْ دُواْمِنْ يَڢَنْشِ رَنْسَ، دُواْمِنْ كَدَ بَلَعِ يَڢَاطُواْ عَثِكِنْ مُتَنٜىٰنْ يَايِنْ دَ عَكٜىٰ لِسَّڢْتَاسُ؞

¹³ غَا أَبِنْدَ دُكْ وَنْدَ عَكَ ڧِرْغَ ذَيْبِيَ، رَبِنْ مَعَوْنِنْ أَظُرْڢَا بِسَغَ مَعَوْنِنْ دَ عَكٜىٰ أَمْڢَانِ دَشِ أَ وُرِے مَيْ ڟَرْكِے؞ كُواْوَنٜىٰ مُتُمْ ذَيْبِيَ وَنَّنْ، بَيْكُواْ غَ يَهْوٜىٰهْ كٜىٰنَنْ؞

¹⁴ دُكْ وَنْدَ عَكَ ڧِرْغَ، وَنْدَ شٜىٰكَرُنْسَ سُنْ كَيْ عَشِرِنْ ذُوَا سَمَ، ذَيْبِيَ وَنَّنْ هَرَاجِ غَ يَهْوٜىٰهْ؞

¹⁵ أَ لُواْكَثِنْ دَ ذَاعَ بَادَ وَنَّنْ هَرَاجِ غَ يَهْوٜىٰهْ دُواْمِنْ ڢَنْسَرْ رَنْكُ، مَيْ أَرْزِڧِ بَذَيْبِيَ ڢِيٜىٰدَ رَبِنْ مَعَوْنِنْ بَ، حَكَمَا تَلَكَ بَذَيْبَادَ أَبِنْدَ يَكَاسَ رَبِنْ مَعَوْنِنْ بَ؞

¹⁶ ذَاكَ كَرْٻِ وَنَّنْ كُطِنْ ڢَنْسَرْ رَنْكُ دَغَ حَنُّنْ مُتَنٜىٰنْ إِسْرَٰٓءِيلَ، عَيِ أَمْڢَانِ دَشِ وَجٜىٰنْ كُلَ دَ تٜىٰنْتِنْ سَدُوَ دَ يَهْوٜىٰهْ؞ وَنَّنْ هَرَاجِ ذَيْ ذَمَ أَبِنْ تُنَاوَا غَ مُتَنٜىٰنْ إِسْرَٰٓءِيلَ أَغَبَنْ يَهْوٜىٰهْ ثٜىٰوَ سُنْ ڢَنْشِ رَنْسُ؞»‏

ڧَتُوانْ ݣُونُواْ نَتَغُلَّ

¹⁷ سَيْ يَهْوٜىٰهْ يَثٜىٰ وَ مُوسَٰى،

¹⁸ ‏«‏ذَاكَيِ ڧَتُوانْ ݣُونُواْ نَتَغُلَّ دُواْمِنْ وَنْكٜىٰ حَنُّوَ دَ ڧَڢَاڢُ، كَكُمَيِ مَسَ غِنْدِنْ ذَمَ نَتَغُلَّ؞ ذَاكَسَا شِ ڟَكَانِنْ تٜىٰنْتِنْ سَدُوَ دَ بَغَدٜىٰنْ هَدَايَ، ذَاكَ كُمَسَا ضُوَ عَثِكِنْسَ؞

¹⁹ أَوُرِنْ نٜىٰ هَٰرُونَ دَ یَیَنْسَ مَظَا ذَاسُوَنْكٜىٰ حَنُّوَنْسُ دَ ڧَڢَاڢُنْسُ؞

²⁰ كَاڢِنْ سُشِغَ تٜىٰنْتِنْ سَدُوَ دَ يَهْوٜىٰهْ، كُواْ كَاڢِنْ سُيِ كُسَدَ بَغَدٜىٰنْ دُواْمِنْ سُمِيڧَ هَدَايَرْدَ عَكَ مِيڧَ دَ وُتَا غَ يَهْوٜىٰهْ، دُواْلٜىٰنٜىٰ سُوَنْكٜىٰ كَنْسُ دَ ضُوَ دُواْمِنْ كَدَ سُمُتُ؞

²¹ هَٰرُونَ دَ ذُرِيَرْسَ ذَاسُوَنْكٜىٰ حَنُّوَنْسُ دَ ڧَڢَاڢُنْسُ دُواْمِنْ كَدَ سُمُتُ؞ وَنَّنْ ذَيْ ذَمَ مُسُ ڧَٰعِدَ تَدِنْدِنْدِنْ دَغَ نَنْ حَرْ إِيَاكَرْ ڟَارَرْسُ؞»‏

مَنْ كٜىٰٻٜىٰوَ

²² سَيْ يَهْوٜىٰهْ يَثٜىٰ وَ مُوسَٰى،

²³ ‏«‏طَوْكِ كَايَنْ يَجِ مَڢِے ݣَوْ، وَتُواْ كِلُواْ شِدَ نَضُوً مُرْ دَ كِلُواْ عُكُ نَسِنَمُوانْ مَيْ ڧَنْشِ دَ كِلُواْ عُكُ نَثِيَوَ مَيْ ڧَنْشِ،

²⁴ دَ كِلُواْ شِدَ نَكَسِّيَ مَيْ ڧَنْشِ، بِسَغَ مَعَوْنِنْ أَظُرْڢَا وَنْدَ عَكٜىٰيِنْ أَمْڢَانِ دَشِ أَ وُرِے مَيْ ڟَرْكِے، تَرٜىٰدَ لِتَ حُطُ نَمَنْ ظَيْتُنْ؞

²⁵ دَ وَطَنَّنْ كَايَنْ ڧَنْشِ ذَاكَيِ مَنْ كٜىٰٻٜىٰوَ مَيْ ڟَرْكِے، وَنْدَ عَكَ ڠَرَ كَمَرْ يَدَّ مَيْيِنْ تُرَارٜىٰ يَكٜىٰيِ؞ ذَيْ ذَمَ مَنْ كٜىٰٻٜىٰوَ مَيْ ڟَرْكِے؞

²⁶ دَ وَنَّنْ مَيْ ذَاكَ كٜىٰٻٜىٰ تٜىٰنْتِنْ سَدُوَ دَ يَهْوٜىٰهْ دَ عَݣُوتِنْ شَيْدَرْ يَرْجٜىٰجٜىٰنِيَ،

²⁷ دَ تٜىٰبُرِنْ دَ دُكَنْ كَايَنْ عَيْكِنْسَ دَ سَنْدَا مَيْ رِڧٜىٰ ڢِتِلُ دَ دُكَنْ كَايَنْ عَيْكِنْسَ دَ بَغَدٜىٰنْ ڧُواْنَ تُرَارٜىٰ،

²⁸ دَ بَغَدٜىٰنْ هَدَايَ تَڧُواْنَاوَا دَ دُكَنْ كَايَنْ عَيْكِنْسَ دَ كُمَ ڧَتُوانْ ݣُونُواْ نَتَغُلَّ تَرٜىٰدَ غِنْدِنْ ذَمَنْسَ؞

²⁹ ذَاكَ كٜىٰٻٜىٰسُ دُواْمِنْ سُذَمَ دَ ڟَرْكِے سُواْسَيْ، كُمَ دُكْ أَبِنْدَ يَتَٻَسُ، ذَيْ ذَمَ مَيْ ڟَرْكِے؞

³⁰ ذَاكَ ظُبَاوَ هَٰرُونَ دَ یَیَنْسَ مَنْ كٜىٰٻٜىٰوَ، كَكٜىٰٻٜىٰسُ دَ ڟَرْكِے دُواْمِنْ سُيِ مِنِ حِدِمَ تَڢِرِسْتُواْثِے؞

³¹ ذَاكَ ڢَطَا وَمُتَنٜىٰنْ إِسْرَٰٓءِيلَ ثٜىٰوَ وَنَّنْ ذَيْ ذَمَ مَنْ كٜىٰٻٜىٰوَ مَيْ ڟَرْكِے نَوَ دَغَ نَنْ حَرْ إِيَاكَرْ ڟَارَرَّكِنْكُ؞

³² بَذَاعَ ظُبَشِ عَكَنْ كُواْوَبَ، كُمَ بَذَاعَ شِرْيَ وَنِ مَيْ إِرِنْسَبَ، غَمَا مَيْ ڟَرْكِے نٜىٰ، كُمَ ذَاكُ كِيَايٜىٰشِ دَ ڟَرْكِے؞

³³ دُكْ وَنْدَ يَشِرْيَ وَنِ مَيْ إِرِنْسَ كُواْ كُوَ يَسَا عَكَنْ وَنِنْدَ بَڢِرِسْتِبَ، ذَاعَ كَوَرْ دَشِ دَغَ جَمَعَرْ إِسْرَٰٓءِيلَ؞»‏

تُرَارٜىٰ مَيْ ڧَنْشِ

³⁴ سَيْ يَهْوٜىٰهْ يَثٜىٰ وَ مُوسَٰى ‏«‏ذَاكَ طَوْكِ كَايَنْ يَجِ مَاسُ ڧَنْشِ، وَتُواْ سِتَكْتٜىٰ دَ عُواْنِكَ دَ غَلْبَنُمْ، كَايَنْ يَجِ مَاسُ ڧَنْشِ تَرٜىٰدَ تُرَارٜىٰنْ لُبَّنْ، كَأَوْنَسُ دَيْدَيْ دَ جُونَ؞

³⁵ دَ وَطَنَّنْ ذَاكَيِ وَنِ تُرَارٜىٰ مَيْ ڧَنْشِ، وَنْدَ عَكَ ڠَرَ كَمَرْ يَدَّ مَيْ تُرَارٜىٰ يَكٜىٰيِ، عَكُمَسَا مَسَ غِشِرِ؞ تُرَارٜىٰ مَيْ ڧَنْشِ كٜىٰنَنْ، مَيْ ڟَرْكِے دَ كُمَ وَنْدَ عَكَ تَاثٜىٰ؞

³⁶ ذَاكَ طِبَ كَطَنْ دَغَ ثِكِ كَدَكَشِ يَذَمَ غَارِ، كَيَيَّڢَا شِ أَغَبَنْ عَݣُوتِنْ شَيْدَرْ يَرْجٜىٰجٜىٰنِيَ عَثِكِنْ تٜىٰنْتِنْ سَدُوَ عِنْدَ ذَنْسَدُ دَكَيْ؞ وَنَّنْ تُرَارٜىٰ ذَيْ ذَمَ مُكُ أَبُ مَيْ ڟَرْكِے سُواْسَيْ؞

³⁷ بَذَاكُ شِرْيَ وَكَنْكُ وَنِ تُرَارٜىٰ مَيْ ڧَنْشِ إِرِنْ وَنَّنْبَ؞ وَنَّنْ تُرَارٜىٰ ذَيْ ذَمَ مُكُ أَبِنْدَ عَكَ كٜىٰٻٜىٰ دَ ڟَرْكِے غَ يَهْوٜىٰهْ؞

³⁸ دُكْ وَنْدَ يَشِرْيَ وَنِ تُرَارٜىٰ إِرِنْسَ دُواْمِنْ أَمْڢَانِنْ كَنْسَ، ذَاعَ كَوَرْ دَشِ دَغَ جَمَعَرْ إِسْرَٰٓءِيلَ؞»‏