ڢِتُواْوَ 3 - أَتَّوْرَتْ دَ أَنَّبَاوَا

اللَّهْ يَا كِرَا مُوسَٰى دُواْمِنْ عَيْكِنْسَ

¹ أَنَانً وَتَرَانَ مُوسَٰى يَنَ كِيوُانْ غَرْكٜىٰنْ يِتْرُواْ بَابَنْ مَاتَرْسَ، ڢِرِسْتِ نَ مَدْيَنَ، يَا بِيدَ غَرْكٜىٰنْسَ تَثِكِنْ دَاجِ حَرْ يَكَيْ هُواْرٜىٰبْ، وَتُواْ بَبَّنْ تُدُنْ اللَّهْ؞

² أَ نَنْ مَلاَىِٕكَنْ يَهْوٜىٰهْ يَا بَيَّنَ أَغَرٜىٰشِ عَثِكِنْ هَرْشٜىٰنْ وُتَادَغَ ڧَرَمِنْ إِتَاثٜىٰ؞ دَ مُوسَٰى يَدُوبَ، يَيِ مَامَاكِ سَبُواْدَ ڧَرَمِنْ إِتَاثٜىٰنْ يَنَ ثِنْ وُتَا عَمَّا بَيْ ڧُواْنٜىٰبَ؞

³ مُوسَٰى يَثٜىٰ أَ رَنْسَ ‏«‏وَنَّنْ أَبِنْ مَامَاكِ نٜىٰ، دُوانْمٜىٰ وَنَّنْ ڧَرَمِنْ إِتَاثٜىٰ بَيْ ڧُواْنٜىٰبَ؟ بَرِ إِنْ مَڟُواْ كُسَ إِنْ‌غَنِ؞»‏

⁴ سَعَدَّ يَهْوٜىٰهْ يَغَ مُوسَٰى يَنَ مَڟُواْوَ دُواْمِنْ يَدُوبَ، سَيْ اللَّهْ يَكِرَا شِ دَغَ ثِكِنْ ڟَكِيَرْ ڧَرَمِنْ إِتَاثٜىٰنْ، يَثٜىٰ ‏«‏مُوسَٰى!‏ مُوسَٰى!‏»‏ مُوسَٰى يَأَمْسَ يَثٜىٰ ‏«‏نَعَمْ!‏ غَا نِے نَنْ؞»‏

⁵ سَيْ اللَّهْ يَثٜىٰ ‏«‏كَدَ كَڧَارَ مَڟُواْوَ كُسَ!‏ ثِرٜىٰ تَاكَلْمَنْكَ، غَمَا وُرِنْ دَ كَكٜىٰ ڟَيٜىٰ، وُرِے مَيْ ڟَرْكِے نٜىٰ؞

⁶ نِنٜىٰ اللَّهْ نَكَاكَنِّنْكَ، وَتُواْ اللَّهْ نَ إِبْرَٰهِيمْ، اللَّهْ نَ إِسْحَٰڧَ، اللَّهْ نَ يَعْڧُوبَ؞»‏ سَعَدَّ مُوسَٰى يَا جِ وَنَّنْ، يَرُڢٜىٰ ڢُسْكَرْسَ غَمَا يَنَ جِنْ ڟُواْرُواْ يَدُوبِے اللَّهْ؞

⁷ سَيْ يَهْوٜىٰهْ يَثٜىٰمَسَ ‏«‏نَغَ عَذَابَرْ دَ جَمَعَتَ سُكٜىٰشَا عَثِكِنْ مَصَرْ؞ نَجِ كُوكَنْسُ سَبُواْدَ رَشِنْ تَوْسَيِنْ شُوغَبَنِّنْسُ نَعَيْكِنْ دُواْلٜىٰ؞ حَڧِيڧَ، نَسَنْ دُكَنْ وَهَلَرْسُ؞

⁸ سَبُواْدَ حَكَ نَسَوْكَ دُواْمِنْ إِنْ كُٻُتَرْ دَسُو دَغَ حَنُّنْ مَصَرَاوَا، إِنْكُمَ ڢِتَرْ دَسُو دَغَ ڧَسَرْ مَصَرْ ذُوَا ثِكِنْ ڧَسَا مَيْݣَوْ، ڧَسَا مَيْ ڢَاطِ، ڧَسَا مَيْ أَمْڢَانِ كُمَ، إِنْكَيْسُ ذُوَا ڧَسَرْ كَنْعَنِيَاوَا دَ هِتِّيَاوَا دَ أَمُواْرِيَاوَا دَ ڢٜىٰرِظِّيَاوَا دَ هِوِيَاوَا دَ يٜىٰبُسِيَاوَا؞

⁹ يَنْذُ ڢَا، كُوكَنْ جَمَعَتَ يَا ذُواْ غَرٜىٰنِ؞ نَكُمَ غَا يَدَّ مَصَرَاوَا سُكٜىٰ دَنّٜىٰسُ؞

¹⁰ يَنْذُ ذَنْعَيْكٜىٰكَ وُرِنْ ڢِرْعَوْنَ دُواْمِنْ كَڢِتَرْدَ جَمَعَتَ، وَتُواْ جَمَعَرْ إِسْرَٰٓءِيلَ دَغَ ثِكِنْ ڧَسَرْ مَصَرْ؞»‏

¹¹ عَمَّا مُوسَٰى يَثٜىٰ وَ اللَّهْ ‏«‏وَنٜىٰنٜىٰنِے دَ حَرْ ذَنْتَڢِے وُرِنْ ڢِرْعَوْنَ، إِنْكُمَ ڢِتَرْدَ جَمَعَرْ إِسْرَٰٓءِيلَ دَغَ ثِكِنْ ڧَسَرْ مَصَرْ؟»‏

¹² سَيْ اللَّهْ يَثٜىٰ ‏«‏ذَنْ كَسَنْثٜىٰ تَرٜىٰدَكَيْ؞ غَا أَبِنْدَ ذَيْ ذَمَ عَلَمَ أَغَرٜىٰكَ ثٜىٰوَ نِنٜىٰ نَا عَيْكٜىٰكَ، سَعَدَّ كَڢِتَرْدَ جَمَعَرْ إِسْرَٰٓءِيلَ دَغَ ڧَسَرْ مَصَرْ، عَكَنْ وَنَّنْ بَبَّنْ تُدُ ذَاكُيِ وَ اللَّهْ سُجَّدَ؞»‏

اللَّهْ يَا بَيَّنَ سُونَنْسَ

¹³ عَمَّا مُوسَٰى يَثٜىٰ وَ اللَّهْ ‏«‏سَعَدَّ نَتَڢِے وُرِنْ إِسْرَٰٓءِيلَاوَا نَثٜىٰمُسُ، ‏‹‏اللَّهْ نَكَاكَنِّنْمُ يَا عَيْكٜىٰنِ ذُوَا غَرٜىٰكُ،›‏ إِنْكُمَ سُكَ تَمْبَيٜىٰنِ ثٜىٰوَ ‏‹‏مٜىٰنٜىٰنٜىٰ سُونَنْسَ؟›‏ مٜىٰ ذَنْثٜىٰ مُسُ؟»‏

¹⁴ اللَّهْ يَثٜىٰ وَ مُوسَٰى ‏«‏نِے إِنَ يَدَّ نَكٜىٰ؞ وَنَّنْ شِينٜىٰ أَبِنْدَ ذَاكَ ڢَطَا وَجَمَعَرْ إِسْرَٰٓءِيلَ، ‏‹‏نِے نٜىٰ يَا عَيْكُواْ نِے وُرِنْكُ؞›‏ »‏

¹⁵ اللَّهْ يَا كُمَ ڢَطَا وَ مُوسَٰى ‏«‏كَڢَطَا وَجَمَعَرْ إِسْرَٰٓءِيلَ ثٜىٰوَ ‏‹‏يَهْوٜىٰهْ اللَّهْ نَكَاكَنِّنْكُ، وَتُواْ اللَّهْ نَ إِبْرَٰهِيمْ، اللَّهْ نَ إِسْحَٰڧَ، اللَّهْ نَ يَعْڧُوبَ، يَا عَيْكٜىٰنِ غَرٜىٰكُ؞›‏ ‏«‏وَنَّنْ شِينٜىٰ سُونَنَ حَرْ أَبَدَا، دَ وَنَّنْ سُونَ ذَاعَ دِنْ‌غَ كِرَنَ حَرْ دُكَنْ ڟَارَا مَاسُ ذُوَا؞»‏

أَنْ بَا مُوسَٰى عُمَرْنِ دُواْمِنْ عَيْكِنْسَ

¹⁶ ‏«‏كَتَڢِے كَتَتَّارَ دُكَنْ دَتَّاوَنْ إِسْرَٰٓءِيلَ، كَڢَطَا مُسُ ثٜىٰوَ ‏‹‏يَهْوٜىٰهْ، اللَّهْ نَكَاكَنِّنْكُ، وَتُواْ اللَّهْ نَ إِبْرَٰهِيمْ دَ إِسْحَٰڧَ دَ يَعْڧُوبَ يَبَيَّنَ أَغَرٜىٰنِ؞ يَثٜىٰ ‏«‏نَلُورَ، نَكُمَ غَا أَبِنْدَ عَكٜىٰيِمُكُ أَ مَصَرْ؞

¹⁷ نَكُمَيِ أَلْڧَوَرِ ثٜىٰوَ ذَنْڢِتَرْ دَكُو دَغَ عَذَابَرْ وَهَلَرْ مَصَرْ، إِنْكُمَ كَيْكُ ڧَسَرْ كَنْعَنِيَاوَا دَ هِتِّيَاوَا دَ أَمُواْرِيَاوَا دَ ڢٜىٰرِظِّيَاوَا دَ هِوِيَاوَا دَ يٜىٰبُسِيَاوَا، ڧَسَاثٜىٰ مَيْ أَمْڢَانِ؞»‏

¹⁸ ‏«‏ ‏‹‏مُتَنٜىٰنْ كُوَ ذَاسُ كَسَ كُنّٜىٰ غَ مَغَنَرْكَ؞ سَعَنً كَيْ دَ دَتَّاوَنْ جَمَعَرْ إِسْرَٰٓءِيلَ ذَاكُتَڢِے وُرِنْ سَرْكِنْ مَصَرْ كُثٜىٰ مَسَ ‏«‏يَهْوٜىٰهْ، اللَّهْ نَ إِبْرَانِيَاوَا يَا بَيَّنَ أَغَرٜىٰمُ؞ يَنْذُ ڢَا، سَيْ كَبَرْمُ مُيِ تَڢِيَرْ ݣُونَ عُكُ ذُوَا ثِكِنْ دَاجِ، دُواْمِنْ مُمِيڧَ هَدَايَ غَ يَهْوٜىٰهْ اللَّهْ نْمُ؞»‏

¹⁹ عَمَّا نَسَنِ سَرْكِنْ مَصَرْ بَذَيْ بَرْكُ كُتَڢِبَ، سَيْدَيْ إِنْ نَتِلَسْتَشِ دَ هَنُّونَ مَيْ إِيكُواْ؞

²⁰ سَبُواْدَ حَكَ ذَنْمِيڧَ هَنُّونَ إِنْبُغِ مَصَرْ دَ دُكَنْ أَيُّكَنْ بَنْ مَامَاكِنْ دَ ذَنْيِ أَڟَكِيَرْسُ؞ بَايَنْ وَنَّنْ ذَيْ بَرْكُ كُتَڢِے؞

²¹ ‏«‏ ‏‹‏ذَنْسَا مَصَرَاوَا سُيِ وَمُتَنٜىٰنَ أَلْحٜىٰرِ، دُواْمِنْ سَعَدَّ ذَاكُ تَڢِے، بَذَاكُ تَڢِے حَنُّ وُاْڢِبَ؞

²² كُواْوَثٜىٰ مَثٜىٰ ذَاتَ تَڢِے تَضُواْڧِ كَايَنْ دَرَجَ نَأَظُرْڢَا دَ نَظِنَرِيَ دَ رِيغُنَ دَغَ وُرِنْ مَتَنْ مَصَرْ دَسُكٜىٰ مَڨُوبْتَنْتَ دَ وَطَنْدَ سُكٜىٰ ذَمَ أَغِدَاجٜىٰنْسُ؞ ذَاكُسَا وَیَیَنْكُ مَظَا دَ مَاتَا وَطَنَّنْ كَايَيَّكِ؞ تَهَكَ ذَاكُ ݣُوشِ أَرْزِڧِنْ مَصَرَاوَا؞›‏ »‏