ڢِتُواْوَ 17 - أَتَّوْرَتْ دَ أَنَّبَاوَا

يَهْوٜىٰهْ يَسَ ضُوَ يَڢِتَ دَغَ دُوڟٜىٰ

¹ دُكَنْ جَمَعَرْ إِسْرَٰٓءِيلَ سُكَتَاشِ دَغَ دَاجِنْ سِنْ سُكَيِ تَتَڢِيَ دَغَ ذَنْ‌غُواْ ذُوَا ذَنْ‌غُواْ، بِسَغَ عُمَرْنِنْ يَهْوٜىٰهْ؞ عَڧَرْشٜىٰ سُكَيِ ذَنْ‌غُواْ أَ رٜىٰڢِدِمْ، عَمَّا بَا ضُوً دَ جَمَعَ ذَاسُ شَا؞

² سَيْ مُتَنٜىٰ سُكَيِ وَ مُوسَٰى غُنَغُنِ سُكَثٜىٰ ‏«‏بَامُ ضُوَ مُشَا؞»‏ مُوسَٰى يَأَمْسَ مُسُ يَثٜىٰ ‏«‏دُوانْمٜىٰ كُكٜىٰيِ مِنِ غُنَغُنِ؟ دُوانْمٜىٰ كُكٜىٰ ڠُودَ أَمِنْثِنْ يَهْوٜىٰهْ؟»‏

³ عَمَّا جَمَعَ سُنَ ڢَامَ دَ ڧِشِنْ ضُوَ سُواْسَيْ، سُكَ ثِيغَبَدَ غُنَغُنِ عَكَنْ مُوسَٰى سُكَثٜىٰ ‏«‏دُوانْمٜىٰ كَڢِتَرْ دَمُو دَغَ مَصَرْ؟ دُوانْمٜىٰ كَكَٰوُاْمُ أَنَنْ كَكَشٜىٰمُ دَ یَیَنْمُ دَ دَبُّواْبِنْمُ دَ ڧِشِنْ ضُوَ؟»‏

⁴ سَيْ مُوسَٰى يَيِ كُوكَا غَ يَهْوٜىٰهْ يَثٜىٰ ‏«‏مٜىٰ ذَنْيِ وَجَمَعَرْ نَنْ؟ غَاشِ، سُنَ أَشِرْيٜىٰ سُجٜىٰجّٜىٰڢٜىٰنِ دَ دُوَڟُو؞»‏

⁵ يَهْوٜىٰهْ يَثٜىٰ وَ مُوسَٰى ‏«‏كَطَوْكِ سَنْدَنْ كِيوُانْكَ دَ كَبُغِ ضُوً نِلُ دَشِ؞ كَطَوْكِ وَطَنْسُ دَتَّاوَنْ إِسْرَٰٓءِيلَ، كُوُثٜىٰ غَبَنْ جَمَعَرْ؞

⁶ نِے ذَنْ ڟَيَ أَغَبَنْكُ أَوَنْثَنْ دُوڟٜىٰ كُسَدَ هُواْرٜىٰبْ؞ سَيْ كَبُغِ دُوڟٜىٰنْ، ضُوَ كُوَ ذَيْڢِتُواْ دَغَ ثِكِنْسَ دُواْمِنْ مُتَنٜىٰ سُشَا؞»‏ أَغَبَنْ دَتَّاوَنْ إِسْرَٰٓءِيلَ، مُوسَٰى يَيِ أَبِنْدَ يَهْوٜىٰهْ يَڢَطَا؞

⁷ مُوسَٰى كُوَ يَكِرَا وُرِنْ دَ سُونَ ‏«‏مَسَّ»‏، وَتُواْ وُرِنْ ڠُوجِ دَ كُمَ ‏«‏مٜىٰرِبَ»‏، وَتُواْ وُرِنْ مُهَوَرَ، سَبُواْدَ إِسْرَٰٓءِيلَاوَا سُكَيِ مُهَوَرَ دَ مُوسَٰى سُكَ ڠُودَ أَمِنْثِنْ يَهْوٜىٰهْ سُنَ ثٜىٰوَ ‏«‏يَهْوٜىٰهْ يَنَ تَرٜىٰدَمُو كُواْ بَابُ؟»‏

أَمَلٜىٰكَاوَا سُنْيِ يَاڧِ دَ إِسْرَٰٓءِيلَاوَا

⁸ سَيْ أَمَلٜىٰكَاوَا سُكَذُواْ دُواْمِنْ سُيِ يَاڧِ دَ إِسْرَٰٓءِيلَاوَا أَ رٜىٰڢِدِمْ؞

⁹ مُوسَٰى يَثٜىٰ وَ يُواْشُوَ ‏«‏جٜىٰكَ، كَذَاٻَا مَنَ مَذَنْ دَ ذَاسُ ڢِتَ سُيِ يَاڧِ دَ مُتَنٜىٰنْ أَمَلٜىٰكْ؞ غُواْبٜىٰ نِے ذَنْ ڟَيَ عَكَنْ تُدُ رِڧٜىٰ دَ سَنْدَنْ كِيوُانْ دَ اللَّهْ يَثٜىٰ مِنِ إِنْرِڧٜىٰ أَ هَنُّونَ؞»‏

¹⁰ يُواْشُوَ يَيِ أَبِنْدَ مُوسَٰى يَعُمَرْثٜىٰشِ، سُكَيِ يَاڧِ دَ مُتَنٜىٰنْ أَمَلٜىٰكْ؞ مُوسَٰى دَ هَٰرُونَ دَ هُرْ سُكَ هَوْ كَنْ تُدُنْ دَيَكٜىٰ كُسَ؞

¹¹ مُدِّنْ مُوسَٰى يَمِيڧٜىٰ حَنُّوَنْسَ سَمَ، سَيْ إِسْرَٰٓءِيلَاوَا سُيِ تَثِنْ نَصَرَا، عَمَّا دَظَرَرْ حَنُّوَنْسَ سُنْ سَوْكَ، سَيْ أَمَلٜىٰكَاوَا سُيِ تَثِنْ نَصَرَا؞

¹² عَمَّا حَنُّوَنْ مُوسَٰى سُنْ غَجِ سُواْسَيْ؞ سَيْ هَٰرُونَ دَ هُرْ سُكَ نٜىٰمِ دُوڟٜىٰ، مُوسَٰى يَذَوْنَ عَكَيْ؞ سَعَنً سُو كُمَ سُكَ ڟَيَ طَيَ أَغٜىٰڢٜىٰنْ دَامَنْسَ، طَيَ كُمَ أَ هَغُنْسَ، سُنَ رِڧٜىٰ دَ حَنُّوَنْسَ سَمَ حَرْ ڢَاطُوَرْ رَانَ؞

¹³ تَهَكَ يُواْشُوَ دَ مُتَنٜىٰنْسَ سُكَ كَكَّشٜىٰ سُواْجُواْجِنْ أَمَلٜىٰكْ دَ تَكُواْبِے؞

¹⁴ سَعَنً يَهْوٜىٰهْ يَثٜىٰ وَ مُوسَٰى ‏«‏كَرُبُوتَ لَابَرِنْ وَنَّنْ نَصَرَا دُواْمِنْ تُنَاوَا، كَكُمَ حَطَ دَ وَنَّنْ أَلْڧَوَرِ ثٜىٰوَ ذَنْ كَوَرْدَ سُونَنْ أَمَلٜىٰكْ دَغَ ڧَرْڧَشِنْ سَمَ، حَرْ بَا وَنِ عَدُونِيَا وَنْدَ ذَيْسَاكٜىٰ تُنَاوَا دَسُو؞ سَعَنً كَتَبَّتَا يُواْشُوَ يَجِ وَنَّنْ؞»‏

¹⁵ مُوسَٰى كُوَ يَغِنَ بَغَدٜىٰ أَوُرِنْ يَكِرَشِ دَ سُونَ ‏«‏‏يَهْوٜىٰهْ نٜىٰ تُوتَتَ؞»‏

¹⁶ يَثٜىٰ ‏«‏كُطَغَ تُوتَرْ يَهْوٜىٰهْ سَمَ!‏ يَهْوٜىٰهْ ذَيْ يِتَيَاڧِ دَ أَمَلٜىٰكَاوَا دَغَ ڟَارَا ذُوَا ڟَارَا؞»‏