ڢِتُواْوَ 14 - أَتَّوْرَتْ دَ أَنَّبَاوَا

ڧٜىٰتَرٜىٰوَرْ جَنْ تٜىٰكُ

¹ أَ عٜىٰتَمْ، سَيْ يَهْوٜىٰهْ يَڢَطَا وَ مُوسَٰى،

² ‏«‏كَڢَطَا وَ إِسْرَٰٓءِيلَاوَا سُجُويَا سُيِ ذَنْ‌غُواْ أَغَبَنْ غَرِنْ ڢِ هَهِرُواتْ كُسَدَ غَرِنْ بَعَلْ ظٜىٰڢُوانْ؞ وَنَّنْ وُرِے يَنَ ڟَكَانِنْ غَرِنْ مِغْدُوالْ دَ كُمَ تٜىٰكُنْ؞

³ تَهَكَ ڢِرْعَوْنَ ذَيْ يِتُنَانِ يَثٜىٰ، ‏‹‏أَهَ، غَا إِسْرَٰٓءِيلَاوَا سُنَ تَڢِيَ بَرْكَتَيْ عَثِكِنْ ڧَسَرْ؞ دَاجِنْ يَا رِڧٜىٰسُ!‏›‏

⁴ ذَنْ تَوْرَرَ ذُوثِيَارْ ڢِرْعَوْنَ دُواْمِنْ يَبِيسُ، كُمَ نَصَرَاتَ عَكَنْ سَرْكِے ڢِرْعَوْنَ دَ دُكَنْ ڧُنْ‌غِيَرْ سُواْجُواْجِنْسَ ذَاتَ كَٰوُاْ مِنِ طَوْكَكَ؞ تَهَكَ مَصَرَاوَا ذَاسُسَنِ ثٜىٰوَ نِنٜىٰ يَهْوٜىٰهْ!‏»‏ إِسْرَٰٓءِيلَاوَا كُوَ سُكَيِ أَبِنْدَ عَكَ ڢَطَا مُسُ؞

مَصَرَاوَا سُنْ بِے إِسْرَٰٓءِيلَاوَا

⁵ سَعَدَّ عَكَ ڢَطَا وَسَرْكِنْ مَصَرْ ثٜىٰوَ مُتَنٜىٰنْ إِسْرَٰٓءِيلَ سُنْ غُدُ، سَيْ ڢِرْعَوْنَ دَ دَتَّاوَنْسَ سُكَ ثَنْجَ تُنَانِنْسُ غَمٜىٰدَ إِسْرَٰٓءِيلَاوَا سُكَثٜىٰ ‏«‏كَيْ!‏ مٜىٰ مُكَيِ كٜىٰنَنْ دَ مُكَ بَرْ دُكَنْ وَطَنَّنْ بَايِ سُنْ تَڢِے؟»‏

⁶ سَيْ سَرْكِنْ يَسَا عَكَ شِرْيَ كٜىٰكٜىٰنْ دُواْكِنْ يَاڧِنْسَ دَ ڧُنْ‌غِيَرْ سُواْجُواْجِنْسَ؞

⁷ يَا تَاشِ دَسُو دَ كٜىٰكُنَنْ دُواْكِنْ يَاڧِ مَڢِے ݣَوْ غُدَا طَرِے شِدَ دَ دُكَنْ سَوْرَنْ كٜىٰكُنَنْ دُواْكِنْ مَصَرْ، تَرٜىٰدَ شُوغَبَنِّنْ يَاڧِ عَكَنْ دُكَنْسُ؞

⁸ سَيْ يَهْوٜىٰهْ يَتَوْرَرَ ذُوثِيَارْ ڢِرْعَوْنَ سَرْكِنْ مَصَرْ دُواْمِنْ يَبِے إِسْرَٰٓءِيلَاوَا، وَطَنْدَ سُكٜىٰ ڢِتُواْوَ دَ ڧَرْڢِنْ ذُوثِيَا؞

⁹ مَصَرَاوَا سُكَبِے إِسْرَٰٓءِيلَاوَا دَ دُكَنْ دَوَكِنْ ڢِرْعَوْنَ دَ كٜىٰكُنَنْ دُواْكِنْسَ دَ مَاسُ هَوَنْ دَوَكِنْسَ دَ كُمَ ڧُنْ‌غِيَرْ سُواْجُواْجِنْسَ؞ مَصَرَاوَا سُكَ سَامِ إِسْرَٰٓءِيلَاوَا عِنْدَ سُكَيِ ذَنْ‌غُواْ عَبَاكِنْ تٜىٰكُ كُسَدَ غَرِنْ ڢِ هَهِرُواتْ أَغَبَنْ غَرِنْ بَعَلْ ظٜىٰڢُوانْ؞

¹⁰ سَعَدَّ إِسْرَٰٓءِيلَاوَا سُكَ طَغَ عِدَنُونْسُ سُكَ حَنْ‌غِ ڢِرْعَوْنَ دَ سُواْجُواْجِنْسَ سُنَ ذُوَا وُرِنْسُ، سَيْ سُكَيِ ضَوَرْ جِكِے دُواْمِنْ ڟُواْرُواْ، سُكَيِ كُوكَا غَ يَهْوٜىٰهْ؞

¹¹ سَعَنً سُكَ ڢُسْكَنْثِ مُوسَٰى سُكَثٜىٰ ‏«‏مٜىٰيَسَا كَكَٰوُاْمُ أَنَنْ دُواْمِنْ مُمُتُ عَثِكِنْ دَاجِ؟ أَنْثٜىٰ بَابُ كَبُرْبُرَنْ دَ ذَاعَ بِنّٜىٰمُ عَثِكِنْ مَصَرْ نٜىٰ؟ مٜىٰ كٜىٰنَنْ كَيِمَنَ دَ كَڢِتَرْ دَمُو دَغَ مَصَرْ؟

¹² دَا مَا بَمُڢَطَا مَكَبَ تُنْ مُنَ عَثِكِنْ مَصَرْ ثٜىٰوَ ‏‹‏كَدَيْ بَرْمُ عَثِكِنْ بَوْتَرْمُ أَ مَصَرْ كَوَيْ؞›‏ غَمَا ذَيْڢِ مَنَ مُبَوْتَاوَ مَصَرَاوَا دَ مُمُتُ أَنَنْ ثِكِنْ دَاجِ؞»‏

¹³ مُوسَٰى كُوَ يَثٜىٰ وَجَمَعَ ‏«‏كَدَ كُجِڟُواْرُواْ!‏ كُڟَيَ شِضُ أَ عِنْدَ كُكٜىٰ، كُغَ ثٜىٰتُوانْ دَ يَهْوٜىٰهْ ذَيْ يِمُكُ يَوْ؞ مَصَرَاوَا وَطَنْدَ كُكٜىٰ غَنِنْسُ عَيَوْ، بَذَاكُ ڧَارَ غَنِنْسُ كُمَ بَ حَرْ أَبَدَا؞

¹⁴ يَهْوٜىٰهْ دَ كَنْسَ ذَيْ يِيَاڧِ دُواْمِنْكُ؞ كُو دَيْ كُيِ شِضُ كَوَيْ!‏»‏

يَهْوٜىٰهْ يَا رَبَ تٜىٰكُ كَشِ بِيُ

¹⁵ سَيْ يَهْوٜىٰهْ يَثٜىٰ وَ مُوسَٰى ‏«‏دُوانْمٜىٰ كَكٜىٰيِ مِنِ كُوكَا؟ كَڢَطَا وَ إِسْرَٰٓءِيلَاوَا سُيِغَبَ؞

¹⁶ سَيْ كَيْ كَطَغَ سَنْدَنْكَ نَكِيوُاْ، كَمِيڧَ حَنُّنْكَ عَبِسَ ضُوً؞ ضُوً كُوَ ذَيْرَبُ كَشِ بِيُ دُواْمِنْ إِسْرَٰٓءِيلَاوَا سُبِے تَثِكِنْ تٜىٰكُنْ عَكَنْ بُوسَشِّيَرْ ڧَسَا؞

¹⁷ نِے كُوَ ذَنْ تَوْرَرَ ظُكَاتَنْ مَصَرَاوَا دُواْمِنْ سُبِے إِسْرَٰٓءِيلَاوَا حَرْ ثِكِنْ تٜىٰكُنْ؞ نَصَرَاتَ كُمَ عَكَنْ سَرْكِے ڢِرْعَوْنَ دَ دُكَنْ ڧُنْ‌غِيَرْ سُواْجُواْجِنْسَ دَ كٜىٰكُنَنْ دُواْكِنْسَ دَ مَاسُ هَوَنْ دَوَكِنْسَ ذَاتَ كَٰوُاْ مِنِ طَوْكَكَ؞

¹⁸ سَعَدَّ نَسَامِ طَوْكَكَ تَوُرِنْ ثِنْ نَصَرَا عَكَنْ ڢِرْعَوْنَ دَ مَصَرَاوَا، ذَاسُسَنِ ثٜىٰوَ نِنٜىٰ يَهْوٜىٰهْ!‏»‏

¹⁹ سَيْ مَلاَىِٕكَنْ اللَّهْ وَنْدَ دَا يَكٜىٰ تَڢِيَ أَغَبَنْ ڧُنْ‌غِيَ ڧُنْ‌غِيَرْ جَمَعَرْ إِسْرَٰٓءِيلَ، يَتَاشِ دَغَ غَبَنْسُ يَكُواْمَ بَايَنْسُ؞ سَيْ ڧُنْشِنْ غِرْغِجٜىٰنْ كُمَ يَتَاشِ دَغَ غَبَنْسُ يَكُواْمَ بَايَنْسُ؞

²⁰ ڧُنْشِنْ غِرْغِجٜىٰنْ يَڟَيَ ڟَكَانِنْ مَصَرَاوَا دَ إِسْرَٰٓءِيلَاوَا؞ أَ دُكَنْ دَرٜىٰ ڧُنْشِنْ غِرْغِجٜىٰنْ يَبَادَ دُهُ غَ غٜىٰڢٜىٰ طَيَ، يَكُمَ بَادَ حَصْكٜىٰ غَ طَيَ غٜىٰڢٜىٰنْ، يَدَّ بَ وَتَ ڧُنْ‌غِيَرْ دَتَ عِيَ كُسَدَ وَتَ عَثِكِنْ دُكَنْ دَرٜىٰنْ؞

²¹ سَيْ مُوسَٰى يَمِيڧَ حَنُّنْسَ بِسَ تٜىٰكُنْ؞ يَهْوٜىٰهْ كُوَ يَا سَا ضُوً تٜىٰكُنْ يَكُواْمَ دَ بَايَ تَوُرِنْ إِسْكَرْ غَبَسْ مَيْ ڧَرْڢِے؞ إِسْكَ تَايِتَ هُورَاوَ عَثِكِنْ دُكَنْ دَرٜىٰ، حَرْ تَا سَا ضُوً يَا رَبُ كَشِ بِيُ، تٜىٰكُنْ كُمَ تَا ذَمَ بُوسَشِّيَرْ ڧَسَا؞

²² إِسْرَٰٓءِيلَاوَا كُوَ سُكَبِے تَثِكِنْ تٜىٰكُنْ عَكَنْ بُوسَشِّيَرْ ڧَسَا؞ ضُوً يَا ذَمَ مُسُ بَنْ‌غُواْ أَغٜىٰڢٜىٰنْ دَامَ، بَنْ‌غُواْ كُمَ أَغٜىٰڢٜىٰنْ هَغُ؞

²³ مَصَرَاوَا دَ دُكَنْ دَوَكِنْ ڢِرْعَوْنَ دَ كٜىٰكُنَنْ دُواْكِنْسَ دَ مَاسُ هَوَنْ دَوَكِ، سُكَ شِغَ ثِكِنْ تٜىٰكُنْ سُنَ بِنْ إِسْرَٰٓءِيلَاوَا؞

²⁴ دَ سَسَّڢٜىٰ كَاڢِنْ وَايٜىٰوَرْ غَرِ، يَهْوٜىٰهْ يَا كَلِّ سُواْجُواْجِنْ مَصَرْ دَغَ ثِكِنْ ڧُنْشِنْ غِرْغِجٜىٰنْ وُتَا، سَيْ يَسَا سُكَ ضِكِثِے؞

²⁵ يَهْوٜىٰهْ يَسَا ڧَڢَاڢُنْ كٜىٰكُنَنْ دُواْكِنْسُ سُنْ كَڢٜىٰ دَݣَرْ دَوَكِ سُكٜىٰ جَنْسُ؞ سَيْ مَصَرَاوَا سُكَيِ إِيهُ سُكَثٜىٰ ‏«‏مُبَرْبِنْ إِسْرَٰٓءِيلَاوَا ڢَا!‏ غَمَا يَهْوٜىٰهْ يَنَ غَابَادَمُو يَنَ يَاڧِ دُواْمِنْسُ!‏»‏

²⁶ سَيْ يَهْوٜىٰهْ يَثٜىٰ وَ مُوسَٰى ‏«‏كَمِيڧَ حَنُّنْكَ عَبِسَ تٜىٰكُنْ، دُواْمِنْ ضُوَ يَكُواْمَ بِسَ كَنْ مَصَرَاوَا دَ كٜىٰكُنَنْ دُواْكِنْسُ دَ مَاسُ هَوَنْ دَوَكِنْسُ؞»‏

²⁷ سَيْ مُوسَٰى يَمِيڧَ حَنُّنْسَ عَبِسَ تٜىٰكُنْ؞ غَرِ يَنَ وَايٜىٰوَ، ضُوً تٜىٰكُنْ يَكُواْمَ كَمَرْ يَدَّ دَا يَكٜىٰ؞ دُكْ دَ ڧُواْڧَرِنْ دَ مَصَرَاوَا سُكَيِ دُواْمِنْ سُڟٜىٰرٜىٰ وَ ضُوً، عَمَّا بَسُ عِيَ بَ، غَمَا يَهْوٜىٰهْ يَا تُورَ ضُوَ يَرُڢٜىٰسُ كَكَڢْ؞

²⁸ ضُوً تٜىٰكُنْ كُوَ يَا كُواْمَ يَا رُڢٜىٰ دُكَنْ كٜىٰكُنَنْ دُواْكِنْ ڢِرْعَوْنَ دَ مَاسُ هَوَنْ دَوَكِنْسَ دَ دُكَنْ سُواْجُواْجِنْسَ وَطَنْدَ سُكَبِے إِسْرَٰٓءِيلَاوَا ذُوَا ثِكِنْ تٜىٰكُنْ؞ بَ كُواْ طَيَنْ دَ يَرَغُ؞

²⁹ عَمَّا إِسْرَٰٓءِيلَاوَا سُكَبِے تَثِكِنْ تٜىٰكُنْ عَبُوسَشِّيَرْ ڧَسَا، ضُوَ كُوَ يَذَمَ مُسُ بَنْ‌غُواْ أَغٜىٰڢٜىٰنْ دَامَ، بَنْ‌غُواْ كُمَ أَغٜىٰڢٜىٰنْ هَغُ؞

³⁰ تَهَكَ يَهْوٜىٰهْ يَثٜىٰثِ إِسْرَٰٓءِيلَاوَا دَغَ حَنُّنْ مَصَرَاوَا أَ رَانَرْ نَنْ؞ إِسْرَٰٓءِيلَاوَا كُوَ سُكَغَ غَوَوَّكِنْ مَصَرَاوَا عَكَنْ بَاكِنْ تٜىٰكُ؞

³¹ دَ إِسْرَٰٓءِيلَاوَا سُكَغَ بَبَّنْ أَبِنْ مَامَاكِنْ دَ يَهْوٜىٰهْ يَيِ عَكَنْ مَصَرَاوَا، سُكَڧَارَ جِنْ ڟُواْرُوانْ يَهْوٜىٰهْ، سُكَ كُمَ غَسْكَتَشِ دَ بَاوَنْسَ مُوسَٰى؞