عٜىٰسْتَا 8 - أَتَّوْرَتْ دَ أَنَّبَاوَا

أَنْبَادَ دُواْكَا يَهُودَاوَا سُكَارٜىٰ كَنْسُ

¹ أَ رَانَرْ نَنْ سَيْ سَرْكِے أَهَسُرُسْ يَبَا سَرَوْنِيَ عٜىٰسْتَا دُكْ كَايَنْ دَ هَامَٰنَ أَبُواْكِنْ غَابَنْ يَهُودَاوَا يَكٜىٰدَشِ؞ عٜىٰسْتَا تَڢَطَا وَسَرْكِے ثٜىٰوَ مُوارْدٜىٰكَيْ دَنْ‌غِنْتَنٜىٰ؞ سَبُواْدَ حَكَ مُوارْدٜىٰكَيْ يَذُواْ غَبَنْ سَرْكِے؞

² سَيْ سَرْكِے يَثِرٜىٰ ذُواْبٜىٰنْسَ نَهَاتِمِ، وَنْدَ يَكَرْٻَ دَغَ وُرِنْ هَامَٰنَ، يَبَا مُوارْدٜىٰكَيْ؞ عٜىٰسْتَا كُوَ تَسَا مُوارْدٜىٰكَيْ يَلُورَ مَتَ دَ دُكْ كَايَنْ دَ هَامَٰنَ يَكٜىٰدَشِ؞

³ سَيْ عٜىٰسْتَا تَسَاكٜىٰ ضُواْڧُوانْ سَرْكِے، تَڢَاطِ عَڧَڢَاڢُنْسَ تَنَ كُوكَا؞ تَ ضُواْڧٜىٰشِ يَيِ وَنِ أَبِنْدَ ذَيْ كَوَرْدَ مُغُنْتَارْ هَامَٰنَ مُتُمِنْ أَغَغْ، وَتُواْ شِرِنْدَ يَڧُلَّ وَ يَهُودَاوَا؞

⁴ سَيْ سَرْكِے يَمِيڧَوَ عٜىٰسْتَا سَنْدَنْ ظِينَارِيَ نَمُلْكِ؞ عٜىٰسْتَا تَتَاشِ تَڟَيَ أَغَبَنْ سَرْكِے؞

⁵ تَثٜىٰ ‏«‏عِدَنْ يَا غَمْشٜىٰكَ، يَا سَرْكِے، عِدَنْ نَسَامِ ڢَضٍ جِنِ أَغَبَنْكَ، عِدَنْ كَيْ سَرْكِے كَغَ يَيِ دَيْدَيْ، عِدَنْ كُمَ نَا غَمْشٜىٰكَ، بَرِ أَ رُبُوتَ وَسِيڧَرْ دُواْكَرْ دَ ذَاتَ كَوَرْدَ وَسِيڧُنْ دَ هَامَٰنَ طَنْ هَمّٜىٰدَتَ مُتُمِنْ أَغَغْ يَرُبُوتَ يَبَايَرْ دُواْمِنْ أَ هَلَّكَ يَهُودَاوَا أَدُكَنْ يَنْكُنَنْ مُلْكٍ سَرْكِے؞

⁶ غَمَا يَيَ ذَنْعِيَ دَوْرٜىٰوَ إِنْ‌غَا مَسِيڢَ عَكَنْ مُتَنٜىٰنَ؟ يَيَ ذَنْعِيَ دَوْرٜىٰوَ إِنْ‌غَا هَلَّكَرْ دَ ذَاتَ سَامِ دَنْ‌غِنَ؟»‏

⁷ سَيْ سَرْكِے أَهَسُرُسْ يَثٜىٰ وَ سَرَوْنِيَ عٜىٰسْتَادَ مُوارْدٜىٰكَيْ مُتُمِنْ يَهُودَ ‏«‏غَاشِ، نَارِغَا نَا رَاتَيٜىٰ هَامَٰنَ غَمَا يَيِ ڧُواْڧَرِ يَهَلَّكَ يَهُودَاوَا، نَا كُمَبَا عٜىٰسْتَا دُكْ كَايَنْ دَ هَامَٰنَ يَكٜىٰدَشِ؞

⁸ عَمَّا بَا مَيْ كَوَرْدَ دُواْكَرْ دَ عَكَ رُبُوتَ دَ سُونَنْ سَرْكِے، عَكَ كُمَ بُغَ هَاتِمِنْ سَرْكِے عَكَيْ؞ دُكْدَهَكَ سَيْ كُرُبُوتَ دُكْ أَبِنْدَ كُكٜىٰسُواْ غَمٜىٰدَ يَهُودَاوَا؞ كُرُبُوتَ أَ سُونَنْ سَرْكِے، عَكُمَ بُغَ هَاتِمِنْ ذُواْبٜىٰنْ سَرْكِے عَكَيْ؞»‏

⁹ نَنْ دَنَنْ سَيْ عَكَ كِرَا مَرُبُوتَنْ سَرْكِے؞ وَنَّنْ يَڢَرُ أَ رَانَرْ عَشِرِنْ دَ عُكُ غَ وَتَنْ عُكُ، وَتُواْ وَتَنْ سِوَنْ؞ مَرُبُوتَنْ سُكَ رُبُوتَ دُكَنْ أَبِنْدَ مُوارْدٜىٰكَيْ يَعُمَرْتَ غَمٜىٰدَ يَهُودَاوَا؞ عَكَ كُمَ عَيْكَ عُمَرْنِنْ ذُوَاغَ هَكِمَنْ يَنْكُنَ دَ ڠُومْنُواْنِ دَ دَتَّاوَنْ يَنْكُنَ دَغَ ڧَسَاشٜىٰ طَرِے دَ عَشِرِنْ دَ بَݣَويْ ﴿127﴾ دَغَ إِنْدِيَ ذُوَا إِتِيُواْڢِيَ؞ عَكَ جُويَا ذُوَا كُواْوَنٜىٰ يَرٜىٰ دَ حَنْيَرْ رُبُوتُنْ دَ عَكٜىٰيِنْ أَمْڢَانِ دَسُو عَكُواْوَنٜىٰ يَنْكِنْ مُلْكٍ؞ عَكَ كُمَ رُبُوتَ وَ يَهُودَاوَا أَ حَنْيَرْ رُبُوتُنْسُ دَ يَرٜىٰنْسُ؞

¹⁰ مُوارْدٜىٰكَيْ يَسَا عَكَ رُبُوتَ وَسِيڧُنْ أَ سُونَنْ سَرْكِے أَهَسُرُسْ، عَكَ كُمَ بُغَ وَ وَسِيڧُنْ هَاتِمِ دَ ذُواْبٜىٰنْ سَرْكِے؞ عَكَ عَيْكَ دَ وَطَنَّنْ وَسِيڧُنْ تَهَنُّنْ یَنْ كَدَتَݣُونَ وَطَنْدَ سُكَ هَوْ دَوَكِ مَاسُ ذَاڢِنْ غُدُنْ دَ عَكَيِ كِيوُانْسُ دُواْمِنْ عَيْكِنْ سَرْكِے؞

¹¹ تَوُرِنْ وَطَنَّنْ وَسِيڧُ كُوَ سَرْكِے يَبَا يَهُودَاوَا عَكُواْوَنٜىٰ بِرْنِ إِظْنِ سُتَتَّارَ كَنْسُ دُواْمِنْ سُكَارٜىٰ رَايُكَنْسُ، سُكُمَ هَلَّكَ، سُكَكَّشٜىٰ، سُكَوَرْدَ كُواْوَثٜىٰ أَلْعُمَّرْ دَ ذَاتَ ڢَاطَ مُسُ دَسُو دَ مَاتَنْسُ دَ يَارَنْسُ؞ عَكَ كُمَبَاسُ إِظْنِ سُڨُوثٜىٰ دُكَنْ كَايَنْ أَبُواْكَنْ غَابَنْسُ؞

¹² رَانَرْ دَ عَكَ كٜىٰٻٜىٰ دُواْمِنْ عَيِ وَنَّنْ أَدُكَنْ يَنْكُنَنْ مُلْكٍ سَرْكِے أَهَسُرُسْ عِتَثٜىٰ رَانَ تَغُواْمَشَا عُكُ غَ وَتَنْ غُواْمَشَا بِيُ، وَتُواْ وَتَنْ أَدَرْ كٜىٰنَنْ؞

¹³ أَبِنْ دَ عَكَ رُبُوتَ أَوَسِيڧُنْ أَنْسَا يَذَمَ دُواْكَا عَكُواْوَنٜىٰ يَنْكِ عَكُمَيِ شٜىٰلَرْسَ غَ دُكَنْ ڧَبِيلُ؞ أَنْيِشِ دُواْمِنْ يَهُودَاوَا سُيِ شِرِ أَوَنَّنْ رَانَ دُواْمِنْ سُيِ رَامُوَا عَكَنْ أَبُواْكَنْ غَابَنْسُ؞

¹⁴ سَيْ یَنْ كَدَتَݣُونَ سُكَ هَوْ دَوَكِنْ سَرْكِے مَاسُ ذَاڢِنْ غُدُ؞ سُكَ ڢِتَ أَغُجٜىٰ، غَمَا دُواْكَرْ سَرْكِے تَنَ ڟَنَنْتَ مُسُ سُيِ سَوْرِ؞ عَكَ كُمَيِ شٜىٰلَرْ وَنَّنْ دُواْكَا وُرِے مَيْ كَتَنْ‌غَ عَبِرْنِنْ شُوشَنْ؞

¹⁵ مُوارْدٜىٰكَيْ كُوَ يَتَاشِ دَغَ غَبَنْ سَرْكِے سَنْيٜىٰ دَ رِيغُنَنْ مُلْكِ مَيْ كَلَرْ ضُوً بُلَ دَ ڢَرِ؞ عَكَ كُمَسَا مَسَ هُولَرْ مُلْكِ مَيْ أَدُوانْ ظِينَارِيَ عَكَنْسَ؞ عَكَسَا مَسَ بَبَّرْ رِغَرْ دَ عَكَيِ دَ لِيلِنْ مَيْݣَوْ مَيْ كَلَرْ جَرْ غَرُورَا؞ دَ يَڢِتَ، سَيْ بِرْنِنْ شُوشَنْ يَأَمْسَ دَ كِرَرِ دَ مُرْنَ؞

¹⁶ يَهُودَاوَا كُوَ سُكَ سَامِ سَوْڧِ دَ مُرْنَ دَ ڢَضٍ ثِكِ دَ بَنْ غِرْمَ؞

¹⁷ عَكُواْوَنٜىٰ يَنْكِ دَ بِرْنِ عِنْدَ عُمَرْنِنْ سَرْكِے دَ دُواْكَرْسَ سُكَ كَيْ، يَهُودَاوَا سُنْثِكَ دَ مُرْنَ دَ ڢَضٍ ثِكِ سُنَيِنْ بِكِ دَ هُوتُ نَمُسَمَّنْ؞ بَنْدَ حَكَمَا، مُتَنٜىٰ دَيَوَ دَغَ ڧَبِيلُنْ ڧَسَرْ سُكَ ذَمَ يَهُودَاوَا، غَمَا ڟُواْرُوانْ يَهُودَاوَا يَكَامَسُ؞