عٜىٰسْتَا 2 - أَتَّوْرَتْ دَ أَنَّبَاوَاعٜىٰسْتَا تَا ذَمَ سَرَوْنِيَ 1 بَايَنْ وَطَنَّنْ أَبُبُوَنْ سَعَدَّ سَرْكِے أَهَسُرُسْ يَهُوثٜىٰ دَغَ ڢُشِنْسَ، سَيْ يَيِ تُنَانِ غَمٜىٰدَ بَشْتِ دَ إِرِنْ أَبِنْدَ تَيِ دَ كُمَ إِرِنْ دُواْكَرْ دَ عَكَيِ عَكَنْتَ؞ 2 سَيْ وَطَنْسُ مَاسُيِ وَسَرْكِے حِدِمَ نَكُسَدَشِ سُكَثٜىٰ «بَرِ أَ نٜىٰمِ وَ سَرْكِے ݣَوَوَنْ یَنْ مَاتَا، بُدُرْوَيْ؞ 3 بَرِ سَرْكِے يَذَاٻِ وَكِلَيْ عَكُواْوَنٜىٰ يَنْكِ نَڧَسَرْ دُواْمِنْ سُكَٰوُاْ دُكَنْ وَطَنَّنْ ݣَوَوَنْ یَنْ مَاتَا، بُدُرْوَيْ أَغِدَنْ دَ عَكٜىٰ أَجِيٜىٰ مَتَنْ سَرْكِے أَوُرِے مَيْ كَتَنْغَ عَبِرْنِنْ شُوشَنْ؞ عَبَرْسُ أَ حَنُّنْ هٜىٰغَيْ، وَنْدَ يَكٜىٰ بَابَا نَسَرْكِے مَيْ كُلَ دَ مَتَنْ سَرْكِے، يَسَا سُسَامِ كَايَنْ ڠَرَنْ جِكِے؞ 4 سَعَنً بَرِ سَرْكِے يَذَاٻِ يَارِنْيَرْ دَ تَغَمْشٜىٰشِ تَذَمَ سَرَوْنِيَ أَمَيْمَكُوانْ بَشْتِ؞» سَرْكِے يَغَ شَوَرَرْ نَنْ تَيِمَسَ ݣَوْ، سَيْ يَبِتَ؞ 5 أَ نَنْ غِدَنْ سَرْكِے أَ شُوشَنْ أَݣَويْ وَنِ مُتُمِنْ يَهُودَ مَيْ سُونَ مُوارْدٜىٰكَيْ طَنْ يَايِرْ، جِيكَنْ شِمٜىٰيِ دَغَ غِدَنْ كِشْ، مُتُمِنْ ذُرِيَرْ بِلِيَامِنُ؞ 6 عِيَلِنْ مُوارْدٜىٰكَيْ سُنَ ثِكِنْ مُتَنٜىٰنْ دَ عَكَ ݣُوشٜىٰ دَغَ عُرُوشَلِيمَ سَعَدَّ سَرْكِے نٜىٰبُكَدْنٜىٰزَّرْ نَڧَسَرْ بَابِيلَ يَݣُوشٜىٰ سَرْكِے يٜىٰهُواْيَكِنْ نَڧَسَرْ يَهُودَ، ذُوَا بَوْتَا؞ 7 مُوارْدٜىٰكَيْ كُوَ يَنَدَ وَتَ ݣَكْݣَوَنْ یَرْ طَنْعُوَنْ بَابَنْسَ مَيْ ݣَنْ غَنِ، سُونَنْتَ هَدَسَّ، وَتُواْ عٜىٰسْتَا؞ سَعَدَّ إِيَايٜىٰنْتَ سُكَ مُتُ، سَيْ مُوارْدٜىٰكَيْ يَطَوْكٜىٰتَ كَمَرْ یَرْسَ؞ 8 سَعَدَّ عَكَيِ شٜىٰلَرْ عُمَرْنِ دَ دُواْكَرْ سَرْكِے، سَيْ عَكَ تَتَّارَ یَنْ مَاتَادَيَوَ أَ شُوشَنْ أَغِدَنْ سَرْكِے أَ حَنُّنْ هٜىٰغَيْ؞ عٜىٰسْتَا تَنَ ثِكِنْسُ، عِتَمَا عَكَ أَجِيٜىٰتَ أَغِدَنْ سَرْكِے، أَ حَنُّنْ هٜىٰغَيْ مَيْ لُورَ دَ غِدَنْ دَ عَكٜىٰ أَجِيٜىٰ مَتَنْ سَرْكِے؞ 9 عٜىٰسْتَا كُوَ تَا غَمْشِ هٜىٰغَيْ سُواْسَيْ، تَكُمَ سَامِ أَلْحٜىٰرِ دَغَ غَرٜىٰشِ؞ بَيْ ٻَاتَ لُواْكَثِ بَ، يَابَاتَ كَايَنْ ڠَرَنْ جِكِے دَ كُمَ عَبِنْثِنْ دَ عَكَ شِرْيَ مُسَمَّنْ دُواْمِنْتَ؞ هٜىٰغَيْ كُوَ يَبَاتَ وُرِے مَڢِے ݣَوْ عَثِكِنْ غِدَنْ دَ عَكٜىٰ أَجِيٜىٰ مَتَنْ سَرْكِے؞ يَكُوَسَا یَنْ مَاتَا بَݣَويْ وَطَنْدَ عَكَ ذَاٻَا دَغَ غِدَنْ سَرْكِے دُواْمِنْ سُيِ مَتَ حِدِمَ؞ 10 عٜىٰسْتَا بَتَ بَيَّنَ أَصَلِنْ مُتَنٜىٰنْتَ كُواْ دَنْغِنْتَبَ، غَمَا مُوارْدٜىٰكَيْ يَا رِغَا يَا غَرْغَطٜىٰتَ كَدَ تَغَيَ وَ كُواْوَ؞ 11 كُواْوَثٜىٰ رَانَ مُوارْدٜىٰكَيْ يَكَنْ ذَاغَيَ أَ ڢِيلِنْ دَيَكٜىٰ أَغَبَنْ غِدَنْ دَ عَكٜىٰ أَجِيٜىٰ مَتَنْ سَرْكِے دُواْمِنْ يَسَنْ لَاڢِيَرْ عٜىٰسْتَا يَكُمَجِ أَبِنْدَ يَكٜىٰ ڢَرُوَ دَ عِتَ؞ 12 كَاڢِنْ عَكَيْ كُواْوَثٜىٰ يَارِنْيَ وُرِنْ سَرْكِے أَهَسُرُسْ، بِسَغَ ڧَٰعِدَ عَكَنْ طَوْكِ شٜىٰكَرَا غُدَا ثِڢْ أَنَڠَرَنْ جِكِنْتَ؞ عَكَنْ طَوْكِ وَتَا شِدَ أَنَ شَاڢَ مَتَ مَنْ مُرْ، أَطَوْكِ وَتَا شِدَ كُمَ أَنَ شَڢَامَتَ مَنْ ڧَنْشِ؞ 13 سَعَدَّ يَارِنْيَ ذَاتَ شِغَ وُرِنْ سَرْكِے، عَكَنْ بَاتَ دُكَنْ أَبِنْدَ تَكٜىٰسُواْ دَغَ ثِكِنْ غِدَنْ دَ عَكٜىٰ أَجِيٜىٰ مَتَنْ سَرْكِے تَرِڧٜىٰ ذُوَا ثِكِنْ غِدَنْ سَرْكِے؞ 14 ذَاتَتَڢِے غِدَنْ سَرْكِے دَ يَمَّ تَكُواْمَ دَ سَڢٜىٰ ذُوَا وَنِ غِدَنْ دَ عَكٜىٰ أَجِيٜىٰ مَتَنْ سَرْكِے، وَنْدَ يَكٜىٰ أَ حَنُّنْ شَعَشْغَظْ، بَابَا نَسَرْكِے، مَيْ لُورَ دَ یَنْ مَاتَانْدَ سَرْكِے يَكٜىٰ ݣُونَ دَسُو؞ بَذَاتَ سَاكٜىٰ ذُوَا وُرِنْ سَرْكِے بَ كُمَ، سَيْدَيْ كُواْ تَغَمْشٜىٰشِ سُواْسَيْ، شِے كُمَ يَكِرَتَ دَ سُونَنْتَ؞ 15 لُواْكَثِ يَيِ دَ عٜىٰسْتَا ذَاتَ شِغَ وُرِنْ سَرْكِے؞ وَنَّنْ عٜىٰسْتَا عِتَثٜىٰ یَرْ أَبِهَيِلْ طَنْعُوَنْ بَابَنْ مُوارْدٜىٰكَيْ، وَدَّ مُوارْدٜىٰكَيْ يَطَوْكٜىٰتَ تَذَمَ یَرْسَ؞ أَ لُواْكَثِنْ كُوَ عٜىٰسْتَا بَتَاضُواْڧِ كُواْمٜىٰبَ، سَيْدَيْ تَابِے شَوَرَرْ هٜىٰغَيْ بَابَا نَسَرْكِے مَيْ لُورَ دَ غِدَنْ دَ عَكٜىٰ أَجِيٜىٰ مَتَنْ سَرْكِے؞ عٜىٰسْتَا كُوَ تَنَدَ ڢَضٍ جِنِ أَعِدُوانْ كُواْوَ؞ 16 عَكَ كَيْ عٜىٰسْتَا وُرِنْ سَرْكِے أَهَسُرُسْ أَغِدَنْسَ أَوَتَنْ غُواْمَ، وَتُواْ وَتَنْ تٜىٰبٜىٰتْ، عَثِكِنْ شٜىٰكَرَا تَبَݣَويْ تَمُلْكِنْسَ؞ 17 سَرْكِے كُوَ يَسُواْ عٜىٰسْتَا ڢِيٜىٰدَ سَوْرَنْ مَاتَا، تَا كُوَ سَامِ أَلْحٜىٰرِ دَ ڢَضٍ جِنِ دَغَ غَرٜىٰشِ ڢِيٜىٰدَ دُكَنْ سَوْرَنْ بُدُرْوَيْ؞ سَبُواْدَ حَكَ يَسَا مَتَ هُولَرْ مُلْكِ، يَمَيْدَ عِتَ سَرَوْنِيَ أَمَيْمَكُوانْ بَشْتِ؞ 18 سَيْ سَرْكِے كُوَ يَيِ بَبَّنْ بِكِ دُواْمِنْ يَغِرْمَمَ عٜىٰسْتَا؞ يَغَيَّثِ مَنْيَنْ مُتَنٜىٰنْسَ دَ دَتَّاوَنْسَ؞ يَكُمَ بَادَ هُوتُ غَ دُكَنْ يَنْكُنَنْ مُلْكِنْسَ؞ يَبَادَ ݣَوْتَيْ عَيَلْوَثٜىٰ بِسَغَ أَرْزِڧِنْ مُلْكِنْسَ؞ مُوارْدٜىٰكَيْ يَثٜىٰثِ رَنْ سَرْكِے 19 سَعَدَّ عَكَ تَتَّارَ بُدُرْوَيْ سَوْ نَبِيُ، مُوارْدٜىٰكَيْ يَنَ ظَوْنٜىٰ عَڧُواْڢَرْ غِدَنْ سَرْكِے، وَتُواْ يَذَمَ طَيَ دَغَ ثِكِنْ دَتَّاوَنْ سَرْكِے كٜىٰنَنْ؞ 20 حَرْ يَنْذُ عٜىٰسْتَا كُوَ بَتَ بَيَّنَ دَنْغِنْتَ كُواْ أَصَلِنْ مُتَنٜىٰنْتَبَ كَمَرْ يَدَّ مُوارْدٜىٰكَيْ يَعُمَرْثٜىٰتَ، غَمَا تَايِ بِيَيَّ دَ أَبِنْدَ مُوارْدٜىٰكَيْ يَڢَطَا مَتَ، كَمَرْ يَدَّ تَيِ تُنْ تَنَ ڧَرَمَ أَغِدَنْسَ؞ 21 عَݣُونَكِنْنَنْ، سَعَدَّ مُوارْدٜىٰكَيْ يَكٜىٰ ظَوْنٜىٰ عَڧُواْڢَرْ غِدَنْ سَرْكِے، سَيْ وَطَنْسُ بَابَانِّنْسَ بِيُ، مَاسُ غَادِنْ ڧُواْڢَرْ غِدَنْ سَرْكِے، وَتُواْ بِغْتَنَ دَ تٜىٰرٜىٰشْ، سُنْيِ ڢُشِے دَ سَرْكِے أَهَسُرُسْ حَرْ سُنْ شِرْيَ سُكَشٜىٰشِ؞ 22 مُوارْدٜىٰكَيْ كُوَ يَسَامِ لَابَرِنْ شِرِنْسُ، سَيْ يَڢَطَا وَ سَرَوْنِيَ عٜىٰسْتَا لَابَرِنْ؞ سَيْ عٜىٰسْتَا تَڢَطَا وَسَرْكِے، تَكُمَ نُونَ مَسَ ثٜىٰوَ مُوارْدٜىٰكَيْ نٜىٰ يَجِ؞ 23 سَعَدَّ عَكَيِ بِنْثِكٜىٰ، عَكَ غَانٜىٰ ثٜىٰوَ لَابَرِنْ مُوارْدٜىٰكَيْ غَسْكِيَ نٜىٰ؞ سَيْ عَكَ رَاتَيٜىٰ وَطَنَّنْ مُتُمْ بِيُ عَكَنْ دُواْغُوانْ كَتَكُوانْ رَاتَيَ مُتَنٜىٰ؞ سَرْكِے كُوَ يَا بَادَ عُمَرْنِ عَكَ رُبُوتَ وَنَّنْ لَابَرِ عَثِكِنْ لِتَّڢِنْ تَارِيحِ نَمُلْكٍ أَغَبَنْسَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria